Read kirikeni 1 Amanyanapụ 20 Bible Online

1 Amanyanapụ 20 - kirikeni bible

1 Amanyanapụ 20

¹Amanyanaḅọ Bẹnhadad Siriaḅọ ḅe oria owunikpo mamgba koḅirimẹ, se jịn sẹ amanyanapụ ḅụ soi maịn fịnjị ọ̀ mịẹkụrọmamẹ inia asụnma na pịkị kporokporo ọmụarụ ma na. Ọ̀ nwẹngị somun Sameria mị ḍẹkị kelema, se owu seni anị pakamẹ.

²Ori okumun-apụ seni opuama mị ḅie ḅụ Izrẹl Amanyanaḅọ Ehab ḅe fịrịma se nwọse ọ̀ ḅẹmẹ, “Amanyanaḅọ Bẹnhadad ḅe nwọ ḅẹmẹ na

³ị́ya seleḅa ma na goli ma na, ị́ya eremeni ma na pịkị ị́ya awọma ḅie ḅụ kụrọtẹịn apụma na nwọse ọ̀ pịrị.”

⁴“Ḍuko ị̀ nyana, Amanyanaḅọ Bẹnhadad ḅe pịrị, na à ḅerenimẹ; ori ineda ị̀rị̀ na pịkị à nyanaye layelaye nwọ ọkịḅịa,” Ehab ḅe ọkọ pẹkẹrẹmẹ.

⁵Ọḅụkọ okumun-apụ ma vinpịkị Ehab ḅe damaḅo se jịnye ḅimẹ, Bẹnhadad ḅe ini fịrịma ḅaraḅụ: “À ḅịpị seni ị́ fịrịmamẹ na ị́ya seleḅa ma na goli ma na, ị́ya eremeni ma na pịkị ị́ya awọma na nwọse ị̀ pịrị.

⁶Anịẹḅẹ sọnị mịọkụ, àrị ị̀ya ọmụtịḅịnị ma fịrịmaḅịa se ini ị́ya amanyanaḅọ warị mị na, pịkị ị́ya fịrịtịḅịnị ma warịma na ḍọkịḅịa, se ini ọrị yelaye goyegoye ini dekiḅịa. Ḅa nwọ pembe ḅiri ḅụ ini ḅo laḅịa.”

⁷Amanyanaḅọ Ehab ḅe sẹ mị ḅie tịḅịnị mamgba chịn koḅirima se nwọ ḅẹmẹ, “Ómine ọrịsam na ḅẹḅọ ḅe ọ̀ wa fama ḅimẹ. Ori oku seni ị̀ fịrịmamẹ na, ị̀ya erema na awọma na, pịkị ị̀ya seleḅa ma na goli ma na ọ̀ nwọ ḅimẹ. À pịkị ḅerenimẹ.”

⁸Tịḅịnị ma na tomonima na nwọse ọ̀ pẹkẹrẹmẹ, “Ngịsị ḅifie ọ̀ pịrịma; ḅereni ọ̀ pịrịma.”

⁹Anịẹrẹchị Ehab ḅe nwọse Bẹnhadad okumun-apụ ma ḅẹmẹ, “Ḍuko ị̀ nyana amanyanaḅọ ḅe pịrị na ị́ tatarị ḅiye mị à ḅerenimẹ, ọkụma maịn karamaye mị àrị ineda ḅereni ẹkẹ.” Okumun-apụ ma ini somẹ, se vinpịkị jịn oku se ḅomẹ

¹⁰Bẹnhadad ḅe ini fịrịma ḅaraḅụ: “À tọn apụ na ḅo mị ọ́mịna opuama mị famaḅịa ini pịkị ḅarana owu ḅie ini kansara warị-a ḍụparịma deki soḅịa. Ye oru ma ị̀ fomu ḅaa à nemikase ọkọ mịẹkẹ ḅẹḅẹ.”

¹¹Amanyanaḅọ Ehab ḅe nwọ pẹkẹrẹmẹ, “Ḍuko Amanyanaḅọ Bẹnhadad ḅe pịrị na jokoma owuniḅọ ḅe, ọmụ mị ḅọrọ sịkị anị ọ̀ ḅụ boma bomaye-ẹ, ma anị koroka sịkịḅụkẹ.”

¹²Bẹnhadad ḅe, Ehab ḅe se ọ̀ pẹkẹrẹye mị naamẹ, ori-na-gbọrị ḅụ sime ísí amanyanapụma ori na iruḅuarị sịkị inia ikowarịma ḅie, ọ̀ tọn oria owuapụma pịrịmẹ na ini ḅụkarakarama owu se opuama mị paka, anịẹrẹchị ini so ini simeḅịa ọrụ ma mun mẹ.

