Read kirikeni 2 Samụẹl 8 Bible Online

2 Samụẹl 8 - kirikeni bible

2 Samụẹl 8

¹Sịkị ḅọrọ ḅe gbọrị sịkị ḅụ, Amanyanaḅọ Devid ḅe pịkịna owu se Filistia apụma pakamẹ, ori ini nẹngịma se ini ḅarị ḅẹrẹtọn inia chuku ḅie sime ama mị pịrịkẹ.

²Ọ̀ pịkịna Moab apụma nwọ nẹngịmamẹ. Ori ikoliapụma se kiri ḅọlọlọ se tẹrẹ apụ goyegoye ḅụ mama apụ nwọ ḅaamẹ. Anịẹrẹchị Moab apụma ḅo ò chuku ḅie sime se ama ocho igbiki gbẹịn seni ọ̀ pịrịmẹ.

³Anịeso ò Siria amanyanaḅọ Zobaḅọ ḅe nwọ nẹngịmamẹ, Hadadiza, Rihọb yaḅe, Hadadiza ḅe Yufretis Tọrụ mị ḅe ọgọnọ ọrụḅụ ḅọrọ mun anị pẹkẹrẹ ḅụ ọ̀ nyana kụrọ mị mịẹse anị chịẹḅịa gose mun-arị sịkị.

⁴Oria asụn ọgọnọ owunima ḅụ kịnị inein-a ẹndẹ na sọnọasi fịnjị Devid ḅe nwọ kunmẹ, pịkịna ḅụọse nwẹngị owunima ḅụ mama poku na kịnị oyi ẹndẹ fịnjị na. Kporokporo se nwẹngịarị owuni ḅụ sọnọasi laḅịa asụn ọ̀ nwọse wẹrịmẹ se kirikọn aye mamgba mịẹse àrị ikelimẹ.

⁵Damaskọs ḅie Siria apụma owuni se ḅarachụa Amanyanaḅọ Hadadiza ḅe pịrịḅịa ẹrẹchị fịrịma sịkị, Devid ḅe owu se ini paka se mama poku na kịnị-a jie ẹndẹ na nwọ ḅaamẹ.

⁶Ori inia eke mị ḅụ ọmụgbin ikowarịma pike chịẹmamẹ, se ini ḅo ò chuku ḅie sime se pịkị ama ocho igbiki gbẹịn se ọ̀ pịrịmẹ. Nyanaḅọ Ḅe Devid ḅe mịẹse ori ọmụḅaraiḅiḅọ sọmẹ nyọ mamgba ḅụ.

⁷Devid ḅe Hadadiza ḅe oria ọmụ tịḅịnịma inia goli-goli agbọ ma ọkị se so Jerusalẹm mun mẹ.

⁸Ọ̀ pịkị alapẹlẹka ḅụ tọn-aye ọkịmẹ Bita na pịkị Bẹrotaị na ḅie ḅụ, anị Hadadiza ḅe dasime opuamama.

⁹Amanyanaḅọ Toị, Hamatḅọ ḅe naamẹ na Devid ḅe Hadadiza ḅe oria ọmụogbo mị mgba nẹngịmasam nwọḅẹ sịkị.

¹⁰Anị ọ̀ yayo Joram ḅe fịrịma mun Amanyanaḅọ Devid ḅe kereni pịkị ò tokoni mẹ, anịatịḅị Hadadiza ḅe ọ̀ nwọ nẹngịmaye gose, Toị ḅe ọ̀ tọn-a sịkị se Hadadiza ḅe na owusọsam. Joram ḅe goli na, seleḅa na pịkị alapẹlẹka na se mịẹ ḍiepịrịaye ọkị se mun Devid ḅe pịrịmẹ.

¹¹Amanyanaḅọ Devid ḅe àrị se osiḅụ wẹrị se tẹkẹ fịrị ḅụ chumẹ, pịkị ori ọmụḅaraiḅi nyana ḅụ sẹma ḅie ọkịḅo seleḅa ma na, goli ma na pịkị alapẹlẹka ma na—

¹²Idọm na, Moab na, Amọn na, Filistia na, pịkị Amalẹk na ḅie na pịkị Hadadiza ḅe ḅara ḅụ ori ọfọịn ọkịḅo ayema ḅụ na.

¹³Devid ḅe ò ḅo ẹrẹpakatẹịnḅọ sọmẹ, Idọm apụma ḅụ mama poku na kịnị-a sọnọ ẹndẹ ma Fụn Pẹsịkiri mị ḅie ḅụ ọ̀ nwọ ḅaa se vinpịkị ḅo sịkị.

¹⁴Bebe Idọm mị mgba ḅie ḅụ ọmụgbin apụ warịma ọ̀ nwọ pike chịẹmamẹ, se anịju ḅụ sime apụma ḅo ò chuku ḅie simemẹ. Nyanaḅọ Ḅe Devid ḅe mịẹse ori ọmụḅaraiḅiḅọ sọmẹ ḅọkọḅọkọ ḅụ.

¹⁵Devid ḅe ọ̀ ḅẹrẹtọn bebe Izrẹl mị mgba pịrịmẹ, ọ̀ pịkị ḍọkịḅo ọrịmẹ na oria tomonima sịkịmamgba ini iḅi ḅara na oloko na kura ḅara na se ini na angamẹ.

¹⁶Joab, Zẹruaya ma yayo ḅe anị ọmụogbo mị ḅe tịḅịnịḅọ ḅe-ẹ; Jẹhoshafat, Ahaịlud yaḅe anị inia ḍiri gịẹịnḅọ ḅe-ẹ.

¹⁷Zadọk, Ahaịtọb yaḅe na Ahimẹlẹk, Abaịata yaḅe na anị agbamịẹapụ ma-ẹ; Sẹraịya ḅe anị ḅẹrẹtọn warị mị ḅe ḍiri gịẹịnḅọ ḅe-ẹ;

¹⁸Bẹnaya, Jẹhoịada yaḅe anị tọrụse Devid ḅe ḅụ wẹrịarị owunima inia tịḅịnịḅọ ḅe-ẹ, anịsịkị Devid owuapụ awọma anị agbamịẹapụ ma-ẹ.