Read kirikeni 2 Amanyanapụ 2 Bible Online

2 Amanyanapụ 2 - kirikeni bible

2 Amanyanapụ 2

¹Nyanaḅọ Ḅe ajisaka fọrụ ḅie Ịlaịja ḅe ọkị iwo soḅie munḅịa sịkị mị lasam. Ịlaịja ḅe na Ịlaịsha ḅe na Gilgalị mị ḅie ḅụ sakị nwẹngị pakamẹ,

²se ateliogbo ḅụ Ịlaịja ḅe nwọse Ịlaịsha ḅe ḅẹmẹ, “Ma mịanga sime; Nyanaḅọ Ḅe ọ̀ tọn ị̀ pịrịmẹ na à so Bẹtẹl mun.” Ọkụma Ịlaịsha ḅe nwọ pẹkẹrẹmẹ, “Àrị ị̀ya ḅereni mị karị fịmẹ ḍumo sime Nyanaḅọ Ḅe na ị́rị́ na pịrịmẹ na ngịsị àrị ị́ wẹrịso ẹkẹ.” Anịẹrẹchị ini so Bẹtẹl mị mun mẹ.

³Anịju ḅụ anga ịkịankoroapụ kpo mị so Ịlaịsha ḅe damamun se nwọse ọ̀ gbelamẹ, “Mịmgba Nyanaḅọ Ḅe ori Ịlaịja ị́ nyanaḅọ ḅe nwọ ọkịḅịa ọkụ ị́ kpaịnma nemi?” “Iin, à nemimẹ,” Ịlaịsha ḅe ọkọ se ini pẹkẹrẹmẹ. “Ọkụma ó ye wa anị gbolomaye ḍukoma.”

⁴Anịsịkị Ịlaịja ḅe nwọse Ịlaịsha ḅe ḅẹmẹ, “Ma mịanga sime, Nyanaḅọ Ḅe ọ̀ tọn ị̀ pịrịmẹ, na à so Jẹriko mun.” Ọkụma Ịlaịsha ḅe nwọ pẹkẹrẹmẹ, “Àrị ị̀ya ḅereni mị karị fịmẹ ḍumo sime Nyanaḅọ Ḅe na ị́rị́ na pịrịmẹ na ngịsị àrị ị́ wẹrịso ẹkẹ.” Anịẹrẹchị ini so Jẹriko mị mun mẹ.

⁵Anịju ḅụ anga ịkịankoroapụ kpo mị so Ịlaịsha ḅe damamun se nwọse ò gbelamẹ, “Mịmgba Nyanaḅọ Ḅe ori Ịlaịja ị́ nyanaḅọ ḅe ọkịḅịa ọkụ ị́ kpaịnma nemi?” “Iin, à nemimẹ,” Ịlaịsha ḅe ọkọ se ini pẹkẹrẹmẹ. “Ọkụma ó ye wa anị gbolomaye ḍukoma.”

⁶Anịsịkị Ịlaịja ḅe nwọse Ịlaịsha ḅe ḅẹmẹ, “Ma mịanga sime; Nyanaḅọ Ḅe ọ̀ tọn ị̀ pịrịsam na à so Jọdan Tọrụ mun.” Ọkụma Ịlaịsha ḅe nwọ pẹkẹrẹmẹ, Àrị ị̀ya ḅereni mị karị fịmẹ ḍumo sime Nyanaḅọ Ḅe na ị́rị́ na pịrịmẹ na ngịsị àrị ị́ wẹrịso ẹkẹ. Anịẹrẹchị ini nwẹngịmamunmẹ,

⁷se ịkịankoroapụma ḅie ḅụ kịnị-a mesi oyi fịnjị ini ḍuko Jọdan mun mẹ. Ịlaịja ḅe na Ịlaịsha ḅe na tọrụ mị aka ḅụ chịẹmẹ, se ịkịankoroapụ kịnị-a mesi oyi fịnjịma kele sikima chịẹsimemẹ.

⁸Anịsịkị Ịlaịja ḅe oria ḅụchụaye abagbanaye mị sin, anị fangalama, se anị seni mengi mị fomumẹ; mengi mị maịn pumẹ, se ori na Ịlaịsha ḅe na kpoinkpoin kiri ọgọnọ saḅa ísí pẹkẹrẹ mị mun mẹ.

⁹Anịju ḅụ, Ịlaịja ḅe nwọse Ịlaịsha ḅe ḅẹmẹ, “Ma àrị iwo soka simeogbo à mịẹ ị́ pịrị ị́ nwọ ḅiye mị ḍuko ị̀ pịrị.” Ịlaịsha ḅe nwọse ọ̀ pẹkẹrẹmẹ, “Ye ị́ya kụrọ mị ḅe mama kiri à nwọ nyana, ị́ tịḅị ḍinmaḅịaḅọ ḅaraḅụ.”

¹⁰Ị́ ḅiye mị ḅụfụkamaye-ẹ, Ịlaịja ḅe ọkọ pẹkẹrẹmẹ. “Ọkụma ị́ anị nyanaḅịa nemikase àrị ị́ koroma iwosoarị sịkị ị́ ị̀ ọrịmẹ ḅẹḅẹ; ị́ nemikase ị̀ ọrịkẹ ḅẹḅẹ, ị́ anị nyana ẹkẹ.”

