Read kirikeni 2 Amanyanapụ 14 Bible Online

2 Amanyanapụ 14 - kirikeni bible

2 Amanyanapụ 14

¹Jẹhoash, Jẹhoahaz yaḅe amanyanaḅọ sọ Izrẹl mị pịrị maịn karama kụra mị ḅie, Amazaya, Joash yaḅe ḅo Juda amanyanaḅọ sọmẹ,

²anị ò ḅo sisọnọ-a kụra fịnjị lasịkị, gbọrịye fa kụra soi ọ̀ nwọse ḅẹrẹtọn mẹ Jerusalẹm mị ḅie. Nyọngọrọ anị Jẹhoadin, Jerusalẹmḅọ ma-ẹ.

³Ọ̀ Nyanaḅọ Ḅe ḅụḅẹlẹye mịẹmẹ, ọkụma ori oria olomuḍaḅọ Amanyanaḅọ Devid ḅe kịkẹkẹ; anịnakaraka, ḍawu Joash ḅe mịẹye mị anị ori sọnị pịkị mịẹye-ẹ.

⁴Oruḅẹrẹnemiapụ ma inia tẹkẹtẹkẹ-a nyọma ori àrị kan sarakẹ, se tomonima pa anịju mun agbamịẹ pịkị insẹnsị dọkịmaḅẹ.

⁵Amazaya ḅe ḅo ḅẹrẹtọn kụrọ mị nyana kirikiri ḍawu amanyanaḅọ ḅe ḅaa tịḅịnịma ọ̀ nwọ ḅaamẹ.

⁶Anịẹḅẹ sọnị, inia awọmẹnịma ori ini ḅaakẹ, ọkụma Nyanaḅọ Ḅe Moziz oloko mị ḅie ḅụ ḍukoye mị ọ̀ nwọ ḍukonwẹngịmẹ: “Ini ḍapụ na nyengiapụ na ḅaa ẹkẹ inia awọmẹnịma mịẹ si gose, ini pịkị awọmẹnị ḅaa ẹkẹ inia ḍapụ na nyengiapụ na mịẹ si gose; tomoniḅọ ḅarana mịẹ si ḅụ anị ini nụḅọ ḅaaḅịaye-ẹ.”

⁷Amazaya ḅe Idọm apụ owunima ḅie kịnị poku na sọnọ ẹndẹ nwọ ḅaamẹ Fụn Pẹsịkiri mị ḅie ḅụ, Sila opuama mị ọ̀ nwọ ọkị se nwọse anị chịnmẹ Joktiẹl, mị anị pa fịarị ẹrẹ mị-ẹ.

⁸Anịsịkị Amazaya ḅe okumun-apụ seni Jẹhoash Izrẹl Amanyanaḅọ ḅe fịrịmamẹ, na ori ineḅịa ḅẹḅẹ ò ḅo ori na owusọ.

⁹Ọkụma Amanyanaḅọ Jẹhoash ḅe nwọ pẹkẹrẹ ọ̀ sẹịnmamẹ, “Gbọrị sịkị Lẹbanọn Tụndụ mị ọgọnọ ḅụ aga-ikpu mị nwọ seni Awụ chịn mị ḅẹmẹ, ‘ị́ ndụḅa ma seni ị̀ nịa ḅe pịrị ori árị na sime.’ Gbọrị piriḅie nama ḅọrọ se piri mị nanga kiri pịrịmẹ.

¹⁰Mịọkụ, Amazaya, Idọm apụma ị́ nwọ nẹngịmaye mị, anị ị́ tịḅị furamaḅẹ. Ị́ya ẹrẹso mị ye anị ị́rị́ na deinkoro, se ị́ya warị ḅie sime. Cheye ẹrẹchị ị́ fa ọkịḅo ị́rị́ na ị́ya tomonima na ọgọnọ gbanaḅịa ḅẹrẹ nwọ pakụma ḅia-ao?”

¹¹Ọkụma Amazaya ḅe ò poki ḍụkụkẹ, anịẹrẹchị Amanyanaḅọ Jẹhoash ḅe oria owuapụma na paka mun ori na owusọmẹ Bẹt Shimẹsh mị nyọ ḅụ Juda mị ḅieḅụ.

¹²Amazaya ọmụogbo mị ọmụ inia ḅara sime, se oria owuni mamgba mangịso inia warịma mun mẹ.

¹³Jẹhoash ḅe Amazaya ḅe kun so mun ikoliḅọ mịẹmẹ, owu mị ọ̀ sọ mun Jerusalẹm mị la, se opuama mị onu ma kansaramẹ Ifrem Amaḅọkọ mị ḅụ sakị mun Ịkọlị mị ḅe Amaḅọkọ mị lamẹ, ineda paka mun kuḅu oyiasi laḅịa ịsụn ḅụ.

