Read kirikeni 2 Amanyanapụ 20 Bible Online

2 Amanyanapụ 20 - kirikeni bible

2 Amanyanapụ 20

¹Ḅo mịsịkị lasịkị Amanyanaḅọ Hẹzekaya ḅe ori obimẹ se kalaye kẹngẹ kọnmẹ ọ̀ fịsam. Ịkịankoro Aịzaya, Emọs yaḅe mun toluma ò ḍiki se ḍuko ọ̀ pịrịmẹ, “Nyanaḅọ Ḅe nwọse ị́ ḅẹmẹ na yegoyegoye karakarama, anịatịḅị mị obi mị ḅie ị́ sịsẹ ẹkẹ. Ḅụkarakarama fị mị pịrị.”

²Hẹzekaya ḅe ọ̀ tọrụ pịkị warị agbagba da se tẹkẹmẹ:

³“Nyanaḅọ, se ḅiekoroma na kuḅie seni ḅụgbana gbẹịn ḅara na pịkị gbun ḅereni nyana ị́ pịrị ḅụ na, à wẹrị fịrịnwẹngị ị́ pịrịmẹ, à pịkị sịkịmamgba ḅụkụrọma ị́rị́ ị̀ ḅe na à mịẹ nwọḅẹye mịẹmịẹmẹ.” Se ọ̀ sakị ḅụakụ ḅara nwọ seni owumẹ.

⁴Aịzaya ḅe ori amanyanaḅọ ḅe koromasomẹ, ọkụma amanyanaḅọ odo mị ogboku ḅẹrẹkọn warị mị ḅie, ma ọ̀ nwọ toluḅọrọka simeogbo Nyanaḅọ Ḅe ḍuko ọ̀ pịrịmẹ na

⁵ò vinpịkị mun ḍuko Hẹzekaya, ḅẹrẹtọn Nyanaḅọ Ḅe tomonima pịrịarịḅọ ḅe pịrị se nwọse ọ̀ ḅe na, “Ị̀rị̀, Nyanaḅọ, ị́ya olomu ḍaḅọ Devid Tamụnọ Ḅe, ị́ kọn tẹkẹ mị à naasam à pịkị ị́ya owumengi ma ọrịsam. Àrị ị́ gwọḅịa, se tẹrẹ-a ḍin laḅịa sịkị ị́ so Oputẹkẹwarị ḅie munḅịa.

⁶Àrị ị́ wẹrịso se ị́ jie-a kụra laḅịa. Ị́rị́ na mị Jerusalẹm opuama mị na, Asiria sẹdaḅọ ḅe ḅara ḅie àrị ọ́ ḍụaḅịa. Àrị agbọ sọ mị opuama mị pịrịḅịa ị̀ya osi mị gose pịkị à ḅereni ị̀ya fịrịnwẹngịḅọ Devid ḅe pịrịye mị gose.”

⁷Anịsịkị Aịzaya ḅe nwọse Amanyanaḅọ ḅe oria fịrịnwẹngịapụma ḅẹmẹ na, ini figi chịn ḅụ pakaḅoye nwọ gbẹịn se ọpọpọlị ma oḅolo anịsịkị ọ̀ ḅụ iḅiḅịa.

⁸Amanyanaḅọ Hẹzekaya ḅe nwọse ò gbelamẹ, “Nde anịa elekima na Nyanaḅọ Ḅe ori ị̀ gwọḅịa pịkị tẹrẹ-a ḍin laḅịa sịkị àrị ineda Oputẹkẹwarị mị ḅie munḅịa nwọḅẹye mị?”

⁹Aịzaya ḅe nwọse ọ̀ pẹkẹrẹmẹ, “Nyanaḅọ Ḅe ọ̀ gbọrị elekima mịẹ ị́ ḍieḅịa, seni ḍiepakụma na ò ḅereniye mị ọ̀ mịẹḅịa. Mịọkụ, nde ị́ ḅụḅẹlẹye, ịrụa ḅie tẹmẹ mị oyi-a ḅụọ seni tọrọkọ mun na anịkanịka oyi-a ḅụọ seni ọḅụda na?”

