Read kirikeni 2 Amanyanapụ 5 Bible Online

2 Amanyanapụ 5 - kirikeni bible

2 Amanyanapụ 5

¹Neaman, Siria ọmụogbo tịḅịdaḅọ ḅe, anị Siria amanyanaḅọ ḅe opu osi seni pịrị pịkị seni gele kiri ḅụ koromaḅọ-ẹ, anịatịḅị Neaman ḅe ḅụ Nyanaḅọ Ḅe ḅọrọ ọmụḅaraiḅi ọkịḅo Siria ọmụgbin apụma pịrịpịrịmẹ. Ori anị opu owuniḅọ-ẹ, ọkụma ḅụkan obi kọnḅọ-ẹ.

²Ini seni Izrẹl mị paka owu ma ḅie gbọrị owu ḅụ Siria apụma gbọrị eremenitọkụ ini nwọ kun soḅomẹ, se á ḅo fịrịnwẹngị eremeniḅọ sọ Neaman ḅe tarọ ma pịrịmẹ.

³Gbọrị ene, á nwọse árị na angaḅọ ma ḅẹmẹ, “À ḅiḅịa na ị̀ nyanaḅọ ḅe pa ḅụkụrọma so Sameria ḅie ḅụ sime ịkịankoroḅọ ḅe damamun! Oria obi mị ori ineda anị gwọḅịa.”

⁴Neaman ḅe mịn mị naa sịkị ò so mun tọkụ ma ḍukoye mị ḍuko amanyanaḅọ ḅe pịrịmẹ.

⁵Amanyanaḅọ ḅe nwọse ọ̀ ḅẹmẹ, “So Izrẹl amanyanaḅọ ḅe damamun se mị ḍiri pẹkẹrẹ mị seni ọ̀ pịrị.” Anị Neaman ḅe seleḅa pẹkẹrẹ-a tẹrẹ-a poku na jie ẹndẹ na, goli pẹkẹrẹ-a jie ẹndẹ na, pịkị oyi-a sịkị se ḅụ ḍinmaḅịa iḅia ḅiriaye na se munye-ẹ.

⁶Ori ọkị ḍiri pẹkẹrẹ mị nwọ ḅẹmẹ, “Mịn ḍiri mị ị̀ya ọmụtịḅịnịḅọ Neaman ḅe ḍiepakụma ị́ pịrịḅịa. À ḅimẹ oria obi mị ị́ nwọ gwọ.”

⁷Izrẹl amanyanaḅọ ḅe ḍiri pẹkẹrẹ mị go sịkị, anị ijira se ọ̀ ḅụ sara so ọkụma ori oria ḅụchụayema kan se oloku se nwọ ḅẹmẹ, “Nde Siria amanyanaḅọ ḅe gose nwọ sime tọrụ seni ị̀ ḍikiye na, à ḅeḅọ ḅe ḅụ oria ḅụkan obi mị gwọ-ẹ? Ị̀rị̀ Tamụnọ-ẹ ọ̀ nwọ chịn, ḍumo na fị na kụrọ ḅara simeḅọ ḅe? Ngịsị ḅọịkẹ na ori ị̀rị̀ na kamụsọḅịa ọkụ ọ̀ nwọ ḍọkịaḅẹ!”

⁸Ịkịankoro Ịlaịsha ḅe pakaye mị naa sịkị, ọ̀ ḅịpị seni amanyanaḅọ ḅe fịrịma se nwọ ḅẹmẹ, “Cheye ẹrẹchị ị́ nwọse ị́ kuḅie sima-ao? Tomoniḅọ ḅe seni ị̀ sẹịnma, à pịkị seni ò ḍieḅịa na Izrẹl ḅieḅụ ịkịankoroḅọ omi-ẹ!”

⁹Anịsịkị Neaman ḅe oria asụnma na pịkị kporokporo mị na se so mun Ịlaịsha ḅe warịḅọkọ ḅụ dachịẹmẹ.

¹⁰Ịlaịsha ḅe gbọrị fịrịnwẹngịḅọ fịrịma mun ḍuko ọ̀ pịrịmẹ na ò mun sọnọma sịkị seni ọ̀ ḅụ sịkịrị Jọdan Tọrụ mị ḅie, se oria obi mị ḅụ ori okorona okorona gwọḅịa.

¹¹Ọkụma Neaman ḅe opu ịganị ḅụ nwẹngị somẹ. Ọ̀ nwọ ḅẹmẹ, “À nwọ chịnmẹ na ọ̀ pa paka ị̀ damaḅo, Nyanaḅọ ọ̀ Tamụnọ Ḅe tẹkẹ, ḅara seni obi mị sime irima fọngọma, se ị̀ gwọḅịa!

¹²Anị sikima ọkụma, Damaskọs mị ḅie sime tọrụ ma, Abana mị na pịkị Fapa mị na, àrị iḅitẹịn Izrẹl mị ḅie sime tọrụ goyegoye nẹngịka? Mgbọkụ àrị arịa ḅieḅụ ị̀ ḅụ sịkịrị se gwọsam!”

¹³Oria fịrịnwẹngịapụma so ọ̀ damamun se nwọ ḅẹmẹ, “Ị̀ nyanaḅọ, nemikase ịkịankoroḅọ ḅe ị́ ḅẹ na ḅụfụkamaye mịẹ nwọḅẹ ọkụma, mgbọkụ ị́ mịẹḅịa. Mịọkụ cheye ẹrẹchị ị́ ineda ọ̀ ḅẹ ḅara mị seni ị́ ḅụ sịkịrị se gwọ ẹka?”

