Read kirikeni 2 Amanyanapụ 21 Bible Online

2 Amanyanapụ 21 - kirikeni bible

2 Amanyanapụ 21

¹Manasẹ ḅe oyimaịn kụra fịnjị ọ̀ nwọ lasam ò ḅo Juda amanyanaḅọ nwọ sọ sịkị, se sọnọfa kụra tesi ọ̀ nwọse ḅẹrẹtọn mẹ Jerusalẹm ḅieḅụ. Nyọngọrọ ma anị Hẹfziba ma-ẹ.

²Nyanaḅọ Ḅe oria tomonima sọmun-arị sịkị ama mị ḅie ò depakụmapụ ma inia si mịẹye ma ḍikiḍa ḅụ, Manasẹ ḅe ò simịẹmẹ Nyanaḅọ Ḅe ḅụ.

³Ḍawu Hẹzekaya ḅe kansin oru ḅẹrẹ nemiapụ tẹkẹ nyọma ò kpoto àrị namamẹ; seni Beal mị tẹkẹḅịa agbamịẹ ẹbẹ ma ò kpoto nwọ namamẹ pịkị Ashera eremeni oru mị nwọ tẹmẹmẹ anị Ehab Izrẹl Amanyanaḅọ ḅe mịẹ ọkụ mị. Manasẹ ḅe lolia ma sọnị ori àrị tẹkẹtẹkẹmẹ.

⁴Oputẹkẹwarị mị ḅieḅụ oru ḅẹrẹ nemiapụ agbamịẹ ẹbẹ ọ̀ nwọ namamẹ, anị Nyanaḅọ Ḅe ḅẹmẹ na anịju ḅụ ini ọ̀ tẹkẹtẹkẹḅịa nwọḅẹ nyọ mị.

⁵Oputẹkẹwarị mị ḅe mama odo ma ḅie, ini seni fịrịnwẹngị lolia ma pịrịpịrịḅịa agbamịẹ ẹbẹ ọ̀ nwọ namamẹ.

⁶Ọ̀ yayo ḅe seni dọkịma agba mịẹmẹ. Ọ̀ tọrụtolu fịrị na àrịa fịrị na nwẹngị-nwẹngịmẹ ọ̀ pịkị ḅaraḍikiapụ na damamun yegbelagbelamẹ. Ori opuma simịẹmẹ Nyanaḅọ Ḅe ḅụ se pịkị oria ịganị owoimamẹ.

⁷Ashera eremeni oru lụgụ mị ò se Oputẹkẹwarị mị ḅie koromamẹ, anịnyọ mị gbolomaye ḅụ Nyanaḅọ Ḅe nwọse Devid ḅe na yayo Sọlọmọn ḅe na ḅẹmẹ: “Mịju Jerusalẹm ḅieḅụ, mị Oputẹkẹwarị mị ḅie, anị à sẹlẹọkịsa nyọ mị-ẹ bebe Izrẹl oyimaịn furo fịnjị mamgba eke mị ḅụ, mị ini ị̀ tẹkẹḅịa nyọ mị-ẹ.

⁸Izrẹlapụma nemikase à tọn ini pịrịye mamgba ḅụ ḅịpịpoki pịkị ị̀ya fịrịnwẹngịḅọ Moziz ḅe chụa seni ini pịrị oloko mamgba kokomẹ ḅẹḅẹ, anịọkụma à ḅereni ẹkẹ ini ini depakụma à seni inia olomu-aḍapụma pịrịsa ama mị ḅieḅụ.”

⁹Judapụma ini Nyanaḅọ Ḅe ḅịpịpokikẹ, se Manasẹ ḅe pịkị ini damun Nyanaḅọ Ḅe oria tomonima sọmun-arị sịkịḅụ ori amama ḅie depakụma sẹma mịẹ sima nẹngị opu si nwọ mịẹmẹ.

¹⁰Nyanaḅọ Ḅe oria fịrịnwẹngị ịkịankoroapụma ḅụ ḅọrọ se nwọ ḅẹmẹ,

¹¹“Amanyanaḅọ Manasẹ ḅe ma ḅụngụngụma sima mịẹ, Kenan apụma mịẹ sima nẹngịmẹ, ọ̀ pịkị oria oru ma ḅụ ḅọrọ Juda mị da mun si ḅie chusam.

