Read kirikeni 1 Amanyanapụ 9 Bible Online

1 Amanyanapụ 9 - kirikeni bible

1 Amanyanapụ 9

¹Amanyanaḅọ Sọlọmọn ḅe Oputẹkẹwarị mị na amanyanaḅọ warị mị na pịkị ọ̀ nama ḍọkị jịn aye goyegoye mamgba na namaso sịkị,

²Nyanaḅọ Ḅe pịkịna ḅụḍiepakụma ọ̀ pịrịmẹ, anị Gibiọn mị ḅie ọ̀ mịẹ ḅara mị.

³Nyanaḅọ Ḅe nwọse ọ̀ ḅẹmẹ, “Ị́ya tẹkẹ mị à naasam. À mị Oputẹkẹwarị mị mịẹfịafịamamẹ anị ini ị̀ tẹkẹtẹkẹ gbasoḅịa ẹrẹchị ị́ namaye mị. À tọrụ se anị ḍiki pịkị anị ḍikiḍikiḅịa sịkịmamgba.

⁴Ị́ nemikase karakaraye ḅụ na epele oforika ḅara na se fịrịnwẹngị ị̀ pịrịmẹ ḅẹḅẹ, anị ị́ ḍa Devid ḅe mịẹ ọkụ mị, se ị́ nemikase ị̀ya olokoma koko pịkị à tọn ị́ pịrị aye mamgba mịẹmẹ ḅẹḅẹ,

⁵à ḅereni ị́ ḍa Devid ḅe pịrịye mị àrị anị mịẹḅịa, à ḍuko ọ̀ pịrịmẹ na ò furoḅie pakaḅo apụ anị sịkịmamgba Izrẹl mị ḅie ḅẹrẹtọnḅịaye-ẹ.

⁶Ọkụma, nemikase ị́rị́ anịkanịka ị́ furoḅie apụma ḅarị ị̀ ḍukonwẹngịkẹ, à chụa ọ́ pịrị olokoma na à tọn ọ́ pịrị ayema na ḅịpịpokikẹ, se jịn-a oru ma tẹkẹmẹ ḅẹḅẹ,

⁷anịsịkị à se ị̀ya tomoni Izrẹlapụma pịrịsa ama mị ḅie àrị ini depakụmaḅịa. Mịn Oputẹkẹwarị mị sọnị àrị anị sarakoromaḅịa anị ómine ị̀ tẹkẹtẹkẹḅịa ẹrẹchị à mịẹfịafịamasaye mị. Nyọnyọ ḅụ sime apụ mamgba Izrẹl mị ḍikisima pịkị anị seni papaye mịẹḅịa.

⁸Mịn Oputẹkẹwarị mị anịḅo opu sara nwọ sọḅịa se anịnyọ ḅọrọḅọ goyegoye ḅụgbiripuḅịa, oḅoku ijira pịkị nụḅọ ḅụ saraḅịa. Ini gbelaḅịa cheye gose ‘Nyanaḅọ Ḅe mị ḅarase mị ama mị na pịkị mị Oputẹkẹwarị mị na mị-ẹ?’

⁹Tomoni pẹkẹrẹḅịa, ‘Anịatịḅị ini Nyanaḅọ inia Tamụnọ Ḅe wẹrịsomẹ, anị Ijipt mị ḅie inia olomu-a ḍapụma ọkị pakụmaḅoḅọ ḅe. Ini nyanaḅereni oru ma pịrị pịkị àrị tẹkẹmẹ. Anịẹrẹchị Nyanaḅọ Ḅe mị fa mị ọkịḅo inia ọgọnọ gbanamẹ.’”

¹⁰Sọlọmọn ḅe si kụra anị nwọse ori ọkịmẹ Oputẹkẹwarị mị na oria amanyanaḅọ warị mị na nama ḅụ.

¹¹Hiram, Taya amanyanaḅọ ḅe, seni mị fịrị mị nwẹngịḅịa awụ chịnma na odo chịn mamgba na, pịkị ò ḅi goli mamgba na, ò se ọ̀ pịrịmẹ. Anịḅo fasịkị, Amanyanaḅọ Sọlọmọn ḅe Galili pẹkẹrẹ mị ḅụ si ama ọ̀ nwọse Hiram ḅe pịrịmẹ.

¹²Hiram ḅe ò mun àrị ḍikimẹ ọkụma àrị ọ̀ ḅụḅẹlẹkẹ.

¹³Anịẹrẹchị ọ̀ nwọse Sọlọmọn ḅe ḅẹmẹ, “ị̀ya mịnaḅọ, ma amama anị ị́ se ị̀ pịrị aye!” Mịn mị gose, nyọ mị ini pa Kabul nwọse anị chịn aḅẹ.

¹⁴Hiram ḅe, goli okpokpo-a oyi ẹndẹ nẹngịye nwọse Sọlọmọn ḅe sẹịnmamẹ.

