Read kirikeni 2 Amanyanapụ 4 Bible Online

2 Amanyanapụ 4 - kirikeni bible

2 Amanyanapụ 4

¹Deḅọ fịsa gbọrị eremeniḅọ dewu ḅe ịkịankoroapụ ogbo ḅọ-ẹ, árị Ịlaịsha ḅe damaḅo se nwọse ọ̀ ḅẹmẹ, “Ị̀ nyanaḅọ, ị̀ deḅe ọ̀ fịsam! Ị́rị́ sọnị nemi ḅaraḅụ ori anị Tamụnọ ḍikiḅalafaḅọ-ẹ, ọkụma mịọkụ, ọ̀ sa ọlọḅọ ḅosam, ị̀ya mama owuapụ awọma ọkị mun omoniapụ mịẹḅịa ẹrẹchị, se ị̀ deḅe fị sa mị gbẹịnḅịaye gose.”

²“Cheye à nwọ mịẹ ị́ pịrịḅe?” ori nwọse á gbelamẹ. “Ḍuko ị̀ pịrị, warị ḅie cheye ị́ nwọ nyana?” Árị nwọse ọ̀ pẹkẹrẹmẹ, “Gbọrịye kẹngẹ sọnị ofori-ẹ, oliv pulo ngẹrị anị ị̀ya ojongo tọkụ mị ḅie omiye-ẹ.”

³Ịlaịsha ḅe nwọse á ḅẹmẹ, “So ị́rị́ na anga apụma damamun, se inia ḅara tọn-a ojongo nwọ ḅọlọ ye ḅie ofori aye, ị́ inedaḅịa ḅara goyegoye.”

⁴“Anịsịkị ị́rị́ na ị́ya owuapụ awọma na warị sọ, ḅọkọ mị palị, se sakị pulo mị seni ojongo ma ḅie sara. Ḅeinsaye goyegoye sikima koroma.”

⁵Anị eremeniḅọ ma so árịa warị ḅie sọye-ẹ, árịa owuapụ awọma na, ḅọkọ mị palị, oliv pulo ojongo mị deki, se pulo mị seni ojongo ma ḅie saramẹ, árịa owuapụ awọma àrị dekidekiḅo á pịrịarị sịkị.

⁶Ini ojongo mamgba nwọ ḅeinmaso sịkị, árị ini gbelamẹ nwọfa kọnye pa omi-otuḅo. Arịa owuapụ awọma ḅie gbọrịḅọ nwọ pẹkẹrẹmẹ, “Jịnye ḅarị ofori-ẹ.” Se oliv pulo mị dachịẹmẹ.

⁷Á vinpịkị so Ịlaịsha ịkịankoroḅọ ḅe damamunmẹ, se ḍuko ọ̀ pịrịmẹ, se ọ̀ nwọse á ḅẹmẹ, “Oliv pulo mị dẹrị se ị́ fị sa mamgba gbẹịn sin, se ị́ya owuapụ awọma na ị́rị́ na se warị kanaḅịa igbiki pịkị iḅiọkụma kọnḅịa.”

⁸Gbọrị ene Ịlaịsha ḅe so Shụnẹm mun mẹ, anịju ḅụ gbọrị ngọkọn eremeniḅọ simemẹ. Árị ọ̀ chịn fịye seni ọ̀ pịrịmẹ, anịsịkị ḅụ sakị ò Shụnẹm mun sịkị goyegoye ori árịa warị bịan se ye fịfịmẹ.

⁹Á nwọse dewu ḅe ḅẹmẹ, “Àrị iḅiọkụ nemimẹ na nwọ sịkịmamgba mịju ḅoḅoḅọ ḅe fịafịa Tamụnọ tomoniḅọ-ẹ.

¹⁰Ye wa warị ochu mị ọgọnọ ḅụ gbọrị kala ḅie nama se gbọrị mọnọye na gbọrị dẹbụl na gbọrị ịkasịe na, pịkị gbọrị tọnjie na seni anịa ḅie koroma ọ̀ pịrị. Ori ineda anịju simeḅịa ò ḅo wa lasịkị goyegoye.”

¹¹Gbọrị ene Ịlaịsha ḅe vinpịkịso Shụnẹm mị mun se iwo oria ḅie mun mẹ ịnyọ saraḅịa ẹrẹchị.

