Read kirikeni 1 Amanyanapụ 1 Bible Online

1 Amanyanapụ 1 - kirikeni bible

1 Amanyanapụ 1

¹Mịọkụ Amanyanaḅọ Devid ḅe ori opuma olomusam, se oria fịrịnwẹngịapụma ichuka nyana ḅụ-gbẹịnye seni ọ̀ ḅụ gbẹịnmẹ nwọḅẹ sọnị, oḅoku pa ọ̀ ḅụ ḅaa aḅẹ.

²Anịẹrẹchị oria fịrịtịḅịnị ma nwọse ọ̀ ḅẹmẹ, “Opu Amanyanaḅọ, ye wa gbọrị iremeni tọkụ ḍọkịḅo ị́ ḅụsọsọma pịkị ị́ ḍikiḍiki. Árị ị́rị́ na gbọrị anga ḅọlọlọse ị́ ḅụ ọfịrịmaḅịa.”

³Ini bebe Izrẹl mị ḅie mgba ḅụ ḍikitọrụgbẹịn eremeni tọkụ ḍọkịmẹ, se Shụnẹm mị ḅieḅụ mị ini ọkọ sime eremeni tọkụ ọrịye-ẹ, árịa ẹrẹ anị Abishag, se ini árị ọkịḅo amanyanaḅọ ḅe pịrịmẹ.

⁴Árị opuma ḍikitọrụgbẹịnmẹ, árị amanyanaḅọ ḅe na anga pịkị ò ḍikiḍikimẹ, ọkụma ori árị na gbolomakẹ.

⁵Mịọkụ Absalọm ḅe fịsa sịkị Devid ḅe na Hagit ma na yi owutọkụ Adonaịja ḅe anị kọn apụma ḅụ sẹnịḅọ ḅe-ẹ. Ori opuma owutọkụ iḅi kọnmẹ. Devid ḅe ngịsị ma ori ịganị ọ̀ pịrịkẹ gbọrịye ḅụ sọnị, se ori opuma kpalakpalamẹ amanyanaḅọ sọḅịa ẹrẹchị. Ò kporokporo ọmụarụ na, asụn na nyana ọ̀ ḅụ pịrịmẹ, pịkị ọ̀ tọrọkọda ori na yemunmun owuapụ-a mesi oyi fịnjị ọ̀ nwọ nyanamẹ.

⁶

⁷Zẹruya ma yayo Joab ḅe ori na ọkwẹịnmamẹ pịkị Abaịata agbamịẹḅọ ḅe na ini ḅerenimẹ na ini ọ̀ mịẹkụrọmaḅịa.

⁸Ọkụma Zadọk agbamịẹḅọ ḅe na, Bẹnaya, Jẹhoịada yaḅe na, Netan ịkịankoroḅọ ḅe na, Shimẹaị ḅe na, Riaị ḅe na, pịkị Devid ḅe se ọ̀ ḅụḍikiḍiki owunima sọnị ini Adonaịja ḅe pẹkẹrẹ ḅụ ofori-ẹ.

⁹Gbọrị ene Adonaịja ḅe anana na, owoi nambuloma na, pịkị ḅẹlẹkị chụa ayamburama nambuloma na, se Oruwu Ḍụparị mị ọgọnọ agbamịẹmẹ Ẹnrogẹl ideri mengi mị na kpeki nyọ ḅụ. Ori Amanyanaḅọ Devid ḅe oria ísí-a owuapụ awọma na, Juda ḅie ḅo amanyanaḅọ fịrịtịḅịnị ma na, nwọ chịnmẹ na ini mị agbamịẹ alalị fị mị ḅo,

¹⁰ọkụma ori na gbọrị ḍaḅọ yiḅọ Sọlọmọn ḅe na, Netan ịkịankoroḅọ ḅe na, Bẹnaya ḅe na pịkị amanyanaḅọ ḅe ḍikiḍikiarị owunima sọnị ori ini chịnkẹ.

¹¹Anịsịkị Netan ḅe so Batshiba Sọlọmọn nyengima damamunmẹ, se nwọse á gbelamẹ, “Ma ị́ naaka na Hagit ma yayo Adonaịja ḅe ori ọ̀ ḅụ seni amanyanaḅọ kunsam nwọḅẹye mị? Amanyanaḅọ Devid ḅe anị gbolomaye ḅụ ò nemiye ofori-ẹ!

¹²Ị́ nemikase ị́ ḍumo na pịkị ị́ya tọkụ Sọlọmọn ḅe ḍumo na ḍụaḅọrọma ḅimẹ ḅẹḅẹ, anịọkụma àrị ị́ ḅẹḅịa,

¹³na sarama so Amanyanaḅọ Devid ḅe damamun se nwọse ò gbela ‘Opu Amanyanaḅọ, ị́ kọkọma yeḅereni ị̀ pịrịmẹ na ị̀ya tọkụ Sọlọmọn ḅe anị ị́ya kiriḍinmaḅịaye-ẹ amanyanaḅọ ḅaraḅụ. Nde anịọkụma, Adonaịja ḅe ḅo amanyanaḅọ sọ ọkụ?’”

¹⁴Netan ḅe pịkị nwọ ḅẹmẹ, “Anịsịkị ị́ amanyanaḅọ Devid ḅe na ọkwẹịn arịogbo à sọḅo ị́ya ḅẹrẹ mị mịẹkụrọmaḅịa.”

¹⁵Anịẹrẹchị Batshiba ma so mun amanyanaḅọ ḅe na ịrịamẹ oria jukuru ḅieḅụ. Ori opuma olomusam, se Abishag, Shụnẹm ama eremeni tọkụ ma, ò ḍikiḍikiaḅẹ.

¹⁶Batshiba ma á tịḅịtumẹ amanyanaḅọ ḅe tọrọkọ ḅụ, se ọ̀ nwọse á gbelamẹ, “Cheye ị́ nwọ ḅi?”

¹⁷Á nwọse ọ̀ pẹkẹrẹmẹ, “Opu Amanyanaḅọ, ị́ kọkọ yeḅereni ị̀ pịrị ị́ Nyana Tamụnọ Ḅe ẹrẹ ḅụ na ị̀ya tọkụ Sọlọmọn ḅe amanyanaḅọ sọḅịa ị́ ḅụọ ḅọrọsa ḅẹḅẹ.

¹⁸Ọkụma Adonaịja ḅe ori amanyanaḅọ sọsaka, se ị́ pịkị anị gboloma gbọrịye sọnị nemikẹ.

¹⁹Ọ̀ tọn-a owoi nambulo na, anana na, pịkị ḅẹlẹkị chụa ayamburama nambulo na se agbamịẹsam. Ọ̀ pịkị ị́ya owuapụ awọma chịn mun mẹ. Abaịata agbamịẹḅọ ḅe na pịkị Joab ị́ya ọmụogbo mị tịḅịnịḅọ ḅe chịn alalị mị mun mẹ, ọkụma ị́ya tọkụ Sọlọmọn ḅe ori ọ̀ chịnkẹ.

²⁰Opu Amanyanaḅọ, bebe Izrẹl mị mgba ị́ tọrụḍikiaḅẹ ị́ seni amanyanaḅọ ḅaraḅụ ị́ya kiriḍinmaḅịaḅọ ḍuko ini pịrịḅịa ẹrẹchị.

²¹Ị́ nemikase ḍukoka ọkụma, ị́ fị kirikiri ị̀ya tọkụ Sọlọmọn ḅe na ị̀rị̀ na ini wa seni ịkpẹịn apụ mịẹḅịa.”

²²Á pa ọkwẹịn arịogbo Netan ḅe ḅo amanyanaḅọ warị mị lamẹ.

²³Ini ḍuko amanyanaḅọ ḅe pịrịmẹ na ịkịankoroḅọ ḅe anịnyọ ori omi-ẹ, se Netan ḅe sọmun amanyanaḅọ ḅe tọrọkọ tịḅịtu mẹ.

²⁴Anịsịkị ọ̀ nwọ ḅẹmẹ, “Opu Amanyanaḅọ, ị́ ḍukopakụmasa na Adonaịja ḅe ị́ya kiriḍinma-ẹ amanyanaḅọ ḅaraḅụ?

²⁵Mịmgba ò mun tọn-a owoi nambulo na anana na, pịkị ḅẹlẹkị chụa ayamburama nambulo na se agbamịẹsam. Ị́ya owuapụ awọ mamgba ori ini chịn mun mẹ, Joab ị́ya ọmụogbo mị tịḅịnịḅọ ḅe na, pịkị Abaịata agbamịẹḅọ ḅe na, se mịọkụ ini ori na alalị fị pịkị olokuaḅẹ. ‘Nangwọ ḍumo sime ị́ pịrị Amanyanaḅọ Adonaịja!’

²⁶Ọkụma ị̀rị̀ na Zadọk agbamịẹḅọ ḅe na, Bẹnaya ḅe na, pịkị Sọlọmọn ḅe na ọ̀ wa chịnkẹ, ị̀ nyanaḅọ.

²⁷Ị́rị́ Amanyanaḅọ ḅe mịn mị ị́ ḅịpịsọ se ị́ya fịrịtịḅịnị ma sọnị ngịsị ị́ ḍuko ini pịrịkẹ ị́ kiriḍinmaḅịaḅọ amanyanaḅọ ḅaraḅụ?”

