Read kirikeni 1 Amanyanapụ 21 Bible Online

1 Amanyanapụ 21 - kirikeni bible

1 Amanyanapụ 21

¹Amanyanaḅọ Ehab warị mị na kpeki gbọrị ozukiri simemẹ Jezriẹl mị ḅie ḅụ, anị nyanaḅọ ḅe ẹrẹ anị Nebọt.

²Gbọrị ene Ehab ḅe nwọse Nebọt ḅe ḅẹmẹ, “Ye àrị ị́ya irumịẹ chịnmgbọlụ ozu mị ọkị, anị ị̀ya amanyanaḅọ warị mị na kpekimẹ, à ḅimẹ à kiri mị se fịayemgbọlụ na fụlọ-chụọ-aye na ozu mịẹ. Àrị iḅi anị nẹngị irumịẹ chịnmgbọlụ ozu kiri seni ị́ pịrịḅịa, anịkanịka anị na gbasị igbiki à nwọse ị́ gbẹịnḅịa, ị́ ọkọ ḅimẹ ḅẹḅẹ.”

³“Mịn ozu kiri mị mịn ị̀ya olomu-a ḍapụma ḅara anị ḅọrọḅo ị̀ ḅara lamẹ. Nyanaḅọ Ḅe ḍụkụma àrị anị seni ị́ pịrị!” Nebọt ḅe ọkọse ọ̀ pẹkẹrẹmẹ.

⁴Ehab ḅe ò so warị mun mẹ, ḅụ oḅoku na ḅụosọ na ḅụ, Nebọt ḅe se ọ̀ ḅẹye mị gose. Ori oria mọnọye mị ọgọnọ ḅọlọlọ tọrụ se warị agbagba damẹ, ọ̀ pịkị yefị ḍụkụkẹ.

⁵Tarọ Jezibẹl ma mun ò gbelamẹ, “Cheye ẹrẹchị ị́ gbọkụ nwọse ngịrị? Cheye ẹrẹchị ị́ yefị ḍụkụka?”

⁶Ori nwọ pẹkẹrẹmẹ, “Nebọt ḅe se ị̀ ḅẹye mị gose-ẹ. Àrị oria irumịẹ chịnmgbọlụ ozu kiri mị tuḅo fẹ ḅimẹ, anịkanịka, nemikase ori ọkọ ḅikẹ ḅẹḅẹ, à jịnye seni anịa kiriḍinma ọ̀ pịrịḅịa, ọkụma ọ̀ nwọse ị̀ ḅẹmẹ na àrị ineda anị nyana ẹkẹ.”

⁷Jezibẹl ma nwọse ọ̀ pẹkẹrẹmẹ, “Iḅimẹ, amanyanaḅọ ḅe ị́rị́ mọnọ se ị́rị́ka?” “Mọnọye mị ọgọnọ koro se pakaḅo, ị́ tọrụ ḅẹlẹma, se yefị. Nebọt irumịẹ chịnmgbọlụ ozu kiri mị àrị anị ọkị ị́ pịrịḅịa!”

⁸Anịsịkị á ḍiri gịẹịnmẹ, Ehab ḅe ẹrẹ ḅụ oriaye oḅoloye mị seni àrị oḅolo, se àrị seni fịrịtịḅịnị ma na pịkị Jezriẹl mị ḅie tịḅịnịma na sẹịnmamẹ.

⁹Ḍiri ma nwọ ḅẹmẹ, “Ḅuruseḅụḅaama gbọrị ene ekere ọ́ nwọ gbolo, se tomonima chịn koḅirima se osi nyana kiri ọ́ nwọ seni Nebọt ḅe pịrị.

¹⁰Mama yeḅụsọka apụ ọ́ nwọ ọkịse ini ọ̀ tọrụkuḅu yeḍuko ọ̀ tịḅịsẹịn na ọ̀ Tamụnọ Ḅe na amanyanaḅọ ḅe na worimẹ. Anịsịkị ómine opuama mị ḅie ori ọkị paka mun ò gbin ḅaa.”

¹¹Jezibẹl ma tọn ini pịrị ḅara ini nwọ mịẹmẹ fịrịtịḅịnị ma na opuama mị ḅie tịḅịnịma na.

¹²Ini ḅuruseḅụḅaama gbọrị ene ekere gbolomẹ, tomonima chịn koḅirima se osi nyana kiri seni Nebọt ḅe pịrịmẹ.

¹³Mama yeḅụsọka apụma nweni mamgba tọrọkọ ḅụ yeḍuko Nebọt ḅe tịḅịsẹịnmẹ na ọ̀ Tamụnọ Ḅe na amanyanaḅọ ḅe na worimẹ, anịẹrẹchị ini opuama mị ḅie ori ọkị paka mun ò gbin ḅaamẹ.

¹⁴Ini oku mị seni Jezibẹl ma fịrịmamẹ: “Nebọt ḅe ini ọ̀ ḅaasam.”

¹⁵Jezibẹl ma oku mị daọkị kirikiri, à nwọse Ehab ḅe ḅẹmẹ, “Nebọt ḅe ọ̀ fị̀sam. Mịọkụ so mun irumịẹ chịnmgbọlụ ozu kiri mị ọkị nyana, anị ò seni ị́ dẹrị ḍụkụkaye mị.”