¹²Ori oria fịrịnwẹngịḅọ Gẹhezaị ḅe ḅẹmẹ na ò mun eremeniḅọ ma chịn ḅo. Á ḅo lasịkị,

¹³ọ̀ nwọse Gẹhezaị ḅe ḅẹmẹ, “Á gbela na cheye à nwọ mịẹ á pịrịḅe, á nyana wa pịrịarị ḅarachụa ma gose. Sosi á ḅiḅịa àrị amanyanaḅọ ḅe anịkanịka ọmụogbo mị tịḅịdaḅọ ḅe damamun se á ḅụ iḅi ọkwẹịn seni ori na ḅẹlẹma.” Á nwọse ọ̀ pẹkẹrẹmẹ, “Ị̀ ḅụpalịmaye mamgba à nyana waraḅẹ ị̀ya tomonima ogboku.”

¹⁴Ịlaịsha ḅe nwọse Gẹhezaị ḅe gbelamẹ, “Anị ọkụma cheye à nwọ mịẹ seni á pịrịḅe?” Gẹhezaị ḅe nwọse ọ̀ pẹkẹrẹmẹ, “Árị owutọkụ nyanakẹ, dewu ḅe ọ̀ pịkị olomusam.”

¹⁵Ịlaịsha ḅe nwọse ọ̀ ḅẹmẹ, “Á ḅẹ á mịju ḅo.” Á ḅo ḅọkọ mị tọrọkọ ḅụ chịẹ simemẹ,

¹⁶se Ịlaịsha ḅe nwọse á ḅẹmẹ, “Jịn kụra nwọ pembe ḅiri laḅịa sịkị ị́ owutọkụ dekiḅịa ị́ ḅara ḅieḅụ.” Árị oloku se nwọ ḅẹmẹ, “Yei!” “Ị̀ nyanaḅọ, ngịsị iruokọn ị̀ pịrịma. Ị́rị́ Tamụnọ tomoniḅọ-ẹ!”

¹⁷Ọkụma, Ịlaịsha ḅe ḍukosa ḅara ḅụ anị ḍukoma kụra mị ḅo anịsịkị mị laḅịa sịkị á gbọrị owutọkụ yisam.

¹⁸Tọn-a kụra ḅọrọ sịkị, fịye soku sịkị mị ḅụ, tọkụ ḅe pakaso gbọrị ene dede ḅie ḅụ, ḍawu ḅe damamunmẹ, anị fịye soku apụma na ozu ḅie simeḅọ ḅe.

¹⁹Bẹkẹma ḅara ḅụ ori owu oloku ḍuko ḍawu ḅe pịrịmẹ, “Ị̀ tịḅị fụkaḅẹ! Ị̀ tịḅị fụkaḅẹ!” Ḍawu ḅe nwọse gbọrị fịrịnwẹngịḅọ ḅẹmẹ, “Tọkụ ḅe deki mun nyọngọrọma pịrị.”

²⁰Fịrịnwẹngịḅọ ḅe tọkụ ḅe deki mun nyọngọrọma pịrịmẹ, árị ò deki á ḅụọ ọgọnọ gbanamẹ mun eneogboin lamẹ, anịsịkị ḅụ mịn ọ̀ fịye-ẹ.

²¹Árị ò deki iwo mun Ịlaịsha ḅie mị ḅie mọnọye mị ọgọnọ ḅọlọlọmẹ, ḅọkọ mị palị, se pakasomẹ.

²²Anịsịkị á dewu ḅe chịn se nwọse ọ̀ ḅẹmẹ, “Gbọrị fịrịnwẹngịḅọ na yepụra asụn na seni ị̀ sẹịnma. À ḅimẹ àrị ịkịankoro Ịlaịsha ḅe damamun. Ḅọlọka sịkị ḅụ à vinpịkịḅoḅịa.”

²³“Cheye ẹrẹchị ị́ mịmgba ọ̀ damamunḅe?” dewu ḅe ọkọse á gbelamẹ. “Ịnyọsara enekẹ pịkị Ịwọ Akalụ Alalị eneka sịkị.” Á nwọse ọ̀ pẹkẹrẹmẹ, “Ye abalama.”

