Read kirikeni 1 Amanyanapụ 2 Bible Online

1 Amanyanapụ 2 - kirikeni bible

1 Amanyanapụ 2

¹Devid ḅe ọ̀ fịḅịa sịkị ḅụ, ọ̀ yayo Sọlọmọn ḅe chịn se kuluma ḅụ tọn ọ̀ pịrị se mịẹ ḅẹ ayema:

²“À fịḅịa sịkị lasam. Kụrọ kuḅie nyana pịkị ị́ mịẹḅịaye nwọ nemi,

³se Nyanaḅọ ị́ Tamụnọ Ḅe tọn ị́ pịrị na mịẹ nwọḅẹ ayema mịẹ. Oria olokoma na ọ̀ tọn aye mamgba na koko, anị Moziz olokoma ḅie ini àrị gịẹịn ọkụ mị, mịẹse ị́ mun-anga-mun-anga ị́ lọkọlọkọḅịa ọkụ ị́rị́ nyana se mịẹyemịẹye ḅụ.

⁴Ị́ nemikase ọ̀ ḅịpị pokimẹ ḅẹḅẹ, Nyanaḅọ Ḅe ò ḅereniye mị ori anị mịẹḅịa, ò ḍuko ị̀ pịrị sịkị mị ḅụ, ọ̀ nwọḅẹmẹ na, ị̀ furo ḅie apụ mị Izrẹl ḅie ḅẹrẹtọn ḅịaye-ẹ, ini tọrụkweinma inia kuḅie mgba na, tẹmẹ na ḅụ ḅereni nyana oria olokoma koko sịkị goyegoye ḅụ.

⁵“Jịnye pịkị omi-ẹ. Joab ḅe seni ị̀ mịẹye mị ị́ ḅiekoroma, anị ori Izrẹl mama ọmụtịḅịdapụ ma ḅaa ye mị, Abna, Na yaḅe na pịkị Amasa, Jẹta yaḅe na. Ị́ se ḅiekoroma ọ̀ wẹrị deinma sịkị ḅụ ini nini ọkụ mị, anị ọmụ sịkị ḅụ ini ḅaa apụma tịḅị sowuḅi ḅụ. Ḅẹrẹ nemikapụ ọ̀ nwọ ḅaamẹ se mịọkụ ọ̀ mịẹye mị ị̀ya ọgọnọ mịn anị ḅo gbanaye-ẹ, à pịkị anịa tọrụsiọrị nwọ damẹ.

⁶Ị́ mịẹḅịaye ị́ nemimẹ; ngịsị ḅereni ma se ori amatẹmẹso fị kọn.”

⁷“Ọkụma Bazilaị Giledịḅọ ḅe owuapụ awọma iḅi anga seni ini na kọn, pịkị iḅiọkụma ini ḍikiḍiki, anịatịḅị ini iḅi anga seni ị̀rị̀ na kọnmẹ, ị́ mbire Absalọm ḅe ḅụ à mangịarị sịkị mị.

⁸“Pịkị Shimẹaị Gira yaḅe, Bahurim amaḅọ ḅe, Bẹnjamin ḅieḅụ. Ḅụakụma ḅara ọ̀ nwọse worinime se ị̀ pịrịmẹ à so Mahaneim mị mun ene mị ḅụ, ọkụma ò ḅo Jọdan Tọrụ mị ḅụ ị̀rị̀ na ịrịa sịkị, à Nyanaḅọ Ḅe ẹrẹ ḅụ kụrọma yeḅereni ọ̀ pịrịmẹ na àrị ọ̀ ḅaa-ẹkẹ.

⁹Ọkụma ị́rị́ fomuḅara se ọ̀ pịrịka ḅaraḅụ ọ̀ wẹrịsoma. Ị́ mịẹḅịaye ị́ nemimẹ, ọrị na ị́ ọ̀ ḅaamẹ.”

¹⁰Devid ḅe fị̀mẹ se ini ò seni Devid Opuama mị ḅieḅụ ḍipimẹ.

¹¹Kụra mesi ọ̀ nwọse amanyanaḅọ sọ Izrẹl mị pịrịmẹ, sọnọma kụra ọ̀ nwọse Hibrọn ḅie sime amadamẹ se kụra soi tẹrẹ-a kụra fịnjị ọ̀ nwọse Jerusalẹm ḅie sime amadamẹ.

¹²Sọlọmọn ḅe ḍawu Devid ḅe kiriḍinmamẹ amanyanaḅọ ḅaraḅụ, se oria amada kụrọ mị ini iḅiọkụma anị mịẹkụrọmamẹ.

