Read kirikeni 2 Amanyanapụ 18 Bible Online

2 Amanyanapụ 18 - kirikeni bible

2 Amanyanapụ 18

¹Hosia, Ela yaḅe amanyanaḅọ sọ Izrẹl mị pịrị tẹrẹ karama kụra mị ḅie Hẹzekaya, Ehaz yaḅe ḅo Juda amanyanaḅọ nwọ sọmẹ,

²ò ḅo sisọnọ-a kụra fịnjị lasịkị anị ò ḅo amanyanaḅọ sọye-ẹ, se gbọrịye fa kụra soi ọ̀ nwọse ḅẹrẹtọn mẹ Jerusalẹm ḅieḅụ. Nyọngọrọ ma anị Abaịja, Zẹkaraya ḅa ma-ẹ.

³Oria olomuḍaḅọ Amanyanaḅọ Devid ḅe ḅụọ ḍikiḍa ḅụ ọ̀ Nyanaḅọ Ḅe ḅụḅẹlẹye mịẹmẹ.

⁴Oruḅẹrẹnemiapụ tẹkẹ nyọma ori àrị kan saramẹ, ini chịẹma koroma ḍụparịma ḅaakọsịma pịkị Ashera eremeni oru ma pẹlẹ gbinmẹ. Moziz ḅe alapẹlẹka se mịẹ oruwu mị sọnị ori anị ḅaakọsịmamẹ, anị ini Nẹhụshtan nwọse chịnye mị. Ọkị mun anị sịkị la sọnị Izrẹlapụma ini pa insẹnsị dọkịma se osi seni anị pịrịaḅẹ.

⁵Hẹzekaya ḅe ò kuḅie seni Nyanaḅọ, Izrẹl Tamụnọ Ḅe ḅụgbanamẹ; Juda mị ngịsị ori na kịkịna amanyanaḅọ anị nyanakẹ, anị ḅọrọ ọ̀ tọrọkọ ḅụ anịkanịka ọ̀ ḅụọ ḅọrọ sịkị ḅụ sọnị.

⁶Nyanaḅọ Ḅe ḅụ ò ḅereni nyanamẹ, ọ̀ pịkị ọ̀ ḅịpịpokika sịkị ofori-ẹ pịkị Nyanaḅọ Ḅe seni Moziz ḅe pịrị olokoma ori iḅiọkụ àrị kokomẹ.

⁷Anịẹrẹchị Nyanaḅọ Ḅe ori ọ̀ ḅụ simemẹ, se ori nyana seni mịẹye goyegoye ọ̀ ḅarasọmẹ, ọ̀ nyana ḅereni Asiria sẹdaḅọ ḅe pịrịkẹ ọ̀ pịkị yeḍụkụ ọ̀ pịrịkẹ.

⁸Ò Filistiapụma nẹngịmamẹ pịkị ini anga nyọma ḅie ḅụ, bokatẹịn ịwọama ḅie ḅụ ọkịmun ḍụḅatẹịn opuama mị la, pịkị Gaza mị na anị kelemakoro nyọma na, ori àrị kanmẹ.

⁹Hẹzekaya ḅe amada inein karama kụra mị ḅie anị Amanyanaḅọ Hosia ḅe Izrẹl mị da sọnọma kụra karama kụra mị ḅie—Sẹda Shalmaneza Asiriaḅọ ḅe Izrẹl mị ḍẹkịkelema seni Sameria mị gbẹịnmachịẹmẹ.

¹⁰Ori anị ḍẹkịkelema se anị gbẹịnmachịẹ tẹrẹ karama kụra mị ḅie Sameria mị ḅịkịmẹ; anị Hẹzekaya ḅe amada sonio karama kụra mị-ẹ, anị pịkị Hosia ḅe amada esenie-a karama kụra mị-ẹ.

¹¹Asiriapụ sẹdaḅọ ḅe Izrẹlapụma kunso Asiria mun mẹ ikoliapụ ḅaraḅụ, se iniaḅụ dapụ seni Hela opuama mị ḅie ḅụ koromamẹ, dapụ seni Habọ Tọrụ mị na kpekima koromamẹ Gozan pẹkẹrẹ mị ḅụ, pịkị dapụ seni Midia opuamama ḅieḅụ koromamẹ.

