Read kirikeni 2 Amanyanapụ 15 Bible Online

2 Amanyanapụ 15 - kirikeni bible

2 Amanyanapụ 15

¹Maịn karama Jeroboam Izrẹl Amanyanaḅọ ḅe amada tẹrẹfasoi karama kụra mị ḅie Ọzaya, Amazaya yaḅe ḅo Juda amanyanaḅọ sọmẹ,

²anị ò ḅo ineinfasi kụra lasịkị, se kụra mesi oyi fịnjị na mama kụra ọ̀ nwọse ḅẹrẹtọn mẹ Jerusalẹm mị ḅie. Nyọngọrọ Jekolaịya ma Jerusalẹmḅọ-ẹ.

³Ḍawu ḅe ḅụọ ḍikiḍa ḅụ ọ̀ Nyanaḅọ Ḅe ḅụḅẹlẹye mịẹmẹ.

⁴Ọkụma oruḅẹrẹnemiapụ tẹkẹ nyọma ọ̀ kankẹ, se tomonima pa arịju ma ḅụ agbamịẹ pịkị insẹnsị dọkịmamẹ.

⁵Nyanaḅọ Ḅe ḅụkan obi seni Ọzaya ḅe gbinmẹ, anị ori na sime mun oria ḍumo kuluma ene mị lamẹ. Sikima sime gbọrị warị ḅie ori angamẹ, oria fịrị mamgba ọ̀ ḅarasinmẹ, anịsịkị yayo Jotam ḅe sẹ mị ḍikiḍikimẹ.

⁶Ọzaya ḅe mịẹ jịn aye goyegoye Juda Amanyanapụ ma Ḅụaḅẹrẹ ḍiri mị ḅie gịẹịn waraḅẹ.

⁷Ọzaya ḅe fịmẹ se amanyanapụ ḍụẹịn ḍipi piri mị ḅie ini ò ḍipimẹ Devid Opuama mị ḅieḅụ, se yayo Jotam ḅe oria kiriḍinmamẹ amanyanaḅọ ḅaraḅụ.

⁸Izrẹl Amanyanaḅọ Ọzaya ḅe amada maịn fa kụra mesi karama kụra mị ḅie Zẹkaraya, maịn karama Jeroboam amanyanaḅọ ḅe yaḅe ḅo Izrẹl amanyanaḅọ sọmẹ, se sonio akalụ ọ̀ nwọse Sameria mị ḅie ḅẹrẹtọn mẹ.

⁹Ò si mịẹmẹ Nyanaḅọ Ḅe ḅụ, ọ̀ tọrọkọ apụma mịẹ ọkụ mị. Amanyanaḅọ Jeroboam, Nebal yaḅe sitịḅị mịẹmịẹaye ma ọ̀ nwọ ḍikiḍamẹ, anị Izrẹl mị da mun si ḅie chuḅọ ḅe.

¹⁰Shalọm, Jebẹsh yaḅe siḅẹrẹḅia Amanyanaḅọ Zẹkaraya ḅe pịrịmẹ, ori ọ̀ ḅaamẹ Ibleam mị ḅie ḅụ, se ori oria kiriḍinmamẹ amanyanaḅọ ḅaraḅụ.

¹¹Zẹkaraya ḅe mịẹ jịn aye goyegoye Izrẹl Amanyanapụ ma Ḅụaḅẹrẹ ḍiri mị ḅie gịẹịn waraḅẹ.

¹²Anịẹrẹchị Nyanaḅọ Ḅe ḅereni Amanyanaḅọ Jẹhu ḅe pịrịye mị mịẹ ḅeinmamẹ: “Ị́ furo ḅie apụma, ini Izrẹl amanyanapụ sọ mun inein karama ḅụọ mị laḅịa.”

¹³Juda Amanyanaḅọ Ọzaya ḅe amada gbọrịye fa mesi karama kụra mị ḅie, Shalọm, Jebẹsh yaḅe ḅo Izrẹl amanyanaḅọ sọmẹ, se gbọrị akalụ ọ̀ nwọse Sameria mị ḅie ḅẹrẹtọn mẹ.

