Read kirikeni 2 Samụẹl 2 Bible Online

2 Samụẹl 2 - kirikeni bible

2 Samụẹl 2

¹Mịn mị ḅo ḅọrọsịkị, Devid ḅe Nyanaḅọ Ḅe gbelamẹ, “Juda amama ḅụ à mun gbọrị ama ḍikiḍiki?” Nyanaḅọ Ḅe nwọ pẹkẹrẹmẹ, “Iin.” Devid ḅe nwọ gbelamẹ, “Nde ama?” “Hibrọn mị-ẹ,” Nyanaḅọ Ḅe nwọ ḅẹmẹ.

²Anịẹrẹchị Devid ḅe so Hibrọn mị mun mẹ, oria mama eremeni ma ọ̀ nwọse chụa mun mẹ: Ahinoam, Jezriẹlḅọ ma na, pịkị Abigẹl anị fịsa Nebal ḅe ta Kamẹlḅọ ma na.

³Ọ̀ pịkị oria owuapụma na inia furoma na se chụa mun mẹ, se ini mun Hibrọn mị kelema amama ḅie angamẹ.

⁴Anịsịkị Juda owuapụma Hibrọn mị ḅo se pulo seni Devid ḅe tịḅịsaramẹ, se ò se Juda amanyanaḅọ mịẹmẹ. Giledị mị ḅie sime Jebẹsh apụma Sọl ḅe ḍipimẹ nwọḅẹye mị Devid ḅe nwọ naa sịkị,

⁵ori okumun-apụ se ini fịrịma se nwọ ḅẹmẹ: “Ye Nyanaḅọ Ḅe ọ́ ḅẹlẹma ọ́ nyana ḅereni ọ́mịna amanyanaḅọ ḅe pịrị se ò ḍipiye gose.

⁶Ye Nyanaḅọ Ḅe mịọkụ iḅi se ọ́ mịẹ pịkị kuḅie se ḅụgbana gbẹịnḅọ sọ ọ́ pịrị. Ị̀rị̀ sọnị àrị iḅianga se ómine na kọnḅịa ọ́ mịẹye mị gose.

⁷Ómine ịnyọchụa pịkị kụrọkuḅie nyana! Sọl ọ́mịna amanyanaḅọ ḅe ọ̀ fịsam, se Juda apụma pịkị pulo seni ị̀ tịḅịsarasam inia amanyanaḅọ ḅaraḅụ.”

⁸Sọl ọmụogbo tịḅịnịḅọ Abna, Na yaḅe, ọ̀ Sọl ḅe yayo Ish-Boshẹt ḅe na mangị Jọdan mị saḅa koro Mahaneim mị mun mẹ.

⁹Anịju ḅụ Abna ḅe Ish-Boshẹt ḅe se amanyanaḅọ mịẹse Giledị mị na, Asha mị na, Jezriẹl mị na, Ifrem mị na, Bẹnjamin mị na, pịkị bebe Izrẹl mị mgba na pịrịmẹ.

¹⁰Kụra mesi ọ̀ nwọ lasam ini ò se Izrẹl amanyanaḅọ mịẹ sịkị, se mama kụra ọ̀ nwọse amadamẹ. Ọkụma Juda furo mị anị nyana ḅereni Devid ḅe pịrịmẹ,

¹¹Hibrọn mị ḅie ḅụ ò sime ḅẹrẹtọn Juda mị pịrị mun sọnọma kụra na pẹkẹrẹ lamẹ.

¹²Abna ḅe na Ish-Boshẹt fịrịnwẹngịapụma na Mahaneim mị ḅie ḅụ so Gibiọn opuama mị mun mẹ.

¹³Joab, Zẹruaya ma yayo ḅe na, pịkị Devid ḅe oria fịrịnwẹngịapụma na mun ini na ịrịamẹ Gibiọn ḍapa mị aka ḅụ ini kpọnjị simemẹ, gbọrị kpo gbọrị pẹkẹrẹ ḅụ simemẹ ḍapa mị aka ḅụ; ísí kpo ísí pẹkẹrẹ ḅụ ini na damadama ma simemẹ.

¹⁴Abna ḅe nwọse Joab ḅe ḅẹmẹ, “Ye wa asẹmẹnị ma ḅụ nweni ọkị gbọrị pẹkẹrẹ gbọrị pẹkẹrẹ ḅụ se ini ḅẹrẹpikia ọmụgbin.” Joab ḅe nwọ pẹkẹrẹmẹ, “Iḅimẹ.”

¹⁵Anịẹrẹchị oyimaịn owuapụ fịnjị, Ish-Boshẹt ḅe na Bẹnjamin sẹ mị na ẹrẹ ḅụ, Devid ḅe oria oyimaịn owuapụ fịnjịma na owusọmẹ.

¹⁶Ọrụḅọḅọ nụḅọ na sọ ḅọ tịḅị gbogbo pịkị nụḅọ okola-agiji mị se nụḅọ na sọḅọ ḅe agaga temi chumẹ, mị ḅaraḅụ ini si-inein-apụ fịnjị mamgba sokoro fị kiri ḅọlọlọmẹ. Anịẹrẹchị Gibiọn mị ḅie ḅụ anịju mị ini nwọse anị chịnmẹ “Okola-agiji Ele.”