¹²Anịẹrẹchị Ị̀rị̀, Nyanaḅọ Izrẹl Tamụnọ Ḅe, seni ḅo Jerusalẹm mị na Juda mị na ọgọnọ gbanaḅịa fa mị naaḅọ goyegoye nụḅọ ḅụ gbiripuḅịa.

¹³À fomuḅara seni Jerusalẹm mị pịrịḅịa anị à seni Sameria mị mịẹ ọkụ mị, anị à seni Izrẹl Amanyanaḅọ Ehab ḅe na ò furo ḅie apụma na mịẹ ọkụ mị. Jerusalẹm apụma àrị ini ọfịn sinḅịa anịa ḅieḅụ, anị yefị ẹfẹrẹ furuma fịafịama se iḅo koroma ọkụ mị.

¹⁴Fị kọnma apụma àrị ini sịkịḅịa se ini saḅama ini na tarakapụma pịrịḅịa, ini ini kanḅịa pịkị inia ama mị kọsịmaḅịa.

¹⁵À mịn mị seni ị̀ya tomonima mịẹḅịa anịatịḅị ini ị̀ ḅụ si mịẹmẹ pịkị ị̀ya ịganị mị owoimasam, inia olomu-aḍapụma Ijipt ḅie ḅụ pakaḅo sịkị ḅụ ọkịḅo mịmgba ene mị la.”

¹⁶Manasẹ ḅe ọ̀ tọn-a ḅẹrẹtịḅị nemikapụ ḅaaye ẹrẹchị Jerusalẹm ateli ma ḅie tomoni-a pulo iderimẹ; ọ̀ mịn mị se chụa mịẹmẹ se Judapụma damun orutẹkẹ ḅie chumẹ. Ori ini mịẹse ini Nyanaḅọ Ḅe ḅụ si mịẹmẹ.

¹⁷Manasẹ ḅe mịẹ jịnye goyegoye, pịkị ọ̀ mịẹ sima na, Juda Amanyanapụ ma Ḅụaḅẹrẹ ḍiri mị ḅie gịẹịn waraḅẹ.

¹⁸Manasẹ ḅe fịmẹ, se amanyanaḅọ warị odo sime ozu mị ḅieḅụ ini ò ḍipimẹ, Ọza ḅe oria ozu mị ḅie, se yayo Amọn ḅe oria kiriḍinmamẹ amanyanaḅọ ḅaraḅụ.

¹⁹Amọn ḅe simaịn kụra fịnjị ọ̀ nwọ lamẹ ò ḅo Juda amanyanaḅọ sọ sịkị, se mama kụra ọ̀ nwọse ḅẹrẹtọn mẹ Jerusalẹm ḅie. Nyọngọrọ ma anị Mẹshụlẹmẹt, Harọz ḅe ḅarọ ma-ẹ, Jọtba ama ḅọ-ẹ.

²⁰Ḍawu Manasẹ ḅe ḅara mị, Nyanaḅọ Ḅe ḅụ ò si mịẹmẹ;

²¹ḍawu ḅe yemịẹ ḅara ọ̀ nwọ ḍikiḍamẹ, ọ̀ pịkị ḍawu ḅe tẹkẹtẹkẹ oru ma nwọ tẹkẹmẹ.

²²Ọ̀ Nyanaḅọ Ḅe sịkịmẹ, oria olomu-aḍapụma Tamụnọ Ḅe, ọ̀ pịkị Nyanaḅọ Ḅe ḅịpịpokikẹ ọ̀ tọn ayema ḅụ.

²³Amọn ḅe, oria fịrịtịḅịnị ma si ḅẹrẹḅia ọ̀ pịrị se ọ̀ ḅaamẹ amanyanaḅọ warị mị ḅie.

²⁴Judapụma, Amọn ḅe ḅaa apụma ini ini ḅaamẹ, se yayo Josaya ḅe se amanyanaḅọ mịẹmẹ.

²⁵Amọn ḅe mịẹ jịnye goyegoye Juda Amanyanapụma Ḅụaḅẹrẹ ḍiri mị ḅie gịẹịn waraḅẹ.

²⁶Amọn ḅe Ọza ozu mị ḅie sime iḍupu mị ḅieḅụ ini ò ḍipimẹ, se yayo Josaya ḅe oria kiriḍinmamẹ amanyanaḅọ ḅaraḅụ.