Read kirikeni 1 Amanyanapụ 16 Bible Online

1 Amanyanapụ 16 - kirikeni bible

1 Amanyanapụ 16

¹Nyanaḅọ Ḅe ḍuko ịkịankoro Jẹhu, Hananị yaḅe pịrịmẹ na ọ̀ mịn oku mị daḅọrọma Beasha ḅe pịrị:

²“Ị́rị́ ị́ tomoniḅọ ḅụ ofori-ẹ, ọkụma àrị ị́ seni tịḅịnịḅọ mịẹ ị̀ya tomoni Izrẹlapụma pịrịmẹ. Mịọkụ ị́rị́ sọnị Jeroboam ḅe simịẹ ọkụ mịẹ se ị̀ya tomonima damun si ḅie chusam. Inia sima ị̀ya ịganị mị owoimasam,

³anịẹrẹchị ị́rị́ na ị́ furo mị na àrị ọ́ famaḅịa anị à seni Jeroboam ḅe mịẹ ọkụ mị.

⁴Ị́ furo ḅieḅọ ḅụ opuama mị ḅieḅụ fịḅọ goyegoye obiri nụḅọ pẹịḅịa, se sẹ mị ḅie ḅụ fịḅọ goyegoye, ẹdẹlẹ nụḅọ pẹịḅịa.”

⁵Beasha ḅe mịẹ jịnye layelaye na pịkị oria kụrọ kuḅie nyana fịrịmamgba na Izrẹl Amanyanapụ ma Ḅụa ḅẹrẹ olomu ḍiri mị ḅie gịẹịn waraḅẹ.

⁶Beasha ḅe ọ̀ fịmẹ se Tiza mị ḅie ini ò ḍipimẹ, se yayo Ela ḅe oria kiriḍinmamẹ amanyanaḅọ ḅaraḅụ.

⁷Nyanaḅọ Ḅe fịrịma Beasha ḅe na ò furo mị na pịrị si oku mị ịkịankoro Jẹhu ḅe anị daḅọrọmamẹ anị Beasha ḅe Nyanaḅọ Ḅe ḅụ mịẹ sima gose. Ò Nyanaḅọ Ḅe ịganị mị owoimamẹ, anị ọ̀ mịẹ siye mị kẹngẹ ḅụkẹ, anị Jeroboam amanyanaḅọ ḅe mịẹ si ḅara mị-ẹ, ọkụma pịkịna, ori anị bebe Jeroboam furo mị mgba nwọ ḅaaye ẹrẹchị-ẹ.

⁸Esa Izrẹl Amanyanaḅọ ḅe amada ineinfa soi karama kụra mị ḅie anị Ela Beasha yaḅe ḅo Izrẹl amanyanaḅọ sọye-ẹ, se mama kụra ọ̀ nwọse Tiza mị ḅieḅụ ḅẹrẹtọnmẹ.

⁹Zimraị, ọmụtịḅịnị ma ḅie gbọrịḅọ, anị amanyanaḅọ kporokporo ọmụarụ ma ḅụ gbọrị pẹkẹrẹ ḅụ tịḅịdaḅọ ḅe, ò seni ḅẹrẹḅiamẹ. Gbọrị ene Tiza mị ḅie Ela ḅe iru ọ̀ tọrụsọ-aḅẹ Aza warị ḅie, Aza ḅe anị amanyanaḅọ odo mị ḅie tịḅịdaḅọ ḅe-ẹ.

¹⁰Zimraị ḅe warị mị ḅie sọmun, se Ela ḅe ḅaamẹ se ḅo amanyanaḅọ sọ ọ̀ tịḅị ḍinmamẹ. Esa Juda Amanyanaḅọ ḅe amanyanaḅọ sọ tẹrẹfa kụra soi karama kụra mị ḅie anị mịn ye mị mịẹye-ẹ.

¹¹Zimraị ḅe ḅo amanyanaḅọ sọ kirikiri Beasha furo mị mgba ọ̀ ḅaafamamẹ. Oria owuapụ mịnapụ na pịkị ikiapụ na goyegoye ọ̀ ḅaamẹ.