¹⁴Anị Neaman ḅe koro Jọdan mị ḅie mun sọnọma sịkị se anịa ḅie buakoroye-ẹ anị Ịlaịsha ḅe ḅẹ ḅara mị, se ọ̀ ḅụ gbọtụma iḅimẹ. Oria ojumịnị mị ḅo kpaịn pịkị ịnyọ nyanamẹ, kalatọkụ ojumịnị sime ọkụ simemẹ.

¹⁵Ori ori na ḅo apụma na vinpịkị so Ịlaịsha ḅe damaḅo se nwọ ḅẹmẹ, “Mịọkụ mị à nemiye-ẹ na jịn oru ofori-ẹ, Izrẹl Tamụnọ Ḅe sikima, anịẹrẹchị, sisi, ị̀ nyanaḅọ, ị̀ ḅara ḍiepịrịye mị daọkị.”

¹⁶Ịlaịsha ḅe nwọse ọ̀ pẹkẹrẹmẹ, “Ḍumo sime Nyanaḅọ, à fịrịnwẹngị pịrịarịḅọ ḅe ẹrẹ à nwọ karịfịmẹ na gbọrị ḍiepịrịye sọnị àrị ọkị ẹkẹ.” Neaman ḅe ḅimẹ na ọ̀ pa ḍiepịrịye mị daọkị, ọkụma, ọ̀ ḍụkụkẹ.

¹⁷Anị Neaman ḅe nwọ ḅẹye-ẹ, “Nemikase ị̀ya ḍiepịrịye mị ị́ ọkị ẹkẹ ḅẹḅẹ, anịọkụma ye à mama yepụra asụn seni aḅaịn sẹịn se chụaso ị̀ya ama mun, anịatịḅị mịọkụ sakị tọrọkọ mun à ḅarị agba anịkanịka dọkịma agbamịẹ gbọrị oru sọnị pịrị ẹkẹ Nyanaḅọ Ḅe sikima.

¹⁸À chịnmẹ na Nyanaḅọ Ḅe ò siḅụ-ḅarasin ị̀ pịrịḅịa àrị ị̀ya amanyanaḅọ ḅe ḅụ so Rimọn, Siria oru ḅe opuwarị mị ḅie mun ọ̀ tẹkẹḅịa sịkị. Pikipikiye ofori-ẹ, Nyanaḅọ Ḅe ò siḅụ-ḅarasin ị̀ pịrịḅịa!”

¹⁹“Dein na mun.” Ịlaịsha ḅe nwọse ọ̀ ḅẹmẹ. Se Neaman ḅe somẹ. Ma ò mun ḅọlọju laka simeogbo,

²⁰Ịlaịsha fịrịnwẹngịḅọ Gẹhezaị ḅe nwọse mịnaḅụ ḅẹmẹ, “Ị̀ nyanaḅọ ḅe ò Neaman ḅe wẹrịso se ò sosam gbọrịye sọnị gbẹịnka ḅaraḅụ! Siriaḅọ ḅe seni ọ̀ pịrịaye mamgba, mgbọkụ ori ọkịsaka. Ḍumo sime Nyanaḅọ Ḅe ẹrẹ ḅụ à mangị ò ḍuko mun ọ̀ ḅara ye daọkịḅịa.”

²¹Anị ò Neaman ḅe ḍukoye-ẹ. Neaman ḅe mangị ò ḍukoarịḅọ ḅe ọrị sịkị, ò kporokporo mị ḅie koro ọ̀ damamun se ò gbelamẹ, “Ḅụfụkamaye omi?”

²²Gẹhezaị ḅe nwọse ọ̀ pẹkẹrẹmẹ, “Ẹn-ẹn, ọkụma ị̀ nyanaḅọ ḅe ị̀ fịrịmamẹ na à ḅo ḍuko ị́ pịrị na mị kirikiri ịkịankoroapụ kpo mama apụ Ifrem chịngị ọgọnọ sẹ mị ḅie ḅụ ḅomẹ, na ò ḅimẹ seleḅa pẹkẹrẹ sọnọma ẹndẹ oyiasi fịnjị na mama sịkị se ḅụ ḍinmaḅịa iḅi ḅiriaye na ị́ nwọse ini pịrị.”

²³“Sisi seleḅa pẹkẹrẹ-a jie ẹndẹ nwọ ọkị,” Neaman ḅe nwọse ọ̀ pẹkẹrẹmẹ. Ori anị ḍukokụrọma, se seleḅa ma seni mama akpa ḅieḅụ fịna, ini pịrịmẹ, pịkị seni ḍinmaḅịa mama ḍikitọrụgbẹịn ḅiriaye nwọse oria fịrịnwẹngịapụma ḅie mama apụ pịrị, se ini fịrịmamẹ na ini Gẹhezaị ḅe tọrọkọ pẹlẹma se mun.

²⁴Ini ḅo Ịlaịsha ḅe anga chịngị mị lasịkị, Gẹhezaị ḅe mama akpa ma deki mun warị ḅie chumẹ. Anịsịkị ò Neaman fịrịnwẹngịapụma ