Read kirikeni 1 Amanyanapụ 15 Bible Online

1 Amanyanapụ 15 - kirikeni bible

1 Amanyanapụ 15

¹Jeroboam Nibat ya Izrẹl amanyanaḅọ ḅe amada maịn fa si karama kụra mị ḅie ḅụ, Abaịja ḅe ḅo Juda amanyanaḅọ sọmẹ,

²se tẹrẹ-a kụra ọ̀ nwọse ḅẹrẹtọnmẹ Jerusalẹm mị ḅie ḅụ. Meaka Absalọm ḅa ma anị nyọngọrọma-ẹ.

³Ḍawu ḅe mịẹ gbọrị sima ọ̀ nwọ mịẹmẹ, ọ̀ pịkị okorona okorona nyana ḅereni Nyanaḅọ, ọ̀ Tamụnọ Ḅe pịrịkẹ, oria ḅieju-ḍaḅọ Devid ḅe sime ọkụ mị.

⁴Ọkụma Devid ḅe tịḅị gose Nyanaḅọ, ọ̀ Tamụnọ Ḅe gbọrị owutọkụ seni Abaịja ḅe pịrịmẹ, anị ọ̀ ḅụọ ḅọrọ se Jerusalẹm mị ḅie ḅẹrẹtọn pịkị mịẹse Jerusalẹm mị chịẹkiri nyanaḅịaḅọ ḅe.

⁵Nyanaḅọ Ḅe mịn mị mịẹmẹ anịatịḅị Devid ḅe ori ọ̀ ḅụḅẹlẹye mịẹmẹ pịkị oria olokoma ḅie ò kokokaye ngịsị ofori-ẹ, Yuraya Hitaịḅọ ḅe ḅẹrẹ mị sikima ọkụma.

⁶Rihoboam ḅe na Jeroboam ḅe na ḅụ sakị ọmụ mị, anị ọkịmun Abaịja ḅe oria ḍumo ene mamgba nwọ lamẹ.

⁷Se Abaịja ḅe mịẹ jịnye layelaye Juda Amanyanapụ ma Ḅụa ḅẹrẹ olomu ḍiri mị ḅie gịẹịn waraḅẹ. Abaịja ḅe na Jeroboam ḅe na ini jụmḅọ jụmḅọ na ọmụ gbin-gbinmẹ.

⁸Abaịja ḅe fịmẹ se ini ò seni Devid opuama mị ḅie ḍipimẹ, se yayo Esa ḅe oria kiriḍinmamẹ amanyanaḅọ ḅaraḅụ.

⁹Jeroboam Izrẹl amanyanaḅọ ḅe amada, si karama kụra mị ḅie anị Esa ḅe ḅo Juda amanyanaḅọ sọye-ẹ,

¹⁰se kụra mesi na gbọrị kụra ọ̀ nwọse ḅẹrẹtọnmẹ Jerusalẹm mị ḅieḅụ. Meaka Absalọm ḅa ma anị oria opu nyengiḅọ ma-ẹ.

¹¹Esa ḅe ọ̀ Nyanaḅọ Ḅe ḅụḅẹlẹye mịẹmẹ, anị oria olomu ḍaḅọ Devid ḅe mịẹ ọkụ mị.

¹²Oru tẹkẹapụ tẹkẹ-a nyọma ḅụ sime sẹfị owuapụma na eremeni ma na, inimgba ori ini desinmẹ sẹ mị ḅie, ọ̀ pịkị tatarị amada se ò ḅo amadapụ ma mịẹ koroma oru mamgba tansinmẹ.

¹³Oria opu nyengiḅọ, Meaka ma, arịa amanyanaḅọ nyengiḅọ kiri mị ḅụ ori á sinmẹ, anịatịḅị Ashera, fịye pakụma si eremeni oru mị tọrụ á nwọ pakụmamẹ. Esa ḅe oru mị pẹlẹ gbin se anị dọkịmamẹ Kidrọn Pẹsịkiri mị ḅie.