¹⁰Hẹzekaya ḅe nwọse ọ̀ pẹkẹrẹmẹ, “Ịrụa ḅie tẹmẹ mị mịẹse anị oyi-a ḅụọ seni tọrọkọ mun mị sarasaratẹịn anị oyi-a ḅụọ seni ọḅụda mị nẹngịmẹ!”

¹¹Aịzaya ḅe Nyanaḅọ Ḅe tẹkẹmẹ, se Nyanaḅọ Ḅe ịrụa ḅie tẹmẹ mị mịẹse anị oyi-a ḅụọ seni ọḅụdamẹ, anị Amanyanaḅọ Ehaz ḅe nama chịẹmaye mị ḅụ.

¹²Anịsịkị mị ḅụ Babilọn amanyanaḅọ Merodak Baladan yaḅe naamẹ na Amanyanaḅọ Hẹzekaya ḅe ọḅụ iḅikẹ, anị ò ḍiri gịẹịn ọ̀ sẹịnmaye-ẹ pịkị ḍiepịrịaye na.

¹³Hẹzekaya ḅe okuḅoapụ ma daọkị, se ọ̀ pẹrẹ la-ọkụ seni ini ḍiemẹ—oria seleḅa ma na, goli ma na, ye kụnụmaye mịẹḅịaye ma na pịkị kụnụ olo ma na pịkị oria owuniaye mamgba na. Oria ngọ koko warịma ḅie na pịkị oria amanyanakiri mị ḅie na, ò se ini ḍiekaye ofori-ẹ.

¹⁴Anịsịkị ịkịankoro Aịzaya ḅe amanyana Hẹzekaya ḅe damamun se ò gbelamẹ, “Mịna owuapụma ndeanga ini ḅo, se cheye ini nwọ ḍuko ị́ pịrị?” Hẹzekaya ḅe nwọse ọ̀ pẹkẹrẹmẹ, “Opuma ḅọlọ sẹ ḅie ini ḅomẹ, Babilọn ḅie.”

¹⁵“Amanyanaḅọ warị mị ḅie cheye ini nwọ ọrị?” “Yemamgba ini ọrịmẹ. Ngọ koko warị mị ḅie sime se à seni ini ḍiekaye ofori-ẹ.”

¹⁶Aịzaya ḅe ḍuko amanyanaḅọ ḅe pịrịmẹ na, “Kụrọmamgba Nyanaḅọ Ḅe nwọ ḅẹmẹ na

¹⁷gbọrị sịkị ḅoaḅẹ, ị́ya amanyanaḅọ warị mị ḅie simeye layelaye, ị́ya olomu-aḍapụma koko koromaḅo mịmgba laye mamgba na, ini àrị deki so Babilọn munḅịa. Gbọrịye kẹngẹ sọnị kọn ẹkẹ.

¹⁸Dada ị́ furo ḅie apụma ḅie dapụ sọnị ini nwọ kun soḅịa, se ini ini poḅịa se ini seni Babilọn amanyanaḅọ ḅe warị ḅie fịrịnwẹngịapụ mịẹḅịa.”

¹⁹Amanyanaḅọ Hẹzekaya ḅe nwọse anị kaịnḅomẹ na mịn mị fieaḅẹ na oria ḍumo ene maḅie deinma simeḅịa, ḅẹrẹ pịkị paka ẹkẹ, anịẹrẹchị ọ̀ nwọse ọ̀ pẹkẹrẹmẹ, “Nyanaḅọ Ḅe ḅụ ị́ daḅọrọma ị̀ pịrị oku mị iḅimẹ.”

²⁰Amanyanaḅọ Hẹzekaya ḅe mịẹ jịn aye goyegoye na, oria kuḅie kụrọ nyana mịẹmịẹaye na, ọ̀ wẹrị mengi kokoye nama ọkụ mị na, ọ̀ pịkị kiri-chuku-ḅie ḅọrọnyọ soku se mengi ọkịḅo opuama mị ḅie chu ọkị mị na, àrịmgba Juda Amanyanapụ ma Ḅụaḅẹrẹ ḍiri mị ḅie gịẹịn waraḅẹ.

²¹Hẹzekaya ḅe fịmẹ se yayo Manasẹ ḅe oria kiriḍinmamẹ amanyanaḅọ ḅaraḅụ.