¹⁴Mẹnahẹm, Gadaị yaḅe Tiza mị ḅie ḅụ so Sameria mun Shalọm ḅe ḅaa, se oria kiriḍinmamẹ amanyanaḅọ ḅaraḅụ.

¹⁵Shalọm ḅe mịẹ jịn aye goyegoye, pịkị ọ̀ wẹrị siḅẹrẹḅia ọkụ mị na, Izrẹl Amanyanapụ ma Ḅụaḅẹrẹ ḍiri mị ḅie gịẹịn waraḅẹ.

¹⁶Mẹnahẹm ḅe Tiza mị ḅie soarị sịkị, Tapua opuama mị ori okorona okorona anị famamẹ, anịa ḅie anga apụma na pịkị anị kelema koro eke mị mgba na, anịatịḅị opuama mị anị nyana ḅereni ọ̀ pịrịkẹ. Simekọn eremeni mamgba ḅụlọma sọnị ò polomẹ.

¹⁷Ọzaya Juda Amanyanaḅọ ḅe amada gbọrịye fa mesi karama kụra mị ḅie, Mẹnahẹm Gadaị yaḅe ḅo Izrẹl amanyanaḅọ sọmẹ, se oyi-a kụra ọ̀ nwọse Sameria ḅie ḅẹrẹtọn mẹ.

¹⁸Ọ̀ Nyanaḅọ Ḅe ḅụ si mịẹmẹ, anịatịḅị ọkịmun ọ̀ fị ene la, Amanyanaḅọ Jeroboam, Nebal yaḅe sitịḅị-a mịẹmịẹayema ọ̀ nwọ ḍikiḍamẹ, anị Izrẹl mị da mun si ḅie chu nweni ọ̀ fị ene laḅọ ḅe.

¹⁹Tiglat Pilẹsa Asiria sẹdaḅọ ḅe, ḅo Izrẹl mị gbẹịnmachịẹ mẹ se Mẹnahẹm ḅe, seleḅa okpokpo inein-a poku na sọnọ ẹndẹ nwọse ọ̀ pịrịmẹ mịẹsosịkị ori ọ̀ ḅụ sọ se ò Mẹnahẹm ḅe mịẹkụrọma se ọ̀ kụrọma sẹ mị ọlọḅịa ḅara.

²⁰Mẹnahẹm ḅe Izrẹl mị ḅie ngọ kọn apụma ḅara kụrọḅara seni igbiki ọkịmẹ, ori ini mịẹmẹ gbọrịḅọ gbọrịḅọ seleḅa pẹkẹrẹ-a mesi oyi fịnjị fịnjị nwọ gbẹịnmẹ. Anị Tiglat Pilẹsa ḅe so oria sẹ mun ye-ẹ.

²¹Mẹnahẹm ḅe mịẹ jịn aye goyegoye Izrẹl Amanyanapụ ma Ḅụaḅẹrẹ ḍiri mị ḅie gịẹịn waraḅẹ.

²²Ọ̀ fịmẹ, ini ò ḍipimẹ se yayo Pẹkahaya ḅe oria kiriḍinmamẹ amanyanaḅọ ḅaraḅụ.

²³Ọzaya Juda Amanyanaḅọ ḅe amada kụra mesi oyi fịnjị karama kụra mị ḅie mị Pẹkahaya Mẹnahẹm yaḅe ḅo Izrẹl amanyanaḅọ sọye-ẹ; se mama kụra ọ̀ nwọse Sameria mị ḅie ḅẹrẹtọn mẹ.

²⁴Ọ̀ Nyanaḅọ Ḅe ḅụ simịẹmẹ, Amanyanaḅọ Jeroboam Nebal yaḅe sitịḅị-a mịẹmịẹayema ọ̀ nwọ ḍikiḍamẹ, anị Izrẹl mị damun si ḅie chuḅọ ḅe.

²⁵Pẹkahaya ọmụtịḅịnị ma ḅie gbọrịḅọ na, Pẹka, Remalaya yaḅe na, Giledị owuapụ ḅụ kịnị-a mesi oyi fịnjị na ḅẹrẹḅia, se Pẹkahaya ḅe ḅaamẹ amanyanaḅọ warị mị ḅieju, ọmụaye koko ḅie mị ḅie ḅụ Sameria mị ḅie, se ori oria kiriḍinmamẹ amanyanaḅọ ḅaraḅụ.

