Read kirikeni 1 Amanyanapụ 18 Bible Online

1 Amanyanapụ 18 - kirikeni bible

1 Amanyanapụ 18

¹Sịkị kele ḅọrọseso, se kụrọ ịrụakpoin sọ tẹrẹ karama kụra mị ḅie Nyanaḅọ Ḅe nwọse Ịlaịja ḅe ḅẹmẹ, “Mun ị́ ḅụ ḍiepakụma Ehab Amanyanaḅọ ḅe pịrị, se àrị ene koromaḅịa.”

²Anị Ịlaịja ḅe paka mun ye-ẹ. Ḅuruḅa mị Sameria mị ḅie anị sitẹịnmẹ,

³anị Ehab ḅe Obadaya ḅe chịn ọkịye-ẹ, anị amanyanaḅọ warị mị ḅie tịḅịdaḅọ ḅe. (Obadaya ḅe anị karakara ḅara seni Nyanaḅọ Ḅe tẹkẹarịḅọ-ẹ,

⁴se Jezibẹl ma Nyanaḅọ Ḅe ịkịankoroapụma ḅaa àrị sịkị ḅụ Obadaya ḅe iniaḅụ kịnị-a sọnọasi ọ̀ nwọ seni pokolo ma ḅie ḅọịmẹ mama kpo ḅụ, mesi oyi fịnjị gbọrị anga gbọrị anga, ọ̀ pịkị fịaye na mengi na se mun ini pịrịpịrịmẹ.)

⁵Ehab ḅe nwọse Obadaya ḅe ḅẹmẹ, “Ye wa mun kiri ḅie pakaḅo àrị mengi goyegoye na pịkị iderimengi-kiri goyegoye na nwọ ḍiki ama mị ḅie ḅụ nwọfa wa ineda osuein nyana se asụnma na yepụra asụnma na pịrị se àrị ḍumoḅịa otuḅo. Mịẹse mịna namama ḅie gbọrịye sọnị fị ẹka ḅara.”

⁶Ọrụ ḅọḅọ iniaḅụ daḅịa pẹkẹrẹ ini nwọse ḅịpịse ogbosọ se anga kịrịkịrị nyọ nwọ damẹ, ini ḍọkịarịye mị ḅụ.

⁷Obadaya ḅe nwẹngịma mun-arị sịkị, ọ̀ bẹkẹma Ịlaịja ḅe na ịrịamẹ. Ori ò nemimẹ, ọ̀ tịḅịtu ọ̀ pịrị, se ò gbelamẹ, “Anịḅọ kọkọma ị́rị́, ị̀ nyanaḅọ?”

⁸“Iin, ị̀rị̀ anị Ịlaịja ḅe-ẹ,” ọ̀ nwọse ọ̀ pẹkẹrẹmẹ, “Mun ḍuko ị́ nyana amanyanaḅọ ḅe pịrị na mịju àrị omi-ẹ.”

⁹Obadaya ḅe nwọse ọ̀ pẹkẹrẹmẹ, “Cheye à nwọ mịẹ ị́ gose ị̀ se mun Ehab Amanyanaḅọ ḅe ḅara ḅie ḅụ ḅaa ḅụ chuḅịa ẹrẹchị ḅiarịye?

¹⁰Ḍumo sime Nyanaḅọ, ị́ Tamụnọ Ḅe à nwọ karị fịmẹ, amanyanaḅọ ḅe, bebe tomonikiri ḅie sime sẹ sẹ mamgba ḅie ori ị́ ḍọkịmẹ, se anị ama mị ḅie ḅẹrẹtọnḅọ ḅe ḅọrọ ḅẹmẹ na ị́ ofori-ẹ ḅẹḅẹ, Ehab ḅe ò ḅiḅịa ori ḅẹrẹtọnḅọ ḅe ò yekarịfị na ini kọkọma ị́ ọrịkẹ.

¹¹Se mịọkụ ị́ ḅimẹ na ị̀rị̀ mun ḍuko ọ̀ pịrị na mịju ị́ omi-ẹ?

¹²Nemikase Nyanaḅọ Ḅe tẹmẹ mị ị̀ ḅụọ pọkọ kirikiri ị́ dekiso mun jịn nyọ koroma ọkụma à che ḍukoḅe? Anịsịkị à nemikase ḍuko Ehab ḅe pịrịmẹ na mịju ị́ omi-ẹ, se ọ̀ ḅarị ineda ị́ nyanaḅoka ọkụma, ori ị̀ ḅaaḅịa. Se ḅiekoroma na ini ị̀ yi sịkị ngịsị ị̀rị̀ anị karakara ḅara se Nyanaḅọ Ḅe tẹkẹarịḅọ-ẹ.

