Read kirikeni 2 Samụẹl 18 Bible Online

2 Samụẹl 18 - kirikeni bible

2 Samụẹl 18

¹Amanyanaḅọ Devid ḅe oria owuapụma ọkịḅo koḅirima, se ini ḍiema mẹndẹ oyiasi fịnjị kpo kpo ḅụ pịkị na sọnọasi kpo kpo ḅụ na wẹrịmẹ, se ọmụ kụlọnị tọn se ini pịrịmẹ.

²Anịsịkị ori ini fịrịma pakụmamẹ tẹrẹ-a kpo ḅụ, se Joab ḅe na numbireowu Abishaị ḅe na, pịkị Ịtaị ḅe na anị Gatḅọ ḅe, iniaḅụ ḅọḅọ gbọrị kpo ḅụ tịḅịdamẹ. Se amanyanaḅọ ḅe nwọse oria owuapụma ḅẹmẹ, “À ḅarana ómine na ọmụ mị munḅịa.”

³Ini nwọse ọ̀ pẹkẹrẹmẹ, “Ị́ mine na mun-ẹkẹ.” “Tarakapụ ma ḅụ anị gbọrịye sọ sọẹkẹ wa nemikase mangị so ọkụma, mịnaḅụ gbọrị pẹkẹrẹ ini nwọ ḅaamẹ ḅe sọnị, anị inia ḅụ yesọẹkẹ; ọkụma ị́ yelatẹịn mịnaḅụ kịnị poku na sọnọ ẹndẹ na nẹngịmẹ. Anịgose anị iḅitẹịnḅịa ị́ mịju opuama mị ḅie sime seni ḅarachụa se wa fịrịma.”

⁴“Ómine ma koroma ḅo na iḅitẹịnmẹ nwọḅẹye goyegoye à mịẹḅịa,” amanyanaḅọ ḅe ọkọse ini pẹkẹrẹmẹ. Anịsịkị ori ama mị onu ḅọkọ ḅụ chịẹ simemẹ, oria owuapụma nwẹngị pakamun-arị sịkị, kịnị-a mẹndẹ oyiasi fịnjị kpo ma na, kịnị-a sọnọasi kpo ma na.

⁵Ọ̀ tọn Joab ḅe na, Abishaị ḅe na, pịkị Ịtaị ḅe na pịrị ḅụ nwọ ḅẹmẹ, “Ị̀rị̀ gose ó yese Absalọm asẹmẹnị tọkụ ḅe lamama.” Se bebe owuni kpo mamgba mịn Devid ḅe kọn oria ọmụtịḅịda apụma pịrị ọkwẹịn mị naamẹ.

⁶Devid ọmụogbo mị pakaso mun sẹ mị ḅụ sikima se Izrẹlapụma na owusọmẹ Ifrem piri mị ḅieḅụ.

⁷Devid owuapụma Izrẹlapụma nẹngịmamẹ, anị ḅalafamamẹ ini se ini nẹngịma ḅara mị, anị ene ḅụ kịnị mama poku na oyi ẹndẹ na ini nwọ ḅaamẹ.

⁸Ọmụ mị wasama mun sẹ mị ḅụ ịkọlị ịkọlị ma lamẹ; se piri mị ḅie fịapụ ḅakatẹịn ọmụ mị ḅie ini ḅaa apụ nẹngịmẹ.

⁹Bẹkẹma ḅaraḅụ Absalọm ḅe ḅo Devid owuapụma ḅụ dapụ na ịrịamẹ. Absalọm ḅe asụn ọ̀ nwọse nwẹngịaḅẹ, se asụn ḅe gbọrị kuru chịn chuku ḅie toluḅọrọarịogbo Absalọm ḅe ọ̀ tịḅị inime ma kuru chịn ịkpangị mị ḅụ fangalamamẹ. Asụn ḅe mangị somẹ se Absalọm ḅe wẹrịso se ò sololo simemẹ, so na kiri na ogboku.

¹⁰Devid owuapụma ḅie gbọrịḅọ ori ọrị se mun ḍuko Joab ḅe pịrị se nwọḅẹmẹ, “Ị̀ nyanaḅọ, àrị Absalọm ḅe ọrịmẹ ọ̀ sụka sime waraḅẹ gbọrị kuru chịn ḅụ.”

¹¹Joab ḅe nwọse ọ̀ pẹkẹrẹmẹ, “Ọkọsime ḅara ị́ nwọse ori ọrị ọkụma, cheye gose ị́ ọ̀ ḅaaka anị gbọrị kirikiri? Mgbọkụ à seleḅa oyi-a okpokpo na ḅirikunye na se ị́ pịrịḅịa.”

