Read kirikeni 1 Amanyanapụ 8 Bible Online

1 Amanyanapụ 8 - kirikeni bible

1 Amanyanapụ 8

¹Anịsịkị Amanyanaḅọ Sọlọmọn ḅe bebe Izrẹl sẹ mị ḅie furofuroma ḅe tịḅịnị mamgba chịn koḅirimamẹ, na ini ọ̀ damaḅo Jerusalẹm mị ḅieḅụ, ini Zaịyọn Devid opuama mị ḅieḅo, Nyanaḅọ Ḅe Ọḅọkụ Igbe mị deki mun Oputẹkẹwarị mị ḅie koromaḅịa ẹrẹchị.

²Inimgba ḅo koḅirimamẹ, ini Tịḅị Kikimanyọ Alalị fịye mị fịḅịa sịkị mị ḅụ, anị Ẹtanim sọnọmẹ karama akalụ mị ḅieḅụ.

³Sẹnịapụ mamgba ḅo koḅirima so sịkị, agbamịẹapụma Ọḅọkụ Igbe mị dekichịẹmamẹ

⁴se anị pụra Oputẹkẹwarị mị ḅie mun mẹ. Livaị apụma na, agbamịẹapụma na pịkị Nyanaḅọ Ḅe pakaḅoḅo Ikowarị mị na anịa fịrịnwẹngịaye mamgba na iko se Oputẹkẹwarị mị ḅie mun mẹ.

⁵Amanyanaḅọ Sọlọmọn ḅe na pịkị bebe Izrẹlapụ mamgba na Ọḅọkụ Igbe mị tọrọkọ ḅụ koḅirima simemẹ se tọn-a anana na, nambulo na se agbamịẹmẹ—kịẹnḅịa-ọkụ-ofori-ẹ àrị ḅaka laḅara mị ḅụ.

⁶Anịsịkị agbamịẹapụma Ọḅọkụ Igbe mị dekimun Osiḅụ-Simetẹịn-Nyọ mị ḅieḅụ koromamẹ Oputẹkẹwarị mị ḅieḅụ, enjẹlapụma chuku ḅie.

⁷Pamba ma finjima igbe mị na pịkị ini seni anị pụra chịnma na gbẹịnmẹ.

⁸Jokoma Osiḅụ Simetẹịn Nyọ mị tọrọkọ chịẹḅọ goyegoye chịnma ḅe kuluma mị ọrịḅịa, ọkụma jịn anga ḅụkẹ. (Chịn ma mịmgba sọnị àrị pa omi-ẹ.)

⁹Ọḅọkụ Igbe mị ḅie gbọrịye sọnị ofori-ẹ, Moziz ḅe seni Saịnaị Tụndụ mị nyọ ḅụ se ḅie chụa yema ḅụ gịẹịn mama ḍụparị pẹkẹrẹma sikima ọkụma, anị Nyanaḅọ Ḅe Izrẹlapụma na ọḅọkụ fị sịkị mị, ini Ijipt mị ḅieḅụ pakaḅoarị sịkịḅụ.

¹⁰Agbamịẹapụma Oputẹkẹwarị mị ḅie pakasoarị sịkị, soḅuno bẹkẹma ḅeinmẹ bebe warị mị ḅie mgba

¹¹anị Nyanaḅọ Ḅe tọrụkuḅu ḅịa pakaḅo tọrụda enekuḅu mị, se ini ḅarị ineda vinpịkị somun inia fịrịma nwẹngịkẹ.

¹²Anịsịkị Sọlọmọn ḅe tẹkẹmẹ “Ị́rị́, Nyanaḅọ Ḅe, ịrụa mị seni sotọrụ koromamẹ, anịẹḅẹ sọnị soḅuno ma na kanakana mị na ḅieḅụ ị́ angamẹ anị ị́ ḅụḅẹlẹ ḅaraḅụ.

