Read kirikeni 2 Samụẹl 7 Bible Online

2 Samụẹl 7 - kirikeni bible

2 Samụẹl 7

¹Amanyanaḅọ Devid ḅe ò deinma sime waraḅẹ oria amanyanaḅọ warị mị ḅieḅụ, Nyanaḅọ Ḅe pịkị ori-na-tarakapụ mamgba ḅaraḅie ò kokomẹ.

²Anị amanyanaḅọ ḅe nwọse ịkịankoro Netan ḅe ḅẹye-ẹ, “Mị ị̀rị̀-ẹ, awụ chịn se nama warị ḅie àrị anga waraḅẹ, ọkụma Tamụnọ Ḅe Ọḅọkụ Igbe mị ikowarị ḅie mị ini anị se koromaye-ẹ!”

³Netan ḅe nwọse ọ̀ pẹkẹrẹmẹ, “Ị́ kuḅie sime se ị́ mịẹ ḍọkịye goyegoye mịẹ, anịatịḅị Nyanaḅọ Ḅe ori ị́rị́na-omi-ẹ.”

⁴Ọkụma anị gbọrị ḍin mị ḅie Nyanaḅọ Ḅe nwọse Netan ḅe ḅẹmẹ,

⁵“Mun ḍuko ị̀ya fịrịnwẹngịḅọ Devid ḅe pịrị, na ị̀rị̀ nwọse ọ̀ ḅẹmẹ, ‘Àrị angaḅịa Oputẹkẹwarị nama ị̀ pịrịḅịaḅọ ị́rị́kẹ.

⁶Ijipt mị ḅieḅụ àrị Izrẹlapụma ḍụaḅọrọma sịkị ngịsị ọkịḅo mịọkụ la, ma àrị Oputẹkẹwarị ḅie angakẹ; ikowarị ḅie mị àrị anga ma ḅọrọarịye-ẹ à mun nyọ mun nyọ.

⁷Àrị Izrẹlapụma na mun-arị nyọ mamgba ḅụ, à tọnsa tịḅịnịma ḅụ gbọrịḅọ sọnị ma à ḅẹkẹ, nde ma ó gose awụ chịn Oputẹkẹwarị nama ị̀ pịrịkaye.’

⁸“Anịẹrẹchị ḍuko ị̀ya fịrịnwẹngịḅọ Devid ḅe pịrị na, Ị̀rị̀ Kụrọmamgba Nyanaḅọ Ḅe, nwọse ọ̀ ḅẹmẹ, ‘eleogbo anana ḍikiḍiki ḅụ ị́ simearịogbo àrị ị́ chịn ọkịmẹ se ị́ seni tịḅịnịḅọ mịẹ ị̀ya tomoni Izrẹlapụma pịrịmẹ.

⁹Ị́ mun nyọ goyegoye àrị ị́rị́ na simemẹ, à pịkị ị́rị́na-tarakapụma nẹngịmamẹ ị́ nwẹngị tọrọkọ mun-arị sịkị. Àrị ị́ mịẹse bebe tomonikiri mị mgba ḅie ẹrẹpakatẹịnḅọ ị́ nwọ sọḅịa.

¹⁰À gbọrị nyọ sẹlẹ koroma ị̀ya tomoni Izrẹlapụma pịrịsam, à pịkị ini seni anịju ḅụ koromasam, anị ini anga se jịn apụ ḅarị ngịsị inia ḅụḅalaḅalama-ẹka nyọ. Ini ḅo mị ama ḅie sọ sịkị ngịsị kụrọyemịẹapụ owu se ini paka aḅẹ, ọkụma mịn mị ḅarị mịẹ-ẹkẹ. À yeḅereni ị́ pịrịmẹ na ye ị́ la-ẹka ḅara à nwọse ị́ wẹrịḅịa ị́rị́na-tarakapụ mamgba ḅara ḅie, à pịkị ị́ furo ḅie pakaḅoḅịa awọ se ị́ pịrịḅịa.

¹²Ị́ fị se ini ị́ seni ị̀ya olomu-aḍapụma na ḍipi gbolomaḅịa sịkị, à mịẹḅịa ị́ya owuapụ awọma ḅie gbọrịḅọ ḅo amanyanaḅọ sọḅịa, à pịkị oria amanyanakiri mị mịẹse anị kụrọḅịa.

¹³Ori anị Oputẹkẹwarị mị nama ị̀ pịrịḅịaye-ẹ, à pịkị ọrịḅịa na oria amanyanakiri mị anị sime gbasomẹ

¹⁴À ḍaḅọ sọ ọ̀ pịrịḅịa, ori sọnị pịkị ị̀ya owutọkụ sọḅịa. Ò yemịẹ irimamẹ ḅẹḅẹ ḍaḅọ mịna tọkụ fomu ọkụ à nwọse fomuḅara se ọ̀ pịrịḅịa.

¹⁵Ọkụma àrị ọ̀ ḅụ ị̀ya kụrọ ḅẹlẹma mị sin ẹkẹ anị à se Sọl ḅe mịẹ ọkụ mị, anị amanyanakiri ḅụ à sinḅọ ḅe, mịẹse ị́rị́ ḅo amanyanaḅọ sọḅịa ọkụ.