¹³Anịsịkị mị ḅụ, gbọrị ịkịankoroḅọ so Amanyanaḅọ Ehab ḅe damamun se nwọse ọ̀ ḅẹmẹ, “Nyanaḅọ Ḅe nwọ ḅẹmẹ, ‘Anị opu ọmụogbo mị anị ḍikiḅalafama! Ị́ se anị nẹngịmaḅịa ọmụḅaraiḅi à nwọse ị́ pịrịḅịa mịmgba, se ị́ nemiḅịa na ị̀rị̀ anị Nyanaḅọ Ḅe-ẹ.’”

¹⁴Ehab ḅe nwọse ò gbelamẹ, “Tụḅọ tịḅịda owu mị pakaḅe?” Ịkịankoroḅọ ḅe nwọse ọ̀ pẹkẹrẹmẹ, “Nyanaḅọ Ḅe nwọ ḅẹmẹ na amama ḍikiḍikiarị apụma chuku ḅie sime owunima ḅie asẹmẹnị ma anị owu mị pakaḅịaye-ẹ.” Amanyanaḅọ ḅe nwọse ò gbelamẹ, “Tụḅọ dada kụlọda ọmụogbo mị pịrịḅe? “Ị́rị́-ẹ,” ịkịankoroḅọ ḅe ọkọse ọ̀ pẹkẹrẹmẹ.

¹⁵Anịẹrẹchị amanyanaḅọ ḅe amama ḍikiḍikiarị apụma chuku ḅie sime owunima ḅie asẹmẹnị ma chịn pakụmaḅomẹ, inimgba kịnị oyi gbọrị chịn fịnjị na oyimaịn apụ fịnjị na-ẹ. Anịsịkị ori Izrẹlapụ ọmụogbo mị chịn pakụmamẹ, inimgba kịẹnḅịpị tẹrẹ ẹndẹ fa si na kịnị oyiasi na-ẹ.

¹⁶Owu paka mị eneogboin ḅiri ḅụ anị sakịmẹ, Bẹnhadad ḅe na gbọrịḅụ sime Amanyanapụ soi maịn apụ fịnjịma iru inia tọrụḅaa aḅẹ inia ikowarịma ḅieḅụ anịsịkị.

¹⁷Owuni ma ḅie asẹmẹnị ma tatarị sọmunmẹ. Bẹnhadad ḅe fịrịma pakụma nyọ koruapụma ḍuko ọ̀ pịrịmẹ na owuni kpo pakaḅoaḅẹ Sameria ḅie.

¹⁸Ori nwọ ḅẹmẹ, “Fịka ḅụ ómine ini kun ḅo, ini ḅo owusọ oḅo-o anịkanịka ini dein ḅụ ḅo sọnị.”

¹⁹Owuni ma ḅie asẹmẹnị ma tịḅịda owu mị pakamẹ, Izrẹlapụ ọmụogbo mị ini palịmẹ,

²⁰se ḅọḅọ nụḅọ na owusọḅọ ḅe nwọ ḅaamẹ. Siria apụma ini mangịmẹ, se Izrẹlapụma gagama ini ḍukomẹ, ọkụma Bẹnhadad ḅe ori asụn ḅụkụlọ se mangịsomẹ, asụn ọgọnọ owunima ḅie dapụ ori na mangịsomẹ.

²¹Amanyanaḅọ Ehab ḅe ele mị ḅie ḅọrọ, asụnma na kporokporo ọmụarụ ma na kun ọkịmẹ, pịkị siḅara se Siria apụma ḅaamẹ.

²²Anịsịkị ịkịankoroḅọ ḅe so Amanyanaḅọ Ehab ḅe damamun se nwọse ọ̀ ḅẹmẹ, “Vinpịkị mun ị́ya owunikpo ma mịẹkụrọma, pịkị tọrụkirila-ḅara se mịẹye ma seni ọrụtọn, anịatịḅị Siria amanyanaḅọ ḅe jịn ịwọfịye pakaḅịa sịkị ḅụ ọ̀ pịkịna ḅo owupakaḅịa.”

²³Bẹnhadad ḅe oria ọmụtịḅịnị ma nwọse ọ̀ ḅẹmẹ, “Izrẹlapụ oru ma tụndụ ḅie tamụnọ-ẹ, anị Izrẹlapụma gose wa nẹngịmaye-ẹ. Ọkụma gbarịmaka ḅaraḅụ wa ini nẹngịmaḅịa, wa nemikase ḅele-kiri-ọgọnọ ḅụ ini na owusọ ọkụma.

²⁴Mịọkụ, amanyanapụma ḅie kịnị soi maịn fịnjịma sin inia kiriḅụ, se ọmụtịḅịdapụ se inia kiri ḍinma.