¹⁴Ori ọrị seleḅa ma na goli mamgba na ori ọkịmẹ, Oputẹkẹwarị mị ḅie fịrịnwẹngịaye ma na, pịkị amanyanaḅọ warị ḅie sime ngọma na, ori arịmgba dekiso Sameria mun mẹ. Ọ̀ pịkị tomonima kun chụa somẹ.

¹⁵Jẹhoash ḅe mịẹ jịn aye goyegoye, pịkị ọ̀ kụrọ kuḅie nyana Juda Amanyanaḅọ Amazaya ḅe na ọmụgbin ḅara mị mgba Izrẹl Amanyanapụ ma Ḅụaḅẹrẹ ḍiri mị ḅie gịẹịn waraḅẹ.

¹⁶Jẹhoash ḅe fịmẹ se amanyanapụ iḍupuma ḅie ini ò ḍipimẹ Sameria mị ḅie, se yayo Jeroboam Maịn karamaḅọ ḅe oria kiriḍinmamẹ amanyanaḅọ ḅaraḅụ.

¹⁷Juda Amanyanaḅọ Amazaya ḅe jie-a kụra ọ̀ ḍumo nwọ lamẹ, Izrẹl Amanyanaḅọ Jẹhoash ḅe fị ḅọrọso sịkị.

¹⁸Amazaya ḅe mịẹ jịn aye goyegoye Juda Amanyanapụ ma Ḅụaḅẹrẹ ḍiri mị ḅie gịẹịn waraḅẹ.

¹⁹Jerusalẹm mị ḅie ini ḅẹrẹḅia Amazaya ḅe pịrịmẹ ọ̀ ḅaaḅịa ẹrẹchị, anị ọ̀ mangịso Lekish opuama mị mun ye-ẹ, ọkụma ori na tarakapụma ò ḍuko anịju mun se ọ̀ ḅaamẹ.

²⁰Ini asụn seni oria oju mị deki Jerusalẹm mị mun mẹ se amanyanapụ iḍupuma ḅie ini ò ḍipimẹ, Devid Opuama mị ḅie.

²¹Juda apụma anịsịkị amanyanaḅọchu seni yayo Ọzaya ineinfasi kụra la tọkụ ḅe chiramẹ amanyanaḅọ ḅaraḅụ.

²²Ọzaya ḅe ḍawu ḅe fị ḅọrọ seso ọ̀ pịkị Elat mị ọkịmẹ ọmụ ḅie, se kpoto anị namamẹ.

²³Amazaya, Joash yaḅe Amanyanaḅọ sọ Juda mị pịrị jie karama kụra mị ḅieḅụ, Jeroboam, Jẹhoash yaḅe ḅo Izrẹl amanyanaḅọ sọmẹ, se kụra mesi gbọrị kụra fịnjị nwọse Sameria ḅie ḅẹrẹtọn mẹ.

²⁴Ọ̀ Nyanaḅọ Ḅe ḅụ si mịẹmẹ, tatarị amada ḅọrọ se ò ḅo amada Jeroboam, Nebal yaḅe Izrẹl mị da mun si ḅie chuḅọ ḅe, ọ̀ nwọ ḍikima yemịẹmẹ.

²⁵Izrẹl eke mị mgba ọmụ ḅie ọ̀ pịkị anị ọkịmẹ, Hamat Ḅọrọnyọ ọgọnọju daọrụ mị ḅụ sakị mun Fịsa Oputọrụ mị la chukuju ḅụ. Mịn mị anị Nyanaḅọ, Izrẹl Tamụnọ Ḅe oria fịrịnwẹngị ịkịankoroḅọ Jona, Amitaị ya Gat Hefaḅọ ḅe ḅụ ḅọrọ ḅereniye mị-ẹ.

²⁶Nyanaḅọ Ḅe Izrẹlapụma ọrịarị ḅalafama tọrụsiọrị mị ọrịmẹ; pịkị ḅarachụa ini pịrịḅịa gbọrịḅọ sọnị ofori ọkụ mị na.

²⁷Ọkụma Nyanaḅọ Ḅe okorona okorona Izrẹl mị fama gbaso mị ori ọkọ ḅikẹ, anịẹrẹchị ori Amanyanaḅọ Jeroboam maịn karamaḅọ ḅe ḅụ ḅọrọ ini ḍụamẹ.

²⁸Jeroboam maịn karamaḅọ ḅe mịẹ jịn aye goyegoye, kụrọkuḅie ḅụ ò gbin ọmụ ma na, pịkị ọ̀ wẹrị Damaskọs mị na Hamat mị na kpoto nwọ ọkịḅo Izrẹl mị pịrị ọkụ mị na, àrịmgba Izrẹl Amanyanapụ ma Ḅụaḅẹrẹ ḍiri mị ḅie gịẹịn waraḅẹ.

²⁹Jeroboam ḅe fịmẹ se amanyanapụ iḍupuma ḅie ini ò ḍipimẹ, se yayo Zẹkaraya ḅe oria kiriḍinmamẹ amanyanaḅọ ḅaraḅụ.