Read kirikeni 1 Amanyanapụ 13 Bible Online

1 Amanyanapụ 13 - kirikeni bible

1 Amanyanapụ 13

¹Nyanaḅọ Ḅe tọn ḅaraḅụ, gbọrị ịkịankoroḅọ Juda ḅie ḅụ so Bẹtẹl mun mẹ se Jeroboam ḅe agbamịẹ ẹbẹ mị tọrọkọ ḅụ chịẹsime agba mị mịẹ ọtọn àrị sịkịḅụ ò mun lamẹ.

²Nyanaḅọ Ḅe tọn ọ̀ pịrị ḅara mịẹ ḅụ ịkịankoroḅọ ḅe agbamịẹ ẹbẹ mị ḍukosimamẹ: “Yei agbamịẹ ẹbẹ, agbamịẹ ẹbẹ, mị Nyanaḅọ Ḅe ḍuko ọkụ-ẹ: Josaya nwọ chịn gbọrị owutọkụ ini nwọ yiḅịa, Devid furo mị ḅie. Oru tẹkẹ agbamịẹapụma, ị́ya ọgọnọ ḅụ ori ini ḅaafamaḅịa ọ̀ pịkị ị́ya ọgọnọ ḅụ tomoni ịmgbema dọkịmaḅịa.”

³Ịkịankoroḅọ ḅe pịkị nwọ ḅẹmẹ, “Mị agbamịẹ ẹbẹ mị ḅịkị koroḅịa, se anịa ọgọnọ ḅụ sime fọn ma galagalaḅịa. Anịsịkị ó nemiḅịa na Nyanaḅọ Ḅe ị̀ ḅụ ḅọrọ mị ọkwẹịn mị kọnmẹ.”

⁴Amanyanaḅọ Jeroboam ḅe mị ọkwẹịn mị naa sịkị, ọ̀ ḅara se ọ̀ da se kụrọ pịrịmẹ, “Ómine ori ḅọ ḅe kun!” Anị-gbọrị-sịkịḅụ amanyanaḅọ ḅe ọ̀ ḅara fịmẹ se ọ̀ ḅarị ineda anị jine ọkịkẹ.

⁵Agbamịẹ ẹbẹ mị bẹkẹma ḅaraḅụ ḅịkị koromẹ, se fọnma ọsụn kiri saramẹ, ịkịankoroḅọ ḅe Nyanaḅọ Ḅe ẹrẹ ḅụ ḍukosa ḅaraḅụ.

⁶Amanyanaḅọ Jeroboam ḅe nwọse ịkịankoroḅọ ḅe ḅẹmẹ, “Sisi ị́ Nyana Tamụnọ Ḅe tẹkẹ ị̀ pịrị, se ọ̀ ḅẹ ori ị̀ ḅara mị gwọ!” Ịkịankoroḅọ ḅe Nyanaḅọ Ḅe tẹkẹ, se amanyanaḅọ ḅe ḅara mị gwọmẹ.

⁷Se amanyanaḅọ ḅe nwọse ịkịankoroḅọ ḅe ḅẹmẹ, “Ị̀rị̀ na so warị ḅo se yefị. Àrị ị́ nwẹngịfịrị mị gose gbẹịnye se ị́ pịrịḅịa.”

⁸Ịkịankoroḅọ ḅe nwọse ọ̀ pẹkẹrẹmẹ, “Ị́ ḅọrọ ị́ya ngọma ḅụ gbọrị pẹkẹrẹ se ị̀ pịrịḅịa sọnị àrị ị́rị́ na mun-ẹkẹ anịkanịka ị́rị́ na yefị anịkanịka ị́rị́ na ḅu gboloma, ngịsị à mịẹ ẹkẹ.

⁹Nyanaḅọ Ḅe ori oloko chụa ị̀ pịrịsam na ngịsị gbọrịye sọnị à fịma pịkị ḅuma, à ḅọrọ ḅo nyọ mị sọnị à pịkị ḅarị anị ateli ḅie ḅọrọ soma.”

¹⁰Anịẹrẹchị ọ̀ pịkị ọ̀ ḅọrọ ḅo nyọ mị ḅụ ḅọrọ sokẹ, ọkụma ọ̀ jịn ateli ọkịmẹ.