²⁵Anịsịkị ị́ ḅụ mangịso apụma na gbasị jịn ọmụogbo nwọ ọkị, pịkị anị gbọrị kịẹnḅịpị nwọ ọkị asụnma na kporokporo ọmụarụ ma na ḅụ. Wa Izrẹlapụma na owusọḅịa ḅele-kiri-ọgọnọ ḅụ, wa ini nẹngịmaḅịa mị sịkị mị ḅụ.” Amanyanaḅọ Bẹnhadad ḅe ini kọnḅo koroma mị ḅereni pịkị ọkọ mịẹmẹ.

²⁶Anịḅo ịwọfịye paka sịkị mị lasịkị ori oria owuapụma chịn se ini na so Efẹk opuama mị mun mẹ owu seni Izrẹlapụma pakaḅịa ẹrẹchị.

²⁷Izrẹlapụma ini nwọ chịn pakụmaḅomẹ ọmụaye ma na; ini mun mama kpo ḅụ ikowarị pike tọrụ se Siria apụma da simemẹ. Izrẹlapụma se Siria apụma na otoma ọkụma, Izrẹlapụma, Siria apụma ḅụ mama kala oḅori ogbo sime ọkụ anị ini sime ọkụ-ẹ, Siria apụma sẹ mị ḅie wasama mun la ọkụ mị ḍikiso ọkụma.

²⁸Gbọrị ịkịankoroḅọ so Amanyanaḅọ Ehab ḅe damamun se nwọse ọ̀ ḅẹmẹ, “Mịn Nyanaḅọ Ḅe ḍukoye-ẹ, ‘Siria apụma ị̀rị̀ chịngị-ọgọnọ tamụnọ-ẹ, ḅele-kiri ọgọnọ tamụnọkẹ ini nwọ ḅẹye ẹrẹchị, àrị ọmụḅaraiḅi se ị́ pịrị seni ị́ inia opu ọmụogbo mị nẹngịmaḅịa, se ị́rị́ na ị́ya tomonima na nemiḅịa na Ị̀rị̀ anị Nyanaḅọ Ḅe-ẹ.’”

²⁹Siria apụma na Izrẹlapụma na inia ikowarịma ḅie sọnọma ḍin seni dama dama ma simemẹ. Sọnọma ḍin karama ene mị ḅie ini sakị owusọmẹ, se Izrẹlapụma oyimaịn poku fịnjị na kịnị oyi ẹndẹ nwọ ḅaamẹ Siria apụma ḅie.

³⁰Fị̀kapụma mangị so Efẹk opuama mị ḅie mun; se anịju ḅụ onu ma sokoro inia ḅụ tẹrẹ-a poku na kịnị-a sọnọma ẹndẹ oyiasi fịnjị pụnụma ḅaamẹ. Bẹnhadad ḅe sọnị inia ḅara pẹlẹma mun opuama mị ḅie gbọrị warị ḅie sọ mun ọḅụju ḅie mị ḅie ḅọịmẹ.

³¹Oria ọmụtịḅịnị ma ọ̀ damamun se nwọ ḅẹmẹ, “Wa nwọ naamẹ na Izrẹl amanyanapụma ini ḍikitịḅịfoin nyanamẹ. Ḅereni wa pịrị wa okuru kaka mịna konju ma ḅụ, pịkị ḍiki se mịna kọngọ ma kpọ kelema se so Izrẹl amanyanaḅọ ḅe damamun, sosi ori ị́ ḅaa ẹkẹ.”

³²Anị ini okuru kakaye-ẹ inia konju ma ḅụ pịkị ḍiki se inia kọngọ ma kpọ kelema se so Ehab ḅe damamun se nwọse ọ̀ ḅẹmẹ, “Ị́ya fịrịnwẹngịḅọ Bẹnhadad ḅe ị́ tẹkẹmẹ oria ḍumo mị gose.” Ehab ḅe nwọ pẹkẹrẹmẹ, “Ọ̀ pa ḍumo wara-ao? Iḅimẹ! Mbire ḅara ọ̀ nwọ simemẹ ị̀ ḅụ!”

³³Bẹnhadad ọmụtịḅịnị ma iḅi elekima tọrụse nwọ ḍikimẹ, se Ehab ḅe “mbire” nwọḅẹ sịkị, ini sọnị kirikiri nwọ ḅẹmẹ, “Ị́ ḍukosa ḅaraḅụ, Bẹnhadad ḅe ị́ mbire-ẹ!” Ehab ḅe nwọ ḅẹmẹ, “Ómine ori ọkịḅo ị̀ pịrị.” Bẹnhadad ḅe ḅo lasịkị, Ehab ḅe ọ̀ chịn se ori ori na kporokporo ọmụarụ mị ḅụkụlọmẹ.

