Read kirikeni 1 Amanyanapụ 17 Bible Online

1 Amanyanapụ 17 - kirikeni bible

1 Amanyanapụ 17

¹Gbọrị ịkịankoroḅọ oria ẹrẹ anị Ịlaịja, Tisbị Giledị mị ḅie ḅụ, ò ḅomẹ, ọ̀ nwọse Amanyanaḅọ Ehab ḅe ḅẹmẹ, “Nyanaḅọ Ḅe ẹrẹ ḅụ, ḍumo sime Izrẹl Tamụnọ anị à fịrịnwẹngị pịrịarịḅọ ḅe, à ḍuko ị́ pịrịaḅẹ na mịmgba ọkịmun mama kụra anịkanịka tẹrẹ-a kụra sịkị ḅụ ijiriji anịkanịka ene ḅarị koro ẹkẹ ọkịmun anị koro à nwọḅẹ sịkị laḅịa.”

²Anịsịkị Nyanaḅọ Ḅe nwọse Ịlaịja ḅe ḅẹmẹ:

³“Mịju so se mun ịrụapakapaka nyọ daọrụ ḅụ Kẹrit mị na kpeki nyọ mị ḅụ ị́ ḅụ ḅọị.

⁴Kala iderimengi mị ị́ ḅuḅịa mengi seni ị́ pịrịḅịa, à pịkị ḍụẹịn ama ọḅọkọ ma fịrịmasam na àrị fịye ọkịkịḅo ị́ pịrịpịrị anịju.”

⁵Ịlaịja ḅe ọ̀ ḅịpịpokimẹ Nyanaḅọ Ḅe tọn ọ̀ pịrịye mị ḅụ, se ò so Kẹrit iderimengi mị nyọ mun simemẹ.

⁶Iderimengi mị ḅụ ḅo mengi mị ọ̀ nwọ ḅumẹ, se ḍụẹịn ama ọḅọkọ ma pịkị fịturu na nama na ọkịḅo ọ̀ pịrịpịrịmẹ dede na saso na goyegoye ḅụ.

⁷Sịkị kele ḅọrọ sịkị iderimengi mị samịnamẹ ene korokaye ẹrẹchị.

⁸Anịsịkị Nyanaḅọ Ḅe nwọse Ịlaịja ḅe ḅẹmẹ,

⁹“Mịọkụ so Zarẹfat ama mị mun Saịdọn mị na kpekiye mị, se anịju ḅụ sime. À tọn deḅọfịsa gbọrị eremeniḅọ pịrịsam, anịju angaḅọ, na á fịye seni ị́ pịrịpịrị.”

¹⁰Anị Ịlaịja ḅe ò so Zarẹfat mị mun ye-ẹ, se ò ḅo ama mị onu ḅọkọ mị lasịkị, deḅọfịsa gbọrị eremeniḅọ ọ̀ nwọ ọrịmẹ á sanga tan aḅẹ. Ọ̀ nwọse á ḅẹmẹ, “Sisi kele mengi se ị̀ pịrị à ḅu.”

¹¹Se á mun anị ọkịḅo omun-arị sịkị, ori á chịn se nwọ ḅẹmẹ, “Pasisi pịkị kele fịturu na se chụaḅo.”

¹²Á nwọse ọ̀ pẹkẹrẹmẹ, “Nyanaḅọ ị́ Tamụnọ ḍumogbasoḅọ Ḅe ẹrẹḅụ à yekarị fịmẹ, à fịturu nyanakẹ, ḅarakuḅu ḅeinka fịlawa kalaye kẹngẹ anị bọlị mị ḅie sime wararịye-ẹ, pịkị oliv pulo kalaye na anị ojongo mị ḅie kọnye-ẹ. À ḅo mịju sanga kalaye tan eḅomẹ se so warị mun kọn kalaye mị mịẹ, se ị̀ya tọkụ ḅe na ị̀rị̀ na pịrịḅịa ẹrẹchị. Anị mịna kuluma fịye mị-ẹ, se wa ḅo ḅuruḅaa mị ḅie sime fịḅịa.”

