Read kirikeni 2 Amanyanapụ 19 Bible Online

2 Amanyanapụ 19 - kirikeni bible

2 Amanyanapụ 19

¹Amanyanaḅọ Hẹzekaya ḅe ini ḍukoye mị naa kirikiri, ori opu kururu ḅụ oria ḅụchụayema kan se kururu ḅiriaye ḅirimẹ, se ò so Nyanaḅọ Ḅe Oputẹkẹwarị mị mun mẹ.

²Ẹlaịakịm amanyanaḅọ warị ḍikiḍikiapụ ma tịḅịnịḅọ ḅe na, Shẹbna, ḅẹrẹkọn warị mị ḍiri gịẹịnḅọ ḅe na, pịkị opu agbamịẹapụma na ọ̀ nwọse ịkịankoro Aịzaya Emọz yaḅe fịrịmamẹ. Ini sọnị ini kururu ḅiriaye ḅirimẹ.

³Mịn ò seni ini fịrịma na ḍuko ịkịankoro Aịzaya ḅe pịrị nwọḅẹ oku mị-ẹ: “Mịmgba, anị tọrụsiọrị ene-ẹ; ini fomuḅara seni wa pịrịaḅẹ, wa pịkị ḅụgerere ḅụ omi-ẹ. Yiḅịa ẹrẹchị ḅụkarakarama, ọkụma seni ngịmaḅịa ịnyọ opuma ḅụfasa eremeniḅọ sime ọkụ anị wa sime ọkụ-ẹ.

⁴Asiria sẹdaḅọ ḅe oria opu ọmụtịḅịnịḅọ ḅe fịrịmaḅo ḍumo sime Tamụnọ Ḅe wọlọmẹ. Ye Nyanaḅọ ị́ Tamụnọ Ḅe ma wọlọ ọkwẹịnma naa se fomuḅara seni àrị kọn apụma pịrị. Anịẹrẹchị Tamụnọ tẹkẹ mine fị ḅụ kọn apụma pịrị.”

⁵Aịzaya ḅe Amanyanaḅọ Hẹzekaya ḅe oku mị na sịkị,

⁶ọ̀ mị oku mị pẹkẹrẹ sẹịnmẹ: “Nyanaḅọ Ḅe nwọse ị́ ḅẹmẹ na Asiria apụma ḍuko na ori ineda ị́ ḍụaḅọrọma ẹkẹ nwọḅẹye mị anị ị́ ḅalafamama.

⁷Nyanaḅọ Ḅe ọ̀ mịẹse sẹdaḅọ ḅe iriaḅa naaḅịa, anị ọ̀ mịẹse ò vinpịkị so oria sẹ mị munḅịa, se Nyanaḅọ Ḅe mịẹse ini ọ̀ ḅaaḅịa anịju ḅụ.”

⁸Asiria apụ ọmụtịḅịnịḅọ Rabshake ḅe naamẹ na sẹdaḅọ ḅe ò Lekish mị wẹrịso se owu seni kpekima sime Libna opuama mị pakaḅẹ; anị ori anịju ò damamunye-ẹ ori na ḅịpị ọkịaḅịa ẹrẹchị.

⁹Ḅịpị ḅo Asiria apụma lamẹ na Sudan Amanyanaḅọ Tahaka ḅe kụlọda Ijipt ọmụogbo mị pịrị se ḅo owu seni ini paka-ẹḅoaḅẹ. Sẹdaḅọ ḅe mịn mị naa sịkị, ò ḍiri seni Hẹzekaya Juda Amanyanaḅọ ḅe fịrịma,

¹⁰se nwọse ọ̀ ḅẹmẹ, “Ị́ kuḅie seni ḅụgbanarị oru ḅe ḍuko ị́ pịrịmẹ na ị́ ḅịkị ị̀ ḅara ḅie sọ ẹkẹ, ọkụma ye anị mị oḅori seni ị́ chamama.

¹¹Asiria sẹda apụma seni ini famaḅịa ẹrẹchị ḍọkị-a sẹ goyegoye mịẹmịẹye ị́ naasam. Ị́ chịnḅara ị́rị́ ineda mangị soḅe?

¹²Ị̀ya olomu-aḍapụma Gozan na, Heran na, pịkị Rizẹf na ḅe opuamama fama pịkị Bẹt-Idẹn apụma ḅaamẹ, anị Tẹlasa ḅie angapụma; se inia oru ma ḅụ gbọrịye sọnị ineda ini ḍụaḅọrọmakẹ.