¹⁶Sịkịmamgba ị́ furo ḅie awọ simeḅịa, à pịkị mịẹḅịa ị́ya amanyanakiri mị sime gbasoḅịa. Ị́ya amanyanakiri mị anị kuluma nyana ẹkẹ.’”

¹⁷Tamụnọ Ḅe ò ḅelema ḍuko Netan ḅe pịrịye goyegoye ò ḍuko Devid ḅe pịrịmẹ.

¹⁸Anịsịkị Amanyanaḅọ Devid ḅe so Nyanaḅọ Ḅe pakaḅoḅo Ikowarị mị ḅie mun kpọnjị sime se tẹkẹmẹ, “Ị̀rị̀ tụḅọ, ị̀ furo mị sọnị cheye ḅụ omi, Kụrọmamgba Nyana Tamụnọ, se ị́ mị ḅara se mine na anga-ao?

¹⁹Anịẹḅẹ sọnị mịọkụ ị́ pa pịkị jịn aye mịẹ ị̀ pịrịtẹịn aḅẹ, Kụrọmamgba Nyana Tamụnọ; ị́ pịkị yeḅereni ị̀ furo ḅie tọrọkọju pakaḅoḅịa apụma pịrịmẹ. Ị́ pịkị mịẹmẹ tomoniḅọ mịn mị ọrịmẹ, Kụrọmamgba Nyana Tamụnọ!

²⁰Cheye àrị ineda nwọ ḍuko ị́ pịrịḅe! Ị́ ị̀ nemimẹ, ị̀rị̀ ị́ya fịrịnwẹngịḅọ-ẹ.

²¹Mịn mị mịẹ mị anị ị́rị́ ḅi ḅara-ẹ pịkị ị́ tọnsa ḅara ḅụ-ẹ; mịna opuaye mamgba ị́ nwọ mịẹmẹ, se yese ị̀ ḍieḅịa ẹrẹchị.

²²Ị́ ḍụḅa la-ọkụ ḍiki, Kụrọmamgba Nyana Tamụnọ! Ị́ kịkẹḅọ ngịsị ofori-ẹ; sịkịmamgba wa nemimẹ na ị́rị́ kẹngẹ anị Tamụnọ-ẹ.

²³Izrẹl mị kịkẹ jịn sẹ ofori-ẹ sẹkiri ḅie, anị omoni ḅara ḅie ị́ ḍụaḅọrọma ḅo se ị́ya tomoni mịẹ apụma. Ị́ mịẹ ini pịrịsa opuaye ma na pịkị ḅụgbiripuma ayema na, mịẹse ị́ya ẹrẹ so bebe tomonikiri mị mgba kelemasam. Jịn-a sẹma ị́ nwọ depakụmamẹ pịkị inia oru ma na, ị́ya tomonima nwẹngị sọmun-arị sịkị, anị Ijipt mị ḅie ị́ ọkịpakụmaḅo se ị́ya tomoni mịẹ apụma.

²⁴Izrẹl mị ị́ nwọse ị́ya tomoni mịẹ gbasosam, se ị́rị́, Nyanaḅọ Ḅe, inia Tamụnọ nwọ sọsam.

²⁵“Mịọkụ, Nyanaḅọ Tamụnọ, ị́ ḅereni ị̀rị̀ na pịkị ị̀ furo ḅie apụma na pịrịye mị mịẹ ḅeinma gbaso, pịkị ị́ mịẹḅịa ị́ nwọḅẹye mị mịẹ.

²⁶Anị opuma ị́ya ẹrẹ soma se tomoni sịkịmamgba nwọ ḅẹḅịa, ‘Kụrọmamgba Nyanaḅọ Ḅe anị Izrẹl Tamụnọ Ḅe-ẹ.’ Ị́rị́ pịkị ị̀ya amanyanakiri mị ḍikiḍiki gbasoḅịa.

²⁷Kụrọmamgba Nyanaḅọ, Izrẹl Tamụnọ! Ị̀ kuḅie kụrọmẹ mị tẹkẹ mị kọn ị́ pịrị ḅụ, anịatịḅị ị́rị́ anị ma aye mamgba ḍieḅelema se ị̀rị̀ ị́ya fịrịnwẹngịḅọ ḅe pịrịye-ẹ, ị́ pịkị ḍuko ị̀ pịrịmẹ na ị̀ furo ḅie apụma ị́ nwọse amanyanapụ mịẹḅịa.

²⁸“Mịọkụ, Kụrọmamgba Nyanaḅọ, ị́rị́ anị Tamụnọ-ẹ; ị́ ḅereniye ma ị́ mịẹmịẹmẹ sịkịmamgba, ị́ pịkịna mịọkụ mị ḅụgbiripumaye mị nwọ ḅereni ị̀ pịrịsam.

²⁹Ị̀ furo ḅie apụma ḅẹlẹma, anị àrị ị́ ḅara ḅiye-ẹ, mịẹse ini ị́ya iḅi ḍikiḅụgerere mị nyana gbasoḅịa ọkụ. Ị́rị́, Kụrọmamgba Nyanaḅọ Ḅe, ma ayema ḅereni ị̀ pịrịsam, ị́ya ḅẹlẹma mị pịkị ị̀ furo ḅie apụma ọgọnọ gbana gbasoḅịa.”