Read kirikeni 2 Amanyanapụ 17 Bible Online

2 Amanyanapụ 17 - kirikeni bible

2 Amanyanapụ 17

¹Ehaz Juda Amanyanaḅọ ḅe amada oyimaịn kụra fịnjị karama kụra mị ḅie Hosia, Ela yaḅe ḅo Izrẹl amanyanaḅọ sọmẹ se esenie-a kụra ọ̀ nwọse ḅẹrẹtọn mẹ Sameria ḅie.

²Nyanaḅọ Ḅe ḅụ ò simịẹmẹ, ọkụma tatarị amanyanapụ sọ Izrẹl mị pịrị ḅọrọsapụ ma mịẹ opu si ḅara mịkẹ.

³Sẹdaḅọ, Shalmaneza Asiriaḅọ ḅe ọmụ seni ọ̀ damaḅomẹ; Hosia ḅe ọ̀ ḅara dekichịẹma ọ̀ pịrịmẹ, se ama ocho igbiki seni ọ̀ gbẹịn-gbẹịnmẹ kụrakụra ḅụ.

⁴Ọkụma gbọrị kụra ḅie Hosia ḅe okumun-apụ seni So, Ijipt amanyanaḅọ ḅe fịrịmamẹ, ḅarachụa ḅi ḅụ, se ḅarị kụrakụra ama ocho igbiki mị gbẹịn Asiria mị pịrịkẹ. Shalmaneza ḅe mịn mị naa sịkị, ò Hosia ḅe kun se ikoli ḅie chumẹ.

⁵Shalmaneza ḅe Izrẹl mị ḍẹkịkelema se Sameria mị gbẹịnmachịẹmẹ. Ori anị gbẹịnmachịẹ tẹrẹ karama kụra mị ḅie

⁶anị Hosia ḅe amada esenie-a karama kụra mị anị Asiriapụ sẹdaḅọ ḅe Sameria mị ọkịye-ẹ ọmụ ḅie. Ori Izrẹlapụma kun so Asiria mun mẹ ikoliapụ ḅaraḅụ, se inia ḅie dapụ seni Hela opuama mị ḅie koromamẹ, ọ̀ dapụ seni Habọ Tọrụ mị na kpekima koromamẹ Gozan pẹkẹrẹ mị ḅụ, ọ̀ pịkị dapụ seni Midia apụ opuamama ḅieḅụ koromamẹ.

⁷Sameria mị ḅịkịmẹ anịatịḅị Izrẹlapụma ini simịẹmẹ Nyanaḅọ inia Tamụnọ Ḅe ḅụ, anị Ijipt amanyanaḅọ ḅe ḅara ḅieḅụ ini ḍụa pịkị Ijipt mị ḅie tọrọkọda ini ọkịpakụmaḅoḅọ ḅe. Ini jịn-a oru tẹkẹmẹ.

⁸Nyanaḅọ Ḅe oria tomonima sọmun-arị sịkị ò depakụma ama mịẹmịẹaye ma ini nwọ ḍamịẹmẹ pịkị Izrẹl amanyanapụma seḅo ama mịẹmịẹaye ma na.

⁹Izrẹlapụma Nyanaḅọ inia Tamụnọ Ḅe ḅụḅẹlẹkaye ini nwọ mịẹmẹ. Inia amama ḅie mgba ini oruḅẹrẹnemi apụma tẹkẹ-a nyọ nama koromamẹ, bokatẹịn ịwọama mị ḅie ọkịmun ḍụḅatẹịn opuama mị la.

¹⁰Chịngị ma ọgọnọ mamgba na pịkị opu ejema chuku ikpuma ḅie goyegoye ini ḍụparịma chịẹma pịkị Ashera eremeni oru mị tọrụ mị tẹmẹ koromamẹ.

¹¹Ini pịkị insẹnsị dọkịma dọkịmamẹ oru ḅẹrẹnemiapụ agbamịẹ ẹbẹ ma ọgọnọ ḅụ, anị Nyanaḅọ Ḅe ama mị ḅie depakụmasa apụma mịẹmịẹaye ḍaye ma. Inia sitịḅịnyana mịẹmịẹaye ma ini nwọse Nyanaḅọ Ḅe ịganị mị owoimamẹ.

¹²Se Nyanaḅọ Ḅe ḅịpịpokikẹ, ò chụa olokoma na ini oru tẹkẹma na ḅụ.

¹³Nyanaḅọ Ḅe oria okunwẹngịapụ na pịkị ịkịankoroapụma na fịrịma Izrẹl na Juda na ḅeri jinemẹ: “Ọ́mịna simịẹmịẹaye ma ḅụ ọ́ ḅarasin se ị̀ya olokoma nwọ koko anị à seni ọ́mịna olomu-aḍapụma pịrị olokoma ḅie simeayema, anị à pịkị ị̀ya fịrịnwẹngị ịkịankoroapụma ḅụ ḅọrọ saḅama ọ́ pịrịsaye ma.”