¹³Anịsịkị Adonaịja, anị Hagit ma yayo ḅe, so Batshiba, Sọlọmọn nyengima damamunmẹ. Á nwọse ò gbelamẹ, “Mị ḅo ikiaḅọ la ḅara mọnọ?” Ori nwọse á pẹkẹrẹmẹ, “Ọkọpakamẹ,”

¹⁴se ọ̀ pịkị nwọ ḅẹmẹ, “Àrị ị́ ḅara ḅiḅịaye omi-ẹ.” Árị nwọse ò gbelamẹ, “Anị cheye?”

¹⁵Ọ̀ nwọse á pẹkẹrẹmẹ, “Ị́ nemimẹ na ị̀rị̀ anị mgbọkụ amanyanaḅọ sọḅịaye-ẹ Izrẹl mị ḅie simeḅọ goyegoye pịkị tọrụ se ọkọ kịẹnmamẹ. Ọkụma anị jịn ḅara pakamẹ, se ị̀ mbire ḅe ḅo amanyanaḅọ sọmẹ, anịatịḅị anị Nyanaḅọ Ḅe ḅereni ọkụ mị-ẹ.

¹⁶Mịọkụ gbọrịye à nwọ ḅiḅịa; sisi, tọrụ seni ị̀ kpọma.” Batshiba ma nwọse ò gbelamẹ, “Anị cheye?”

¹⁷Ọ̀ nwọse á pẹkẹrẹmẹ, “Sisi Amanyanaḅọ Sọlọmọn ḅe ḅẹ ori Abishag, Shụnẹm eremeni tọkụ ma seni ị̀ pịrị àrị á sime. À nemimẹ na ori ị́ ḅịpị sịkị ẹkẹ.”

¹⁸Á nwọse ọ̀ pẹkẹrẹmẹ, “Opuma iḅimẹ, àrị ọkwẹịn amanyanaḅọ ḅe pịrịḅịa ị́ gose.”

¹⁹Anịẹrẹchị Batshiba ma so amanyanaḅọ ḅe damamunmẹ Adonaịja ḅe gose ori na ọkwẹịnma ḅịa ẹrẹchị. Amanyanaḅọ ḅe sịsẹ nyọngọrọma kereni se tịḅịtu á pịrịmẹ. Anịsịkị ori oria amanyana ngada mị ọgọnọ simemẹ se ini pịkị jịn ịkasịye ọkịḅo se á seni oria amaḅaranga ḅụ simemẹ.

²⁰Á nwọse ọ̀ ḅẹmẹ, “Àrị ị́ ḅara gbọrị ḅarachụa kalaye nwọ ḅiḅịa. Sisi, ị̀ ḅịpị sịkịma.” Ọ̀ nwọse á gbelamẹ, “Anị cheye, nyengiḅọ?” “Àrị ị́ ḅịpị sịkị ẹkẹ.”

²¹Á nwọse ọ̀ pẹkẹrẹmẹ, “Ye ị́ mbire Adonaịja ḅe Abishag ma ọkị sime.”

²²Amanyanaḅọ ḅe nwọse á gbelamẹ, “Cheye ẹrẹchị ị́ ḅe na àrị Abishag ma seni ọ̀ pịrị? Ị́ pịkị ineda ị̀ ḅẹḅịa na amanyana ngada mị sọnị à seni ọ̀ pịrị. Ori ị̀ mbire sẹnịḅọ-ẹ, pịkị Abaịata agbamịẹḅọ ḅe na Joab ḅe na oria pẹkẹrẹ ḅụ ini omi-ẹ!”

²³Anị Sọlọmọn ḅe Nyanaḅọ Ḅe ẹrẹ ḅụ yeḅereni kụrọmaye-ẹ, “Ye Tamụnọ Ḅe ị̀ fomuḅaa à nemikase Adonaịja ḅe mịẹse ori ò ḍumo se mị ọ̀ nwọ ḅiarịye mị gbẹịnkẹ ḅẹḅẹ!

²⁴Nyanaḅọ Ḅe ori ị̀ mịẹkụrọmasam ị̀ ḍa Devid ḅe amanyana ngada mị ọgọnọ ḅụ; ò ḅereniye mị ori anị mịẹsam se amanyanakiri mị seni ị̀rị̀ na ị̀ furo ḅie apụma na pịrịsam. À ḍumo sime Nyanaḅọ Ḅe karịfịmẹ na Adonaịja ḅe mịmgba ḅụ ọ̀ fịḅịa!”