¹³Mịọkụ yelatẹịn, ẹrẹsotẹịn Oputẹkẹwarị à nwọ nama seni ị́ pịrịsam, anị ị́ anga gbasoḅịa nyọ.”

¹⁴Tomonima anịju ḅụ chịẹsime sịkị, Amanyanaḅọ Sọlọmọn ḅe tọrụ pịkị ini da, se Tamụnọ Ḅe ḅẹlẹma ḅi inia ọgọnọ gbanamẹ.

¹⁵Ọ̀ nwọ ḅẹmẹ, “Ómine Izrẹl mị Nyana Tamụnọ Ḅe tokoni! Ò ḅereni ị̀ ḍa Devid ḅe pịrịye mị ori anị mịẹsam, ọ̀ nwọ ḅẹmẹ,

¹⁶Ijipt mị ḅieḅụ àrị ị̀ya tomonima ọkịpakụmaḅo sịkị ngịsị, gbọrị opuama sọnị à sẹlẹọkịkẹ bebe Izrẹl ama mị ḅie ḅụ, anị ini Oputẹkẹwarị nama se ị̀ tẹkẹtẹkẹḅịa nyọ. Ọkụma àrị ị́rị́ Devid ḅe sẹlẹọkịmẹ, ḅẹrẹtọn ị̀ya tomonima pịrịḅịa ẹrẹchị.”

¹⁷Sọlọmọn ḅe pịkị nwọ ḅẹmẹ, “Ị̀ ḍa Devid ḅe ọ̀ tọnmẹ, Nyanaḅọ Izrẹl Tamụnọ Ḅe tẹkẹtẹkẹḅịa Oputẹkẹwarị ọ̀ nwọ nama ọ̀ pịrịḅịa,

¹⁸ọkụma Nyanaḅọ Ḅe nwọse ọ̀ ḅẹmẹ, ‘Ị́ karakaramẹ ị́ Oputẹkẹwarị nama ị̀ pịrịḅịa, ị́ nwọ ḅẹye mị,

¹⁹ọkụma ị́rị́ anị nama ẹkẹ. Ị́ya tọkụ ḅe, ori ị́ya tọkụ ḅe anị ị̀ya Oputẹkẹwarị mị namaḅịaye-ẹ.’

²⁰“Mịọkụ Nyanaḅọ Ḅe ò ḅereniye mị ori anị mịẹsam. Àrị ị̀ ḍaḅe kiriḍinmasam Izrẹl amanyanaḅọ ḅaraḅụ, à pịkị Nyanaḅọ Izrẹl Tamụnọ Ḅe ini nwọ tẹkẹtẹkẹḅịa Oputẹkẹwarị nama ọ̀ pịrịsam.

²¹Oputẹkẹwarị mị ḅie ḅụ Ọḅọkụ Igbe mị simeḅịa nyọ à nwọ chụapakụmasam, anị Nyanaḅọ Ḅe, mịna olomu-a ḍapụma na fị ọḅọkụ mị, yema ḅụ gịẹịn ḍụparị pẹkẹrẹ ma ḅie sime igbe mị, ori Ijipt mị ḅie ḅụ ini ọkịpakụmaḅo sịkị ḅụ.”

²²Anịsịkị tomonima tọrụkuḅu ḅụ Sọlọmọn ḅe mun agbamịẹ ẹbẹ mị tọrọkọ chịẹ, anịju ọ̀ ḅarama dekichịẹma

²³se tẹkẹmẹ, “Nyanaḅọ, Izrẹl Tamụnọ, ị́ kịkẹ oru ofori-ẹ ọgọnọju, so mị ḅie ḅụ, anịkanịka sẹkiri chuku ḅie! Ị́ya ọḅọkụ mị ị́ kokomẹ ị́ya tomonima ị́rị́na-fịye mị pịkị ị́ya ḅẹlẹma mị ḍiepakụma ini pịrịmẹ ini inia kuḅie mgba se ị́ ḅịpịpoki sịkị.