¹⁴Esa ḅe orutẹkẹapụ tẹkẹ-a nyọ mamgba ọ̀ kansinkẹ nwọḅẹ sọnị Nyanaḅọ Ḅe ḅụ ò ḅereni nyanamẹ oria ḍumo ene mamgba ḅụ.

¹⁵Ḍawu ḅe seni osiḅụ wẹrị Tamụnọ Ḅe pịrịaye mamgba ò se Oputẹkẹwarị mị ḅie chukoromamẹ, pịkị ori ḅarana se osiḅụ wẹrị goli na seleḅa na seni mịẹaye ma na.

¹⁶Esa Juda Amanyanaḅọ ḅe na, pịkị Beasha Izrẹl Amanyanaḅọ ḅe na, sịkịsịkị ḅụ ini jụmḅọ jụmḅọ na ọmụ gbin-gbinmẹ, ini ḅẹrẹtọn kụrọ ḅụ sime sịkị mị mgba ḅụ.

¹⁷Beasha ḅe owuni se Juda mị ḍẹkịkelemamẹ se sakị Rema mị nama kụrọmamẹ owuni ḅaraḅụ, mịẹse ḅọrọmun Juda mị ḅie sọ pịkị anịa ḅie pakasoḅịa ẹmbẹ mamgba ọ̀ nwọ dachịẹmaḅịa ẹrẹchị.

¹⁸Anị Amanyanaḅọ Esa ḅe seleḅa mamgba na goli ma na ọkịye-ẹ, anị Oputẹkẹwarị mị na amanyanaḅọ warị mị na ḅie ḅụ kọn ayema, àrị se oria fịrịtịḅịnị ma ḅụ dapụ ḅụ ḅọrọ àrị seni Damaskọs ḅie ḅụ Amanyanaḅọ Bẹnhadad Siriaḅọ ḅe fịrịmamẹ, anị Tabrimọn yaḅe, oria opu ḍaḅọ anị Hiziọn ḅe-ẹ, mị ò seni ọ̀ fịrịma oku mị-ẹ.

¹⁹“Ye wa ḅịpị se ogbo sọḅaraḅụ gbọrịḅụ sime, mịna ḍapụma sime ọkụ mị. Mà seleḅa ma na goli ma na ị́ya ḍiepịrịaye-ẹ. Mịọkụ ị́rị́ na Amanyanaḅọ Beasha Izrẹlḅọ ḅe na nyana ḅịpị ogbosọ mị anị kansin, mịẹse owuni kpo ma ị́ya eke mị ḅụ ọ̀ nwọ chịn ọkịḅịa ọkụ.”

²⁰Amanyanaḅọ Bẹnhadad ḅe ò ḅerenimẹ Esa ḅe seni ọ̀ ḅẹye mị, se ori oria ọmụtịḅịdapụ ma na oria ọmụogbo mị na fịrịma se ini owu seni Izrẹl opuamama pakamẹ. Ini Ijọn mị na, Danị mị na, Ebẹl Bẹt Meaka mị na, anị Galili Ḍapa mị na kpeki nyọ mị, pịkị bebe Naftalaị eke mị mgba na ọkịmẹ ọmụ ḅie.

²¹Amanyanaḅọ Beasha ḅe pakaye mị naa sịkị, Rema mị nama kụrọma mị, ori anị dachịẹmamẹ, se ò so Tiza mị mun mẹ.

²²Anịsịkị Amanyanaḅọ Esa ḅe kụrọ pịrịmẹ bebe Juda ḅie mgba, gbọrịḅọ sọnị sikimaka ḅaraḅụ, na ini ḅarachụa Rema mị ḅie ḅụ Beasha ḅe seni ama mị nama kụrọma fịrị mị nwẹngị sime ḍụparịma na eje ikiḅa ma na tan so. Mà fịrịnwẹngịaye ma anị Esa ḅe ọkị seni Mizpa mị na Giba mị na, anị Bẹnjamin eke mị ḅụ simeye mị na nwọ nama kụrọmaye-ẹ.

