Read kirikeni 1 Amanyanapụ 12 Bible Online

1 Amanyanapụ 12 - kirikeni bible

1 Amanyanapụ 12

¹Rihoboam ḅe ò so Shẹkẹm mun mẹ, anị bebe ọgọnọjuda Izrẹlapụ mamgba ò se amanyanaḅọ kunḅịa ẹrẹchị koḅirima sime nyọ mị.

²Jeroboam, Nibat yaḅe, anị Amanyanaḅọ Sọlọmọn ḅe ḅara pẹlẹma mangịso Ijipt munḅọ ḅe, mị ḅẹrẹ mị naa sịkị Ijipt mị ḅie ḅụ ò soḅomẹ.

³Ọgọnọjuda sẹma ọ̀ fịrịma ḅomẹ, se inimgba gboloma so Rihoboam ḅe damamun se nwọse ọ̀ ḅẹmẹ,

⁴“Ị́ ḍa Sọlọmọn ḅe kụrọkụrọ ḅara se wa mịẹ pịkị iku wa pụnụma aye se mịna ọgọnọ ḅụ gbanamẹ. Ị́ nemikase mà iku wa pụnụma ayema mịẹ sarasarama wa pịrị pịkị mịẹse wa dein ḍumo kọnmẹ ḅẹḅẹ, wa nyanaḅereni ị́ pịrị apụ sọḅịa.”

⁵Ọ̀ nwọse ini pẹkẹrẹmẹ, “Tẹrẹ-a ḍin ḅụ ó vinpịkịḅo se à pẹkẹrẹ ḅịpị seni ọ́ pịrịḅịa.” Anị ini soye-ẹ.

⁶Amanyanaḅọ Rihoboam ḅe tetema seni ḍawu Sọlọmọn ḅe pịrịpịrị sẹnịsa apụma ḅịpị gbelamẹ. “Nde ó se ị̀ pịrị se à seni mịnapụma pẹkẹrẹḅịa tetema?”

⁷Ini nwọse ọ̀ pẹkẹrẹmẹ, “Ị́ nemikase ḅimẹ na ị́ iḅiọkụ se fịrịnwẹngị mịnapụma pịrịḅịa ḅẹḅẹ, ini ḅiarịye mị ḅụ iḅi pẹkẹrẹ ḅịpị seni ini pịrị, ini sọnị pịkị nyana ḅereni fịrịnwẹngị ị́ pịrị gbasoḅịa.”

⁸Ọkụma sẹnịapụma se ọ̀ pịrị tetema mị ori anị ọkịkẹ anịnakaraka ori na ogu ḅaraḅụ sẹnị pakaḅo apụma ọ̀ nwọ damamunmẹ, anị mịọkụ tetema se ọ̀ pịrịarị apụma.

⁹“Cheye ọ́ nwọse ị̀ tetema ḅe?” ọ̀ nwọse ini gbelamẹ. “Inia ḅụ pụnụma ayema mịẹ sarasarama ini pịrị ị̀ ḅara nwọ ḅiarị apụma, cheye à nwọse ini pẹkẹrẹ ọ́ nwọḅẹ?”

¹⁰Ini nwọse ọ̀ pẹkẹrẹmẹ, “Mịn ị́ se ini ḅẹḅịa ọkụ-ẹ: ‘Ị̀ ḅara ịkalịḅe tụmgbalị mị anị kpokorotẹịn ị̀ ḍaḅe konju nẹngịmẹ!’

¹¹Ini ḅẹ, ‘Ị̀ ḍaḅe ori iku ọ́ ḅụ pụnụma aye se ọ́mịna ọgọnọ gbanamẹ ḅẹḅẹ, àrị àrị mịẹse àrị ikutẹịnḅịa. Fomuye ọ̀ nwọse ó fomumẹ ḅẹḅẹ; ị̀rị̀ asụn fomufomuye anị à seni ó fomuḅịaye-ẹ!’”