¹¹Anịsịkị mị ḅụ gbọrị olomu ịkịankoroḅọ simemẹ Bẹtẹl mị ḅie. Oria owuapụ awọma ḅo Juda ḅie ḅụ ḅo ịkịankoroḅọ ḅe anị ene ḅụ Bẹtẹl ḅie mịẹye mị na ò se Amanyanaḅọ Jeroboam ḅe ḅẹye mị na nwọ ḍuko se ọ̀ pịrịmẹ.

¹²Olomu ịkịankoroḅọ ḅe nwọse ini gbelamẹ, “Nde ateli ọ̀ nwọ ọkị ò so sịkị ḅụ?” Ini ateli mị seni ò ḍiemẹ

¹³se ori ini ḅẹmẹ na, ini yese oria yepụra asụn ḅe ọgọnọ ise ọ̀ pịrị. Ini ọ̀ ḅẹ ḅara mị mịẹmẹ, se ori asụn ḅe se nwẹngị

¹⁴ideri koromun ateli mị ḅie, Juda ḅie ḅụ ḅo ịkịankoroḅọ ḅe ḍukomẹ, se gbọrị kuru-eje-chuku ḅụ ori ọrịmẹ ọ̀ kpọnjị sime waraḅẹ. Ọ̀ nwọse ò gbelamẹ, “Juda ḅie ḅụ ḅo ịkịankoroḅọ ḅe ị́rị́?” “Ị̀rị̀-ẹ,” tomoniḅọ ḅe nwọ pẹkẹrẹmẹ.

¹⁵Ọ̀ nwọse ọ̀ ḅẹmẹ, “Ḅo ị̀rị̀ na warị mun se wa yefị gboloma.”

¹⁶Ọkụma Juda ḅie ḅụ ḅo ịkịankoroḅọ ḅe nwọse ọ̀ ḅẹmẹ, “Àrị ineda ị́rị́ na so warị mun-ẹkẹ, ị́ seni ị̀ kọn ḅiarị igoni mị sọnị à pịkị anị daọkị-ẹkẹ. Àrị ị́rị́ na fị anịkanịka ḅu gbolomaḅịaye ofori-ẹ mịju ḅụ,

¹⁷anịatịḅị Nyanaḅọ Ḅe ori oloko chụa ị̀ pịrịsam na gbọrịye sọnị à fịma pịkị ḅuma, pịkị à ḅọrọḅo ateli mị ḅie ḅụ ḅọrọso warị munma.”

¹⁸Anịsịkị Bẹtẹl ḅie ḅụ ḅo olomu ịkịankoroḅọ ḅe nwọse ọ̀ ḅẹmẹ, “Ị̀rị̀ sọnị ị́ juo ịkịankoroḅọ-ẹ, se Nyanaḅọ Ḅe tọn ḅaraḅụ, enjẹlḅọ ḍuko ị̀ pịrịmẹ na àrị ị́ ọkịso warị mun se igoni se ị́ kọn.” Ọkụma olomu ịkịankoroḅọ ḅe ori iruokọn aḅẹ.

¹⁹Anị Juda ḅie ḅụ ḅo ịkịankoroḅọ ḅe olomu ịkịankoroḅọ ḅe na so warị mun se yefị gbolomaye-ẹ.

²⁰Ini fịye dẹbụl mị ḅụ simearịogbo, Nyanaḅọ Ḅe ọkwẹịn mị ḅo olomu ịkịankoroḅọ ḅe lamẹ,

²¹se ori oloku nwọse Juda ḅie ḅo ịkịankoroḅọ ḅe ḅẹmẹ, “Nyanaḅọ Ḅe nwọ ḅẹmẹ na ị́ ọ̀ ḅịpịpokikẹ, ọ̀ tọn ị́ pịrịye mị sọnị ị́ pịkị mịẹkẹ.

²²Anịnakaraka, ị́ somun yefị pịkị ḅumẹ ori oloko chụa ị́ pịrị nyọ mị ḅụ. Mịn mị ẹrẹchị ị́ fịḅịa, ị́ya oju mị ọ́mịna furo iḍupu mị ḅie ḅụ ini anị ḍipi ẹkẹ.”