¹³Ma ị́ naaka na Jezibẹl ma Nyanaḅọ Ḅe ịkịankoroapụma ḅaa àrị sịkị ḅụ, inia ḅie ḅụ kịnị-a sọnọasi à nwọse pokolo ma ḅie ḅọịmẹ mama kpo ḅụ, mesi oyi fịnjị gbọrị anga, gbọrị anga ḅụ, pịkị fịaye na mengi na se ini pịrịmẹ nwọḅẹye mị?

¹⁴Nde ị́ ị̀ ḅẹḅịa ọkụ na à mun ḍuko amanyanaḅọ ḅe pịrị na mịju ị́ omi-ẹ? Ori ị̀ ḅaaḅịa!”

¹⁵Ịlaịja ḅe nwọse ọ̀ pẹkẹrẹmẹ, “Ḍumo sime Kụrọmamgba Nyanaḅọ, à fịrịnwẹngị pịrịarịḅọ Ḅe ẹrẹ ḅụ, à yeḅerenimẹ na mịmgba àrị ị̀ ḅụ se amanyanaḅọ ḅe ḍieḅịa.”

¹⁶Anị Obadaya ḅe so Amanyanaḅọ Ehab ḅe damamun se ḍuko ọ̀ pịrịye-ẹ, se Ehab ḅe so mun Ịlaịja ḅe na ịrịa-ẹmun mẹ.

¹⁷Ehab ḅe ori ọrị sịkị, ọ̀ nwọ ḅẹmẹ, “Sembe mị ị́rị́, Izrẹl mị ḅụfụkamatẹịn arịḅọ ḅe!”

¹⁸Ịlaịja ḅe nwọse ọ̀ pẹkẹrẹmẹ, “Ị̀rị̀ ḅụfụka pịrịḅọkẹ.” “Ị́rị́-ẹ, ị́rị́ na ị́ ḍaḅe na-ẹ. Ọ́ Nyanaḅọ Ḅe ḅịpịpokikẹ ọ̀ chụa olokoma ḅie se Beal oru ma tẹkẹaḅẹ.

¹⁹Mịọkụ bebe Izrẹlapụ mamgba ḅẹ, na iniḅo ị̀rị̀ na ịrịa Kamẹl Tụndụ mị nyọ ḅụ. Beal ịkịankoroapụ kịnị ẹndẹ na mesi-oyi fịnjịma na pịkị Ashera eremeni oru ma ịkịankoroapụ kịnị ẹndẹ ma na ini nwọse chụa ḅo, anị Amanyanaḅọ ta Jezibẹl ma mịẹkụrọma apụma.”

²⁰Anị Ehab ḅe bebe Izrẹlapụma na pịkị Beal ịkịankoroapụ mamgba na chịn koḅirimaye-ẹ Kamẹl Tụndụ mị nyọ ḅụ.

²¹Ịlaịja ḅe tomonima damamun se nwọse ini ḅẹmẹ, “Anị tụtụ ḅọlọ mun nde sịkị lasịkị re ómine ineda ọ́mịna ḅụ ma kaịnḅo ḅe? Nemikase Nyanaḅọ Ḅe anị Tamụnọ Ḅe-ẹ ḅẹḅẹ, ómine ọ̀ tẹkẹ; ọkụma nemikase Beal mị anị Tamụnọ Ḅe-ẹ ḅẹḅẹ, ómine ọ̀ tẹkẹ!” Ọkụma tomonima gbọrị ọkwẹịn sọnị ini kọnkẹ.

²²Anịsịkị Ịlaịja ḅe nwọ ḅẹmẹ, “Ị̀rị̀ kẹngẹ kọnmẹ Nyanaḅọ Ḅe oria ịkịankoroapụma ḅie, ọkụma Beal ịkịankoroapụma ḅie kịnị ẹndẹ na mesi-oyi fịnjị omi-ẹ.

²³Mama owoi nambulo ọ́ nwọse ḅo; ye Beal ịkịankoroapụma gbọrịwu ọkị, ọ̀ ḅaa, ọ̀ kẹnị, se ò seni fịnị ọgọnọ gbana, ọkụma fịnị tọnjị anịa ḅụ chụa ma, ị̀rị̀ pịkị ísí owoi nambulo ḅe seni anị gbọrị ḅara mị mịẹḅịa.