¹²Tẹrẹ-a ḍin ḅọrọ sịkị Jeroboam ḅe na bebe tomoni mamgba na vinpịkị Amanyanaḅọ Rihoboam ḅe damamunmẹ, anị ori ini ḅẹ ḅaraḅụ.

¹³Amanyanaḅọ ḅe sẹnịapụma tetema mị ori ọkịkẹ se kụrọkụrọma ọkwẹịn tomonima pịrịmẹ,

¹⁴anị asẹmẹnị ma se ọ̀ pịrị tetema mị-ẹ. Ọ̀ nwọ ḅẹmẹ, “Ị̀ ḍaḅe iku ḅụ pụnụma aye ọ̀ nwọ seni ọ́mịna ọgọnọ gbanamẹ; àrị àrị mịẹse àrị pịkị ikutẹịnḅịa. Ò fomuye seni ó fomumẹ, asụn fomufomuye anị ị̀rị̀ à seni ó fomuḅịaye-ẹ!”

¹⁵Anị Nyanaḅọ Ḅe ḅi ọkụ mị-ẹ, mịẹse Shịlo ḅie ḅo ịkịankoroḅọ Ahaịja ḅe ḅụ ọ̀ ḅọrọ ḍuko seni Jeroboam Nibat yaḅe pịrịye mị mịẹ ḅeinma ḅịa ẹrẹchị. Mịn mị gose anị amanyanaḅọ ḅe ngịsị tomonima pokikaye-ẹ.

¹⁶Tomonima amanyanaḅọ ḅe ngịsị ori ini poki ḍụkụ ẹkẹ nwọḅẹye mị ọrị sịkị, ini olokumẹ, “Devid ḅe na ò furo na ó se gbinkoroma! Cheye jịnsịkị ini nwọ mịẹ wa pịrịsa? Izrẹlapụ, ó ye wa so mịna warịma mun! Ye Rihoboam ḅe ngẹrị ḅarana ọ̀ ḅụ ḍikiḍiki!” Anị Izrẹlapụma ḅarị nyanaḅereni ḍụkụkaye-ẹ,

¹⁷se ini Rihoboam ḅe koromaso seni ori amanyanaḅọ sọ Juda eke mị ḅụ anga apụma kẹngẹ pịrịmẹ.

¹⁸Amanyanaḅọ Rihoboam ḅe Adonaịram ḅe fịrịmamẹ, anị kụrọkụrọ ḅaraḅụ fịrịnwẹngịapụ tịḅịnịḅọ ḅe, na ori Izrẹlapụma damamun, ọkụma ini ó gbin ḅaamẹ. Mịn mị ḅụ Rihoboam ḅe oria kporokporo mị ḅụkụlọ se inia ḅara pẹlẹma mangị so Jerusalẹm mị mun mẹ.

¹⁹Anịsịkị ngịsị Izrẹl mị ḅụ ọgọnọjuda amanyanakiri amama ḅie sime apụma ini ḅarị nyana ḅereni Devid furo ḅie amanyanapụma pịrị ḍụkụkẹ.

²⁰Izrẹlapụma, Jeroboam ḅe Ijipt mị ḅie ḅụ ò soḅosam nwọḅẹye mị naa sịkị, ini ọ̀ fịrịmaḅo ori na ḅịpị ọkịamẹ se ò seni Izrẹl amanyanaḅọ mịẹmẹ. Juda sẹ mị kẹngẹ anị nyana ḅereni Devid furo ḅie apụma pịrịye-ẹ.

²¹Rihoboam ḅe ḅo Jerusalẹm mị lasịkị, Juda furo mị ḅie owusọtẹịn owunima ḅụ simaịn poku fịnjị na kịnị oyi ẹndẹ ọ̀ nwọ chịn koḅirimamẹ, Juda na Bẹnjamin na sẹma ḅie ò ḅimẹ ori ọgọnọjuda Izrẹl sẹma na ọmụ gbin mịẹsosịkị ọ̀ pa ḅẹrẹtọn ḅụ sime ọgọnọju-a sẹma pịrịḅịa ọkụ.