¹⁴Ọkụma ini ḅịpị poki ḍụkụkẹ; inia olomu-aḍapụma ininachịn ọkụ mị ini sọnị pịkị sime ọkụ-ẹ, anị kuḅie seni Nyanaḅọ inia Tamụnọ Ḅe ḅụgbana ḍụkụkapụ ma.

¹⁵Ò tọn ini pịrịayema ngịsị ini kokokẹ, ori inia olomu-aḍapụma na fị ọḅọkụ mị sọnị ini kokokẹ, ini pịkị ò seni inia ḅeri jinearịye ma se yechịnkẹ. Yeḅụofori oru ma re anị ini tẹkẹarịye-ẹ se vinpịkị yeḅụoforiapụ nwọ sọmẹ, ini pịkị ini kelema koro sẹma amamịẹmịẹye ma ḍamịẹmẹ anị ini Nyanaḅọ Ḅe ḅịpịpoki ḍụkụkẹ ọ̀ tọn ini pịrịayema ḅie.

¹⁶Nyanaḅọ inia Tamụnọ Ḅe oloko mamgba ini kanmẹ se ikulele se mama owoi nambulo mịẹmẹ àrị tẹkẹḅịa ẹrẹchị; ini pịkị Ashera eremeni oru mị tẹmẹmẹ, lolia ma ini àrị tẹkẹmẹ ini pịkị fịrịnwẹngị Beal oru mị pịrịmẹ.

¹⁷Ini inia owuapụ awọma na eremeni awọma na seni dọkịma agba mịẹ seni oruḅẹrẹnemiapụ oru ma pịrịmẹ, ini tọrụtoluapụma na ḅaraḍikiapụ ma na chuku mun yegbelamẹ, pịkị okorona okorona iniaḅụ mgba seni kurakaye mịẹ mị pịrịmẹ Nyanaḅọ Ḅe tọrụkuḅu, se anịḅụ ini oria ịganị mị owoimamẹ.

¹⁸Izrẹlapụma ḅụ Nyanaḅọ Ḅe ori ịganị nyanamẹ; anịẹrẹchị ọ̀ tọrụkuḅu ḅụ ori ini desin jịn sẹ fịrịmamẹ, Juda amanyanakiri mị kẹngẹ ọ̀ nwọ wẹrịsomẹ.

¹⁹Ọkụma ini Judapụma sọnị Nyanaḅọ inia Tamụnọ Ḅe olokoma kokokẹ; Izrẹlapụma ḍaọkị ama mịẹmịẹyema ini nwọ ḍamẹ.

²⁰Nyanaḅọ Ḅe Izrẹlapụ mamgba ori ini sịkịmẹ, ò fomuḅara seni ini pịrị pịkị ini daḅọrọma akụ kuḅie nyana tarakapụma pịrịmẹ ọkị nweni anịḅe kuluma ọ̀ tọrụkuḅu ḅụ ori ini desinmẹ.

²¹Nyanaḅọ Ḅe Juda mị ḅie ḅụ Izrẹl mị pusikima ḅọrọso sịkị, Izrẹlapụma Jeroboam, Nebal yaḅe seni inia amanyanaḅọ mịẹmẹ. Jeroboam ḅe ini mịẹse ini Nyanaḅọ Ḅe sịkịmẹ se ini damun ḅalafama sima ḅie chumẹ.

²²Ini Jeroboam ḅe ḍukonwẹngịmẹ se ọ̀ mịẹsa si mamgba nwọ ḍawọ mịẹma mun mẹ.

²³Ọkị nweni anịḅe kuluma Nyanaḅọ Ḅe ọ̀ tọrụkuḅu ḅụ ini desinmẹ anị oria fịrịnwẹngị ịkịankoroapụma ḅụ ọ̀ ḅọrọ inia ḅerijine na ò mịẹḅịa nwọḅẹye mị. Anịẹrẹchị Izrẹlapụma ini ini kunso Asiria mị mun mẹ, mịọkụ sọnị anịju ḅụ ini pa anga waraḅẹ.

²⁴Asiria sẹdaḅọ ḅe ma opuamama ḅieḅụ tomoni ọkịmẹ anị Babilọn mị na, Kọt mị na, Iva mị na, Hamat mị na, pịkị Sẹfaveim mị na, se ini seni Sameria opuamama ḅieḅụ koroma, ini seni ini sẹịnsosa Izrẹlapụma kiriḍinmamẹ. Ini ma opuamama ọkịmẹ se anịju ḅụ angamẹ.

²⁵Ini tatarị mun anịju ḅụ anga sịkị, ini Nyanaḅọ Ḅe tẹkẹkẹ, anịẹrẹchị ọ̀ chịrịḅa fịrịma inia ḅie dapụ ḅaamẹ.

²⁶Ini ḍuko Asiria sẹdaḅọ ḅe pịrịmẹ na, ò seni mun Sameria opuamama ḅieḅụ koromapụ ma anị ama oru oloko mị ini nemikẹ anịẹrẹchị Asiria oru ḅe chịrịḅa ḅe fịrịma ini ḅaa aḅẹ.