²³Amanyanaḅọ Esa ḅe mịẹ jịn aye na oria kụrọ kuḅie ḅụ ọ̀ nwẹngị-a fịrịma na, ọ̀ nama kụrọma amama na, arịmgba gịẹịn waraḅẹ Juda Amanyanapụ ḅụa Ḅẹrẹ Olomu ḍiri mị ḅie ḅụ. Ọkụma ò ḅo olomu sịkị ḅụọ obi ori ikelimamẹ.

²⁴Esa ḅe ọ̀ fịmẹ se ini ò seni amanyanapụ iḍupuma ḅie ḍipimẹ Devid opuama mị ḅie ḅụ, se yayo Jẹhoshafat ḅe oria kiriḍinmamẹ amanyanaḅọ ḅaraḅụ.

²⁵Amanyanaḅọ Esa ḅe amada maịn karama kụra mị ḅie, anị Amanyanaḅọ Jeroboam ya Nedab ḅe ḅo Izrẹl amanyanaḅọ sọye-ẹ. Mama kụra anị ò seni ḅẹrẹtọnye-ẹ.

²⁶Ḍawu ḅe, ọ̀ tọrọkọ da se mịẹḅara mị, Nyanaḅọ Ḅe ḅụ ò si mịẹmẹ ọ̀ pịkị Izrẹl mị damun si ḅie chumẹ.

²⁷Beasha, Ahaịja ya Ịsaka sẹḅọ ḅe, ḅẹrẹḅia Nedab ḅe pịrị se ọ̀ ḅaamẹ anị Nedab ḅe na oria ọmụogbo mị na Gibetọn Filistia ḅie sime opuama mị ḍẹkị kelemarị sịkịḅụ.

²⁸Esa Juda Amanyanaḅọ ḅe amada tẹrẹ-a kụra karama kụra mị ḅie anị mịn mị mịẹye-ẹ. Anịẹrẹchị Beasha ḅe ḅo Nedab ḅe kiriḍinmamẹ Izrẹl amanyanaḅọ ḅaraḅụ.

²⁹Anị kirikiri ọ̀ sakị Jeroboam furo ḅie apụ mamgba ḅaasinmẹ. Anị Nyanaḅọ Ḅe oria fịrịnwẹngị ịkịankoroḅọ Ahaịja, Shịloḅọ ḅe ḅụ ḅọrọ ḍukosa ḅaraḅụ, na Jeroboam furo mị mgba ọ̀ ḅaafamaḅịa; gbọrịḅọ kẹngẹ sọnị kọn ẹkẹ.

³⁰Mịn mị mịẹmẹ, anịatịḅị Jeroboam ḅe ọ̀ Nyanaḅọ Izrẹl Tamụnọ Ḅe ịganị mị owoimamẹ, anị ọ̀ mịẹ-a sima na, ọ̀ pịkị Izrẹl mị mịẹse anị mịẹ-a sima na gose.

³¹Nedab ḅe mịẹ jịn aye layelaye Izrẹl Amanyanapụ ma ḅụa Ḅẹrẹ Olomu ḍiri mị ḅie ḅụ gịẹịn waraḅẹ.

³²Esa Juda Amanyanaḅọ ḅe na Beasha Izrẹl Amanyanaḅọ ḅe na sịkịsịkị ḅụ ini jụmḅọ jụmḅọ na ọmụ gbin gbinmẹ ini ḅẹrẹtọn kụrọ ḅụ sime mun la ene mamgba ḅụ.

³³Esa Juda Amanyanaḅọ ḅe amada tẹrẹ karama kụra mị ḅie, Beasha Ahaịja yaḅe ḅo amanyanaḅọ sọ bebe Izrẹl mị mgba pịrịmẹ, se Tiza ḅie anị ò sime ḅẹrẹtọnye-ẹ ọkịmun si inein-a kụra fịnjị nwọ lamẹ.

³⁴Jeroboam Amanyanaḅọ ḅe mịẹ ọkụ mị, Nyanaḅọ Ḅe ḅụ ò si mịẹmẹ pịkị Izrẹl mị damun si ḅie chumẹ.