²⁴Ị́ ḅereni ị̀ ḍa Devid ḅe pịrịye mị ị́ anị kokomẹ; mịmgba ọkwẹịn goyegoye mịẹḅeinmasam.

²⁵Se mịọkụ, Nyanaḅọ Izrẹl Tamụnọ àrị ị́ tẹkẹmẹ na pa pịkị ísí ị́ ḅereniye mị sọnị koko, anị ị́ ḅereni ị̀ ḍa Devid ḅe pịrịye mị. Ị́ nwọse ọ̀ ḅẹmẹ na sịkịmamgba ò furo ḅie apụma ḅie gbọrịḅọ amanyanaḅọ sọ Izrẹl mị pịrịḅịa, ini nemikase iḅiọkụ ori ị́ ḅịpịpoki ọkụ seni ị́ ḅịpịpokimẹ ḅẹḅẹ.

²⁶Anịẹrẹchị mịọkụ, Yei Izrẹl Tamụnọ, ye ị́ ḅereni ị̀ ḍa Devid, ị́ya fịrịnwẹngịḅọ ḅe pịrị aye goyegoye ḅo mịẹ ḅeinmaye nwọsọ.

²⁷“Ọkụma, Yei Tamụnọ, ị́ ineda kọkọma sẹkiri ḅie angaḅe? Bebe so mị mgba sọnị ineda ị́ dekika sịkị anị ḍụḅa la ḅaraḅụ, nde anịọkụma, mị à nama Oputẹkẹwarị mị re, ndende ḅara ḍụḅa se ị́ sọḅe?

²⁸Ị̀ Nyana Tamụnọ, ị̀rị̀ ị́ya fịrịnwẹngịḅọ-ẹ. Ị̀ya tẹkẹ mị poki, se mịmgba àrị ị́ ḅara ḅiarịye mị mịẹ ị̀ pịrị.

²⁹Ḍin na enekaka na ḅie mị Oputẹkẹwarị mị ḍikiḍiki, mịanga anị ini ị́ tẹkẹtẹkẹḅịa ẹrẹchị ị́ sẹlẹọkịsa nyọ mị. À tọrụ se mị Oputẹkẹwarị mị da se tẹkẹ sịkị goyegoye ị̀ na-a.

³⁰Ị̀ya tẹkẹma naa, pịkị ị́ya tomonima tẹkẹma sọnị, ini tọrụ se mịju da seni tẹkẹ sịkị goyegoye. So mị ḅie, ị́ya warị ḅie wa naa se siḅụ-ḅarasin wa pịrị.

³¹“Tomoniḅọ siye se jụmḅọ mịẹmẹ se ini nụḅọ seni ị́ya agbamịẹ ẹbẹ mị tọrọkọ ḅomẹ, se mị Oputẹkẹwarị mị ḅie ḅụ yekarịfịmẹ, na ọ̀ mịẹye ofori-ẹ ḅẹḅẹ,

³²Yei Nyanaḅọ, soḅie anị poki se ḅẹrẹkọn ị́ya fịrịnwẹngịapụma pịrị. Siyemịẹḅọ ḅe fomuḅara seni ọ̀ pịrị, se ḅẹrẹtịḅị nemikaḅọ ḅe wẹrịso.

³³“Ị́ya tomoni Izrẹlapụma ị́ ḅụ simịẹ ẹrẹchị, inina-tarakapụma ini nẹngịmamẹ se ini vinpịkị ị́ damaḅo se sọḅo mị Oputẹkẹwarị mị ḅie ḅụ ḅụiderima ị́ tẹkẹ mẹ se siḅụ-ḅarasin pịrị ḅimẹ ḅẹḅẹ,

³⁴soḅie ini poki. Ị́ya tomonima mịẹ sima ḅụḅarasin ini pịrị, se pịkịna ini ọkịḅo ị́ seni inia olomu-a ḍapụma pịrị ama mị ḅie chu.