¹¹Ini ḅịpị ḅẹlẹma nwẹngịma mun-arị sịkị ḅụ, bẹkẹma ḅaraḅụ kporokporo fịnị arụ asụn na ḅo inia ogboku pu ḅọrọ se Ịlaịja ḅe ọkị iwo soḅie mun mẹ ajisaka fọrụ ḅie.

¹²Ịlaịsha ḅe anị ọrị se Ịlaịja ḅe chịn oloku se nwọ ḅẹmẹ, “Ị̀ ḍa, ị̀ ḍa! Owusọ Izrẹl mị pịrị opuḅọ! Ị́ sosam!” Se ọ̀ ḅarị Ịlaịja ḅe ọrịkẹ. Kururu ḅu, Ịlaịsha ḅe oria ḅụchụaye mị se maịn pumẹ.

¹³Anịsịkị ori Ịlaịja ḅe ḅara sokoro koro ḅụchụaye abagbanaye mị deki se vinpịkị mun Jọdan tọrụ aka mị ḅụ chịẹmẹ.

¹⁴Ori Ịlaịja ḅụchụaye abagbanaye mị seni mengi mị fomu se nwọ ḅẹmẹ, “Nde Nyanaḅọ, Ịlaịja Tamụnọ Ḅe?” Anịsịkị ọ̀ pịkịna anị se mengi mị fomumẹ, se mengi mị maịn pu se ọ̀ nwẹngị saḅa ísí pẹkẹrẹ mun mẹ.

¹⁵Jẹriko ḅie ḅo ịkịankoroapụ kịnị-a mesi oyi fịnjịma ori ọrị seni nwọ ḅẹmẹ, “Ịlaịja kụrọ mị anị ḅo Ịlaịsha ḅe ọgọnọ gbanasam!” Ini mun ọ̀ la, se tịḅịtu ọ̀ pịrị,

¹⁶se nwọ ḅẹmẹ, “Mine kịnị-a mesi oyi fịnjị omi-ẹ, mine mgba kụrọapụ-ẹ. Ye wa mun ị́ nyanaḅọ ḅe ḍọkị. Sosi Nyanaḅọ Ḅe tẹmẹ ò deki se ò gbọrị tụndụ ọgọnọ anịkanịka pẹsịkiri ḅie koroma se ọ̀ wẹrịsosam.” “Ẹn-ẹn, ó munma,” Ịlaịsha ḅe ọkọse ini pẹkẹrẹmẹ.

¹⁷Ọkụma ini pa anị ḍuko kụrọmamẹ, anị ọ̀ wẹrịso se ini mun ye-ẹ. Ini kịnị-a mesi oyi fịnjịma mun chịngịma ọgọnọ na pẹsịkiri ma ḅie na Ịlaịja ḅe ḍọkị mun tẹrẹ-a ḍin lamẹ, ọkụma ini ori ọrịkẹ.

¹⁸Anịsịkị ini vinpịkị Ịlaịsha ḅe damaḅomẹ, Jẹriko ḅie ò koru sime nyọ mị ḅụ, se ọ̀ nwọse ini ḅẹmẹ, “À ḍuko ọ́ pịrịka na ó munma-ẹ?”

¹⁹Jẹriko ḅie da owuapụ so Ịlaịsha ḅe damamun se nwọse ọ̀ ḅẹmẹ, “Ị́rị́ sọnị nemi ḅaraḅụ, wa nyanaḅọ, mịn mị iḅi opuama-ẹ, ọkụma mengi mị iḅikẹ, anị pịkị mịẹse kiri mị sọye mịẹkẹ.”

²⁰Ori nwọse ini ḅẹmẹ, “Ọ́ fụn seni ịwọ bọlị ḅie chụa, se anị seni ḅo ị̀ pịrị.” Ini anị seni ḅo ọ̀ pịrịmẹ,

²¹se ò so ideri mengi mị tịḅịju mun, se fụn mị seni mengi mị ḅie sara, se nwọ ḅẹmẹ, “Nyanaḅọ Ḅe nwọ ḅẹmẹ: ‘À mị mengi mị mịẹ fịafịasam, se anị ḅarị fị ọkịḅo-ẹkẹ pịkị lọkọlọkọ kiri sọḅịa.’”

²²Anịsịkị ngịsị anị mengi mị fịafịaḅụ anị sime waraḅẹ, anị Ịlaịsha ḅe ḍuko na anị simeḅịa nwọḅẹ ḅara mị.

²³Ịlaịsha ḅe Jẹriko mị wẹrịsomẹ, so Bẹtẹl munḅịa ẹrẹchị, se ateliogbo ḅụ owuapụ awọ gbọrị ama ḅie pakaḅo ò se ḍẹrịye mịẹmẹ. Ini oloku nwọse ọ̀ ḅẹmẹ, “Ya nwẹngịso mịju, ḅe tịḅịfiriḅọ!”

²⁴Ịlaịsha ḅe tọrụ pịkị, gamụnụma ini ḍiki, se Nyanaḅọ Ḅe ẹrẹ ḅụ worinime se ini pịrịmẹ. Anịsịkị mama ịrụọrụọ chịrị piri ḅie pakaḅo owuapụ awọma ḅie ḅụ kịnị-a mesi na mamapụ nwọ kanị kọsịmamẹ.

²⁵Ịlaịsha ḅe so Kamẹl Tụndụ mị ọgọnọ mun mẹ, se ọḅụkọ ò vinpịkị Sameria mun mẹ.