¹²Ọkụma tomoniḅọ ḅe nwọse Joab ḅe pẹkẹrẹmẹ, “Ị́ nemikase seleḅa okpokpo-a mẹndẹ oyiasi fịnjị seni ị̀ pịrịḅịa nwọḅẹ sọnị, àrị ị̀ ḅara se amanyanaḅọ tọkụ ḅe lama ẹkẹ. Mine mgba naamẹ amanyanaḅọ ḅe tọn ị́rị́ na Abishaị ḅe na pịkị Ịtaị ḅe na pịrịmẹ na, ‘Ị̀rị̀ gose asẹmẹnị tọkụ Absalọm ḅe ó ye seni ọ̀ lamama.’

¹³À kọkọma nemikase amanyanaḅọ ḅe ḅịpịpokika se Absalọm ḅe ḅaa ọkụma, amanyanaḅọ ḅe ọ̀ naaḅịa—yegoyegoye ọ̀ naanaamẹ—anịsịkị ị́ ị̀ ḅịpị pẹkẹrẹ se ị̀ ḍụaẹkẹ.”

¹⁴“À ḅarị sịkị fama ị́rị́ na gbọrịye sọnị ḍuko ẹkẹ,” Joab ḅe ọkọse ọ̀ ḅẹmẹ. Tẹrẹ-a angwa ọ̀ nwọ ọkị seni mun Absalọm ḅe ekpe ḅụ temichumẹ, ma ọ̀ fị̀ka simeogbo, kuru chịn mị ḅụ ò sololo sime nyọ ḅụ.

¹⁵Anịsịkị Joab owunima ḅụ oyi owuni kpeki ma mun se Absalọm ḅe ḅaa koromamẹ.

¹⁶Anị Joab ḅe oḍu mị ofuro owu mị dachịẹmaye-ẹ, se oria owunima pịkịmaḅo se ḅarị Izrẹlapụma ḍukokẹ.

¹⁷Ini Absalọm ḅe oju mị ọkị se gbọrị gbun olulu ḅie gbin, se ḍụparịma tan anị gbẹịn tundurumamẹ piri mị ḅieḅụ. Izrẹlapụ mamgba mangịmẹ, se ḅọḅọ so nụḅọ ama mun mẹ.

¹⁸Absalọm ḅe oria ḍumo sịkị ḅụ gbọrị lụgụ ọ̀ nwọ tẹmẹ koroma ọ̀ ḅụ pịrịmẹ Amanyanaḅọ Pẹsịkiri mị ḅieḅụ, anịatịḅị ori ẹrẹ somaḅịa owutọkụ ọ̀ nwọ nyanakẹ. Anịẹrẹchị ori anị seni ọ̀ ḅụ korumẹ, se ọkịḅo mịmgba la sọnị Absalọm Lụgụ ini nwọse anị chịnchịnmẹ.

¹⁹Anịsịkị Ahimeaz, Zadọk yaḅe nwọse Joab ḅe ḅẹmẹ, “Ye à mangị mun iḅi ḅẹrẹ mị ḍuko amanyanaḅọ ḅe pịrị na Nyanaḅọ Ḅe ori na tarakapụma ḅara ḅie ori ọ̀ ḍụaḅọrọmasam.”

²⁰Joab ḅe nwọse ọ̀ ḅẹmẹ, “Ẹn-ẹn,” “mịmgba mun gbọrị iḅi ḅẹrẹ sọnị ḍukoma. Jịn ene lasịkị ị́ ineda munḅịa ọkụma mịmgba anịkẹ, anịatịḅị amanyanaḅọ tọkụ ḅe ọ̀ fị̀sam.”

²¹Anịsịkị ọ̀ nwọse oria omoniḅọ Sudan ḅọḅe ḅẹmẹ, “Mun ị́ ọrịye ḍuko se amanyanaḅọ ḅe pịrị.” Omoniḅọ ḅe ọ̀ tịḅịtu se sakị mangị ma mun mẹ.

²²Ahimeaz ḅe pa ịgbanịaḅẹ, “À pakaḅịaye abalakẹ; sisi ye ị̀rị̀ sọnị à mangị mun ḅẹrẹ mị ḍuko.” “Cheye ẹrẹchị ị́ mun ḍọkị-ao ị̀ya tọkụ?” Joab ḅe ò gbelamẹ. “Ị́ anịa ḅụ iḅi gbẹịnye nyana ẹkẹ.”

²³Ahimeaz ḅe pịkịna nwọ ḅẹmẹ, “Anị sime ọkụ sime ọkụ sọnị,” “à mun ḅimẹ.” Joab ḅe nwọse ọ̀ ḅẹmẹ, “Anịọkụma mun.” Anịẹrẹchị Ahimeaz ḅe Jọdan Pẹsịkiri mị ḅieḅụ mangị ideri koro mun sịkị famaka ḅaraḅụ omoniḅọ ḅe ḅọrọmẹ.

