Read kirikeni 1 Amanyanapụ 6 Bible Online

1 Amanyanapụ 6 - kirikeni bible

1 Amanyanapụ 6

¹Izrẹlapụma Ijipt mị ḅie pakaso kụra ẹndẹ iniasi fịnjị ḅọrọ seso, anị Sọlọmọn ḅe Izrẹl mị da inein karama kụra mị ḅie, maịn karama akalụ mị, anị Ziv akalụ mị ḅie, Sọlọmọn ḅe Oputẹkẹwarị fịrị mị sakịye-ẹ.

²Ḅie mị ḅụ, anịa ịsụn mị ḅụọ-a iniasi oyi fịnjị-ẹ, finji mị ḅụọ-a soi-ẹ, se anịa gele mị ḅụọ-a mesi na sọnọ-ẹ.

³Ḅọrọ mun jukuru mị laḅịa ḅie mị anịa gbun jie-a ḅụọ-ẹ, se finji mị ḅụọ-a soi-ẹ, osiḅụ-sime nyọ mị finji ọkụ anị anị finji ọkụ-ẹ.

⁴Oputẹkẹwarị agbagba ma fo-a nyọ arịa ḅụ omi-ẹ, nụngọda ọrụ ḅụ àrị kpapụtẹịn ḅie mị nẹngịmẹ.

⁵Oputẹkẹwarị agbagba ma ḅụ na anịa ọḅụju na gbọrị tẹrẹ-a deki ọgọnọ warị ọ̀ nwọ nama oḅolomẹ, gbọrị dẹkị, gbọrị dẹkị ḅe gele sọnọma ḅụọ na ikiḅa-ikiḅa-ẹ.

⁶Chukuju datẹịn jukuru ma, arịa finji gbọrị jukuru sọnọma ḅụọ na ikiḅa-ikiḅa-ẹ, ogboku dẹkị mị ḅe-a jukuru ma arịa finji esenia-a ḅụọ-ẹ, se ọgọnọju dẹkị mị ḅe-a jukuru ma arịa finji oyi-a ḅụọ na ikiḅa-ikiḅa-ẹ. Oputẹkẹwarị mị ḅụ ọgọnọ da mama dẹkị warị agbagba ma, gbam-gbamtẹịn chuku da dẹkị warị agbagba ma nẹngịmẹ, mịẹso sịkị chukuju dẹkị mị ineda ịnyọ nyana ọgọnọju-a dẹkị-a jukuru warị agbagba ma dachịẹmaḅịa ọkụ; ini àrị dachịẹmaḅịa iku mgbẹsẹ aye nama arịa ḅie chuka ḅaraḅụ.

⁷Ò seni Oputẹkẹwarị mị nama ḍụparịma, ḍụparịpu nyọ mị ḅụ ini gbọkụ àrị tẹlịma ọrụtọnmẹ, anịẹrẹchị amana, anịkanịka apala, anịkanịka jịn ikulele fịrịnwẹngịye se nyọ fiema ofori-ẹ ori Oputẹkẹwarị mị namarị sịkị ḅụ.

⁸Chuku datẹịn dẹkị mị na oḅoloma warị mị ḅụ ḅọrọsọ nyọ mị, Oputẹkẹwarị mị ḅe chuku da nyọ ḅụ anị simemẹ, kpọlị mun maịn karama dẹkị mị na tẹrẹ karama dẹkị mị na laḅịa ịkpịkpa arịa ḅụ omi-ẹ.

⁹Amanyanaḅọ Sọlọmọn ḅe Oputẹkẹwarị mị namaso sịkị, iku mgbẹsẹ aye na patala-patala awụ chịn ḍụpọ na ọ̀ nwọse ochu mị silemẹ.

¹⁰Oputẹkẹwarị mị ḅụ nụngọ da warị agbagba ma ḅụ tẹrẹ-a dẹkị ọgọnọ warị ọ̀ nwọ nama oḅolomẹ, gbọrị dẹkị ḅe gele sọnọma ḅụọ na ikiḅa-ikiḅa nwọ lamẹ, se awụ chịn ḅụ opuaye ọ̀ nwọse mgbẹsẹ aye mịẹ dẹkị ma dachịẹma gbolomamẹ.

¹¹Nyanaḅọ Ḅe nwọse Sọlọmọn ḅe ḅẹmẹ,

¹²“Ị́ nemikase ị̀ya olokoma na à tọn koromaye mamgba na nwọ kokomẹ ḅẹḅẹ, à ḅereni ị́ ḍa Devid ḅe pịrịye mị àrị anị mịẹ ị́ pịrịḅịa.

¹³Àrị ị̀ya tomoni Izrẹlapụma ogboku ḅụ angaḅịa mị ị́ namarị Oputẹkẹwarị mị ḅieḅụ, à pịkị ini sara koroma-ẹkẹ.”

¹⁴Mị ḅaraḅụ Sọlọmọn ḅe Oputẹkẹwarị mị nama karamamẹ.

¹⁵Awụ chịn ḍụpọma mị ò seni ḅieju warị agbagba ma oḅoloye-ẹ, warịkiri ḅụ sakịmun sile ochu mị la, se warịkiri mị odo chịn ḍụpọ ọ̀ nwọse anị dẹmẹ.

¹⁶Oputẹkẹwarị mị ḅie ọḅụju gbọrị jukuru ọ̀ nwọ namamẹ, ini nwọse anị chịnmẹ Osiḅụ-Simetẹịn-Nyọ. Anịa ịsụn mị ḅụọ-a soi lamẹ, anịsịkị patala patala awụ chịn ḍụpọ ọ̀ nwọse kiki ma pumẹ, kiri ḅụ àrị chịẹ mun sile ochu mị lamẹ.