²⁵Anịẹrẹchị Amanyanaḅọ Sọlọmọn ḅe kụrọ seni Bẹnaya ḅe pịrị se ọ̀ paka so mun Adonaịja ḅe ḅaamẹ.

²⁶Anịsịkị Amanyanaḅọ Sọlọmọn ḅe nwọse Abaịata agbamịẹḅọ ḅe ḅẹmẹ, “So ị́ya ama mun Anatọt sẹ mị ḅieḅụ. Fị anị ị́ gbẹịnye-ẹ, ọkụma mịọkụ àrị ị́ ḅaa-ẹkẹ, anịatịḅị ị́rị́ anị Nyanaḅọ Ḅe Ọḅọkụ Igbe mị ḍikiḍikiarịye-ẹ ị̀ ḍa Devid ḅe ḅụ ị́ sime sịkịḅụ, ị́ pịkị ori na tọrụsiọrịmẹ oria ḅụfụka mamgba ḅieḅụ.”

²⁷Anịsịkị Sọlọmọn ḅe Abaịata ḅe sinmẹ Nyanaḅọ Ḅe agbamịẹḅọ fịrị mị ḅụ, anịḅụ ọ̀ mịẹmẹ Nyanaḅọ Ḅe Shịlo ḅieḅụ agbamịẹḅọ Ịlaị ḅe na ò furo ḅie apụma na ḅụ kọn ọkwẹịn mị ḅo mịẹḅeinmamẹ.

²⁸Joab ḅe pakaye mị naamẹ. (Ori Adonaịja ḅe mịẹkụrọmamẹ, ọkụma Absalọm ḅe kẹ.) Anị ọ̀ mangị Nyanaḅọ Ḅe pakaḅoḅo Ikowarị mị mun se agbamịẹ ẹbẹ mị ḅụ ịkọlị ma ọlọye-ẹ.

²⁹Amanyanaḅọ Sọlọmọn ḅe, Joab ḅe mangị Ikowarị mị munsam se agbamịẹ ẹbẹ mị anga sịkị sime waraḅẹ nwọḅẹye mị na sịkị, Sọlọmọn ḅe gbọrị okumunḅọ seni Joab ḅe fịrịma se ò gbelamẹ na cheye ẹrẹchị ọ̀ mangị agbamịẹ ẹbẹ mị damamun. Joab ḅe nwọse ọ̀ pẹkẹrẹmẹ na ọ̀ Sọlọmọn ḅe ḍikiḅalafamẹ anị ò gose mangị agbamịẹ ẹbẹ mị damamunye-ẹ. Anịẹrẹchị Amanyanaḅọ Sọlọmọn ḅe Bẹnaya ḅe fịrịmamẹ na ò mun Joab ḅe ḅaa.

³⁰Ò so Nyanaḅọ Ḅe pakaḅoḅo Ikowarị mị mun se nwọse Joab ḅe ḅẹmẹ, “Amanyanaḅọ ḅe nwọ ḅẹmẹ na pakaḅo.” Joab ḅe nwọse ọ̀ pẹkẹrẹmẹ, “Ẹn-ẹn,” “À mịju sime fịḅịa.” Bẹnaya ḅe vinpịkị so amanyanaḅọ ḅe damamun se Joab ḅe ḍukoye mị nwọ ḍuko ọ̀ pịrịmẹ.

³¹Sọlọmọn ḅe nwọse ọ̀ pẹkẹrẹmẹ, “Joab ḅe ḍuko ḅara mị mị-ẹ.” “Ọ̀ ḅaa se ò ḍipi. Anịsịkị anị ḅọrọ ị̀rị̀-o anịkanịka Devid furo ḅie apụma ḅie jụmḅọ sọnị ini ḅarị se ọlọ-ẹkẹ, Joab ḅe mịẹye mị, anị ọ̀ ḅẹrẹ nemikapụ ma ḅaaye mị gose-ẹ.

³²Nyanaḅọ Ḅe ò fomuḅara seni Joab ḅe pịrịḅịa ọ̀ kọn nini mị gose, ị̀ ḍa Devid ḅe nemika ḅaraḅụ. Joab ḅe mịẹyeofori mama owuapụ ḅaamẹ, iḅi ọ̀ nẹngị apụ: Abna, Izrẹl ọmụtịḅịdaḅọ ḅe na pịkị Amasa Juda ọmụogbo ọmụtịḅịdaḅọ ḅe na.

³³Ori ini niniye mị ḅe fomuḅara mị Joab ḅe na ò furo ḅie apụma na ọgọnọ ḅụ anị gbana gbasoḅịa. Ọkụma Nyanaḅọ Ḅe ọ̀ lọkọlọkọ seni Devid furo ḅie apụma pịrịḅịa sịkịmamgba anị oria amanyana ngada mị ọgọnọ sime apụma.”

³⁴Anị Bẹnaya ḅe so Nyanaḅọ Ḅe pakaḅoḅo Ikowarị mị ḅie nwọ mun se Joab ḅe ḅaaye-ẹ, se oria ama ḅie ini ò ḍipimẹ, ele ogbo ḅụ.

³⁵Amanyanaḅọ ḅe Bẹnaya ḅe seni ọmụogbo ọmụtịḅịdaḅọ mịẹ se Joab ḅe kiriḍinmamẹ, se Zadọk agbamịẹḅọ ḅe se Abaịata ḅe kiriḍinmamẹ.

³⁶Anịsịkị amanyanaḅọ ḅe ḅịpị se Shimẹaị ḅe fịrịma se nwọse ọ̀ ḅẹmẹ, “Warị nama ị́ ḅụ pịrị mị Jerusalẹm mị ḅie. Anịa ḅie anga, se opuama mị anị wẹrịsoma.

³⁷Nemikase ị́ anị wẹrịso se Kidrọn Okolo mị ḅọrọkoro sịkị omi-ẹ ḅẹḅẹ, pikipikiye ofori-ẹ, ị́ fịḅịa, se ị́rị́na-mịnaḅụ na mị ini ọlọḅịaye-ẹ.”

³⁸Shimẹaị ḅe nwọse ọ̀ pẹkẹrẹmẹ, “Opuma iḅimẹ, Amanyanaḅọ,” “àrị ị́ ḍuko ḅara mị nwọ mịẹḅịa.” Anịẹrẹchị Jerusalẹm mị ḅieḅụ ori anga mun ḅọlọ sịkị lamẹ.

³⁹Tẹrẹ-a kụra ḅọrọ sịkị, Shimẹaị ḅe oria omoni ma ḅie mama apụ mangị so Gat amanyanaḅọ ḅe damamunmẹ, Ekish, Meaka yaḅe. Shimẹaị ḅe ini Gat ḅie omi-ẹ nwọ naa sịkị,

⁴⁰ori oria yepụra asụn ḅe karakarama se ọ̀ ḅụkụlọ se so Amanyanaḅọ Ekish ḅe damamunmẹ Gat mị ḅie oria omoni ma ḍọkị gose. Ori ini ọrị se ini ọkị soḅomẹ.

⁴¹Sọlọmọn ḅe ḅo Shimẹaị ḅe mịẹye mị naa sịkị,

⁴²ori ọ̀ fịrịmaḅo se nwọse ọ̀ ḅẹmẹ, “Àrị ị́ mịẹse Nyanaḅọ Ḅe ẹrẹ ḅụ ị́ yeḅerenimẹ na Jerusalẹm mị ḅie ị́ ḅụọpọkọ-ẹkẹ. Àrị ị́ ḅerijinemẹ na ị́ nemikase ḅụọpọkọmẹ ḅẹḅẹ, pikipikiye ofori-ẹ ị́ fịḅịa. Anị mị ị́ ḅereni se nwọḅẹ na ị́ ị̀ ḅịpịpokiḅịa?

⁴³Cheye ẹrẹchị, anị ọkụma, ị́ gose ḅarị ị́ ḅereniye mị mịẹka pịkị ị̀ ḅịpịpokika à chụa ị́ pịrị oloko mị ḅụ?

⁴⁴Ị́ seni ị̀ ḍa Devid ḅe mịẹirimaye mamgba ị́ iḅiọkụma nemimẹ. Nyanaḅọ Ḅe anịa fomuḅara seni ị́ pịrịḅịa.

⁴⁵Ọkụma ori ị̀ ḅẹlẹma ḅịa ọ̀ pịkị mịẹḅịa Devid amanyanakiri mị kụrọma chịẹ gbasoḅịa.”

⁴⁶Anị amanyanaḅọ ḅe kụrọ seni Bẹnaya ḅe pịrịye-ẹ na ọ̀ pakamun Shimẹaị ḅe ḅaa, ò paka mun ọ̀ ḅaamẹ. Mịọkụ ḅẹrẹtọn kụrọ mị okorona okorona Sọlọmọn ḅe ḅara ḅie omi-ẹ.