²⁷Anịẹrẹchị sẹdaḅọ ḅe kụrọ pịrịmẹ; “Ikoliapụ ḅara ḅụ wa kun ḅo agbamịẹapụma ḅie gbọrịḅọ ọ́ nwọ fịrịma; ye ò vinpịkị somun anịju ḅụ anga, mịẹse ori anị ama oru oloko mị seni tomonima telimaḅịa ọkụ.”

²⁸Anịẹrẹchị Izrẹlapụ-gbọrị-agbamịẹḅọ, anị Sameria ḅie ini sẹịnsosaḅọ somun Bẹtẹl ḅie angamẹ, anịju ḅụ ini ḅara wẹrịma Nyanaḅọ Ḅe tẹkẹtẹkẹ ọkụ nwọse tomonima telimamẹ.

²⁹Ọkụma Sameria mị ḅie ḅo angapụma pa inia oru ma mịẹ-aḅẹ, ini pịkị àrị seni Izrẹlapụma nama oru-a warịma ḅie koromamẹ. Gbọrị kpo, gbọrị kpo inia oru nwọ mịẹmẹ ini kịrịkịrịma anga opuamama ḅieḅụ.

³⁰Babilọn apụma, Sọkọt Benọt oru oru-a tọrụma pakụmamẹ; Kọt apụma, Nagaị oru-a tọrụ ma pakụmamẹ; Hamat apụma, Ashima oru-a tọrụ ma pakụmamẹ;

³¹Iva apụma Nibhaz mị na pịkị Tatak mị na oru-a tọrụ ma pakụmamẹ; se Sẹfaveim apụma, pịkị inia awọma seni dọkịma agbama mịẹ seni inia oru, Adramilẹk mị na Anamilẹk mị na pịrịpịrịmẹ.

³²Mịna apụma ini pịkị Nyanaḅọ Ḅe sọnị tẹkẹtẹkẹmẹ, se ini pịkị inia ḅie ḅaralapụlapụ sẹlẹọkị seni agbamịẹ fịrịnwẹngị oruḅẹrẹ nemiapụ ma tẹkẹtẹkẹ-a nyọma ḅụ, anịju agbamịẹ ini pịrịpịrịmẹ.

³³Ini Nyanaḅọ Ḅe tẹkẹtẹkẹmẹ, ọkụma ini pịkị inia oru ma sọ tẹkẹtẹkẹmẹ anị ini ḅo anga sẹma ḅe ama anga anga ḅaraḅụ.

³⁴Ọkịḅo mịmgba la sọnị, inia olomu ama anganga ḅarama ini pa ọlọchịẹma waraḅẹ. Nyanaḅọ Ḅe ini ọ̀ tẹkẹ ḍụkụkẹ, ọ̀ pịkị seni Jekọb, anị ori Izrẹl nwọse chịnḅọ ḅe awọma pịrị olokoma na ọ̀ tọnkoromaye ma na ini àrị kokokẹ.

³⁵Nyanaḅọ Ḅe ori ini na ọḅọkụ fị se tọn ini pịrịmẹ: “Ọ́ jịn-a oru tẹkẹma; tịḅịtu àrị pịrịma pịkị fịrịnwẹngị àrị pịrịma, pịkị agbamịẹ àrị pịrịma.

³⁶Ómine ị̀ ḅịpịpoki, ị̀rị̀ anị Nyanaḅọ Ḅe-ẹ, opu kụrọ na ịnyọ na seni Ijipt mị ḅieḅụ ómine ọkị pakụmaḅoḅọ ḅe; ọ́ tịḅịtu ị̀ pịrị pịkị agbamịẹ ị̀ pịrịḅịa.

³⁷Sịkịmamgba à gịẹịn koroma ọ́ pịrị olokoma na à tọn koromaye ma na ọ́ nwọ kokoḅịa. Ọ́ jịn-a oru tẹkẹ ẹkẹ,

³⁸àrị ómine na fị ọḅọkụ mị ó seni ḅieḅarama ẹkẹ.

³⁹Ómine, ị̀rị̀ Nyanaḅọ ọ́mịna Tamụnọ Ḅe ḅịpịpokiḅịa, se àrị ọ́ ḍụaḅịa ómine na tarakapụma ḅara ḅie.”

⁴⁰Ọkụma iniapụ ma ini poki ḍụkụkẹ, ini pa inia olomu ama anganga ḅarama ḍukonwẹngịaḅẹ.

⁴¹Anịẹrẹchị iniapụ ma ini Nyanaḅọ Ḅe tẹkẹtẹkẹmẹ, ọkụma ini pịkịna inia oru ma sọnị tẹkẹtẹkẹmẹ se ọkịḅo mịmgba la sọnị inia awọma anị gbọrị ḅara mị pa nwọ mịẹ-aḅẹ.