³⁵“Ị́ya tomonima ị́ ḅụ siye mịẹ ẹrẹchị ị́ ene mị ọlọchịẹmamẹ, se ini si ḅụ pịkị se tọrụ se mị Oputẹkẹwarị mị da, ḅụiderima se ị́ tẹkẹ mẹ ḅẹḅẹ,

³⁶soḅie ḅụ ini poki. Amanyanaḅọ ḅe na Izrẹlapụma na sima ḅụḅarasin ini pịrị, karakaraye mị mịẹḅịa ọkụ seni ini telima. Anịsịkị, Yei Nyanaḅọ, ene se mị ị́ya ama mị fịrịma, anị ị́rị́ ḅarana se ị́ya tomonima pịrị gbasosa ama mị.

³⁷“Ḅuruḅa anịkanịka ama nwẹngị obi ḅo ama mị gbẹịnmẹ ḅẹḅẹ, anịkanịka kụrọ fọrụ chịnmgbọlụma ḅaamẹ, anịkanịka igurube kpo, anịkanịka tarakapụ owu se ị́ya tomonima pakamẹ, anịkanịka oju ḅie sime obi, anịkanịka papa obi inia ḅie omi-ẹ nwọ ḅẹḅẹ,

³⁸inia tẹkẹma poki. Nemikase ị́ya tomoni Izrẹlapụma ḅie apụ kururu ḅụ kuḅie laḅara se ḅarama sụma mị Oputẹkẹwarị mị da se tẹkẹmẹ ḅẹḅẹ,

³⁹inia tẹkẹma naa. Soḅie ị́ya warị ḅie ini poki, siḅụ-ḅarasin ini pịrị, se ḅarachụa ini pịrị. Ị́rị́ kẹngẹ anị tomoniḅọ kuḅie koroma arịye ma nemiye-ẹ. Ọrụ ḅọḅọ gbẹịn ḅara seni nụḅọ na yemịẹ,

⁴⁰mịẹse ị́ya tomonima sịkịmamgba ị́ ḅịpịpokiḅịa ẹrẹchị, ị́ se mịna olomu-a ḍapụma pịrị ama mị ḅie ini anga àrị sịkị layelaye.

⁴¹“Nemikase ḅọlọ ama ḅie anga igoniḅọ ị́ya ẹrẹso mị na pịkị ị́ nwẹngị ị́ya tomonima pịrị opu fịrịma na se ḅo mị Oputẹkẹwarị mị ḅie ḅụ ị́ tẹkẹmẹ ḅẹḅẹ,

⁴²

⁴³oria tẹkẹ mị poki. Soḅie, ị́ anga nyọ ḅụ, ọ̀ naa se ori ị́ ḅara ḅiye mị mịẹ ọ̀ pịrị, mịẹse bebe tomonikiri mị ḅie sime apụ mamgba ị́ nemi pịkị ị́ ḅịpịpokiḅịa ọkụ, anị ị́ya tomoni Izrẹlapụma mịẹ ọkụ mị. Anịsịkị ini nemiḅịa na mị à nwọ nama Oputẹkẹwarị mị anị ini sime ị́ tẹkẹtẹkẹḅịa nyọ mị-ẹ.

⁴⁴“Ị́ tọn ị́ya tomonima pịrị na ini mun inina-tarakapụma na ọmụgbin se ini ị́ tẹkẹmẹ, ini sime nyọ goyegoye, ini tọrụ se mị opuama mị damẹ ḅẹḅẹ anị ị́ sẹlẹọkịsa ama mị, pịkị mị à nama ị́ pịrịsa Oputẹkẹwarị mị na,

⁴⁵inia tẹkẹma poki. Soḅie ḅụ ini na se ọmụḅaraiḅi seni ini pịrị.

⁴⁶“Ị́ya tomonima ị́ ḅụ siye mịẹ sịkị—siye mịẹkaḅọ pịkị ofori-ẹ—se ị́ya ịganịḅụ ị́ ini wẹrịso se inina-tarakapụma ini nẹngịmamẹ, se ini kun se ikoliapụ mịẹ so jịn ama mun mẹ, anị ama mị ḅọlọmẹ nwọḅẹ sọnị,

⁴⁷ị́ya tomonima tẹkẹma poki. Nemikase ini anị ama mị ḅie ḅụ siḅụ pịkị se ị́ tẹkẹmẹ, ini simịẹ pịkị sitịḅịnyana la-ọkụ ḍukopakụmamẹ ḅẹḅẹ, inia tẹkẹma naa, Yei Nyanaḅọ.

⁴⁸Nemikase anị ama mị ḅie ḅụ ini kọkọmaḅara na epele ofori ḅarana, se inia siḅụ pịkị se ị́ tẹkẹ àrị sịkịḅụ, ini tọrụ se mị ama mị damẹ ḅẹḅẹ, anị ị́ se mịna olomu-a ḍapụma pịrị ama mị, anị ị́ sẹlẹọkịsa opuama mị, pịkị mị à nama ị́ pịrị Oputẹkẹwarị mị na,

⁴⁹anịsịkị inia tẹkẹma poki. Soḅie ḅụ ị́ya warị ḅie ini naa se ḍikitịḅịfoin nyana ini pịrị.

⁵⁰Inia si mamgba ḅụ ḅarasin ini pịrị, ini pịkị ininachịn ị́ pịrịsa ayema sọnị wẹrịso ini pịrị, se mịẹse inina-tarakapụma iḅi ḍumo se ini na anga.

⁵¹Ini anị ị́ya tomoni-ẹ, ị́rị́ Ijipt mị ḅie ḅụ ọkịpakụmaḅo apụma, anị kọrị fịnị mị ḅie ḅụ.

⁵²“Gele Kụrọmamgba Nyanaḅọ, sisi pa ḅẹlẹma nyana ị́ya tomoni Izrẹlapụma na inia amanyanaḅọ ḅe na pịrị, se ini ị́ chịn se ḅarachụa ḅi sịkị goyegoye inia tẹkẹma naa.

⁵³Sẹkiri mị ḅie mgba ḅie ḅụ ị́rị́ ini sẹlẹọkị se ị́ya tomoni nwọ mịẹmẹ, ị́ya fịrịnwẹngịḅọ Moziz ḅe ḅụ ị́ ḅọrọ ḍuko ini pịrịsa ḅaraḅụ, anị Ijipt mị ḅie mịna olomu-a ḍapụma ị́ nwọ ọkịpakụmaḅo sịkị ḅụ.”

⁵⁴Sọlọmọn ḅe, Nyanaḅọ Ḅe tẹkẹ so sịkị ori agbamịẹ ẹbẹ mị tọrọkọ sịsẹ se chịẹmẹ, anị ọ̀ kpẹrẹkị sime ọ̀ ḅarama dekichịẹma nyọ mị.

⁵⁵Gele pụkọ ḅụ ọ̀ Tamụnọ Ḅe ḅẹlẹma mị ḅi seni anịju ḅụ koḅirima sime apụ mamgba ọgọnọ gbanamẹ. Ọ̀ nwọ ḅẹmẹ,

⁵⁶“Ọ́ Nyanaḅọ Ḅe tokoni anị deinma seni oria tomonima pịrịḅọ ḅe, anị ò ḅereni ini pịrịsa ḅaraḅụ. Oria fịrịnwẹngịḅọ Moziz ḅe ḅụ ọ̀ ḅọrọ se ḅereni ini pịrị iḅi aye mamgba ọ̀ mịẹ ini pịrịmẹ.