¹²Sameria mị ḅịkịmẹ anịatịḅị Izrẹlapụma ini Nyanaḅọ inia Tamụnọ Ḅe ḅịpịpokikẹ, anịnakaraka, ori ini na fị ọḅọkụ mị ini nwọ kanmẹ pịkị Moziz Nyanaḅọ Ḅe fịrịnwẹngịḅọ ḅe chụa ini pịrị oloko mamgba ini kokokẹ. Ini poki ḍụkụ ẹkẹ ini pịkị ḅịpịpoki ḍụkụ ẹkẹ.

¹³Amanyanaḅọ Hẹzekaya ḅe amada oyi-inein fịnjị karama kụra mị ḅie Sẹnakirib, Asiria sẹdaḅọ ḅe owu seni Juda ọmụaye koko opuamama paka se àrị nẹngịmamẹ.

¹⁴Hẹzekaya ḅe oku seni Sẹnakirib ḅe fịrịmamẹ, anị Lekish mị ḅie simeḅọ ḅe; “À mịẹirimasam; pasisi ḅarị owu se ị̀ pakama se ị́rị́ ḅiye goyegoye à seni ị́ gbẹịnḅịa.” Sẹdaḅọ ḅe nwọse Hẹzekaya ḅe pẹkẹrẹmẹ na seleḅa ḅụ okpokpo-a poku na sọnọ ẹndẹ na pịkị goli ḅụ, okpokpo-a mẹndẹ oyiasi fịnjị na ọ̀ nwọse ọ̀ sẹịnma.

¹⁵Hẹzekaya ḅe Oputẹkẹwarị mị ḅie sime seleḅa mamgba na pịkị amanyanaḅọ warị igbiki koko warị mị ḅie simeayema na seni ọ̀ sẹịnmamẹ;

¹⁶Oputẹkẹwarị ḅọkọ ma ḅụ sime goli ma ọ̀ kpakpa sinmẹ pịkị ini seni Oputẹkẹwarị ḅọkọ chịnma ḅụ oḅolo goli ma sọnị, àrịmgba ò seni Sẹnakirib ḅe sẹịnmamẹ.

¹⁷Asiria sẹdaḅọ ḅe Lekish opu ọmụogbo se Jerusalẹm fịrịmamẹ, owu seni Hẹzekaya ḅe pakaḅịa ẹrẹchị; owunima ḅie opusọtẹịn tẹrẹ apụ - Tatan ḅe na, Rabsaris ḅe na, pịkị Rabshake ḅe na kụlọ damẹ. Ini ḅo Jerusalẹm mị lasịkị, ḅịtẹ ḍori apụma fịrịnwẹngịarị ateli mị anga ḅụ sime ini soku, ọgọnọ daọrụ ḅụ ḍapa mị ḅie mengi mị ḅọrọ ḅoarị nyọ ḅụ ini simemẹ.

¹⁸Anịsịkị ini ḅịpị se amanyanaḅọ Hẹzekaya ḅe fịrịmamẹ, se oria fịrịtịḅịnị ma ḅie tẹrẹ apụ mun ini na ịrịamẹ, Ẹlaịakịm, Hilkaya yaḅe, anị amanyanaḅọ warị mị ḅie tịḅịdaḅọ ḅe na, Shẹbna, ḅẹrẹkọn warị mị ḍiri gịẹịnḅọ ḅe na; pịkị Joa, Esaf yaḅe na, anị gịẹịn ḍiri ma ḍikiḍikiarịḅọ ḅe na.

¹⁹Ọmụtịḅịnị ma ḅie gbọrịḅọ Rabshake ḅe ḍuko ini pịrịmẹ na sẹdaḅọ ḅe nemi ḅimẹ cheye Amanyanaḅọ Hẹzekaya ḅe tịḅịfurama-ao?

