Read kirikeni 2 Samụẹl 4 Bible Online

2 Samụẹl 4 - kirikeni bible

2 Samụẹl 4

¹Sọl ḅe yayo Ish-Boshẹt ḅe Hibrọn ḅieḅụ ini Abna ḅe ḅaamẹ nwọḅẹye mị naa sịkị ọ̀ ḅalafamẹ, oḅoku ijira pịkị Izrẹlapụ mamgba ḅụ saramẹ.

²Ish-Boshẹt ḅe mama fịrịtịḅịdapụ ọ̀ nwọ nyanamẹ, ini anị ọḅụ owu paka ogboapụ ma ḅụ tịḅịnị ma-ẹ, Beana ḅe na Rikab ḅe na, Rimọn, Bẹnjamin sẹ ḅie Bierọtḅọ ḅe oria owuapụ awọ-ẹ. (Bierọt mị ini anị kịẹn Bẹnjamin mị ḅụ chumẹ.

³Jokoma anị nyana apụma ini mangịso Giteim mị ḅie mun mẹ, anịju ḅụ ini angamẹ anịsịkị ngịsị, ọkịḅo mịmgba lamẹ.)

⁴Sọl ḅe yayo Jonatan ḅe gbọrị ikeli owutọkụ ọ̀ nwọ nyanamẹ, sọnọ-a kụra ọ̀ nwọ lasịkị ḅụ ini Sọl ḅe na Jonatan ḅe na ḅaaye-ẹ. Inia fị mị gbolomaye ḅo Jezriẹl opuama mị lasịkị, ọ̀ ḍẹkịḅọ ma ò deki chụa mangịmẹ; ọkụma árị opuma beye gose, á ḅaraḅie ò sokoromẹ se ò ḅo ikeliḅọ sọmẹ, oria ẹrẹ anị Mẹfịboshẹt.

⁵Rikab ḅe na Beana ḅe na so Ish-Boshẹt ḅe warị mun mẹ eneogboin ḅiri ḅụ, anịsịkị mị ḅụ, ori eneogboin ịnyọ saraḅẹ.

⁶Ḅọkọ ḅụ sime eremeniḅọ ma á sịngịaḅẹ fịturu mịẹ ịpịamgba mgbọlụma ḅụ fun ma á nwọ gugu sin àrị sịkị ḅụ, anị Rikab ḅe na Beana ḅe na mẹ-ẹma sọmunye-ẹ.

⁷Ini nwọ warị ḅie sọ kirikiri, ini so Ish-Boshẹt ḅe oria jukuru ḅie mun mẹ, anị ò gbun mọnọ kọn àrị sịkị ḅụ, se ini ọ̀ ḅaamẹ. Anịsịkị ini ọ̀ tịḅị pẹlẹsin se anị deki se bebe ḍin mị ḅie mgba nwẹngị Jọdan Pẹsịkiri mị ḅie toluḅọrọmẹ.

⁸Ini tịḅị mị se mun Amanyanaḅọ Devid ḅe pịrịmẹ Hibrọn mị ḅie se nwọse ọ̀ ḅẹmẹ, “Mịn Ish-Boshẹt ḅe tịḅị mị-ẹ, ị́rị́na-tarakaḅọ Sọl ḅe yaḅe anị ị́ ḅaa ḍọkịḅọ ḅe. Mịmgba Nyanaḅọ Ḅe ò ḅereni Ị́rị́ Amanyanaḅọ ḅe pịrịsam ị́ Sọl ḅe na ò furoḅie apụma na ḅụ sowuḅi.”

⁹Devid ḅe nwọse ini pẹkẹrẹmẹ, “À ḍumo sime Nyanaḅọ Ḅe karịfịmẹ, anị ḅụfụka mamgba ḅieḅụ ị̀ ḍụaḅọrọmaḅọ ḅe!

¹⁰Ḅo Ziklag ḅie Sọl ḅe fị mị ḍuko ị̀ pịrị okunwẹngịḅọ ḅe ọ̀ nwọ chịnmẹ na ò ḅo iḅi ḅẹrẹ ḍuko-ẹ ḅoaḅẹ. Àrị ori ọkị se, ò seni fịḅụ chumẹ. Anị oria iḅi ḅẹrẹ mị ḅụ à se ọ̀ pịrị gbẹịnye mị-ẹ!

¹¹Nde anị sitẹịn mịna warị ḅie mọnọarị ḅẹrẹsọ-nemikaḅọ ḅe nini-si-mịẹapụ ma pịrịḅịa ọkụ! Mịọkụ àrị ọ́mịna ḅụ sowuḅiḅịa, ómine ò niniye gose, sẹkiri mị ḅie àrị ómine ọfịnsinḅịa!”

¹²Devid ḅe kụrọ pịrịmẹ se oria owunima Rikab ḅe na Beana ḅe na ḅaa se inia ḅarama na ḅụọma na pẹlẹsinmẹ, ini àrị seni kpekima Hibrọn ḍapa mị anga sịkị ḅụ sololo koromamẹ. Ini Ish-Boshẹt ḅe tịḅị ọkị seni Abna iḍupu mị ḅie ḍipimẹ, anị Hibrọn mị ḅieḅụ.