¹⁷Anị mị ḅọrọ se so, kụrọ ọmụ koromẹ, se Devid ḅe oria owuapụma Abna ḅe na Izrẹl mị na nẹngịmamẹ.

¹⁸Zẹruaya ma árịa tẹrẹ-a owuapụ awọma sọnị anịju ḅụ ini omi-ẹ; Joab ḅe na, Abishaị ḅe na, pịkị Asahẹl ḅe na. Asahẹl ḅe anị piri ḅie tụḅụra mangị ọkụ mangịarịḅọ ḅe,

¹⁹sakị Abna ḅe ḍukomẹ, se mangị dada ọ̀ damamun-aḅẹ.

²⁰Abna ḅe tọrụ pịkị ọḅụḍiki se nwọse ọ̀ ḅẹmẹ, “Anị ḅọ ị́rị́, Asahẹl?” Ọ̀ nwọ pẹkẹrẹmẹ, “Iin ị̀rị̀-ẹ.”

²¹“Ḅarị ị̀ ḍukoma!” Abna ḅe nwọse ọ̀ ḅẹmẹ. “Owuni ma ḅie gbọrịḅọ ḍuko se oriaye ma ọkị.” Ọkụma Asahẹl ḅe ọ̀ pa ò ḍukoaḅẹ.

²²Abna ḅe pịkị gbọrị sịkị na nwọse ọ̀ ḅẹmẹ, “Ḅarị ị̀ ḍukoma! Cheye ẹrẹchị àrị ị́ ḅaa mị ị́ nwọse ị̀ ḅụ fụkama-ao? Che tọrụ à nwọse ị́ mbire Joab ḅe ḍikiḅe?”

²³Ọkụma Asahẹl ḅe ò sokẹ; ọ̀ pa ò ḍukoaḅẹ, anị Abna ḅe ọḅụju ḅụ wẹrị oria angwa mị se ọ̀ ḅụlọ ḅụ ò gbinye-ẹ; se angwa mị mun ò kokuogbo tolupakamẹ. Asahẹl ḅe ò sokoro kiri koro se fịmẹ, ḅo ọ̀ ḅọlọlọ sime nyọ mị la ḅọ goyegoye anịju ḅụ dachịẹ se chịẹmẹ.

²⁴Ọkụma Joab ḅe na Abishaị ḅe na sakị Abna ḅe ḍuko nweni ịrụa mị ḅo tumaḅịa sịkị ini ḅo Ama chịngị mị lamẹ, anị Gaịya mị ḅụ ịrụapakapaka nyọ daọrụ mị ḅụ Gibiọn piri ele ateli mị mun-arị nyọ mị.

²⁵Bẹnjamin sẹ mị ḅie owuapụma Abna ḅe gbori kelema se gbọrị chịngị ọgọnọju ḅụ inia ḅụkarakarama chịẹsimemẹ.

²⁶Abna ḅe Joab ḅe chịn oloku se nwọ ḅẹmẹ, “Wa owusọ ḅụ sime gbasoḅe? Ị́ ọrịka na anịḅe kuluma wa gbọrị sọye sọ nyanakẹ ḅụakụ sikima ọkụma? Mine na ómine na gbọrị sẹ ḅe apụ-ẹ. Anị mun nde sịkị lasịkị re ị́ya tomonima ị́ nwọḅẹ ḅe na ini ḅarị wa ḍuko ma-ẹ?”

²⁷“À ḍumo gbaso Tamụnọ Ḅe karịfịmẹ,” Joab ḅe nwọse ọ̀ pẹkẹrẹmẹ, “na ị́ nemikase ọkwẹịnka ọkụma mgbọkụ ị̀ya tomonima ini ị́ ḍuko nweni ọkịmun ḅa dede ḅie laḅịa.”

²⁸Anịsịkị Joab ḅe oḍu mị ofuromẹ se elekima mịẹ oria tomonima pịrịmẹ na ini dachịẹ Izrẹlapụma ḍukoḅụ; anịẹrẹchị owu mị ḅo dachịẹmẹ.

²⁹Abna ḅe na oria tomonima na anị ḍin mị ḅie Jọdan Pẹsịkiri mị ḅie ḅụ nwẹngị ḅọrọ somẹ, ini Jọdan Tọrụ mị saḅamẹ se anị eneḅa dede mị mgba ini nwọse so mun Mahaneim mị lamẹ.

³⁰Joab ḅe ḅarị ini ḍukoka sịkị, oria owuapụ mamgba ò koḅirimẹ se ḍọkịḅo ọrịmẹ na gbọrịye fa si-a tomoni iniaḅie ḅụ fasam, Asahẹl ḅe se chụa kịẹn ọkụma.

³¹Devid ḅe oria owuapụma kịnị-a mesi ofori kịnị ẹndẹ nwọ ḅaamẹ, Abna ḅe oria owuapụma ḅụ Bẹnjamin sẹ mị ḅie ḅụ.

³²Joab ḅe na oria owuapụma na Asahẹl ḅe oju mị ọkị se mun inia furo iḍupu mị ḅie ḍipimẹ Bẹtlihẹm mị ḅie. Anịsịkị bebe ḍin mị mgba ini nwọse nwẹngị se eneḅa ḅụ ḅo Hibrọn mị lamẹ.