¹⁶Anị gbọrị sịkịḅụ, Ehab ḅe so irumịẹ chịnmgbọlụ ozu kiri mị sime nyọ mun mẹ, anị nyana ọkịḅịa ẹrẹchị.

¹⁷Anịsịkị Nyanaḅọ Ḅe nwọse Ịlaịja ịkịankoroḅọ ḅe ḅẹmẹ anị Tisbịḅọ ḅe:

¹⁸“So Ehab, Sameria Amanyanaḅọ ḅe damamun, Nebọt irumịẹ chịnmgbọlụ ozu kiri mị ḅie ḅụ ị́ ori ọrịḅịa, anị ọkị nyanaḅịa ẹrẹchị.

¹⁹Ḍuko ọ̀ pịrị na Ị̀rị̀, Nyanaḅọ Ḅe, nwọse ọ̀ ḅẹmẹ, ‘Ị́ tomoniḅọ ḅe niniso-sịkị, ị́ pịkị oria ngọ mị sọnị se chụa ọkị-ao?’ Ḍuko ọ̀ pịrị na mị Ị̀rị̀ à ḍukoye-ẹ: ‘Obiri ma nwọ Nebọt ḅe oju pulo mị taḅa gbọrị nyọ mị ḅụ anị àrị pịkịna ị́ya oju pulo mị sọnị taḅaḅịa ọkụ-ẹ!’ ”

²⁰Ehab ḅe Ịlaịja ḅe ọrị sịkị, ọ̀ nwọse ọ̀ ḅẹmẹ, “Ị́ ḅo ị̀ ọrị saka, ị̀rị̀ na tarakaḅọ? “Iin, à ị́ ọrịsam,” Ịlaịja ḅe ọkọse ọ̀ pẹkẹrẹmẹ, “Ị́ jokoma ị́ ḅụ ḍiepakụmasam kurakaye nwọ mịẹḅịa ẹrẹchị Nyanaḅọ Ḅe tọrụkuḅu.

²¹Anịẹrẹchị Nyanaḅọ Ḅe nwọse ị́ ḅẹmẹ, ‘À fa ọkịḅo ị́ pịrịḅịa. Àrị ị́rị́ na ḅarị mịẹgbolomaye nyana ẹkẹ à pịkị ị́ furo ḅie owuḅọ goyegoye nwọ ḅaa famaḅịa, anị ḅọrọ asẹmẹnị-o pịkị olomusa apụ sọnị.

²²Ị́ya furo mị anị ḅo Amanyanaḅọ Jeroboam, Nibat yaḅe furo mị kịkẹḅịa, anị pịkị Amanyanaḅọ Beasha Ahaịja yaḅe furo mị kịkẹḅịa, anịatịḅị ị̀ya ịganị mị ị́ nwọ owoimasam anị Izrẹl mị damun si ḅie chu ḅụ.’

²³Anịsịkị Jezibẹl ma gbolomaye ḅụ Nyanaḅọ Ḅe nwọ ḅẹmẹ na obiri arịa oju pẹịḅịa Jezriẹl opuama mị ḅie ḅụ.

²⁴Ị́ya mịnapụma ḅie opuama mị ḅie ḅụ fịḅọ goyegoye obiri nụḅọ pẹịḅịa, pịkị opuama mị ḅie ḅụ sikima mun sẹ mị ḅie fịḅọ goyegoye ẹdẹlẹ nụḅọ pẹịḅịa.”

²⁵(Gbọtụma mịnaḅụ seni okorona okorona kurakaye mịẹ mị ḅụ Ehab ḅe kịkẹ jụmḅọ ngịsị ofori-ẹ Nyanaḅọ Ḅe tọrụkuḅu ḅụ—arịmgba tarọ Jezibẹl ma tọn ḅaraḅụ-ẹ.

²⁶Ori ḅụgererematẹịn sima mịẹmẹ, anị oru tẹkẹ mị ḅụ, Amọraị apụma mịẹ ọkụ mị, anị Izrẹlapụma ama mị ḅie sọmun-arị sịkị Nyanaḅọ Ḅe depakụma Amọraị apụma.)

²⁷Ịlaịja ḅe ori ọkwẹịn so sịkị, Ehab ḅe oria ḅụchụayema kanmẹ, ori àrị sin, se okuru ḅụchụaye nwọ chụamẹ. Ò fịye sịkịmẹ, okuru ḅụchụaye ọ̀ nwọ chụa mọnọmẹ, se kuḅie si na ngịrị ḅụ na nwẹngịma ḅọrọmẹ.

²⁸Nyanaḅọ Ḅe nwọse ịkịankoro Ịlaịja ḅe ḅẹmẹ,

²⁹“Ehab ḅe ị̀ tọrọkọ ḅụ ọ̀ ḅụ iderima la-ọkụ ị́ ọrịsa? Ọ̀ nwọ mị ḅara mị mịẹsa sịkị, à ḅarị fa ọkịḅo ọ̀ pịrị ẹkẹ oria ḍumo sịkị ḅụ; yayo ḅe ḍumo sime sịkị ḅụ anị à fa mị ọkịḅo Ehab furo mị pịrịḅịaye-ẹ.”