²³Ini yefị so sịkị, olomu ịkịankoroḅọ ḅe yepụra asụn ḅe ọgọnọ ye se ise Juda ḅie ḅụ ḅo ịkịankoroḅọ ḅe pịrị,

²⁴se ò somẹ. Ateli mị ḅie ḅụ chịrịḅa ori na bịama se ọ̀ ḅaamẹ. Oria oju mị ateli ogbo ḅọlọlọ simemẹ se chịrịḅa ḅe na yepụra asụn ḅe na anịanga sịkịḅụ chịẹsimemẹ.

²⁵Ḅọrọarị apụ oju mị ọrịmẹ ateli ogbo ḅụ, chịrịḅa ḅe anị na kpekima chịẹsime waraḅẹ. Ini mun Bẹtẹl mị ḅie ḅụ ini ọrịye mị ḍukomẹ.

²⁶Olomu ịkịankoroḅọ ḅe anị gbolomaye mị naa sịkị ọ̀ nwọ ḅẹmẹ, “Anị Nyanaḅọ Ḅe ḅịpịpokika ịkịankoroḅọ ḅe ori-ẹ! Anịẹrẹchị Nyanaḅọ Ḅe chịrịḅa fịrịma owuse ọ̀ paka se ọ̀ ḅaamẹ, anị Nyanaḅọ Ḅe ḍuko na ọ̀ mịẹḅịa nwọḅẹ ḅaraḅụ.”

²⁷Anịsịkị ọ̀ nwọse oria owuapụ awọma ḅẹmẹ, “Ó ye se ị̀ya yepụra asụn ḅe ọgọnọ ise ị̀ pịrị.” Ini ọ̀ ḅẹ ḅara mịẹmẹ,

²⁸se ò somun ịkịankoroḅọ ḅe oju mị ọrịmẹ ateli ogbo anị ḅọlọlọ sime nyọ mị ḅụ, se yepụra asụn ḅe na chịrịḅa ḅe na pa anịanga sịkịḅụ chịẹ waraḅẹ. Chịrịḅa ḅe, oju mị ọ̀ pẹịkẹ ọ̀ pịkị owuse yepụra asụn ḅe pakakẹ.

²⁹Olomu ịkịankoroḅọ ḅe oju mị deki se anị se yepụra asụn ḅe ọgọnọ gbana, anị se so pịkịma Bẹtẹl ḅomẹ, ḍụẹịn ḍin anị pịrịḅịa ẹrẹchị se anị ḍipimẹ.

³⁰Ori anị seni oria furo iḍupu mị ḅie ḅụ ḍipimẹ, se ori na oria owuapụ awọma na ḍụẹịn ḍin anị pịrị se nwọ ḅẹmẹ, “Yei ị̀ya mịnaḅọ, ị̀ya mịnaḅọ!”

³¹Ini ḍụẹịn mị ḍipi so sịkị, ịkịankoroḅọ ḅe nwọse oria owuapụ awọma ḅẹmẹ, “À fịsa ḅẹḅẹ, ómine ị̀ seni mị iḍupu mị ḅie ḅụ ḍipi se ị̀ya oju mị se oriaye mị na kpekima ḅọlọlọ koroma.

³²Nyanaḅọ Ḅe tọn ḅaraḅụ Bẹtẹl agbamịẹ ẹbẹ mị ḅụ na pịkị Sameria amama ḅie tẹkẹ-a nyọ mamgba na ḅụ ọ̀ kọn ọkwẹịn ma mịẹḅịa gbarịmaka ḅaraḅụ.”

³³Jeroboam Izrẹl Amanyanaḅọ ḅe oria sima ḅụ ọ̀ pa vinpịkịkẹ, ọkụma ọ̀ pa yeḅụsọka furoma ḅie ḅụ agbamịẹapụ sẹlẹọkịaḅẹ mun ọ̀ nama koroma agbamịẹ ẹbẹ ma ọgọnọ fịrịnwẹngịḅịa ẹrẹchị. Agbamịẹḅọ sọ ḅiḅọ goyegoye ọ̀ nụḅọ se agbamịẹḅọ mịẹmẹ.

³⁴Mị si mị oria furo ḅụ ọ̀ mịẹse oria amada mị kan pịkị okorona okorona fa gbasoye-ẹ.