¹³Hamat na, Apad na, Sẹfaveim na, Hẹna na, pịkị Iva na opuamama inia amanyanapụma nde ini?”

¹⁴Amanyanaḅọ Hẹzekaya ḅe okuḅoapụ ma ḅaraḅụ ḍiri mị ọkị se anị gomẹ. Anịsịkị ori Oputẹkẹwarị mị ḅie sọmun se ḍiri mị seni Nyanaḅọ Ḅe tọrụkuḅu koroma,

¹⁵se tẹkẹmẹ, “Yei Nyanaḅọ, Izrẹl Tamụnọ, pamba chụa enjẹlapụma ọgọnọju ḅụ ị́rị́ ị́ya amanyanaḅọ ngada ọgọnọ simeḅọ, ị́rị́ kẹngẹ anị Tamụnọ-ẹ, ḅẹrẹtọn bebe tomonikiri amanyanakiri mamgba pịrịarị ḅọ-ẹ. Ị́rị́ so mị na sẹkiri mị na tẹmẹmẹ.

¹⁶Nyanaḅọ, mịọkụ, mịnaḅụ pakarịye mị ḍiki. Sẹnakirib ḅe kọn seni ị́rị́ ḍumogbaso Tamụnọ Ḅe wọlọarị ọkwẹịn mamgba poki.

¹⁷Mine mgba wa nemimẹ, Nyanaḅọ, na Asiria sẹdapụ ma ini tọn-a sẹ famasam, pịkị mịẹse iniapụ ma amama ḅo papa sara simemẹ,

¹⁸pịkị inia oru ma dọkịmamẹ-anị ngịsị tamụnọkaye ma, tomoni papa chịn na ḍụparị na nwọse ḅarana tẹmẹayema.

¹⁹Mịọkụ, Nyanaḅọ mịna Tamụnọ, wa ḍụa Asiria apụma ḅaraḅie, mịẹso sịkị sẹkiri ḅie sime sẹ mamgba nemiḅịa ọkụ, Yei Nyanaḅọ na ị́rị́ kẹngẹ anị Tamụnọ-ẹ.”

²⁰Anịsịkị Aịzaya ḅe oku seni Amanyanaḅọ Hẹzekaya ḅe fịrịmamẹ amanyanaḅọ ḅe kọn tẹkẹ mị pẹkẹrẹ ḅụ,

²¹Nyanaḅọ Ḅe nwọ ḅẹmẹ, “Jerusalẹm opuama mị anị ị́ ḍẹrịaḅẹ, Sẹnakirib, pịkị ị́ ḍikisima aḅẹ.

²²Ị́ koroma ḅara tụḅọ ị́ nwọ wọlọ-ao pịkị se kpọti-ao? Ị́ ị̀ osisikẹ ị̀rị̀ fịafịa Izrẹl Tamụnọ Ḅe.

²³Ị́ya okumun-apụ ma ị́ nwọ fịrịmaḅo ḅụboma ị̀ pịrịmẹ na ị́ya kporokporo ọmụarụ mamgba ị́ nwọse Lẹbanọn mị ḅie gololotẹịn tụndụma nẹngịmamẹ. Ị́rị́ nwọse ḅụbomamẹ na, anịju ḅụ geletẹịn awụ chịn ma na iḅitẹịn kuru chịn ma na ị́ nwọ pẹlẹ gbinmẹ, ị́ pịkị opu piri mị ḅie sọmun gbuntẹịn nyọma lamẹ.

²⁴Ị́rị́ nwọse ḅụbomamẹ na jịn sẹ apụ amama ḅie ḅụ ị́ tiḅe soku se mengi ḅumẹ se ị́ya owunima pịkị ḅụọ seni Naịl Tọrụ mị nanga samịnamamẹ.

²⁵“Ngịsị ma ị́ naaka na ị̀rị̀ maye mamgba tọn koromamẹ ḅọlọsa sịkị ngịsị? Se mịọkụ, àrị anị mịẹpakụmasam. Ị̀rị̀ kụrọ mị seni ị́ pịrịmẹ ị́ se ini ọmụaye ma se gbori opuamama mịẹse àrị pịkịḅo sara-sime-fun-chiri sọmẹ.

²⁶Anịju ḅụ anga apụma iniaḅụ ịnyọ ofori-ẹ; inia ḅalafamẹ, iniaḅụ pịkị gbiripu-gbiripumẹ. Eleogbo sime osuein anịkanịka warị ochu ọgọnọ sopaka ịnyanya ma sime ọkụ anị ini sime ọkụ-ẹ, anị ịrụapakapaka nyọ daọrụ ọfịrị fọrụ mị, fiese àrị ḅịkị sara sara ọkụ mị.