²⁸Amanyanaḅọ Devid ḅe nwọ ḅẹmẹ, “Batshiba ma ḅẹ á vinpịkị ḅo”—se á ḅo ọ̀ tọrọkọ chịẹmẹ.

²⁹Anịsịkị ọ̀ nwọse á ḅẹmẹ, “Ḍumo sime Nyanaḅọ Ḅe ẹrẹ ḅụ à yeḅereni ị́ pịrịmẹ, anị ị̀ya ḅụfụka mamgba ḅie ḅụ ị̀ ḍụaḅọ ḅe,

³⁰na mịmgba Nyanaḅọ Izrẹl Tamụnọ Ḅe ẹrẹ ḅụ à ḅereni ị́ pịrịye mị àrị anị mịẹḅịa, na ị́ya tọkụ Sọlọmọn ḅe ị̀ kiriḍinmaḅịa amanyanaḅọ ḅaraḅụ.”

³¹Batshiba ma tịḅịtu se nwọ ḅẹmẹ, “Ye ị̀ nyana amanyanaḅọ ḅe ḍumo gbaso!”

³²Anịsịkị Amanyanaḅọ Devid ḅe ḅịpị se Zadọk ḅe na, Netan ḅe na, pịkị Bẹnaya ḅe na fịrịmamẹ. Ini sọḅo sịkị,

³³ọ̀ nwọse ini ḅẹmẹ, “Ómine ị̀ya ḅẹrẹkọn warị ḅie fịrịtịḅịnị ma ọkị ọ́ ḅụ chụa; ye ị̀ya tọkụ Sọlọmọn ḅe ị̀ya yepụra asụn ḅe se nwẹngị, se ómine ọ̀ ḅọrọma mun Gịhọn Iderimengi mị la,

³⁴anịju ḅụ Zadọk ḅe na Netan ḅe na, pulo seni ọ̀ tịḅị sara se ò seni Izrẹl amanyanaḅọ kun. Anịsịkị ómine oḍu mị ofuro se oloku, ‘Nangwọ ḍumo sime Amanyanaḅọ Sọlọmọn ḅe pịrị!’

³⁵Ómine ò ḍuko pịkịma mịanga ḅo ò ḅo ị̀ya amanyanaḅọ ngada mị ọgọnọ simeḅịa sịkị ori amanyanaḅọ ḅaraḅụ ị̀ya kiri ọkịḅịa, anịatịḅị ori anị à sẹlẹọkị saye-ẹ ḅẹrẹtọn Izrẹl mị na, Juda mị na pịrịḅịaye-ẹ.”

³⁶Bẹnaya ḅe nwọse ọ̀ pẹkẹrẹmẹ, “Anị mị mịẹḅịa”, “ye Nyanaḅọ ị́ Tamụnọ Ḅe pịkị anị mịẹkụrọma!

³⁷Nyanaḅọ Ḅe ori ị́rị́ Opu Amanyanaḅọ ḅe na sime ḅara mị se pịkị Sọlọmọn ḅe na sime, pịkị mịẹse oria amanyana mị ẹrẹsotẹịn ị́yaye mị nẹngị.”

³⁸Anịẹrẹchị Zadọk ḅe na, Netan ḅe na, Bẹnaya ḅe na, pịkị amanyanaḅọ ḅe se ọ̀ ḅụ koru owunima[1] na Sọlọmọn ḅe ọkị seni Amanyanaḅọ Devid asụn ḅe ọgọnọ gbanamẹ, se ọ̀ ḅọrọma Gịhọn Iderimengi mị nyọ mun mẹ.

³⁹Zadọk ḅe pulo chụa ịgbana mị dekimẹ anị Nyanaḅọ Ḅe pakaḅoḅo Ikowarị ḅie ori ọkịḅoye mị, se pulo mị seni Sọlọmọn ḅe tịḅịsaramẹ. Ini oḍu mị ofuromẹ, se tomoni mamgba olokumẹ, “Nangwọ ḍumo sime ị́ pịrị, Amanyanaḅọ Sọlọmọn!”

⁴⁰Anịsịkị ini ori na vinpịkị somẹ, oloku, ḅieḅẹlẹ, pịkị ofurofuroaye ma ofuromẹ, ini iḅiọkụma alalị fị ḅụ nyọ fiema kiri mị jikemẹ.

⁴¹Adonaịja ḅe na oria igoniapụma na alalị mị fịso-arịsịkị, ini nyọ mị fiearị-ọkụ mị naamẹ. Se Joab ḅe oḍu mị fiearịye mị naa sịkị, ò gbelamẹ, “Nde opuama mị ḅie gose mị ḅara se fiearịye?”