²⁴Anịsịkị ye Beal ịkịankoroapụma inia oru ḅe tẹkẹ, ị̀rị̀ pịkị Nyanaḅọ Ḅe tẹkẹḅịa, se fịnị koromaḅo tẹkẹ mị pẹkẹrẹḅọ goyegoye ori anị Tamụnọ Ḅe-ẹ.” Tomonima olokumẹ na inia ḅịpịsọmẹ.

²⁵Anịsịkị Ịlaịja ḅe nwọse Beal ịkịankoroapụma ḅẹmẹ, “Ómine nwọ ḅaka apụ-ẹ ḅẹ sịkị, ọ́ gbọrị owoi nambulo ọkị se tatarị ọ́mịna agba mị mịẹ. Ómine ọ́mịna oru ḅe tẹkẹ, ọkụma ọ́ fịnị tọnjị fịnị mị ḅụ chụama.”

²⁶Ini ọkịḅo ini pịrị owoi nambulo ḅe ini nwọ ọkị, ọ̀ karakarama, se Beal mị tẹkẹ nweni eneogboin nwọ lamẹ. Ini oloku se nwọ ḅẹmẹ, “Wa pẹkẹrẹ Beal!” se ini sakị sẹkịsẹkị ini pike agbamịẹ ẹbẹ mị kelemamẹ. Ọkụma gbọrị pẹkẹrẹ ḅịpị sọnị ḅokẹ.

²⁷Eneogboin mị ḅụ Ịlaịja ḅe sakị ini pụamẹ: “Ómine oloku tẹkẹ! Ori tamụnọ-ẹ! Sosi ori enekaka ḍawọ kọn aḅẹ, anịkanịka ori ịnyọsaraḅẹ, anịkanịka ò yemun waraḅẹ. Anịkanịka sosi ọ̀ mọnọaḅẹ, anịẹrẹchị ómine owo sịsẹma!”

²⁸Anị ịkịankoroapụma oloku tẹkẹ se kingi ma na kongo ma na se iniaḅụma pẹlẹsara, inia mịẹmịẹye sime ḅaraḅụ, ọkị nweni pulo iniaḅụ sara sịkị lamẹ.

²⁹Ini pa inia oruaye ma karị na chịn oloku na ḅụ sime nweni eneogboin ḅịpị ḅọrọ sịkị lamẹ; ọkụma pẹkẹrẹ ḅịpị ofori-ẹ, fie se ini naaye sọnị ofori-ẹ.

³⁰Anịsịkị Ịlaịja ḅe nwọse tomonima ḅẹmẹ, “Ó kpekima ị̀ damaḅo,” se inimgba ḅo ò gbori kelemamẹ. Ọ̀ sakị Nyanaḅọ Ḅe agbamịẹ ẹbẹ mị tẹlịmamẹ anị kansarasaye mị.

³¹Oyimaịn ḍụparị fịnjị ọ̀ nwọ ọkịmẹ, gbọrịye gbọrị furo, gbọrị furo anị Jekọb owuapụ awọma ẹrẹma ini nwọse chịn oyimaịn furo fịnjịma, anị Nyanaḅọ Ḅe Izrẹl nwọse chịnḅọ ḅe.

³²Mà ḍụparịma ọ̀ nwọse kpoto agbamịẹ ẹbẹ mị namamẹ se Nyanaḅọ Ḅe tẹkẹḅịa ẹrẹchị. Ò kiri soku anị kelemamẹ, anị ineda inein-a galọnị laḅịa mengi dekiḅịa anị ḍụḅa la ḅaraḅụ.

³³Anịsịkị ọ̀ fịnị mị seni agbamịẹ ẹbẹ mị ọgọnọ gbanamẹ, ori owoi nambulo ḅe kẹnị se fịnị mị ọgọnọ gbanamẹ se nwọ ḅẹmẹ, “Ó mengi se inein-a ojongo ma ḅie chụa ḅeinma se anị seni agbamịẹ nama mị na fịnị mị na ọgọnọ sara.” Ini ọkọ mịẹmẹ,

³⁴se ọ̀ nwọse ini ḅẹmẹ, “Ọ́ pịkịna sara”—ini pịkị ọkọ mịẹmẹ. Ọ̀ nwọse ini ḅẹmẹ, “Ọ́ pịkịna jịn gbọrị sịkị se ọkọ mịẹ,”—se ini ọkọ mịẹmẹ.

³⁵Mengi mị agbamịẹ ẹbẹ mị ḅụ pukoro mun ini soku kiri mị ḅeinmamẹ.

