Read kirikeni 2 Samụẹl 17 Bible Online

2 Samụẹl 17 - kirikeni bible

2 Samụẹl 17

¹Anị mị ḅọrọ ma ḅọlọka sịkị ḅụ, Ahitofẹl ḅe nwọse Absalọm ḅe ḅẹmẹ, “Ye à kịnị poku na oyi ẹndẹ na sẹlẹọkị owuapụ ḅụ, se mị ḍin ḅie à Devid ḅe ḍọkịmamunḅịa.

²Àrị owu se ọ̀ pakaḅịa ịnyọ nwọ ọ̀ ḅụ fa se ò kuḅie pịkị lọkọsa sịkị. Àrị ọ̀ ḅalafamaḅịa, se oria owuapụ mamgba ọ̀ ḅụ mangịsoḅịa. Amanyanaḅọ ḅe kẹngẹ anị à ḅaaḅịaye-ẹ

³anịsịkị oria owuapụ mamgba à nwọ ọkị se ḅo ị́ pịrịḅịa, eremeniḅọ pịkịma so deḅọ warị mun ọkụ mị. Gbọrịḅọ kẹngẹ anị ị́ ḅaa ḍọkịye-ẹ; kirikọn ísíapụ mamgba dein nyanaḅịa.”

⁴Mịn tetema mị anị Absalọm ḅe na pịkị Izrẹl tịḅịnị mamgba na ḅụ dein koromẹ.

⁵Absalọm ḅe nwọ ḅẹmẹ, “Mịọkụ ọ́ pịkị Hushaị ḅe na chịn, se ye wa pịkị ò ḍukoḅịa ye nwọ naa.”

⁶Hushaị ḅe ḅo lasịkị, Absalọm ḅe nwọse ọ̀ ḅẹmẹ, “Mịn anị Ahitofẹl ḅe se wa pịrị tetema-ẹ; wa anị ọkịḅe? Anịkẹ ḅẹḅẹ, ị́rị́ wa mịẹḅịa ọkụ ḍuko wa pịrị.”

⁷Hushaị ḅe nwọse Absalọm ḅe pẹkẹrẹmẹ, “Ahitofẹl ḅe mị sịkị ḅụ se ọ́ pịrị tetema mị iḅikẹ.

⁸Ị́ nemimẹ na ị́ ḍa Devid ḅe na oria owuapụma na kụrọma owusọ ḍin apụ-ẹ, ini kụrọ ḅarase awọ kun se so sa ịrọrọ chịrịḅa owoi ọkụ anị mịọkụ iniḅo sime sa ọkụ-ẹ. Ị́ ḍaḅe ọmụgbin ḍin pịkịna aka nemi owuniḅọ-ẹ, se oria owuapụma ori ini na gbọrị anga sime simekẹ ḍin ḅụ.

⁹Mịọkụ sosi ọ̀ ḅọị waraḅẹ gbọrị pokolo ḅie anịkanịka jịn nyọ ḅụ. Devid ḅe ori owu se ị́ya owuapụma paka kirikiri naaḅọ naaḅọ ḅẹḅịa, na ị́ya owuapụ mamgba ori ini ḅaasosam.

¹⁰Anịsịkị chịrịḅa ḅe ḅalafaka ọkụ se ḅalafaka kuḅie nyana owuapụma sọnị, inia ḅalafaḅịa; anịatịḅị Izrẹl mị ḅie ḅẹḅọ ḅẹḅọ nemimẹ na ị́ ḍaḅe opu owuniḅọ-ẹ, pịkị oria owuapụma sọnị kụrọma owusọ ḍin apụ-ẹ.

¹¹Ị̀ya tetema anị, ị́ bebe Izrẹl mị ḅie sime apụ mamgba nwọ chịnḅo koḅirimaḅịa; sẹ mị ḅụ gbọrị ịkọlị ọkịmun ísí ịkọlị la, tọrụaka ḅụ onwun ḅaka ọkụ mị, se ị́rị́ ḅarana ọmụkụlọ mị da ini pịrị.

¹²Devid ḅe sime anga sime anga, wa ọ̀ ḍọkịḅo se owu se ọ̀ pakaḅịa, pakarịye ma ọ̀ nwọ nemika simeogbo. Ori na oria owuapụma na ḅụ ḍumoḅịa gbọrịḅọ sọnị ofori-ẹ.

¹³Ò nemikase mangị ọḅụda mun gbọrị opuama ḅie sọmẹ ḅẹḅẹ, Izrẹl a tomoni mamgba ḍiki ọkịḅo se opuama mị jine se mun pẹsịkiri ḅie gbinḅịa. Ngịsị gbọrị ḍụparị kẹngẹ sọnị chịngịma ọgọnọ ḅụ kọn ẹkẹ.”

¹⁴Absalọm ḅe na bebe Izrẹlapụ mamgba na nwọ ḅẹmẹ, “Hushaị ḅe oria tetema mị iḅitẹịn Ahitofẹl ḅe ye mị nẹngịmẹ.” Nyanaḅọ Ḅe ọ̀ tọnpẹlẹsam na Ahitofẹl ḅe oria iḅi tetema mị ini ọkịma mịẹso sịkị fịfa ḅo Absalọm ḅe ọgọnọ gbanaḅịa ẹrẹchị.

¹⁵Anịsịkị Hushaị ḅe ḍuko agbamịẹapụ Zadọk ḅe na Abaịata ḅe na pịrịmẹ ò seni Absalọm ḅe na Izrẹl tịḅịnịma na pịrị tetema mị, pịkịna Ahitofẹl ḅe pịrị tetema mị na.