¹⁷Osiḅụ-Simetẹịn-Nyọ mị tọrọkọ sime jukuru mị, anịa ịsụn ḅụọ-a tesi-ẹ.

¹⁸Patala patala awụ chịn ḍụpọma ḅụ ḅapa na ngwengwe na, ọ̀ nwọ kara àrị ḅirimamẹ. Bebe ḅieju mị mgba awụ chịn ọ̀ nwọse anị oḅolomẹ, anịẹrẹchị warị agbagba ma ḅụ ḍụparịma nweni àrị ọrịḅịa ọkụ ofori-ẹ.

¹⁹Oputẹkẹwarị mị ọḅụju ḅụ gbọrị jukuru ọ̀ nwọ namamẹ anị Nyanaḅọ Ḅe oria Ọḅọkụ Igbe mị simeḅịa nyọ mị-ẹ.

²⁰Mị jukuru mị anịa ịsụn ḅụọ-a soi lamẹ, finji mị sọnị ḅụọ-a soi, anịa gele mị pịkị ḅụọ-a soi-ẹ, anịmgba jokoma goli ọ̀ nwọse anị oḅolomẹ. Agbamịẹ ẹbẹ mị awụ chịn ḍụpọ ọ̀ nwọse anị oḅolomẹ.

²¹Oputẹkẹwarị mị ḅie ò goli se oḅolomẹ, ọ̀ pịkị goli-goli ikoli seni ḅieju jukuru mị ḅọkọ ḅụ chụa mgbẹsẹmẹ, anịa jukuru mị sọnị goli ọ̀ nwọse anị oḅolomẹ.

²²Bebe Oputẹkẹwarị mị ḅieju mgba ò goli seni oḅolomẹ, pịkị Osiḅụ-Simetẹịn-Nyọ mị ḅie sime agbamịẹ ẹbẹ mị sọnị.

²³Oliv chịn ọ̀ nwọse mama enjẹlapụ kara Osiḅụ-Simetẹịn-Nyọ mị ḅie koromamẹ, gbọrịye gbọrịye gele jie-a ḅụọ lamẹ.

²⁴Mama aye mamgba gbasịmẹ àrị pịkị gbọrị ḅara simemẹ. Gbọrịye mama pamba mama pamba nwọ nyanamẹ, gbọrị pamba gbọrị pamba ịsụn sọnọma ḅụọ na ikiḅa lamẹ, anịẹrẹchị gbọrị pamba ḅịpị okolo ḅụ sakịmun ísíye mị la anịa ịsụn mị jie-a ḅụọ lamẹ.

²⁷Ori àrị seni Osiḅụ-Simetẹịn-Nyọ mị ḅie kpekima-kpekima koromamẹ, anịẹrẹchị àrị arịa mama pamba, mama pamba ma finji ọkụma àrị jịnye jịnye lamẹ warị mị ḅie ogboku ḅụ, anịsịkị ísí mama pamba ma warị agbagba ma lamẹ.

²⁸Ọ̀ tẹmẹ mama enjẹlapụma ò goli se àrị oḅolomẹ.

²⁹Opu ḅie mị na, pịkị ḅieju jukuru mị na warị agbagba ma ḅụ mgba na ori enjẹlapụ na, enemi kọrọ na, pịkị ngwengwe na kara àrị ḅirimamẹ.

³⁰Warịkiri mị sọnị ò goli seni oḅolomẹ.

³¹Oliv chịn se mịẹ mama pẹkẹrẹ ḅọkọ ọ̀ nwọse Osiḅụ-Simetẹịn-Nyọ mị ḅụ ḅọrọsọ nyọ mị ḅụ chụamẹ; ḅọkọ mị anịa ọgọnọju mị mịọmịọ kelema koromẹ.

³²Ḅọkọ ma ḅụ enjẹlapụ na, enemi kọrọ na, pịkị ngwengwe na ọ̀ nwọ kara àrị ḅirimamẹ. Ḅọkọ ma na, enjẹlapụma na, pịkị enemi kọrọ ma na ò goli seni àrị oḅolomẹ.

³³Ḅọrọ mun opu ḅie mị ḅie sọḅịa nyọ mị, oliv chịn ọ̀ nwọse gbọrị inein-a ịkọlị ḅọkọ mịẹmẹ.

³⁴Odo chịn se mịẹ mama iko-a ḅọkọ pịkị omi-ẹ

³⁵se enjẹlapụ na, enemi kọrọ ma na pịkị ngwengwe ma na anịa ḅụ ọ̀ nwọ kara ḅirimamẹ, se goli seni àrị oḅolomẹ.

³⁶Oputẹkẹwarị mị tọrọkọ gbọrị ḅiejusọtẹịn odo ọ̀ nwọ namamẹ, ori onu nama anị kelemamẹ; ḍụparị tẹrẹ-a ọrụ goyegoye ḅụ gbọrị awụ chịn mgbẹsẹye anị nwọ nyanamẹ.

³⁷Oputẹkẹwarị mị ḅe chuku sẹkẹ ḍụparị mị, maịn karama akalụ mị ḅie ori anị ḍipimẹ, Ziv akalụ mị anị Sọlọmọn ḅe amada inein karama kụra mị ḅieḅụ.

³⁸Nine karama akalụ, anị Bul akalụ mị ḅieḅụ, anị Sọlọmọn ḅe amada oyi gbọrịye fịnjị karama kụra mị ḅụ anị Oputẹkẹwarị mị nama karamaye-ẹ, jokoma ini anị tọn koroma ḅaraḅụ. Sọnọma kụra Sọlọmọn ḅe nwọse anị namamẹ.