²⁷“Ọkụma ị́ gbolomaye goyegoye à nemimẹ, ị́rị́ mịẹarịye na ị́ mun-arị nyọ na. Ị̀ ḅụ ị́ si ịganị kọn la-ọkụ à nemimẹ.

²⁸Ị́ya si ịganị mị na, ị́ya ḅụdekichịẹma mịẹmịẹye mị na, ini ḍuko ị̀ suasam, se mịọkụ inji-kun-arị à nwọse ị́ nini ḅie sụka tolumaḅịa pịkị asụn-ḅịpị-ịkasịye se ị́ ḅịpị ịkasịḅịa, se ị́ ḅo gbọrị ateli mị ḅie anị à pịkị ị́ ọkị pịkịma so ḅịaye-ẹ.”

²⁹Anịsịkị Aịzaya ḅe nwọse Amanyanaḅọ Hẹzekaya ḅe ḅẹmẹ, “Mịn pakaḅịaye mị ḅe elekima mị-ẹ. Mịn kụra mị na ḅoḅịa kụra mị na ḅie ngẹrị sopaka chịnmgbọlụ-a fịaye kẹngẹ anị ọ́ nyana fịḅịaye-ẹ, ọkụma anị ḍukomaḅịa kụra mị ḅie ómine ineda ọ́mịna chịnmgbọlụ-a fịaye ḍipi pịkị àrị sokuḅịa, pịkị irumịẹ chịnmgbọlụ ozuma ḅie ye ḍipi se pịkị tụmgbakị elelenda fịḅịa.

³⁰Juda mị ḅie fị ḅụ kọn apụma ye ini na lọkọlọkọḅịa, anị kuno ma iḅiọkụ kirisọ seni chịnmgbọlụ chụa chịnma sime ọkụ anị ini simeḅịa ọkụ-ẹ.

³¹Jerusalẹm ḅie na Zaịyọn Tụndụ mị ọgọnọ ḅụ na tomoni kọnḅịa, anịatịḅị Nyanaḅọ Ḅe ọ̀ tọnpẹlẹsam na mịn mị mịẹḅịa.

³²“Asiria apụ sẹdaḅọ ḅe gbolomaye ḅụ mị Nyanaḅọ Ḅe ḍukoye-ẹ: ‘Mịn opuama mị ḅie ọ̀ sọ ẹkẹ, ọ̀ pịkị gbọrị ḍẹịn se anị datẹịn ẹkẹ. Agbọ ọlọ owunima ḅie, ngịsị opuama mị kpekimaḅịaḅọ ofori-ẹ, pịkị aḅaịn tẹmẹ chịẹma se anị ḍẹkị kelemaḅịaḅọ ofori-ẹ.

³³Ọ̀ ḅọrọḅo gbọrị ateli mị ḅie anị ọ̀ pịkị ḅọrọ soḅịaye-ẹ mị opuama mị sọka ḅaraḅụ. Ị̀rị̀, Nyanaḅọ Ḅe, anị à ḍuko ọkụ-ẹ.

³⁴Àrị agbọ sọ mị opuama mị pịrị pịkị anị ḍikiḍikiḅịa, ị̀ya osi mị gose, pịkị à ḅereni ị̀ya fịrịnwẹngịḅọ Devid ḅe pịrịye mị na gose.’”

³⁵Anị ḍin mị ḅie Nyanaḅọ Ḅe enjẹlḅọ Asiria apụma ikowarịma pike sime nyọ mị mun se owunima ḅie sitẹrẹ-a poku fịnjị na kịnị-a mẹndẹ oyiasi fịnjị na nwọ ḅaamẹ. Anịḅe eneḅa dede ḅie, inimgba ini fị sara simemẹ!

³⁶Anị Asiria apụ sẹdaḅọ Sẹnakirib ḅe ọḅụ gbinma se vinpịkị so Ninivẹ mị mun ye-ẹ.

³⁷Gbọrị ene, oria oru Nisrọk Oputẹkẹwarị mị ḅie ọ̀ tẹkẹarị ogbo, oria owuapụ awọma ḅie mamapụ, Adramilẹk ḅe na pịkị Sharẹza ḅe na, inia okola-agiji ma seni ọ̀ ḅaamẹ, se mangịso Ararat ama mị mun mẹ. Oria owuapụ awọma ḅie gbọrịḅọ, Isahadọn ḅe oria kiriḍinmamẹ sẹdaḅọ ḅaraḅụ.