¹⁵Amanyanaḅọ Sọlọmọn ḅe kụrọḅara mị ò se tomonima mịẹse ori Oputẹkẹwarị mị na, amanyanaḅọ warị mị na namaye-ẹ, opuama mị ḅụ ịrụapakapaka nyọ daọrụ mị kiri mị pịrị ḅeinma, pịkị opuama mị onu mị namamẹ. Ọ̀ pịkị anị gbọrị ḅara mị mịẹmẹ, se ò kpoto opuamama; anị Hezọ na, Mẹgido na, pịkị Gaza na namamẹ.

¹⁶(Ijipt amanyanaḅọ ḅe owuse Gaza mị paka se anị ọkịmẹ; anịa ḅie anga apụma ḅaafama pịkị fịnị seni opuama mị ḅụ chụamẹ. Anịsịkị ori anị se agbanị-chụa ḅarọ ma pịrịmẹ, á Sọlọmọn ḅe na sime sịkị ḅụ,

¹⁷se Sọlọmọn ḅe kpoto anị namamẹ.) Sọlọmọn ḅe oria kụrọḅara se nweni mịẹ fịrịnwẹngị ḅara mị ọ̀ nwọse pịkị Bẹt Horọn ḅụ Ideri koro nyọ mị kpoto nwọ namamẹ.

¹⁸Bealat na, pịkị Juda piri ele mị ḅie sime Tema mị,

¹⁹anị oria fịrịnwẹngịaye ma ọ̀ nwọ koko opuamama, oria asụnma na, oria owuni-a kporokporoma na sime opuamama na pịkị Jerusalẹm mị ḅie ḅụ ọ̀ nama ḍọkịye goyegoye mamgba na, Lẹbanọn mị ḅie ḅụ, na pịkị oria amanyanakiri mị ḅie jịn-a nyọ ḅụ na.

²⁰Sọlọmọn ḅe kụrọkụrọ ḅara ḅụ ọkị se oria fịrịma nwẹngịapụma, anị Izrẹlapụma Kenan mị ọkị sịkị mị ḅụ ini ḅaaka apụ awọmẹnịma-ẹ. Mịna apụma anị Amọraị apụma na, Hitaị apụma na, Pẹrizaị apụma na, Hivaị apụma na, pịkị Jebus apụma na, inia awọma omoniapụ ḅụ sime ọkịḅo mị sịkị mị lamẹ.

²²Sọlọmọn ḅe Izrẹlapụma ori ini seni omoniapụ mịẹkẹ; ini oria owuni na, tịḅịnị na, ọmụalapụ na, owuni kporokporo tịḅịdapụ na, pịkị asụn se nwẹngịapụ na nwọ mịẹmẹ.

²³Ini kịnị ẹndẹ sọnọmasi oyi fịnjị tịḅịdapụ sọ kụrọḅara ḅụ fịrịnwẹngịarịapụ ma pịrịmẹ, anị Sọlọmọn ḅe oria kịrịkịrị-a warịma namarị apụma.

²⁴Sọlọmọn ḅe ori onwun se opuama mị ḅụ ịrụapakapaka nyọ daọrụ ḅụ kiri mị pịrị ḅeinma so sịkị, anị tarọ Ijipt amanyanaḅọ ḅe ḅa ma, á Devid Opuama mị ḅie pakaso mun Sọlọmọn ḅe nama á pịrị amanyanaḅọ warị mị ḅie sọye-ẹ.

²⁵Kụra ḅụ tẹrẹ-a sịkị Sọlọmọn ḅe nwọse ọ̀ nama Nyanaḅọ Ḅe pịrị agbamịẹ ẹbẹ ọgọnọ dọkịma agba na nwẹngịgboloma agba na nwọ mịẹmịẹmẹ. Ọ̀ pịkị insẹnsị dọkịma Nyanaḅọ Ḅe pịrịpịrịmẹ. Se mị ḅara mị ḅụ ori Oputẹkẹwarị mị nama karamamẹ.

²⁶Amanyanaḅọ Sọlọmọn ḅe pịkị Iziọngiba ḅie onwoin arụ kpo nwọ namamẹ, anị Ilat mị na kpekima sime nyọ mị, Akaba Ẹgẹdẹ mị aka ḅụ, Idọm ama mị ḅie ḅụ.

²⁷Amanyanaḅọ Hiram ḅe oria mengi-tọrụ-ọmụgbin-arụ ma ḅie tomonima ḅụ ḍin-sa-apụ ḅụ dapụ nwọ se Sọlọmọn ḅe fịrịmamẹ mun oria tomonima na fịrịnwẹngịḅịa ẹrẹchị.

²⁸Ini dọkụ mun Ọfa ama mị lamẹ, se goli okpokpo gbọrị poku na jie ẹndẹ nẹngịye nwọ ọkịḅo Sọlọmọn ḅe pịrịmẹ.