¹²Anị Nyanaḅọ Ḅe ịkịankoroḅọ Jẹhu ḅe ḅụ ḅọrọ Beasha ḅe ḅụ ḍukosa ḅaraḅụ, Zimraị ḅe bebe Beasha furo mị mgba ọ̀ ḅaafamamẹ.

¹³Inia oru tẹkẹ-a mịẹmịẹaye ma na, ini pịkị Izrẹl mị damun si ḅie chuye gose. Beasha ḅe na yayo ḅe na ini Nyanaḅọ Izrẹl Tamụnọ Ḅe ịganị mị owoimamẹ.

¹⁴Ela ḅe mịẹ jịnye goyegoye Izrẹl Amanyanapụ ma Ḅụa ḅẹrẹ olomu ḍiri mị ḅie gịẹịn waraḅẹ.

¹⁵Esa Juda Amanyanaḅọ ḅe amada tẹrẹfa soi karama kụra mị ḅie, anị Zimraị ḅe ḅo Tiza sime ḅẹrẹtọn Izrẹl mị pịrịye-ẹ, sọnọma ḍin ḅụ. Izrẹl owuni kpo ma Filistia opuama Gibetọn mị ḍẹkị kelemarị sịkị ḅụ,

¹⁶anị ini naaye-ẹ na Zimraị ḅe ḅẹrẹḅia amanyanaḅọ ḅe pịrị se ọ̀ ḅaasam, anịḅụ mị inimgba anịju ḅụ inia ọmụtịḅịdaḅọ Omraị ḅe seni amanyanaḅọ kun Izrẹl mị pịrịye-ẹ.

¹⁷Omraị ḅe na oria owuni kpo mị na Gibetọn mị ḅie so se mun Tiza mị ḍẹkịkelemamẹ.

¹⁸Opuama mị ḅịkịsa ọkụ Zimraị ḅe nwọ ọrị sịkị, ò so ḅieju sime ọmụaye koko warị mị ḅie mun mẹ, amanyanaḅọ warị mị ḅie, se fịnị seni amanyanaḅọ warị mị ḅụ chụa se orumo mị ḅieḅụ fịmẹ.

¹⁹Mịn mị gose mịẹye anịatịḅị Nyanaḅọ Ḅe ḅụ ò si mịẹmẹ. Ọ̀ tọrọkọḅụ tatarị amada Jeroboam ḅe ḅara mị, ọ̀ Nyanaḅọ Ḅe ḅụḅẹlẹkaye mịẹmẹ oria sima ḅụ, ọ̀ pịkị Izrẹl mị damun si ḅie chumẹ.

²⁰Zimraị ḅe mịẹ jịn aye mamgba Izrẹl Amanyanapụ ma Ḅụa ḅẹrẹ olomu ḍiri mị ḅie gịẹịn waraḅẹ, pịkị ọ̀ ḅara wẹrịma siḅẹrẹḅia ọkụ mị na.

²¹Izrẹlapụma ini puamẹ, iniaḅụ dapụ ḅimẹ Tibnaị, Gaịnat yaḅe ḅo amanyanaḅọ sọ, ísíapụma pịkị Omraị ḅe pẹkẹrẹ ḅụ simemẹ.

²²Anịḅe kuluma, Omraị ḅe pẹkẹrẹ ḅụ sime apụma ḅarakụrọtẹịnmẹ. Tibnaị ḅe ọ̀ fịmẹ se Omraị ḅe ḅo amanyanaḅọ nwọ sọmẹ.