⁴²Ma ori ọkwẹịn soka simeogbo, Jonatan, Abaịata agbamịẹḅọ ḅe, yaḅe ḅolamẹ. Adonaịja ḅe nwọse ọ̀ ḅẹmẹ, “Sọḅo.” “Ị́rị́ iḅi ḅọ-ẹ—ị́ iḅi ḅẹrẹ se ḅo waraḅẹ.”

⁴³Jonatan ḅe nwọse ọ̀ pẹkẹrẹmẹ, “Ị̀ ḅalafakẹ.” “Opu Amanyanaḅọ Devid ḅe ọ̀ Sọlọmọn ḅe seni amanyanaḅọ kunsam.

⁴⁴Ọ̀ Zadọk ḅe na, Netan ḅe na, Bẹnaya ḅe na, pịkị amanyanaḅọ koru owunima na fịrịma se ini ọ̀ ḅọrọma mun mẹ. Ini ọ̀ mịẹse ori amanyanaḅọ asụn ḅe seni nwẹngịmẹ,

⁴⁵se Zadọk ḅe na Netan ḅe na pulo seni ọ̀ tịḅị saramẹ amanyanaḅọ ḅaraḅụ Gịhọn Iderimengi mị nyọ ḅụ. Anịsịkị ini so opuama mị ḅie mun mẹ, oloku se ḅieḅẹlẹaḅẹ, mịọkụ tomonima ini oloku nyọ fiema ḅụ omi-ẹ. Anị ị́ nwọ naa àrị nyọ fiema mị-ẹ.

⁴⁶Sọlọmọn ḅe anị mịọkụ amanyanaḅọ ḅe-ẹ.

⁴⁷Anịḅe jịnye, ini amanyanaḅọ warị ḅie fịrịtịḅịnị ma sọ Amanyanaḅọ Devid ḅe damamun se osi seni ọ̀ pịrị se nwọ ḅẹmẹ, ‘Ye ị́ Tamụnọ Ḅe mịẹse Sọlọmọn ḅe ẹrẹsotẹịn ị́ nẹngị, pịkị ye Sọlọmọn amanyanakiri mị lọkọlọkọtẹịn ị́yaye mị nẹngị.’ Anịsịkị Amanyanaḅọ Devid ḅe oria mọnọye mị ọgọnọ ḅụ

⁴⁸tịḅịtu mẹ tẹkẹ ḅụ se ọ̀ tẹkẹ ḅụ nwọ ḅẹmẹ, ‘Ó ye wa tokoni seni Nyanaḅọ Ḅe pịrị, anị Izrẹl Tamụnọ Ḅe, ori anị mịẹse mịmgba ị̀ya awọma ḅie gbọrịḅọ amanyanaḅọ ḅaraḅụ ḅo ị̀ kiriḍinma, pịkị ị̀ ḍumoma se à tọrụ seni anị ọrịḅọ Ḅe!’”

⁴⁹Anịsịkị Adonaịja ḅe oria igoniapụma inia ḅalafamẹ, ini sịsẹ se ḅọḅọ mịnaju damẹ.

⁵⁰Adonaịja ḅe ori opuma Sọlọmọn ḅe ḍikiḅalafa ḅụ so Nyanaḅọ Ḅe pakaḅoḅo Ikowarị mị mun se agbamịẹ ẹbẹ mị ịkọlị ma ọlọmẹ.

⁵¹Ini ḍuko Amanyanaḅọ Sọlọmọn ḅe pịrịmẹ na Adonaịja ḅe ò gose ḅalafaḅẹ se agbamịẹ ẹbẹ mị ịkọlị ma ọlọ waraḅẹ se ḅẹaḅẹ, “Tatarịye, à ḅimẹ Amanyanaḅọ Sọlọmọn ḅe yekarịfị ị̀ pịrị na ori ị̀ ḅaa ẹkẹ.”

⁵²Sọlọmọn ḅe pẹkẹrẹmẹ, “Ò nemikase nyana ḅerenimẹ ḅẹḅẹ ọ̀ tịḅị inime mgbọlụ kẹngẹ sọnị ḅara la-ẹkẹ, ọkụma ò nemikase nyana ḅerenikẹ ḅẹḅẹ, ọ̀ fịḅịa.”

⁵³Amanyanaḅọ Sọlọmọn ḅe ḅịpị seni Adonaịja ḅe fịrịma se ori ọkịḅomẹ agbamịẹ ẹbẹ mị ḅụ. Adonaịja ḅe so amanyanaḅọ ḅe damamun se tịḅịtu ọ̀ tọrọkọ ọ̀ pịrịmẹ, se amanyanaḅọ ḅe nwọse ọ̀ ḅẹmẹ, “Ị́ ineda so ị́ya warị munḅịa.”