¹³“Ḅalafama,” Ịlaịja ḅe nwọse á ḅẹmẹ. “Mun ị́ya fịye mị karakarama. Ọkụma ị́ nyanaye mị ḅụ, tatarị gbọrị kala okpokpo nwọ mịẹ ḅo ị̀ pịrị, anịsịkị kọnye mị karakarama seni ị́rị́ na ị́ya tọkụ ḅe na pịrị.

¹⁴Anịatịḅị Nyanaḅọ, Izrẹl Tamụnọ Ḅe nwọ ḅẹmẹ, ‘Ị́ya bọlị mị ḅie fịlawa kuno-ẹkẹ, ojongo mị ḅie sọnị kunoka mun Ị̀rị̀, Nyanaḅọ Ḅe, ene koromaḅịa ene mị laḅịa.’”

¹⁵Deḅọfịsa eremeniḅọ ma somun Ịlaịja ḅe seni á ḅẹ ḅara mị mịẹmẹ, se inimgba ḅakama fịye nyana mun tọn-a ḍin lamẹ.

¹⁶Anị Nyanaḅọ Ḅe Ịlaịja ḅe ḅụ ḅọrọ yeḅerenisa ḅaraḅụ; bọlị mị ngịsị fịlawa ḅie kunokẹ pịkị ojongo mị sọnị pulo anịa ḅie kunokẹ.

¹⁷Sịkị ḅo ḅọrọ sịkị deḅọfịsa eremeniḅọ ma yayo ḅe ori obimẹ; ene ḅene-ḅene obi mị sitẹịnmẹ, se anịḅe kuluma ọ̀ fịmẹ.

¹⁸À nwọse Ịlaịja ḅe ḅẹmẹ, “Tamụnọ Tomoniḅọ, cheye ẹrẹchị ị́ mịn mị se ị̀ mịẹ? Ị́ mịanga ḅo ị̀ya sima se Tamụnọ Ḅe ḅiekoroma se ḅo mịẹse ị̀ya tọkụ ḅe fịmẹ?”

¹⁹Ịlaịja ḅe nwọse á ḅẹmẹ, “Tọkụ ḅe seni ị̀ pịrị.” Ori á ḅara tọkụ ḅe ọkịmẹ, ò deki so ọgọnọju ḅụ ò sime ḅie mị mun se ò seni oria mọnọye mị ọgọnọ ḅọlọlọmẹ.

²⁰Anịsịkị ori oloku tẹkẹmẹ, “Yei Nyanaḅọ, ị̀ Tamụnọ, cheye ẹrẹchị nwọ sime tẹmẹtaịnmaye ị́ nwọse ma deḅọfịsa eremeniḅọ ma mịẹ? Árị iḅiọkụ iḅi ḍumo se ị̀rị̀ na anga se ị̀ ḍikiḍikimẹ, mịọkụ yayo ḅe ị́ ọ̀ ḅaasam!”

²¹Anịsịkị Ịlaịja ḅe tẹrẹ-a sịkị seni tọkụ ḅe ọgọnọ ịsụn ḅọlọlọ se tẹkẹmẹ, “Yei Nyanaḅọ ị̀ Tamụnọ, mịẹse ḅe tọkụ ḅe ò ḍumo!”

²²Nyanaḅọ Ḅe Ịlaịja ḅe kọn tẹkẹ mị pẹkẹrẹmẹ; tọkụ ḅe sakị ịnyọ sara se ḍumomẹ.

²³Ịlaịja ḅe tọkụ ḅe deki koro nyọngọrọma damamun se nwọse á ḅẹmẹ, “Ḍiki, ị́ya tọkụ ḅe ò ḍumosam!”

²⁴Á nwọse ọ̀ pẹkẹrẹmẹ, “Mịọkụ mị à kọkọma nemisaye-ẹ, na ị́rị́ Tamụnọ tomoniḅọ-ẹ, na Nyanaḅọ Ḅe pịkị kọkọma ị́ ḅụ ḅọrọ ọkwẹịnmẹ!”