Read kirikeni 2 Samụẹl 22 Bible Online

2 Samụẹl 22 - kirikeni bible

2 Samụẹl 22

¹Devid ḅe ọkwẹịn ḅụ mịn nime mị chu Nyanaḅọ Ḅe pịrịmẹ, Nyanaḅọ Ḅe Sọl ḅe ḅara ḅie Devid ḅe ḍụaḅọrọmaḅo, pịkị ori na tarakapụma na ḅara ḅie.

²Nyanaḅọ Ḅe anị ị̀ya agbọ-ẹ; ori ị̀ya kụrọ owuni warị-ẹ.

³Ị̀ Tamụnọ Ḅe ị̀ya ḅụḅọịnyọ-ẹ, ọ̀ ḅụ ị̀ laḅịaye ofori-ẹ Ori agbọ ḅara nwọse ị̀ kikimamẹ; ori owusọ ị̀ pịrịmẹ se ị̀ laye ofori-ẹ. Ori anị ị̀ ḍụaḅọrọmaḅọ ḅe-ẹ; ori ị̀ gbẹịnmẹ yese nweni lamalama yema ḅaraḅie ọ̀ pịkị ị̀ ḍụamẹ.

⁴À Nyanaḅọ Ḅe chịnmẹ, se ị̀rị̀ na tarakapụma ḅara ḅie ori ị̀ ḍụamẹ. Nyanaḅọ Ḅe Tokoni!

⁵Fị ambura mamgba ị̀ kelemamẹ; nweni ḅaaḅaa ambura ma ị̀ya ọgọnọ mbimbile mbimbile ḅọrọmẹ.

⁶Fị mị ḅe ḅalafa ị̀ kelemamẹ; iḍupu mị pịkị anịa ḍẹịn tu ị̀ pịrịmẹ.

⁷Ị̀ya ḅụfụka ḅie à Nyanaḅọ Ḅe chịn olokumẹ; àrị ị̀ Tamụnọ Ḅe chịn olokumẹ ḅarachụa gose. Oria Oputẹkẹwarị mị ḅie ori ị̀ pụkọ naamẹ; ị̀ya ḅarachụa ḅi owu mị ọ̀ naamẹ.

⁸Anịsịkị sẹkiri mị ḅalafa se jikemẹ; so mị sẹkẹ ḍụparịma jike amaḅara na ereḅara na da se geregeremẹ ḅalafaḅụ anịatịḅị Tamụnọ Ḅe ori ịganịmẹ!

⁹Onwoin ò niniḅie kan pakamẹ, yedọkịma fịnị ḅẹlẹ na kọrịarị anyị mgbọlụ na ọ̀ ḅịpị ḅie pakaḅomẹ.

¹⁰Ò so mị kan finji se koroḅomẹ, ọ̀ ḅụọ chuku sime kanakana so oḅuto ma na.

¹¹Oria enjẹlapụma ọgọnọ ò vuma finḅọrọmẹ; fọrụ-a pamba ma ọgọnọ ọ̀ nwẹngịmẹ.

¹²Ọ̀ kanakana se ọ̀ ḅụ gbẹịnmẹ; irisi fọrụ na ene na ọ̀ gbẹịn kelemamẹ;

¹³kọrịarị anyị mgbọlụ fịnị ḅẹlẹ ọ̀ tọrọkọ sime soalagba mị ḅie ḅụ pakamẹ.

¹⁴Anịsịkị Nyanaḅọ Ḅe sotọrụ ḅụ ò soalagba tẹịnmẹ, se Kụrọmamgba Nyana Tamụnọ Ḅe pụkọ mị nweni nwọ naamẹ.

¹⁵Ori oria ḍẹịn ma tẹịn se ori na tarakapụma galagalamamẹ; soalagba wakam inia tọrụ sọ ḅụ ori ini mịẹse ini mangịmẹ.

¹⁶Abaji mị chukuḅie kiri mị ḅụpakụmamẹ, sẹkiri mị anịa chuku sẹkẹ ayema àrị ḅụpakụmamẹ anị Nyanaḅọ Ḅe ịganị ori na tarakapụma pịrị pịkị yeḅụosọ ḅụ ekerea ini pịrị sịkị ḅụ.

