Read kirikeni 2 Amanyanapụ 12 Bible Online

2 Amanyanapụ 12 - kirikeni bible

2 Amanyanapụ 12

¹Jẹhu Izrẹl Amanyanaḅọ ḅe Izrẹl mị da sọnọma kụra karama kụra mị ḅie anị, Joash ḅe ḅo Juda amanyanaḅọ sọye-ẹ, se kụra mesi ọ̀ nwọse Jerusalẹm ḅie ḅẹrẹtọn mẹ. Bashibaḅọ Zibia ma anị nyọngọrọ ma-ẹ.

²Oria ḍumo ene mamgba ḅie ọ̀ Nyanaḅọ Ḅe ḅụḅẹlẹye mịẹmẹ, anịatịḅị Jẹhoịada agbamịẹḅọ ḅe yese ò telimamẹ.

³Anịẹḅẹsọnị oru ḅẹrẹ nemiapụ tẹkẹ nyọma ori àrị kankẹ, se tomonima pa mun àrịju ma ḅụ agbamịẹ pịkị insẹnsị dọkịmaḅẹ.

⁴Joash ḅe agbamịẹapụma chịn se kụrọ seni ini pịrịmẹ na se Oputẹkẹwarị mị ḅie agbamịẹḅịa ẹrẹchị ini ocho igbiki na, sịkịmamgba ini mịẹarị agbama ḅie sọḅoarị igbiki ma na, pịkị ḅụḅẹlẹḅara ḅụ mịẹ agba ḍiepịrịaye mamgba ini koko.

⁵Agbamịẹḅọ goyegoye, ọ̀ fịrịnwẹngị pịrị apụma se ḅo igbiki mị nwọ ọlọḅịa. Se ini igbiki mị seni Oputẹkẹwarị mị ḅụ siye tẹlịmaḅịa, fịrị mị la ḅaraḅụ.

⁶Joash ḅe amada sitẹrẹ-a kụra fịnjị karama kụra mị ḅie sọnị agbamịẹapụma na ini pa Oputẹkẹwarị mị ḅụ siye tẹlịmakẹ.

⁷Anị ò Jẹhoịada ḅe na ísí agbamịẹapụma na chịn se ini gbelaye-ẹ, “Cheye ẹrẹchị ma ómine Oputẹkẹwarị mị ḅụ siaye tẹlịmaka? Mịọkụ sakị tọrọkọ mun ọ́ da igbiki ma ómine ḅarị koko ẹkẹ; ómine anị saḅama jụmḅọ pịrịḅịa, mịẹse ini ineda siaye ma tẹlịmaḅịa ọkụ.”

⁸Agbamịẹapụma mịn mị ini ḅerenimẹ, ini pịkị ḅerenimẹ na ini ma siaye ma tẹlịma ẹkẹ Oputẹkẹwarị mị ḅụ.

⁹Anịsịkị Jẹhoịada ḅe gbọrị igbe ọkịmẹ, ḅịpịgbẹịnye mị ḅụ kalanyọ tolu, se igbe mị seni agbamịẹ ẹbẹ mị anga sịkị ḅụ koromamẹ, amaḅara anga ḅụ Oputẹkẹwarị mị ḅie sọmun-arị ọkụma. Tẹkẹḅịa ẹrẹchị ḅo apụma, se ḅọkọ ḅụ sime agbamịẹ fịrịnwẹngịarị apụma pịrị igbiki mamgba ini seni igbe mị ḅie chụamẹ.

¹⁰Igbiki igbe mị ḅie ḅaka sịkị goyegoye, amanyanaḅọ ḍiri gịẹịnḅọ ḅe na Gele Agbamịẹḅọ ḅe na ḅo seleḅa ma sanị se àrịa iku mị la-ọkụ nwọ tọn nemiḅịa.

¹¹Ini igbiki mị la-ọkụ mị se ḍiri ḅie chụa sosa ḅẹḅẹ, ini seleḅa ma saḅama Oputẹkẹwarị mị ḅie fịrị mị ḅara sime apụma pịrịḅịa, mịnapụma anị akanị ma gbẹịnḅịaye-ẹ, pịkị warịnama apụma na,

¹²ḍụparị se fịrịnwẹngịapụma na, pịkị ḍụparị pu apụma na, se ḍụpọ puḅịa opu chịnma na ḍụparịma na fẹ ini seni siayema tẹlịma, pịkị jịn ḅụpalịma se gbẹịn na iḅiaye mamgba gbẹịnḅịaye-ẹ.

¹³Igbiki mị ḅụ ini ye ọkị seni ini mịẹ seleḅa ọmọngọ ma na, bọlị ma na, epelepe ma na gbẹịnkẹ, anịkanịka se tọnjie ma ḅụ fịrịnwẹngịḅịaye ma sọnị, anịkanịka jịn seleḅa anịkanịka goli se mịẹḅịaye sọnị.

¹⁴Anịmgba ini seni fịrịnwẹngịapụma gbẹịnmẹ pịkị seni siaye ma tẹlịmaḅịaye ma fẹmẹ.

¹⁵Fịrị mị ḅara sime apụma dada kuḅie seni ḅụgbana gbẹịn apụ-ẹ, anịẹrẹchị ini ḅẹ na ini ḅo opoli tọn nwọḅẹye mị anị papa sịkị fama-ẹ.

¹⁶Mịẹirima agbama igbiki na pịkị simịẹ agbamịẹaye ma na ini seni igbe mị ḅie chụakẹ; anị sime agbamịẹapụma pịrịmẹ.

¹⁷Anịsịkị mị ḅụ Siria Amanyanaḅọ Hazaẹl ḅe owu seni Gat mị paka se anị kanmẹ; se ọ̀ pịkị owu seni Jerusalẹm mị pakaḅịa ọkụ ḍọkịmẹ.

¹⁸Juda Amanyanaḅọ Joash ḅe, ọ̀ ḅụ tatarị amadapụ ma Jẹhoshafat ḅe na, Jẹhoram ḅe na, pịkị Ehaziya ḅe na se osiḅụ wẹrị Nyanaḅọ Ḅe pịrị agbamịẹ ḍiepịrịayema na, ori pịkị oria agbamịẹ ḍiepịrịayema na seni àrịa ḅụ chụamẹ pịkị Oputẹkẹwarị mị ḅie sime goli mamgba na pịkị amanyanaḅọ warị mị ḅie sime aye mamgba na seni ḍie Siria Amanyanaḅọ Hazaẹl ḅe pịrịmẹ, anịsịkị re mị ori oria ọmụogbo mị chịn ọkịye-ẹ Jerusalẹm mị ḅụ.

¹⁹Amanyanaḅọ Joash ḅe mịẹ jịn aye goyegoye Juda Amanyanapụ ma Ḅụaḅẹrẹ ḍiri mị ḅie gịẹịn waraḅẹ.

²⁰Amanyanaḅọ Joash ḅe oria tịḅịnị fịrịnwẹngịapụma ḅẹrẹḅia ọ̀ pịrịmẹ, se inia ḅie mamapụ, Jozaka, Shimiat yaḅe na Jẹhozabad, Shoma yaḅe na, ọ̀ ḅaamẹ Jerusalẹm mị ḅụ ịrụapakapaka nyọ daọrụ ḅụ ini onwun sara ḅeinma se nama warị kiri mị ọgọnọ, ḅọrọ Sila mị mun ateli mị ḅie. Joash ḅe amanyanapụ iḍupuma ḅieḅụ ini ò ḍipimẹ Devid Opuama mị ḅie, se yayo Amazaya ḅe oria kiriḍinmamẹ amanyanaḅọ ḅaraḅụ.