²⁰Ọ̀ nwọ gbelamẹ: “Ị́ chịnḅara ḅịpị ḅụ kọn ọkwẹịn ineda ọmụgbin aka na owu kiri kụrọ na kọnḅe? Ị́ chịnḅara tụḅọ ḅarachụa ị́ pịrịḅe ị́ nyana ḅereni Asiria mị pịrịka ọkụma?

²¹Ijipt mị ị́ nwọse ḅiekpọmamẹ ḅarachụa ị́ pịrịḅịa ẹrẹchị. Ọkụma anị ma anị papa mịnịmịnị chịn seni amgbara mịẹ ọkụ simemẹ anị anyị se ị́ ḅara temitoluḅịa. Anị Ijipt amanyanaḅọ ḅe sime ọkụ-ẹ tomoniḅọ ọ̀ ḅụ sẹrẹrẹ sịkị goyegoye ḅụ.”

²²Asiriapụ ọmụtịḅịnịḅọ ḅe pịkị nwọ ḅẹmẹ: “Ḅọrọ anịkẹ ḅẹḅẹ ị́ ḍuko ị̀ pịrịḅịa na Nyanaḅọ ọ́mịna Tamụnọ Ḅe ị́ nwọse ḅiekpọma-ao? Anị Hẹzekaya ḅe simasa Nyanaḅọ Ḅe oria osiḅụ sime-a nyọma na agbamịẹ ẹbẹ ma na-ẹ, anị ò ḍuko Judapụma na Jerusalẹm apụma pịrị na ini Jerusalẹm mị ḅie sime agbamịẹ ẹbẹ mị nyọ ḅụ kẹngẹ tẹkẹtẹkẹ ḅe nyọ mị.

²³Àrị ị́rị́ na ḅịpịọkịaḅịa sẹdaḅọ ḅe ẹrẹ ḅụ. Asụn ḅụ sọnọ ẹndẹ à nwọse ị́ pịrịḅịa ị́ nemikase ineda ḅaka ọkọlapụ nyanaḅo àrị nwẹngịmaḅịa ḅẹḅẹ!

²⁴Asiria apụ ọmụtịḅịnị ma ḅie iderimatẹịnḅọ sọnị ị́ ineda nụḅọ da-ẹkẹ, anịẹḅẹ sọnị, ị́ ḅiaḅẹ Ijipt apụma kporokporo ọmụarụ ma na asụnma na nwọse ị́ fịrịma!

²⁵Ị́ chịnḅara à papa owu seni ị́ya sẹ mị paka se anị kanḅe, Nyanaḅọ Ḅe ḅarachụa ị̀ pịrịka ḅaraḅụ? Nyanaḅọ Ḅe na mịnaḅụ na nwọse ị̀ ḅẹmẹ na àrị owu seni anị paka se anị kansin.”

²⁶Anịsịkị Ẹlaịakịm ḅe na, Shẹbna ḅe na, pịkị Joa ḅe na nwọse ọmụtịḅịnịḅọ Rabshake ḅe ḅẹmẹ, “Wa nyanaḅọ Aram apụ ọkwẹịn seni ọkwẹịn wa pịrị. Wa naamẹ. Hibru ọkwẹịn seni ọkwẹịnma; onu mị ọgọnọ ḅụ sime apụ mamgba ini wa pokiaḅẹ.”

²⁷Ori nwọse ini pẹkẹrẹmẹ, “Ọ́ chịnḅara ómine na amanyanaḅọ ḅe na kẹngẹ anị sẹdaḅọ ḅe ị̀ fịrịma na à ma ọkwẹịn ma kọn pịrị-ẹ nwọḅẹ apụ? Ẹn-ẹn, onu mị ọgọnọ sime apụma sọnị àrị ọkwẹịn ini pịrịaḅẹ anị inia fịnya ma fị pịkị inia nịna ma ḅuḅịa apụma, anị óminesọ anị ómine na simeḅịa ọkụ mị.”

