Read kirikeni 2 Samụẹl 6 Bible Online

2 Samụẹl 6 - kirikeni bible

2 Samụẹl 6

¹Devid ḅe pịkị jịn gbọrị sịkị se Izrẹl mị ḅieḅụ owusọtẹịn owunima chịn koḅirimamẹ, inimgba kịẹnḅịpị anị tẹrẹ-a poku na jie ẹndẹ,

²ori inia tọrọkọda ini na mun Beala mị lamẹ Juda mị ḅieḅụ, anịju ḅụ Tamụnọ Ḅe Ọḅọkụ Igbe mị ọkịsoḅịa ẹrẹchị, Kụrọmamgba Nyanaḅọ Ḅe ẹrẹ mị ḅụ simeye mị, anị ini tẹmẹ pamba nyana ayema ọgọnọju ḅụ sime amanyanaḅọ ngada mị ọgọnọ simeḅọ ḅe.

³Chịngị mị ọgọnọ sime Abinadab warị ḅie ini anị dekipakụmamẹ se anị seni ịwọ kporokporo ọgọnọ ḅụ gbanamẹ. Abinadab owuapụ awọ Ọza ḅe na Ahaịo ḅe na kporokporo mị datekerema aḅẹ,

⁴Ahaịo ḅe anịa tọrọkọ ḅụ nwẹngịma mun aḅẹ.

⁵Devid ḅe na bebe Izrẹlapụ mamgba na ini ini ịnyọ mgba se sẹkịmẹ, pịkị nime chu ḅụ simemẹ osi seni Nyanaḅọ Ḅe pịrịḅụ. Ini ọbọ farịmẹ, tẹrẹ-a ḍiki ọbọ ma na, akwa na, ịchakachaka na pịkị ḅarafarịaye na.

⁶Ini ḅo Nekọn ịpịamgba pịsịrị nyọ mị lasịkị, nambuloma ḅụọ tọmbụlọmẹ, se Ọza ḅe ḅarasụma Ọḅọkụ Igbe mị dachịẹmamẹ.

⁷Anị kirikiri Tamụnọ Nyanaḅọ Ḅe ịganị nyana Ọza ḅe pịrị se ọ̀ ḅaamẹ, anịatịḅị ori osi nyana anị pịrịkẹ. Ọza ḅe anịju ḅụ fịmẹ Ọḅọkụ Igbe mị anga sịkị,

⁸anịẹrẹchị anịsịkị ngịsị ini nwọse anị nyọ mị chịnmẹ Pẹrẹz Ọza. Devid ḅe anị opuma ò ḅụosọmẹ Nyanaḅọ Ḅe ịganị ḅụ fomuḅarase Ọza ḅe pịrịye gose.

⁹Anịsịkị Devid ḅe Nyanaḅọ Ḅe ḍikiḅalafa ḅụ nwọ ḅẹmẹ, “Nde àrị ineda Ọḅọkụ Igbe mị deki se soḅịa ọkụ mịọkụ?”

¹⁰Anịẹrẹchị ọ̀ tọnpẹlẹmẹ na ọ̀ ḅarị anị deki se so Jerusalẹm mị mun-ẹkẹ; anịnakaraka ori ateli mị ḅụ pịkịmẹ se anị se Obẹd Idọm ḅe warị mun mẹ, anị Gat opuamaḅọ ḅe.

¹¹Anịju ḅụ anị sime mun tẹrẹ-akalụ lamẹ, se Nyanaḅọ Ḅe Obẹd Idọm ḅe na ò furo mị na ḅẹlẹmamẹ.

¹²Amanyanaḅọ Devid ḅe ḅo naamẹ na Ọḅọkụ Igbe mị gose Nyanaḅọ Ḅe Obẹd Idọm ḅe furo mị na pịkị ọ̀ nyana aye mamgba na ḅẹlẹmasam nwọḅẹ sịkị, ò mun Obẹd Idọm ḅe warị ḅie anị ọkị se so Jerusalẹm mị mun mẹ opu alalịfị ḅụ.

¹³Ọḅọkụ Igbe mị dekiapụ ma sonio-a ḅụọ nwọ sin sịkị, Devid ḅe ini dachịẹma se gbọrị owoi nambulo na pịkị gbọrị ḅẹlẹkị chụa ayamburama nambulo na se agbamịẹ Nyanaḅọ Ḅe pịrịmẹ.

¹⁴Devid ḅe gbọrị lọkọ-ḅịtẹ kẹngẹ anị ò konju ḅụ simeye-ẹ se ori ịnyọ la-ọkụ se sẹkịmẹ osi seni Nyanaḅọ Ḅe pịrịḅụ.

¹⁵Anị ḅaraḅụ ori na bebe Izrẹlapụ mamgba na Ọḅọkụ Igbe mị deki so Jerusalẹm mị mun mẹ ḅieḅẹlẹ olokutịḅị ḅie na oḍu ofuro ḅụ na.

¹⁶Igbe mị ini nwọ ọkịḅo opuama mị ḅie chuarị sịkị, Maịkal, Sọl ḅe ḅarọma, pẹlẹḅọkọ ḅie toluma ḍiki se osiḅụ sime Amanyanaḅọ Devid ḅe sẹkịarị ọkụ na fukuarị ọkụ na nwọ ọrị sịkị, anị á ḅụ si mẹ.

¹⁷Ini Igbe mị ọkịḅo se, anị seni anịa kiriḅụ koromamẹ, Devid ḅe pike koroma anị pịrị Ikowarị mị ḅieḅụ. Anịsịkị Devid ḅe dọkịma agba na deinma ḍiepịrịaye agba na mịẹ se Nyanaḅọ Ḅe pịrịmẹ.

¹⁸Devid ḅe dọkịma agba na deinma ḍiepịrịaye agba na mịẹso sịkị ọ̀ ḅẹlẹma se tomonima pịrịmẹ Kụrọmamgba Nyanaḅọ Ḅe ẹrẹḅụ

¹⁹ò fịye ḍie seni inimgba pịrịmẹ. Fịturu gbọrị okpokpo na fọị nama na, pịkị samịnasa chịnmgbọlụ na ọ̀ nwọse Izrẹl mị ḅie ḅọḅọ pịrịmẹ, owuapụ na eremeni na. Anịeso ọrịḅọḅọ so mịna warị mun mẹ.

²⁰Ọḅụkọ, Devid ḅe so oria warị mun mẹ kereniḅịpị seni ò furo ḅie apụma pịrị-ẹ mun sịkị, Maịkal ma paka ḅo ori na ịrịamẹ. Á nwọ ḅẹmẹ, “Izrẹl Amanyanaḅọ ḅe ori opu ẹrẹ mịẹ ọ̀ ḅụ pịrịmẹ mịmgba!” “Oria fịrịnwẹngịapụma inia fịrịnwẹngị eremeni awọma tọrụkuḅu ḅụchụaye chụaka se oḅoriḅọ ye mịẹ ọkụ se ye mịẹmẹ!”

²¹Devid ḅe nwọ pẹkẹrẹmẹ, “À sẹkị osi seni Nyanaḅọ Ḅe pịrịaḅẹ, anị ị́ ḍaḅe na ò furo mị na sịkị se ị̀ sẹlẹọkị seni tịḅịnịḅọ mịẹ, Izrẹl oria tomonima pịrịḅọ ḅe. À pa pịkị sẹkị osi seni Nyanaḅọ Ḅe pịrịmamunḅịa,

²²mịn ḅara nẹngịma ḅara à nwọse ị̀ ḅụgererematẹịnḅịa. Ị́ ineda koromaḅịa na à yeḅụofori-ẹ, ọkụma ị́ nwọ ḅẹrẹḅẹ eremeni awọma ini ị̀ se gololokiri ḅụ koromaḅịa!”

²³Maịkal, Sọl ḅe ḅarọma, árị awọ yikẹ ngịsị.