¹⁶Hushaị ḅe pịkị nwọ ḅẹmẹ, “Sarama, mịọkụ! Ómine oku seni Devid ḅe fịrịma na piri ele mị ḅie sime tọrụ mị saḅa koro nyọ mị ḅụ, ngịsị mịn ḍin ḅie ọ̀ mọnọ ma, ọkụma ò Jọdan mị saḅa, sịkị famaka ḅaraḅụ, mịẹso sịkị ini ori na oria owuapụma na kun se ini ḅaa fama ẹka ḅara.”

¹⁷Abaịata ya Jonatan ḅe na Zadọk ya Ahimeaz ḅe na Ẹnrogẹl mengi mị tịḅịju ọrụ ḅụ ini koruaḅẹ, anị Jerusalẹm mị akasịkị ḅụ, anịatịḅị ini dadama tomoni ini ọrịḅịa ḅara seni opuama mị ḅie sọḅịa ọkụ ofori-ẹ. Gbọrị fịrịnwẹngị eremenitọkụ sịkị sịkị ḅụ mun pakarịye mị ḍuko ini pịrị se ini mun ḍuko Amanyanaḅọ Devid ḅe pịrịpịrịmẹ.

¹⁸Ọkụma gbọrị ene, gbọrị owutọkụ ini ọrị se mun ḍuko Absalọm ḅe pịrịmẹ; anịẹrẹchị ini be mangị mun gbọrị owuḅọ warị ḅie ḅụ ḅọịmẹ Bahurim mị ḅie. Oria warị mị odo ḅie ḅụ gbọrị olulu ọ̀ nwọ nyanamẹ, se ini anịa ḅie koro mun simemẹ.

¹⁹Tomoniḅọ ḅe tarọ ma ye gbẹịnye ọkị, finjima se olulu mị ḅịpị gbẹịn se fịayemgbọlụ nwọse anị ọgọnọ sara wasamamẹ, mịẹse gbọrịḅọ sọnị nemiḅo ẹka ḅara.

²⁰Absalọm ḅe oria tịḅịnị fịrịnwẹngịapụma ḅo warị mị la se nwọse eremeniḅọ ma gbelamẹ, “Ahimeaz ḅe na Jonatan ḅe na ndeju ini omi.” “Ini tọrụ mị saḅamẹ,” á nwọse ini pẹkẹrẹmẹ. Owuapụma ini ḍọkịmẹ ọkụma ini ineda ini ḍọkịḅokẹ, anịẹrẹchị ini vinpịkịso Jerusalẹm mị mun mẹ.

²¹Ini so ḅọrọ-eso anị Ahimeaz ḅe na Jonatan ḅe na olulu mị ḅie pakaḅo se so mun ḅẹrẹ mị ḍuko Amanyanaḅọ Devid ḅe pịrịye-ẹ. Ahitofẹl ḅe tọn ọ̀ pịrị siye mị ini nwọ ḍuko ọ̀ pịrị se nwọse ọ̀ ḅẹmẹ, “Sarama tọrụ mị saḅa.”

²²Anị Devid ḅe na oria owuapụma na sakị Jọdan mị saḅaye-ẹ, se ene ḅa ḅịa sịkị ini mgba ini saḅa sosam.

²³Ahitofẹl ḅe ini oria tetema mị ọkịkẹ nwọ ọrị sịkị, oria yepụra asụn ḅe ọ̀ nwọ ḅụkụlọ se so oria ama mị mun mẹ. Ori oria warị tọn fama so sịkị, ori ọ̀ ḅụ kpọḅaamẹ. Se furo iḍupu mị ḅie ini ò ḍipimẹ.

²⁴Absalọm ḅe na Izrẹlapụma na Jọdan mị saḅakoro sịkị Devid ḅe ò ḅo Mahaneim ama mị lasam.

²⁵(Absalọm ḅe Amasa ḅe seni ọmụtịḅịdaḅọ mịẹmẹ, se Joab ḅe kiriḍinma ḅụ. Amasa ḅe anị Jẹta Ishmẹlḅọ ḅe yayo-ẹ; nyọngọrọma anị Abigẹl ma-ẹ, Nahash ḅe ḅarọma, anị Joab nyengi Zẹruaya ma nụmbụrarọ ma-ẹ.)

²⁶Absalọm ḅe na oria owuapụma na Giledị ama mị ḅie ini ikowarị pike se simemẹ.

²⁷Devid ḅe ḅo Mahaneim mị lasịkị, Nahash ya Shobaị ḅe ḅo ori na ịrịamẹ Amọn sẹ mị ḅie, Raba opuama mị ḅie ò ḅomẹ, pịkị Meka Amịẹl ya Lodiba ḅie ḅo ḅọ ḅe na, pịkị Bazilaị, Giledị ḅie sime Rogẹlim ḅie ḅo ḅọ ḅe na.

²⁸Ini ye fị-a bọlị na, arama ḅẹlẹ na, mọnọye gbẹịn aye na, pịkị fịaye na, fịturu mịẹ ịpịamgba na, irumịẹ chịnmgbọlụ na, ini iḅiọkụma gbẹịn dẹkịdẹkịmaka fịayemgbọlụ na, fọịsa fịayemgbọlụ na, akịdị na, obe na, ḅẹịn na, kpo sa ndo mengi na, ndo mengi ḅie ḅẹlẹkị na, pịkị tọn-a anana na, nwọse ḅo Devid ḅe na oria owuapụma na pịrịmẹ ini fị. Anịatịḅị ini nemimẹ na Devid ḅe na oria owuapụma na ḅuru na mengi na iḅiọkụma ini tarịḅịa, ịnyọ pịkị iniaḅụfaḅịa piri ele mị ḅie.