¹⁷Nyanaḅọ Ḅe ọgọnọju ḅụ koroḅo se ị̀ ọlọmẹ; ori ị̀ jine pakụmamẹ gbun mengi ma ḅie.

¹⁸Ori ị̀ ḍụaḅọrọmamẹ ị̀rị̀na-taraka kụrọapụ ma ḅaraḅie pịkị ị̀ ḍikiḅụnwọnwọ apụ mamgba na ḅaraḅie— ị̀ ḅụḅụ ini opuma kụrọmẹ.

¹⁹À ḅụfụka ḅie sime sịkị ini owu se ị̀ pakamẹ, ọkụma Nyanaḅọ Ḅe ị̀ gbẹịnmẹ.

²⁰Ọ̀ ḅarachụa ị̀ pịrị se à ḅụfụka ḅie pakaḅomẹ; ori ị̀ ḍụamẹ anịatịḅị ị̀ya mịẹmịẹye ọ̀ ḅụḅẹlẹmẹ.

²¹Nyanaḅọ Ḅe gbẹịnye se ị̀ pịrịmẹ anịatịḅị à karakaraye mịẹmẹ; ori ị̀ ḅẹlẹmamẹ anịatịḅị à mịẹirima nyanakẹ.

²²Nyanaḅọ Ḅe olokoma à kokomẹ; ị̀ Tamụnọ Ḅe ḅụ à ḅụ sinkẹ.

²³Oloko mamgba à kwein tọrụ se àrị ḍikimẹ; à kụrọtịḅịḅie chụa oria olokoma pịrịkẹ.

²⁴Ò nemimẹ na si ị̀ ḅụ ofori-ẹ, à pịkị mịẹirimaye ḅụ ị̀ ḅụ sinmẹ.

²⁵Anịẹrẹchị ọ̀ gbẹịnye se ị̀ pịrịmẹ anịatịḅị à karakaraye mịẹmẹ, anịatịḅị ò nemimẹ na à mịẹirima nyanakẹ.

²⁶Yei Nyanaḅọ, ị́ ḅereniapụma ị́ ini ḅerenimẹ, pịkị ịlọlị ḅụ ofori iḅi apụma ị́ pịkị iḅi se ini mịẹmịẹmẹ.

²⁷Ịlọlị ḅụ oforikapụ ma ịlọlị ḅụ oforika ḅara ị́ nwọse ini na angamẹ, ọkụma sitịḅịnyanapụma si ḅara ị́ nwọse ini na angamẹ.

²⁸Ḅụ iderimapụma ị́ ini ḍụamẹ, ọkụma ḅụdekichịẹma apụma ị́ ini iderimamẹ.

²⁹Nyanaḅọ, Ị́rị́, ị̀ya enekuḅu-ẹ; ị́ ị̀ya kanakana mị desinmẹ.

³⁰Ị́ ịnyọ na kụrọ na se ị̀ pịrịmẹ à se owu se ị̀rị̀ na tarakapụma paka pịkị ini nẹngịmamẹ.

³¹Ḅe Tamụnọ Ḅe—oria fịrịma kpaịn ọkụ ḍiki, oria ọkwẹịn ḅụ sẹrẹrẹ mị opuma iḅimẹ! Ori agbọ sọ se ò chuku ḅie ḅọị apụ mamgba pịrịmẹ.

³²Nyanaḅọ Ḅe ngẹrị anị Tamụnọ-ẹ; Tamụnọ Ḅe ngẹrị anị mịna ḍụaḅọ-ẹ.

³³Ḅe Tamụnọ Ḅe ị̀ya kụrọḅụ-ḅọịnyọ-ẹ; ori ị̀ya atelima karakarama kpaịnmamẹ.

³⁴Ọ̀ mịẹmẹ tụḅụra mangị ọkụ à nwọse ị̀ ḅụọma ḅụ kụrọ kuḅie nyanamẹ; ọ̀ mịẹmẹ tụndụma ọgọnọ ye ị̀ lakẹ.