²²Ọkụma Tamụnọ Ḅe ịkịankoro Shẹmaịya ḅe ḅẹmẹ

²³na ọ̀ mị oku mị ḍuko Rihoboam Juda amanyanaḅọ ḅe na bebe Juda na Bẹnjamin na sẹ ḅie apụ mamgba pịrị:

²⁴“Ómine owuse ọ́mịna mịnapụma pakama anị Izrẹlapụma. Ó so ọ́mịna warịma mun ómine mgba. Nwọ pakaye mị àrị ọkọ se anị tọnmẹ.” Inimgba Nyanaḅọ Ḅe ḅịpịpokimẹ ọ̀ tọnye mị ḅụ se vinpịkị so inia warịma mun mẹ.

²⁵Amanyanaḅọ Jeroboam Izrẹlḅọ ḅe Shẹkẹm ama mị nama kụrọmamẹ, Ifrem chịngị ọgọnọ sẹ mị ḅie ḅụ se kele anịju ḅụ angamẹ. Ọ̀ pịkị somun Pẹnuẹl ama mị nama kụrọmamẹ.

²⁶Ọ̀ nwọse ḅịpị-se-ọ̀-ḅụ fiemamẹ, “Mịọkụ yema wẹrị sime ḅaraḅụ, nemikase ị̀ya tomonima pa so Jerusalẹm mị mun se agbamịẹ Nyanaḅọ Ḅe pịrịarị ọkụma anịnyọ Oputẹkẹwarị mị ḅie, ini saḅaḅọrọ nyana ḅereni Amanyanaḅọ Rihoboam Judaḅọ ḅe pịrị se ị̀ ḅaaḅịa.”

²⁸Ò koroma kọn anị pịrị seso, ò goli seni mama owoi-a nambulo tẹmẹmẹ, se nwọse oria tomonima ḅẹmẹ, “Ó Jerusalẹm mun tẹkẹtẹkẹ sịkị opuma ḅọlọsam. Izrẹlapụ, ma anị Ijipt mị ḅie ómine ọkịpakụmaḅo oru ma-ẹ!”

²⁹Goli se tẹmẹ owoi-a nambuloma ḅụ gbọrịye ọ̀ nwọse Bẹtẹl ḅie koroma mẹ anịsịkị ísíye mị seni Danị ḅie koromamẹ.

³⁰Anịẹrẹchị tomonima ini simịẹmẹ, ini somun Bẹtẹl ḅie na Danị ḅie na kọnkọn tẹkẹma gose.

³¹Jeroboam ḅe ọ̀ pịkị chịngịma ọgọnọ ḅụ tẹkẹ-a nyọ namamẹ, ọ̀ pịkị agbamịẹapụ sẹlẹmẹ furofuro ma ḅie, anị Livaị sẹ mị ḅie pakaḅoka jịn apụ.

³²Jeroboam ḅe ọ̀ pịkịna nine akalụ mị ḅie jie-a ḍin ene, alalị nwọ tọn pakụmamẹ anị Juda mị ḅie ini fịfị alalị mị pembeye. Bẹtẹl agbamịẹ ẹbẹ mị ọgọnọ ori agba mịẹ seni ò goli se tẹmẹ owoi-a nambuloma pịrịmẹ, ọ̀ pịkị anịju Bẹtẹl mị ḅie ḅụ agbamịẹapụ se koromamẹ; ọ̀ nama tẹkẹ-a nyọma ḅie ḅụ fịrịnwẹngịarị apụ.

³³Nine akalụ mị ḅie jie-a ḍin ene mị ḅụ, anị ọ̀ ḅarana tọn koroma ene mị ḅie, ò so Bẹtẹl mị mun mẹ, se agbamịẹ ẹbẹ mị ọgọnọ ḅụ agbamịẹ se alalị koroma ọ̀ tọn koroma Izrẹlapụma pịrị alalị mị fịmẹ.