²⁴Devid ḅe opuama mị tọrọkọ ḅọkọ mị na ḅieju ḅọkọ mị na ogboku ḅụ ọ̀ kpọnjị sime waraḅẹ. Nyọ koruḅọ ḅe kpọlị mun onu mị ọgọnọju la se ateli da ḅọkọ mị ochu ọgọnọ chịẹsimemẹ; ọ̀ tọrọkọju ḍiki se gbọrị mangị ma ḅoarị owuḅọ nwọ ọrịmẹ.

²⁵Ò koroḅo se ḍuko amanyanaḅọ ḅe pịrịmẹ, se amanyanaḅọ ḅe nwọ ḅẹmẹ, “Ori ngẹrị-ẹ ḅẹḅẹ ori iḅi ḅẹrẹ se ḅoaḅẹ.” Mangịarị ḅọ ḅe ḅo kpeki mẹ.

²⁶Se nyọ koruḅọ ḅe pịkị jịn ngẹrị mangị ma ḅoarịḅọ nwọ ọrịmẹ, se ò ḅo ḍuko ḅọkọ koruḅọ ḅe pịrịmẹ, “Ḍiki! Jụmḅọ pịkị mangị ma ḅoaḅẹ!” Amanyanaḅọ ḅe nwọse ọ̀ pẹkẹrẹmẹ, “Ḅe ḅọ ḅe sọnị ori iḅi ḅẹrẹ se ḅoaḅẹ.”

²⁷Nyọ koruḅọ ḅe nwọ ḅẹmẹ, “Àrị ọrị ḅara, tatarị ḅọḅe oria mangị ḅụọ mị Ahimeaz ḅe kịkẹmẹ.” Amanyanaḅọ ḅe nwọ ḅẹmẹ, “Ori anị iḅi tomoniḅọ-ẹ,” “ọ̀ pịkị iḅi ḅẹrẹ se ḅoaḅẹ.”

²⁸Ahimeaz ḅe ḅo amanyanaḅọ ḅe kereni, pịkị ọ̀ ḅụ se chama kiri gbinmẹ ọ̀ tọrọkọ ḅụ, se nwọ ḅẹmẹ, “Tokoni se Nyanaḅọ ị́ Tamụnọ Ḅe pịrị, anị ọmụḅaraiḅi se ị́ pịrị, seni nyana ḅereni Ị́rị́ Amanyanaḅọ ḅe pịrị ḍụkụka apụma nwọ nẹngịma ḅọ ḅe!”

²⁹Amanyanaḅọ ḅe nwọse ò gbelamẹ, “Asẹmẹnị tọkụ Absalọm ḅe ye ọ̀ laka?” Ahimeaz ḅe nwọse ọ̀ pẹkẹrẹmẹ, “Ị̀ nyanaḅọ, ị́ya owuni tịḅịnịḅọ Joab ḅe ị̀ fịrịma sịkị ḅụ, nyọ opuma fie ḅara à nwọ ọrịmẹ, ọkụma anị gose ọkọ mịẹye àrị ineda ḍuko ẹkẹ.”

³⁰Amanyanaḅọ ḅe nwọse ọ̀ ḅẹmẹ, “Mun anịju ḅụ chịẹsime,” se ọ̀ ḅọrọ mun gbọrị anga ḅụ chịẹsimemẹ.

³¹Anịeso Sudan omoniḅọ ḅe ḅo lamẹ, se nwọse amanyanaḅọ ḅe ḅẹmẹ, “Àrị iḅi ḅẹrẹ se ḅo Ị́rị́ Amanyanaḅọ ḅe pịrị-ẹḅomẹ! Mịmgba Nyanaḅọ Ḅe ọ̀ mịẹ sarasarama ị́ pịrịse nyana ḅereni ị́ pịrị ḍụkụka apụ mamgba ị́ nwọ nẹngịmasam!”

³²Amanyanaḅọ ḅe nwọse ò gbelamẹ, “Asẹmẹnị tọkụ Absalọm ḅe ye ọ̀ laka?” Omoniḅọ ḅe nwọse ọ̀ pẹkẹrẹmẹ, “Ye ori asẹmẹnị tọkụ ḅe ḅụ pakaye mị, ọkọ paka ị́rị́ na tarakapụ mamgba pịrị, ị̀ nyanaḅọ, pịkị nyana ḅereni ị́ pịrị ḍụkụka apụ mamgba na.”

³³Amanyanaḅọ ḅe opu kururu ḅo ò ḅie sọmẹ. Ọ̀ kpọlị iwo mun ateli daḅọkọ mị ọgọnọju sime ḅie mị sọ se owumẹ. Ò mun-arị sịkị ori owuaḅẹ, “Yei, ị̀ya tọkụ! Ị̀ya tọkụ Absalọm! Absalọm, ị̀ya tọkụ! Mgbọkụ ị̀rị̀ ị́ tịḅị ḍinma se fị̀saka, ị̀ya tọkụ! Absalọm, ị̀ya tọkụ!”