Read kirikeni 2 Amanyanapụ 1 Bible Online

2 Amanyanapụ 1 - kirikeni bible

2 Amanyanapụ 1

¹Izrẹl Amanyanaḅọ Ehab ḅe fị ḅọrọso sịkị, Moab sẹ mị kọngọ kụrọma Izrẹl mị pịrịmẹ.

²Izrẹl Amanyanaḅọ Ehaziya ḅe oria amanyanaḅọ ọgọnọ warị mị ḅụ ḅaragbanaye mị ọgọnọ sokoro koromẹ, Sameria ḅieḅụ se ye opuma ọ̀ lamẹ. Anịẹrẹchị ori okumun-apụ seni Bẹlzibọb Filistia apụ oru Ẹkrọn ḅie simeye mị fịrịmamẹ, ọ̀ kpaịnma ḍumoḅịa na ò ḍumo ẹka na gbela nemiḅịa ọkụ.

³Ọkụma Nyanaḅọ Ḅe enjẹlḅọ tọn ịkịankoro Ịlaịja, Tisbị ḅọ ḅe pịrịmẹ, na ori Amanyanaḅọ Ehaziya okumun-apụ ma damamun se nwọse ini gbela, “Cheye ẹrẹchị ó mun Bẹlzibọb chuku yegbela-ẹmun-ao, Ẹkrọn oru mị? Anịatịḅị ọ́ nwọ chịn na Izrẹl mị ḅieḅụ Tamụnọ ofori-ẹ?

⁴Ó ḍuko amanyanaḅọ ḅe pịrị na Nyanaḅọ Ḅe nwọ ḅẹmẹ, ‘Ị́ ḍumo ẹkẹ ị́ layema ḅụ; ị́ fịḅịa!’” Ịlaịja ḅe Nyanaḅọ Ḅe tọn ḅara mị mịẹmẹ,

⁵se okumun-apụ ma vinpịkịso amanyanaḅọ ḅe damamunmẹ. Ọ̀ nwọse ini gbelamẹ, “Cheye ẹrẹchị ó vinpịkịḅo?”

⁶Ini nwọse ọ̀ pẹkẹrẹmẹ, “Gbọrị owuḅọ mine-na-ịrịa se nwọse wa ḅẹmẹ na wa vinpịkị ị́ damaḅo se ḍuko ị́ pịrị na Nyanaḅọ Ḅe nwọse ị́ ḅẹmẹ, ‘Cheye ẹrẹchị ị́ okumun-apụ seni Bẹlzibọb, Ẹkrọn oru mị fịrịma se anịa chuku yegbela-ẹmun-ao? Anịatịḅị ị́ nwọ chịn na Izrẹl mị ḅieḅụ Tamụnọ ofori-ẹ? Ị́ ḍumoẹkẹ ị́ layema ḅụ, ị́ fịḅịa!’”

⁷“Tomoniḅọ ḅe ori ndende sime?” amanyanaḅọ ḅe ọkọse ini gbelamẹ.

⁸“Nama ojuapụra se mịẹ ḅụchụaye ọ̀ nwọ chụamẹ pịkị nama ojuapụra ḅirikunye seni ò ḅirikunmẹ,” ini ọkọse ọ̀ pẹkẹrẹmẹ. Amanyanaḅọ ḅe nwọ ḅẹmẹ, “Ịlaịja ḅe ori-ẹ!”

⁹Anịsịkị gbọrị owunitịḅịnịḅọ na kịnị-a mesi oyi fịnjị na ọ̀ nwọ fịrịmamẹ mun Ịlaịja ḅe ọkịḅoḅịa ẹrẹchị. Owunitịḅịnịḅọ ḅe ori ọrịmẹ na Ịlaịja ḅe gbọrị chịngị ọgọnọ ḅụ kpọnjị sime waraḅẹ se nwọse ọ̀ ḅẹmẹ, “Tamụnọ fịrịnwẹngịḅọ, amanyanaḅọ ḅe nwọ tọn ị́ pịrịmẹ na koroḅo.”