³⁵Ọmụgbin ḅara ọ̀ nwọse ị̀ telimamẹ, mịẹsosịkị àrị ineda kụrọtẹịn lubu mị se fịrịnwẹngịḅịa ḅara.

³⁶Yei Nyanaḅọ, ị́ ị̀ gbẹịnmẹ ị́ pịkị ị̀ ḍụamẹ; ị́ya ḅarachụa mị ị̀ mịẹse àrị opusọsam.

³⁷Ị́ mịẹmẹ ini kụrọ ḅara se ị̀ kun sokẹ, ma à pịkị ngịsị ḅịkịkẹ.

³⁸Àrị ị̀rị̀na-tarakapụ ma ḍuko mẹ se ini nẹngịmamẹ; à dachịẹ nyanakẹ àrị ini ḅaafamaka simeogbo.

³⁹Àrị ini fomu gbinmẹ, ini pịkị ineda sịsẹkẹ; ọmụ ḅara sisapụ ḅọlọlọ ị̀ tọrọkọ ini nwọ kọnmẹ.

⁴⁰Ọmụ ḅie ị́ ịnyọ se ị̀ pịrịmẹ ị́ pịkị mịẹmẹ àrị ị̀rị̀na-tarakapụ ma nẹngịmamẹ.

⁴¹Ị́ mịẹmẹ ị̀rị̀na-tarakapụ ma ị̀ ḅụ ḅụ mangịsomẹ; ị̀ ḍikiḅụnwọnwọ apụma àrị ini ḅaamẹ.

⁴²Ini ḅarachụa ḅimẹ, ọkụma ini ḍụaḅọ ofori-ẹ; ini Nyanaḅọ Ḅe chịn owu mẹ, ọkụma ori ini pẹkẹrẹkẹ.

⁴³Àrị ini gbẹịn dẹkịdẹkịmamẹ, se ini ḅo fọn kịkẹmẹ; ateliogbo ḅụ aḅaịn nanga ọkụ à nwọse ini nangamẹ.

⁴⁴Nyana ḅereni ị̀ pịrịkapụ ma ḅaraḅie ị́ ị̀ ḍụamẹ ị́ pịkị mịẹmẹ ị̀ya ḅẹrẹtọn mị sẹ mamgba kelemamẹ; ma à nemikapụ mịọkụ ḅo ị̀ chuku ḅie sime ị̀ya tomoni sọsam.

⁴⁵Jịn sẹ apụ tịḅịtu ị̀ pịrịmẹ; àrị ọkwẹịn sịkị ini ị̀ ḅịpị pokimẹ.

⁴⁶Kụrọ kuḅie iniaḅụ famẹ se ḅụgeregere ḅụ ini inia owuni-a kụrọ warịma ḅie pakaḅomẹ.

⁴⁷Nyanaḅọ Ḅe ò ḍumomẹ! Ị̀ya ḍụaḅọrọmaḅọ ḅe boma! Ị̀ ḍụaḅọrọma Kụrọ Tamụnọ Ḅe opu mị ḍuko pakụma!

⁴⁸Ọ̀ mịẹse àrị ị̀rị̀na-tarakapụ ma nẹngịmamẹ; ọ̀ pịkị mịẹmẹ sẹma à ḅẹrẹtọn àrị pịrịmẹ

⁴⁹ọ̀ pịkị ị̀rị̀na-tarakapụ ḅie ị̀ ḍụaḅọrọmamẹ. Yei Nyanaḅọ, ị́ mịẹse sarasarama ị̀ pịrịse àrị ị̀rị̀na-tarakapụ ma nẹngịmasam; ị́ pịkị ḍikitịḅịfoin nyanakapụma ḅie ị̀ ḍụamẹ.

⁵⁰Anịẹrẹchị sẹma ogboku àrị ị́ boma mẹ; à boma nime chu ị́ pịrịmẹ.

⁵¹Tamụnọ Ḅe ori opu ọmụḅaraiḅi se oria amanyanaḅọ ḅe pịrịmẹ; ọ̀ sẹlẹ ọkịsaḅọ ḅe sịkịmamgba ori ọ̀ ḅẹlẹmamẹ, anị Devid ḅe na ò furo ḅie apụma na ọkịmun ḅene-ḅene la.