Read kirikeni 1 Amanyanapụ 10 Bible Online

1 Amanyanapụ 10 - kirikeni bible

1 Amanyanapụ 10

¹Shiba amanyanaḅọ ma, Sọlọmọn ḅe oria ẹrẹso mị naa se Jerusalẹm ḅomẹ, ḅụfụkamaye seni ọ̀ ḍaḍikiḅịa ẹrẹchị.

²Fịrịnwẹngị á pịrịḅịa apụ á nwọse ḅakama chụaḅomẹ, pịkị ike-nambulo na, àrị pụra kịrịkịrị ye kụnụmaye ma na, yela ḍụparị na, pịkị tọn-a goli na. Á ḅo Sọlọmọn ḅe na ịrịa sịkị, á koroma ineda se ò gbelaḅịaye mamgba á nwọse ò gbelamẹ.

³Arịmgba ọ̀ pẹkẹrẹmẹ, opuma ọ̀ ḅụfụkama se ò pufinjikaye ofori-ẹ.

⁴Shiba amanyanaḅọ ma Sọlọmọn ḅe kọn yenemi mị gbolomaye nwọ ọrịmẹ, á tọrụ se ọ̀ nama amanyanaḅọ warị mị ọrịmẹ.

⁵Oria dẹbụl mị ọgọnọ ini se gbana fịayema na, oria fịrịtịḅịnị ma anga nyọma na, oria amanyanaḅọ warị mị ḅie fịrịnwẹngịapụma kpaịnma sime ḅara mị na, pịkị ini ḅiri gbọrị-tọrụ-aye ma na, alalị-fịaye-fị-sịkịḅụ ò koruarịapụ ma na, ọ̀ pịkị Oputẹkẹwarị mị ḅie ḅụ mịẹ agbama na á nwọ ọrị sịkị. Àrị á ḅụlọḅeinma so ọkụma á ḅụ pịkị gbiripumẹ.

⁶Á nwọse Amanyanaḅọ Sọlọmọn ḅe ḅẹmẹ, “Ị̀ya sẹ mị ḅie, àrị ị́ ḅụ naaye ma na, ị́ya nemi mị na kọkọmaye-ẹ!

⁷Ọkụma ngịsị à ḅerenikẹ, ọkị nweni à ḅo ḅarana tọrụ se arịmgba ọrị sịkị lamẹ. Ọkụma anịaḅụ pẹkẹrẹ kẹngẹ sọnị à naakẹ, ị́ya nemi mị na, pẹrẹ mị na, àrị opuma ini ḍuko ị̀ pịrịayema nẹngịmẹ.

⁸Ị́ya erema nyana iḅiso ḍiki! Pịkị ị́ya fịrịnwẹngịapụma nyana iḅiso ḍiki, anị iḅifụḅara ḅaraḅụ sịkịmamgba ị́ tọrụkuḅu sime se ị́ya nemi ọkwẹịnma pokiarịapụ ma!

⁹Tokoni sime ị́ Nyana Tamụnọ Ḅe pịrị! Anị ị́ ḍikiḅieḅẹlẹḅụ ị́ se Izrẹl amanyanaḅọ mịẹḅọ ḅe. Anịatịḅị ọ̀ nyana Izrẹl mị pịrị ḅẹlẹma sime gbaso ẹrẹchị, ori ị́ se amanyanaḅọ mịẹ ini pịrịmẹ, mịẹse ị́ oloko mị na karakara ḅẹrẹkọn mị na ọlọchịẹmaḅịa ọkụ.”

¹⁰Á se ḅo ḍiepịrịayema á nwọse Amanyanaḅọ Sọlọmọn ḅe pịrịmẹ; goli okpokpo-a sonioasi, pịkị ye kụnụmaye na, kụnụ olo mịẹaye na pịkị yela ḍụparị ḅụ ḅakaye na. Á seni ọ̀ pịrị ye kụnụmayema na, kụnụ olo mịẹaye ma na, ḅakatẹịn jịnsịkị ḅụ, ma ayema pembe aye ḅụ ori ọkịsaye goyegoye nẹngịmẹ.

¹¹(Hiram mengi-tọrụ-ọmụgbin-arụ ma, anị Ọfa mị ḅie goli ma ọkịḅo ayema, àrị pịkị anịnyọḅụ ḅakama junipa chịn na, pịkị yela ḍụparị na se ḅomẹ.

¹²Sọlọmọn ḅe, chịnma ò se Oputẹkẹwarị mị ḅie na amanyanaḅọ warị mị ḅie na ḅụ ḅaraḅụ ọlọḅịa tanjị-na-koro-na-aye mịẹmẹ, ọ̀ pịkị àrị seni lubu-ọbọ mịẹse nime chuapụ pịrịmẹ. Ma ma anị junipa chịn ḅụ iḅitẹịn aye ḅụ jịnsịkị ini fẹḅo Izrẹl ḅie chu aye-ẹ; àrị kịkẹaye jịn ene ini ḅarị ọrịkẹ.)

¹³Amanyanaḅọ Sọlọmọn ḅe Shiba amanyanaḅọ ma ḅiyeḅiye ọ̀ seni á pịrịmẹ; anị ama mịẹmịẹye ḅaraḅụ ò seni ḅẹlẹma ḅaraḅụ á pịrị ayema sikima. Anịsịkị anị árị na pịkị arịa fịrịnwẹngịapụma na vinpịkị so Shiba ama mị mun ye-ẹ.