¹⁰Ịlaịja ḅe nwọse ọ̀ pẹkẹrẹmẹ, “Nemikase ị̀rị̀ Tamụnọ fịrịnwẹngịḅọ-ẹ ḅẹḅẹ, ye fịnị soḅie koroḅo ị́rị́na-ị́ya tomonima na dọkịma ḅaa!” Anị gbọrị kirikiri fịnị koroḅo owunitịḅịnịḅọ ḅe na oria tomonima na dọkịma ḅaamẹ.

¹¹Amanyanaḅọ ḅe jịn owunitịḅịnịḅọ na kịnị-a mesi oyi fịnjị na se fịrịmamẹ, ò mun nwọse Ịlaịja ḅe ḅẹmẹ, “Tamụnọ fịrịnwẹngịḅọ, amanyanaḅọ ḅe tọn ị́ pịrịmẹ na koroḅo mị kirikiri!”

¹²Ịlaịja ḅe nwọse ọ̀ pẹkẹrẹmẹ, “Nemikase ị̀rị̀ Tamụnọ fịrịnwẹngịḅọ-ẹ ḅẹḅẹ, ye fịnị soḅie koroḅo ị́rị́na-ị́ya tomonima na dọkịma ḅaa!” Anị gbọrị kirikiri Tamụnọ Ḅe oria fịnị koroḅo owunitịḅịnịḅọ ḅe na oria tomonima na dọkịma ḅaamẹ.

¹³Amanyanaḅọ ḅe pịkị tẹrẹ karama sịkịḅụ gbọrị owunitịḅịnịḅọ na kịnị-a mesi oyi fịnjị na fịrịmamẹ. Ọ̀ chịngị mị tanjị iwomun, ọ̀ ḅụọịkpụkụ ma seni Ịlaịja ḅe tọrọkọ kpẹrẹkị se tẹkẹ ḅụ nwọ ḅẹmẹ, “Tamụnọ fịrịnwẹngịḅọ ḍikitịḅịfoin nyana ị̀rị̀na-ị̀ya tomonima na pịrị. Mịna ḍumo ma ḅọrọma!

¹⁴Ísí mama owunitịḅịnị ma na inia tomonima na fịnị soḅie koroḅo ini dọkịma ḅaasam; ọkụma pasisi ḍikitịḅịfoin nyana ị̀ pịrị!”

¹⁵Nyanaḅọ Ḅe enjẹlḅọ ḅe nwọse Ịlaịja ḅe ḅẹmẹ, “Ori na koro mun, se ḅalafama.” Anịẹrẹchị Ịlaịja ḅe owunitịḅịnịḅọ ḅe na so amanyanaḅọ ḅe damamunmẹ

¹⁶se nwọse ọ̀ ḅẹmẹ, “Mị Nyanaḅọ Ḅe ḍukoye-ẹ: ‘Ị́ okumun-apụ seni Bẹlzibọb, Ẹkrọn oru mị fịrịmamẹ yegbelaḅịa ẹrẹchị—anị Tamụnọ Izrẹl mị ḅieḅụ ofori-ẹ ị́ ye se gbelaḅịaḅọ anịka? Ị́ ḅụ iḅi-ẹkẹ, ị́ fịḅịa!’”

¹⁷Ehaziya ḅe fị̀mẹ, Nyanaḅọ Ḅe Ịlaịja ḅe ḅụ ḅọrọ ḍukosa ḅaraḅụ. Ehaziya ḅe ori owuapụ awọ nyanakẹ, anịẹrẹchị numbireowu Joram ḅe oria kiriḍinmamẹ amanyanaḅọ ḅaraḅụ, Jẹhoram, Jẹhoshafat yaḅe amada maịn karama kụra mị ḅie, anị Juda amanyanaḅọ ḅe.

¹⁸Amanyanaḅọ Ehaziya ḅe mịẹ jịnye goyegoye gịẹịn koroma waraḅẹ Izrẹl Amanyanapụ ma ḅụa ḅẹrẹ ḍiri mị ḅieḅụ.