³⁶Eneogboin ḅiri agbamịẹ sịkị mị lasịkị, Ịlaịja ḅe agbamịẹ ẹbẹ mị sime nyọ mun se tẹkẹmẹ, “Yei Nyanaḅọ, Ebraham na, Aịzịk na pịkị Jekọb na Tamụnọ, ḍiepakụma mịọkụ na ị́rị́ anị Izrẹl Tamụnọ Ḅe-ẹ na ị̀rị̀ anị pịkị ị́ya fịrịnwẹngịḅọ-ẹ na ị́rị́ tọn ḅaraḅụ anị à ma mamgba mịẹye-ẹ.

³⁷Ị̀ pẹkẹrẹ Nyanaḅọ, ị̀ pẹkẹrẹ, mịẹse mịnapụma nemiḅịa ọkụ na ị́rị́ Nyanaḅọ Ḅe, anị Tamụnọ Ḅe-ẹ, na ị́ pịkị kpoto ini ọkị seni ị́ ḅụ pịrịaḅẹ.”

³⁸Nyanaḅọ Ḅe fịnị koroma ḅo se agba mị dọkịma famamẹ, fịnị pẹkẹrẹ ma na, pịkị ḍụparịma na, kiri mị na dọkịma fama, se ini soku kiri mị ḅie sime mengi mị mgba samịna famamẹ.

³⁹Tomonima mịn mị ọrị sịkị, ini iniaḅụ se chama kiri gbin se olokumẹ, “Nyanaḅọ Ḅe ori anị Tamụnọ Ḅe-ẹ; Nyanaḅọ Ḅe kẹngẹ anị Tamụnọ Ḅe-ẹ!”

⁴⁰Ịlaịja ḅe kụrọ pịrịmẹ, “Ọ́ Beal ịkịankoroapụ kun, ó ḅereni se inia ḅie gbọrịḅọ sọnị soma!” Tomonima inimgba kunmẹ, se Ịlaịja ḅe ini se Kishọn Kala Iderimengi nyọ mị mun se ini ḅaamẹ.

⁴¹Anịsịkị Ịlaịja ḅe nwọse Ehab Amanyanaḅọ ḅe ḅẹmẹ, “Mịọkụ somun yefị. Ene ḅie fiemaḅo se à naamẹ.”

⁴²Ehab ḅe somun yefịḅịa sịkị, Ịlaịja ḅe Kamẹl Tụndụ mị tanjị mun ọgọnọju lamẹ. Anịju ḅụ ori ọ̀ tọrụ tu kirida, se ọ̀ tịḅị seni ọ̀ ḅụọ ẹmbẹ ḅie chu simemẹ.

⁴³“Mun tọrụ se opu tọrụ mị da se nyọ mị ḍiki,” ọ̀ nwọse oria fịrịnwẹngịḅọ ḅe ḅẹmẹ. Fịrịnwẹngịḅọ ḅe mun se vinpịkịḅo se nwọse ọ̀ ḅẹmẹ, “Gbọrịye sọnị àrị ọrịkẹ.” Sọnọma sịkị Ịlaịja ḅe nwọse ọ̀ ḅẹmẹ na ò mun ḍiki.

⁴⁴Sọnọma sịkị karamaye mị ḅụ fịrịnwẹngịḅọ ḅe vinpịkịḅo se nwọ ḅẹmẹ, “Ḍụḅa tomoniḅọ ḅara nẹngịka soḅuno à nwọ ọrịmẹ opu tọrụ mị ḅụ anị ḅoaḅẹ.” Ịlaịja ḅe oria fịrịnwẹngịḅọ ḅe fịrịmamẹ, “Mun ḍuko Ehab Amanyanaḅọ ḅe pịrị na ori oria kporokporo mị ḅụkụlọ se be jua so warị mun ene mị ma ḅo ọ̀ dachịẹmaka simeogbo.”

⁴⁵Ḅoka kala sịkị ḅụ sotọrụ mị kanakana soḅuno anị gbẹịnsam, fọrụ sakị fiesam, se ene sakị ikuma koromẹ. Ehab ḅe be oria kporokporo mị ḅụkụlọ se be jua so Jezril mun mẹ.

⁴⁶Nyanaḅọ Ḅe kụrọ mị ḅo Ịlaịja ḅe ọgọnọ gbanamẹ; ori oria ḅụchụayema se ò ḅirikun se mangị Ehab ḅe ḅọrọ mun Jezril mị onu ḅọkọ mị lamẹ.