¹⁴Kụra goyegoye Amanyanaḅọ Sọlọmọn ḅe goli tẹrẹfa okpokpo-a jieasi fịnjị fa tẹrẹ-a poku ọ̀ nwọ ọkịkịmẹ,

¹⁵pịkị tuḅonima gbẹịn-gbẹịn ama-ocho-igbiki ma na, tuḅo ḅụ sọye ma na pịkị Arab amanyanapụma na Izrẹlapụ pẹkẹrẹ ma ḍikiḍiki ḅẹrẹtọn apụma gbẹịn-gbẹịn ama-ocho-igbiki ma na.

¹⁶Sọlọmọn ḅe opu agbọ oyiasi ọ̀ nwọ mịẹmẹ, se arịaḅụ gbọrịye gbọrịye, ineda goli jie-opu-okpokpo jie-opu-okpokpo ọ̀ nwọ sanị àrị oḅolomẹ.

¹⁷Ọ̀ pịkị gbam-gbam agbọ jieasi nwọ mịẹmẹ, se ò goli inein-a okpokpo, inein-a okpokpo nwọ sanị gbọrị agbọ, gbọrị agbọ oḅolomẹ. Mà agbọ mamgba ò seni Lẹbanọn Opu Piri Warị mị ḅie koromamẹ.

¹⁸Ọ̀ pịkị gbọrị opu amanyanaḅọ ngada nwọ mịẹmẹ. Ori oḍu se anịaḅụ gbọrị pẹkẹrẹ oḅolomẹ se kirikọn pẹkẹrẹ mị mgba iḅitẹịn goli ọ̀ nwọ sanị oḅolomẹ.

¹⁹Amanyanaḅọ ngada mị kpọlị mun anịa ọgọnọ laḅịa ịkpịkpa mị, ḅụọ sinsin koroma ḅe sonio-a ḅụọ anị nwọ nyanamẹ, gbọrị ịkpịkpa gbọrị chịrịḅa, gbọrị ịkpịkpa gbọrị chịrịḅa ọ̀ nwọ tẹmẹ ịkpịkpa ma ọgọnọ kuluma mị ḅụ koromamẹ, arịmgba oyimaịn chịrịḅa fịnjị-ẹ. Amanyanaḅọ ngada mị ọḅụju ḅụ owoi-nambulo gbọrị tịḅị ọ̀ nwọ mịẹ koromamẹ. Mama ḅara gbanamaye ma ḅụ, gbọrị chịrịḅa, gbọrị chịrịḅa omi-ẹ. Nwọ sime amanyanaḅọ ngada jịnsịkị jịn amanyanakiriḅụ ma pakaḅokẹ.

²¹Sọlọmọn ḅe oria mengi ḅu ọmọngọ mamgba goli seni mịẹaye-ẹ, pịkị jokoma goli ọ̀ nwọse oria fịrịnwẹngịaye mamgba mịẹmẹ Lẹbanọn Opu Piri Warị mị ḅie sime ayema. Ọ̀ seleḅa se mịẹaye ofori-ẹ, anịatịḅị Sọlọmọn enema ḅie àrị yelakẹ.

²²Abaji sọ àrị onwoin arụ ḅụ tọn aye ọ̀ nwọ nyanamẹ, anị Hiram onwoin arụ ma na dọkụpakarịye. Tẹrẹ-a kụra goyegoye oria arụ ma àrị pịkịmaḅoḅịa sịkị, àrị goli na, seleḅa na, oḍu na, kpako na, pịkị ḅụkọ na se ḅoḅịa.

²³Amanyanaḅọ Sọlọmọn ḅe ori ngọ kọntẹịn pịkị yenemitẹịn jịn amanyanaḅọ goyegoye nẹngịmẹ,

²⁴se bebe tomonikiri mị mgba ḅo Tamụnọ ḅe seni ọ̀ pịrịsa nemi mị poki ḅimẹ.

²⁵Ḅo ḅọ goyegoye ḍiepịrịye se ḅomẹ—seleḅa na goli na se tẹmẹ aye na koro ḅụchụaye na, owuniaye na, kụnụ olo mịẹaye na, ye kụnụmaye na, asụnma na, pịkị yepụra asụnma na. Mịn mị kụrakụra ḅụ mịẹmịẹye-ẹ.

²⁶Sọlọmọn ḅe kporokporo ọmụarụ ma ḅụ tẹrẹ ẹndẹ oyiasi fịnjị ọ̀ nwọ namamẹ, pịkị ini se owu munmun asụnma ḅụ poku oyi ẹndẹ na. Ori arịaḅụ daye se Jerusalẹm ḅie wẹrịmẹ se kirikọn ayema se kịrịkịrị opuamama ḅie ḅụ koromamẹ.

²⁷Ori amadarị sịkị ḅụ, seleḅa Jerusalẹm ḅie ḍụparị ḅaka ọkụ anị àrị ḅaka ọkụ-ẹ, awụ chịn mị sọ sikamọ ejema ḅaka ọkụ ḅakamẹ, papa ịḅa chịn Juda chịngịma chuku ḅein ọkụ mị.

²⁸Amanyanaḅọ ḅe ye fẹḅo ọ̀ pịrịpịrị apụma iderima ḅịpị se Ijipt ḅie na Silisia ḅie na asụnma fẹ ḅoḅomẹ.

²⁹Ijipt ḅie mị ini kporokporo ọmụarụ ma fẹ ḅoḅoye-ẹ, se àrị se Hitaị amanyanaḅọ ḅe na pịkị Siria amanyanaḅọ ḅe na dẹrịdẹrịye-ẹ. Ini se gbọrị kporokporo ọmụarụ dẹrịarịye anị seleḅa pẹkẹrẹ ẹndẹ oyiasi fịnjị, se gbọrị asụn pịkị seleḅa pẹkẹrẹ sọnọmasi oyi fịnjị nwọ lamẹ.