³⁴Bẹnhadad ḅe nwọse ọ̀ ḅẹmẹ, “Ị̀ ḍaḅe ị́ ḍaḅe ḅara ọkị amama àrị àrị saḅama ị́ pịrịḅịa, ị́ pịkị ineda tuḅo kọnḅịa nyọ pakụma ị́ ḅụ pịrịḅịa Damaskọs mị ḅie ḅụ, anị ị̀ ḍaḅe Sameria mị ḅie ḅụ mịẹ ọkụmị-ẹ.” Ehab ḅe ọ̀ pẹkẹrẹmẹ, “Wa nwọ sime ḅịpịọkịa nyanasa sịkị, anịọkụma, àrị ị́ wẹrịso se ị́ soḅịa.” Ori ori na yemịẹkụrọma ḍiri gịẹịnso se ori ọ̀ wẹrịso se ò somẹ.

³⁵Nyanaḅọ Ḅe tọn ḅaraḅụ ịkịankoroapụ-ogbo mị ḅie ò juo ịkịankoroḅọ ḅẹmẹ na ori ọ̀ ḅakụ. Ọkụma ọ̀ ḍụkụkẹ,

³⁶anị ọ̀ nwọse ọ̀ ḅẹye-ẹ, “Nyanaḅọ Ḅe tọnye mị ḅụ ị́ ḅịpịpokika ẹrẹchị chịrịḅa ị́ ḅaaḅịa, ị́ ị̀ wẹrị so ḅụsikima kirikiri.” Se ori ọ̀ wẹrịso ḅụsikima kirikiri chịrịḅa ọ̀ ḅaamẹ.

³⁷Se ḅe gbọrị ịkịankoroḅọ ḅe so jụmḅọ damamun se nwọ ḅẹmẹ, “Ị̀ ḅakụ!” Ḅeḅọ ḅe ori ọ̀ ḅakụmẹ; ọ̀ gagama ọ̀ ḅakụ se ye ọ̀ lamẹ.

³⁸Ịkịankoroḅọ ḅe ḅịtẹ se ọ̀ tọrụ fịnamẹ mịẹse nweni ò nemi ẹkaye ẹrẹchị, se ò somun ateli aka ḅụ chịẹ Izrẹl amanyanaḅọ ḅe ḅọrọḅịa sịkị koruaḅẹ.

³⁹Amanyanaḅọ ḅe ḅọrọarị sịkị ḅụ, ịkịankoroḅọ ḅe ọ̀ chịn se nwọ ḅẹmẹ, “Ị́ya opu ḅụ, ọmụ mị ḅie àrị owusọ arịogbo anị gbọrị owuniḅọ, ini kun mine na tarakaḅọ se ḅo ị̀ pịrị se nwọ ḅẹmẹ, ‘Ḅeḅọ ḅe ḍikiḍiki; nemikase ori ị́ ḅara pẹlẹma somẹ ḅẹḅẹ, ị́ ḍumo anị ị́ seni anị gbẹịnḅịaye-ẹ, anịkanịka seleḅa pẹkẹrẹ-a sọnọma ẹndẹ oyiasi fịnjị ị́ nwọ gbẹịnḅịa.’

⁴⁰Ọkụma à jịn mịẹmịẹaye ḅụ simearịogbo, tomoniḅọ ḅe ị̀ ḅara pẹlẹma somẹ.” Amanyanaḅọ ḅe nwọse ọ̀ pẹkẹrẹmẹ, “Ị́rị́ ḅarana-ḅẹrẹ-si-pẹlẹ ị́ ḅụ pịrịsam, pịkị ḅarana anịa si fomuye mị daḅịa.”

⁴¹Ịkịankoroḅọ ḅe ḅịtẹ mị kansinmẹ ọ̀ tọrụ ḅụ, se anị kirikiri amanyanaḅọ ḅe ò nemimẹ na ori ịkịankoroapụma ḅie gbọrịḅọ-ẹ.

⁴²Anịsịkị ịkịankoroḅọ ḅe nwọse amanyanaḅọ ḅe ḅẹmẹ, “Mịn Nyanaḅọ Ḅe Kọn ọkwẹịn mị-ẹ: ‘Àrị ị́ ḅẹ na ḅaa nwọḅẹ ḅọ ḅe, ị́ ọ̀ wẹrịso se ori ị́ ḅara pẹlẹma sosaye ẹrẹchị ị́ ḍumo ị́ nwọse anị gbẹịnḅịa, se ị́ya ọmụogbo mị anị ḅaa ḅụ sọḅịa ini ini wẹrịso se oria ọmụogbo mị inia ḅara pẹlẹma soye ẹrẹchị.’”

⁴³Amanyanaḅọ ḅe vinpịkị so warị mun mẹ, kuḅie ḅalaḅala na ḅụ oḅoku ḅụna.