²⁶Pẹkahaya ḅe mịẹ jịn aye goyegoye Izrẹl Amanyanapụ ma Ḅụaḅẹrẹ ḍiri mị ḅie gịẹịn waraḅẹ.

²⁷Ọzaya Juda Amanyanaḅọ ḅe amada kụra mesi oyi fịnjị na maịn karama kụra mị ḅie Pẹka, Remalaya yaḅe ḅo Izrẹl amanyanaḅọ sọmẹ, se si kụra nwọse Sameria mị ḅie ḅẹrẹtọn mẹ.

²⁸Ọ̀ Nyanaḅọ Ḅe ḅụ si mịẹmẹ, Amanyanaḅọ Jeroboam Nebal yaḅe sitịḅị-a mịẹmịẹayema ọ̀ nwọ ḍikiḍamẹ, anị Izrẹl mị da mun si ḅie chuḅọ ḅe.

²⁹Pẹka ḅe amanyanaḅọ ḅụ sime sịkị mị ḅụ anị Tiglat Pilẹsa, Asiria sẹdaḅọ ḅe, ọmụ ḅie mịna opuamama ọkịye-ẹ: Ijọn mị na, Ebẹl Bẹt Meaka mị na, Janoa mị na, Kedẹsh mị na, pịkị Hezọ mị na, pịkị Giledị na, Galili na, pịkị Naftalaị eke ma na, se ò tomonima ọkịmun ikoli ḅie chumẹ Asiria ḅie.

³⁰Jotam, Ọzaya yaḅe Juda amanyanaḅọ sọ si kụra karama kụra mị ḅie Hosia, Ela yaḅe ḅẹrẹḅia Amanyanaḅọ Pẹka ḅe pịrị se ọ̀ ḅaa pịkị oria kiriḍinmamẹ amanyanaḅọ ḅaraḅụ.

³¹Pẹka ḅe mịẹ jịn aye goyegoye Izrẹl Amanyanapụ ma Ḅụaḅẹrẹ ḍiri mị ḅie gịẹịn waraḅẹ.

³²Pẹka, Remalaya yaḅe Izrẹl amanyanaḅọ sọ maịn karama kụra mị ḅie, Jotam, Ọzaya yaḅe ḅo Juda amanyanaḅọ nwọ sọmẹ.

³³Si sọnọ-a kụra fịnjị ọ̀ nwọ lasịkị ḅụ, se ineinfasi kụra ọ̀ nwọse Jerusalẹm mị ḅie ḅẹrẹtọn mẹ. Nyọngọrọ ma anị Jerusha, Zadọk ḅa ma árị-ẹ.

³⁴Ḍawu Ọzaya ḅe mịẹmịẹ ayema ọ̀ nwọ ḍikiḍamẹ, se Jotam ḅe ọ̀ Nyanaḅọ Ḅe ḅụḅẹlẹye mịẹmẹ.

³⁵Ọkụma oruḅẹrẹ nemiapụ ma inia tẹkẹ nyọma ọ̀ kankẹ, se tomonima pa mun agbama mịẹ pịkị insẹnsị dọkịmamẹ arịju ma ḅụ. Jotam ḅe anị Oputẹkẹwarị mị ọgọnọjuda Nụngọḅọkọ mị namaye-ẹ.

³⁶Jotam ḅe mịẹ jịn aye goyegoye Juda Amanyanapụ ma Ḅụaḅẹrẹ ḍiri mị ḅie gịẹịn waraḅẹ.

³⁷Ori amanyanaḅọ ḅụ sime sịkị mị, anị Nyanaḅọ Ḅe tatarị Amanyanaḅọ Rezịn, Siriaḅọ ḅe na pịkị Amanyanaḅọ Pẹka, Izrẹlḅọ ḅe na fịrịma mun owuse Juda mị pakaye-ẹ.

³⁸Jotam ḅe fịmẹ se amanyanapụ iḍupuma ḅieḅụ ini ò ḍipimẹ Devid Opuama mị ḅie, se yayo Ehaz ḅe oria kiriḍinmamẹ amanyanaḅọ ḅaraḅụ.