²³Anịẹrẹchị Esa Juda Amanyanaḅọ ḅe amanyana, kụra soi gbọrị kụra fịnjị karama kụra mị ḅie, Omraị ḅe ḅo Izrẹl amanyanaḅọ sọmẹ, se oyimaịn kụra fịnjị ọ̀ nwọse ḅẹrẹtọnmẹ. Tatarị sonio-a kụra ma ḅie Tiza mị ḅie ò sime ḅẹrẹtọnmẹ,

²⁴se ò ḅo Shẹma ini nwọse chịn gbọrị owuḅọ ḅara seleḅa pẹkẹrẹ-a jie ẹndẹ nwọse Sameria chịngị mị fẹmẹ. Omraị ḅe ọ̀ chịngị mị nama kụrọmamẹ, anịju ḅụ ori ama nama, se nwọse anị chịnmẹ Sameria, ò se Shẹma ḅe korumẹ, anị tatarị sịkị chịngị mị nyanaḅọ ḅe.

²⁵Omraị ḅe Nyanaḅọ Ḅe ḅụ si mịẹtẹịn tatarị ọ̀ tọrọkọ ḅụ amada ḅọrọsapụ ma nẹngịmẹ.

²⁶Ọ̀ tọrọkọda Jeroboam ḅe sime ọkụ mị, ọ̀ Nyanaḅọ Izrẹl Tamụnọ Ḅe ịganị mị owoimamẹ, anị oria sima ḅụ na, ọ̀ pịkị tomonima damun si ḅie chumẹ, pịkị oru tẹkẹ ḅụ na.

²⁷Omraị ḅe mịẹ jịn aye na, pịkị ọ̀ nwẹngị-a fịrị mamgba, Izrẹl amanyanapụ Ḅụa ḅẹrẹ olomu ḍiri mị ḅie gịẹịn waraḅẹ.

²⁸Omraị ḅe ọ̀ fịmẹ se Sameria ḅie ini ò ḍipimẹ, se yayo Ehab ḅe oria kiriḍinmamẹ amanyanaḅọ ḅaraḅụ.

²⁹Esa Juda Amanyanaḅọ ḅe amanyana maịnfa mesi karama kụra mị ḅie anị Ehab ḅe ḅo Izrẹl amanyanaḅọ sọye-ẹ, se simaịn kụra fịnjị ọ̀ nwọse Sameria mị ḅie sime ḅẹrẹtọnmẹ.

³⁰Ori Nyanaḅọ Ḅe ḅụ si mịẹtẹịn tatarị ọ̀ tọrọkọ amadapụ ma ḅụ ḅẹḅọ ḅẹḅọ nẹngịmẹ.

³¹Jeroboam Amanyanaḅọ ḅe mịẹ si kẹngẹ nwọ mịẹ mị ọ̀ karakẹ; ọ̀ pịkị somun Jezibẹl ma simemẹ anị Etbal Saịdọn Amanyanaḅọ ḅe ḅarọ ma, se Beal mị nwọ tẹkẹtẹkẹmẹ.

³²Sameria mị ḅieḅụ ọ̀ tẹkẹwarị nama Beal mị pịrịmẹ, pịkị agbamịẹ ẹbẹ nama anị pịrịmẹ, se anị ọkịmun tẹkẹwarị mị ḅie chukoromamẹ.

³³Ọ̀ pịkị Ashera-eremeni-oru mị tọrụ pakụmamẹ. Ehab ḅe ọ̀ Nyanaḅọ Ḅe ịganị mị owoimatẹịn ísí amanyanapụ mamgba nẹngịmẹ.

³⁴Ori amanyana sịkị ḅụ anị Haịẹl Bẹtẹlḅọ ḅe kpoto Jẹriko mị namaye-ẹ. Nyanaḅọ Ḅe Jọsụwa, Nọn yaḅe ḅụ ḅọrọ ḍukosa ḅaraḅụ, Haịẹl ḅe oria tatarị owutọkụ Abaịram ḅe ọ̀ fịmẹ, ọ̀ Jẹriko mị chukusẹkẹ-ḍụparị mị ḍipi sịkị mị ḅụ, oria furo pẹlẹ owutọkụ Sigọb ḅe sọnị ọ̀ fịmẹ anị onu ḅọkọ ma ọ̀ nwọ nama sịkị mị ḅụ.