²⁴Anịsịkị á yese yepụra asụn ḅe ọgọnọ ise se ọ̀ ḅụkụlọ se nwọse fịrịnwẹngịḅọ ḅe ḅẹmẹ, “Mịẹse yepụra asụn ḅe ori inedaḅịa ḅara ọ̀ nwọse mangị, se ngịsị ḅara lọkọma ma, à jịn ọkụse ị́ ḅẹmẹ sikima ọkụma.”

²⁵Anị á pakaso Kamẹl Tụndụ mị mun ye-ẹ anị Ịlaịsha ḅe sime nyọ mị. Ịlaịsha ḅe á ḅoarị ọkụ ọrịmẹ, á pa ọ̀ ḅụ sasa waraḅẹ se ọ̀ nwọse oria fịrịnwẹngịḅọ Gẹhezaị ḅe ḅẹmẹ, “Ḍiki, Shụnẹm eremeniḅọ ma á ḅoaḅẹ!!

²⁶Be á damamun se ḍọkị nemi ye kpaịnma árị na iḅi wara-ao, dewu ḅe na, pịkị yayo ḅe na ḅụ.” Á ḍuko Gẹhezaị ḅe pịrịmẹ na yemamgba iḅi waraḅẹ,

²⁷ọkụma á ḅo Ịlaịsha ḅe lasịkị á tịḅịtu se ọ̀ ḅụọchuku kunmẹ. Gẹhezaị ḅe ori á suma sin ọtọnmẹ, ọkụma Ịlaịsha ḅe nwọ ḅẹmẹ, “Á wẹrịso. Opu ḅụḅalaḅala á ḅụ omi ọkụ ị́ ọrịka? Se Nyanaḅọ Ḅe anị gboloma gbọrịye sọnị ḍuko ị̀ pịrịkẹ.”

²⁸Eremeniḅọ ma nwọse ọ̀ ḅẹmẹ, “Ị̀ nyanaḅọ, àrị ị́ ḅara tọkụ ḅi? À ḍuko ị́ pịrịka na ị̀ kuḅiemgbọlụ mị ḅo opuye ḅụ gbanaḅịaye mịẹ ị̀ pịrị ma-ẹ.”

²⁹Ịlaịsha ḅe tọrụpịkị Gẹhezaị ḅe da se nwọse ọ̀ ḅẹmẹ, “Sarama! Ị̀ya amgbara mị deki mun. Dachịẹ gbọrịḅọ sọnị kerenima, ị́rị́ na ịrịaḅọ goyegoye, pịkị nemikase ini ị́ kereni sọnị ḅerenima. Dada so warị mị mun se ị̀ya amgbara mị seni tọkụ ḅe ọgọnọ gbana.”

³⁰Eremeniḅọ ma nwọse Ịlaịsha ḅe ḅẹmẹ, “Ḍumo ḅụ sime Nyanaḅọ Ḅe na ị́rị́ na ḅụ à nyana ḅereni mị na à nwọ karịfịmẹ, ngịsị àrị ị́ wẹrịso ẹkẹ!” Anịẹrẹchị ini mama apụma gbọrị ḅụọ ḅụ vinpịkịso mun mẹ.

³¹Gẹhezaị ḅe tatarị mun se Ịlaịsha amgbara mị seni tọkụ ḅe ọgọnọ gbanamẹ, ọkụma ọ̀ pụkọ naakẹ pịkị gbọrị ḍumo elekima sọnị ọ̀ ḅụ ofori-ẹ. Anịẹrẹchị ò vinpịkịso Ịlaịsha ḅe damamun se nwọse ọ̀ ḅẹmẹ, “Tọkụ ḅe ọ̀ sịsẹkẹ.”

³²Ịlaịsha ḅe mun lasịkị ori ngẹrị so warị mị ḅie mun mẹ, se tọkụ ḅe ọrịmẹ mọnọye mị ọgọnọ ọ̀ fị ḅọlọlọ sime waraḅẹ.

³³Ọ̀ ḅọkọ mị palị se Nyanaḅọ Ḅe tẹkẹmẹ.

³⁴Anịsịkị ọ̀ tọkụ ḅe ọgọnọ ḅọlọlọmẹ, se ọ̀ ḅịpị na, ọ̀ tọrụmgbọlụma na pịkị ọ̀ ḅarama na se tọkụ ḅe ḅịpị na, tọrụmgbọlụma na pịkị ḅarama na ọgọnọ gbanamẹ. Ọ̀ tọkụ ḅe ọgọnọ ḅụ ịsụn sime sịkị, tọkụ ḅe oju pịkị kelekelema ọfịrịaḅẹ.

³⁵Ịlaịsha ḅe sịsẹ, nwẹngị warị mịn ḅie kelema se mun pịkịna tọkụ ḅe ọgọnọ ḅọlọlọ simemẹ. Tọkụ ḅe sọnọma sịkị nwọse chịsamẹ, se ọ̀ tọrụmgbọlụma finjimẹ.

³⁶Ịlaịsha ḅe Gẹhezaị ḅe chịn se nwọse ọ̀ ḅẹmẹ, na ọ̀ tọkụ ḅe nyengima chịnḅo. Á sọḅo sịkị, ori nwọse á ḅẹmẹ, “Ḅe ị́ya tọkụ ḅe-ẹ.”

³⁷Árị Ịlaịsha ḅe ḅụọchuku ḅịkịkoro, á tọrụ seni kiri lamamẹ; anịsịkị á yayo ḅe deki somẹ.

³⁸Gbọrị sịkị, ḅuruḅaa bebe ama mị mgba ḅieḅụ simemẹ, se Ịlaịsha ḅe pịkịmaso Gilgalị mị mun mẹ. Ò ye seni ịkịankoroapụma ḅie gbọrị kpo telimarị sịkị ḅụ, ori oria fịrịnwẹngịḅọ ḅe ḅẹmẹ na ò mengi seni gbọrị opu ḅẹlẹ ḅie sara anị se fịnị ọgọnọ chịẹma se ọḍụ chụọ ini pịrị.

³⁹Inia ḅie gbọrịḅọ so ozu ḅie mun mẹ fụlọ chụọ ịnyanya kaịnḅịa ẹrẹchị. Gbọrị owoi irumịẹ chịnmgbọlụ chịn ọ̀ nwọ ọrịmẹ, ori ineda dekiḅịa ḅara ọ̀ nwọse nweniḅaa ịnyanya se chụa tanmẹ. Ori àrị se ḅo seni àrị kịrị ọḍụ mị ḅie chụamẹ, àrị gbolomaye nemika ḅaraḅụ.

⁴⁰Ini ọḍụ mị sara owuapụma pịrịmẹ ini anị fịḅịa ẹrẹchị. Ọkụma ini anị seni inia ḅịpị lama kirikiri ini oloku ḍuko Ịlaịsha ḅe pịrịmẹ, “Nweniḅaaye ḅẹlẹ mị ḅie omi-ẹ!”—se ini ḅarị fị ḍụkụkẹ.

⁴¹Ịlaịsha ḅe fụlọ mị ḅimẹ, se anị seni pịkịma ḅẹlẹ mị ḅie sara, se nwọ ḅẹmẹ, “Ọ́ pịkịna ọḍụ se chụa tomonima pịrị se ini fị.” Se anịsịkị mị ḅụ ḅụfụkamaye ḅarị fụlọ mị ḅie ofori-ẹ.

⁴²Jịn sịkị ḅụ, gbọrị owuḅọ Beal Shalisha ḅie ḅụ ḅomẹ, anị kụra mị ḅie ini tatarị pẹlẹ fịturu mịẹ ịpịamgba ma ini nwọse mịẹ fịturu si okpokpo, na ịwọma pẹlẹ ịpịamgba ḅụ daye na se ḅo Ịlaịsha ḅe pịrịmẹ. Ịlaịsha ḅe nwọse oria fịrịnwẹngịḅọ ḅe ḅẹmẹ na ori àrị seni ịkịankoroapụ kpo mị pịrị se ini fị,

⁴³ọkụma ori nwọse ọ̀ pẹkẹrẹmẹ, “Ị́ chịn ḅara mịn mị kịnị-a sọnọasi karaḅe?” Ịlaịsha ḅe nwọse ọ̀ pẹkẹrẹmẹ, “Se ini pịrị ini fị anịatịḅị Nyanaḅọ Ḅe nwọ ḅẹmẹ na ini fị pịkị kọnḅịa.”

⁴⁴Anị fịrịnwẹngịḅọ ḅe fịye mị dẹ koroma ini pịrịye-ẹ, se Nyanaḅọ Ḅe ḍukosa ḅaraḅụ, inimgba fịye mị fịmẹ se pa pịkị kọnmẹ.