⁵⁷Yei Nyanaḅọ mịna Tamụnọ Ḅe mine na sime, anị ọ̀ mịna olomu-a ḍapụma na sime ọkụ mị; ye ọ̀ wa wẹrịsoma, anịkanịka wa se sarakoromama;

⁵⁸ye ọ̀ wa mịẹse wa ọ̀ ḅịpịpoki, mịẹse wa sịkịmamgba ò ḅi ḅara nwọse ḍumokọnḅịa ọkụ, se ò seni mịna olomu-a ḍapụma pịrị olokoma na, ọ̀ tọn ayema na kokoḅịa ọkụ.

⁵⁹Ye Nyanaḅọ mịna Tamụnọ Ḅe sịkịmamgba mị tẹkẹ mị na pịkị àrị ọ̀ ḅara ḅiarịyema se ḅiekoroma. Ye ọ̀ sịkịmamgba ḍikitịḅịfoin nyana oria tomoni Izrẹlapụma na, pịkị inia amanyanaḅọ ḅe na pịrị, inia ḅụpalịmaye ma eneḅeneḅene ini na sime ḅaraḅụ.

⁶⁰Se bebe tomonikiri sime sẹ mamgba nemiḅịa na Nyanaḅọ Ḅe kẹngẹ anị Tamụnọ Ḅe-ẹ—jụmḅọ ofori-ẹ.

⁶¹Ye ómine oria tomonima pịkị sịkịmamgba Nyanaḅọ mịna Tamụnọ Ḅe ḅụ ḅereni nyana, ḅịpịpoki ḅụ oria olokoma na ọ̀ tọn aye mamgba na nwọ koko, anị ọ́ nwọ mịmgba mịẹ ọkụ mị.”

⁶²Anịsịkị Amanyanaḅọ Sọlọmọn ḅe na bebe anịju sime apụ mamgba na agbamịẹ se Nyanaḅọ Ḅe pịrịmẹ.

⁶³Nambulo ḅụ mama poku na jie ẹndẹ fịnjị, anana ḅụ pịkị jie-a poku ọ̀ nwọse nwẹngị gboloma agbamịẹmẹ. Se amanyanaḅọ ḅe na bebe tomoni mamgba na mị ḅara mị seni Oputẹkẹwarị mị se Tamụnọ Ḅe ḅarachụa mẹ.

⁶⁴Anị gbọrị ene mị ḅụ ọ̀ pịkị ḅẹrẹkọn odo mị ḅie sime nweni mamgba pịrị pẹkẹrẹ mị mịẹfịafịamamẹ, anị Oputẹkẹwarị mị tọrọkọ ḅụ, anịsịkị ọ̀ pịkị bebe nama dọkịma agbama mịẹmẹ, fịayemgbọlụ ḍiepịrịaye agbama na pịkị nama ḅẹlẹkị mị na se nwẹngịgboloma agbamịẹmẹ, ò gose mịn mị mịẹye anịatịḅị alapẹlẹka agbamịẹ ẹbẹ mị ngịsị bokẹ ma agbama dekiḅụ.

⁶⁵Anịju Oputẹkẹwarị mị nyọ ḅụ, Sọlọmọn ḅe na bebe Izrẹlapụ mamgba na Tịḅịkikima nyọma Alalị ma fịmẹ sọnọma ḍin ḅụ. Tomoni opuma kpo ḅụ ḅakamẹ, Hamat Ḅọrọnyọ ọgọnọju daọrụ ḅụ sakị ḅo apụma na pịkị chukuju daọrụ ḅụ Ijipt apụma eke mị ḅụ ḅo apụma na.

⁶⁶Nine-a ḍin karama ene mịn ḅụ Sọlọmọn ḅe tomonima ḅẹ se ini so inia amama mun mẹ. Inimgba ini ò tokonimẹ se ḅieḅẹlẹ ḅụ so inia amama mun mẹ Nyanaḅọ Ḅe se oria fịrịnwẹngịḅọ Devid ḅe na pịkị oria tomoni Izrẹlapụma na pịrị ḅẹlẹma mamgba na gose.