²⁸Ọmụtịḅịnịḅọ Rabshake ḅe chịẹ sime se olokumẹ Hibru ọkwẹịn ḅie, “Asiria sẹdaḅọ ḅe ḍuko ọ́ pịrịarịye mị ọ́ nwọ poki!

²⁹Ori ó ḅerijine-aḅẹ na ngịsị ó ḅerenima Hẹzekaya ḅe oḅori seni ọ́ chịn. Hẹzekaya ḅe ori ineda ọ́ ḍụaḅọrọma ẹkẹ.

³⁰Ọ́ pịkị ḅereni ọ̀ pịrịma ọ́ Nyanaḅọ Ḅe seni ḅiekpọma ọ̀ nwọse ọ́ ḅẹḅẹ. Ó koromama na Nyanaḅọ Ḅe ori ọ́ ḍụaḅọrọmaḅịa, na ori ineda Asiria ọmụogbo mị dachịẹma se ini ḅarị ọ́mịna opuama mị ọkị ẹkẹ nwọḅẹye mị sọnị ó ḅerenima.

³¹Hẹzekaya ḅe ómine ó pokima. Asiria apụ sẹdaḅọ ḅe tọn ọ́ pịrịmẹ na opuama mị ḅieḅụ ọ́ pakaḅo se ḅara dekichịẹma ọ̀ pịrị. Ómine mgba ò ḅereni ọ́ pịrịḅịa ọ́mịna ozuma ḅie chịnmgbọlụma ḅụ chụa tụmgbakị elelenda ma ọ́ fịḅịa, ọ́ pịkị figi chịnma ḅụ chịnmgbọlụma fịḅịa, pịkị ọ́mịna tiḅe ma ḅie mengi nwọ ḅuḅịa.

³²Ọkị nweni sẹdaḅọ ḅe ómine seni mun iḅiọkụ ọ́mịna sẹ mị kịkẹ sẹ ḅie koromaḅịa sịkị la, anị irumịẹ chịnmgbọlụ ozu sime nyọ, ó seni iru mịẹḅịaye na, ó seni fịturu mịẹḅịa ịpịamgba pịkị sime nyọ na; oliv na oliv pulo na, pịkị ḅẹịn na sime ama. Ó nemikase ọ̀ tọnye mị mịẹmẹ ḅẹḅẹ, ọ́ fị ẹkẹ, ọkụma ó ḍumoḅịa. Ó ḅerenima Hẹzekaya ḅe oḅori seni ọ́ chịn se ó ḅo Nyanaḅọ Ḅe ori ọ́ ḍụaḅịa nwọḅẹ koroma nwọ kọn.

³³Ísí-a sẹ oru ma ḅụ ineda arịa sẹma ḍụaḅọrọmaye omi, Asiria sẹdaḅọ ḅe ḅara ḅie?

³⁴Mịọkụ ndeju àrị omi, Hamat mị na Apad mị na oru ma? Sẹfaveim mị na, Hẹna mị na, pịkị Iva mị na oru ma nde àrị? Sameria mị ḍụaḅọrọmaye omi ị̀ ḅaraḅie?

³⁵Nde sịkị ḅụ ma sẹ mamgba oru ma ḅụ gbọrịye àrịa sẹma ḍụaḅọrọma mịna sẹdaḅọ ḅe ḅara ḅieḅụ? Anịọkụma nde ó gose Nyanaḅọ Ḅe ori ineda Jerusalẹm mị ḍụaḅọrọmaḅịa nwọḅẹ koroma kọn àrị ọkụ.”

³⁶Tomonima ini ọkwẹịnkẹ, Amanyanaḅọ Hẹzekaya ḅe ini ḅẹ ḅaraḅụ; gbọrị ọkwẹịn kẹngẹ sọnị ini kọnkẹ.

³⁷Anịsịkị Ẹlaịakịm ḅe na, Shẹbna ḅe na, pịkị Joa ḅe na inia ḅụchụayema kanmẹ opu kururu ḅụ, se vinpịkị mun Asiria apụ ọmụtịḅịnịḅọ ḅe kọn ọkwẹịn mị ḍuko seni amanyanaḅọ ḅe pịrịmẹ.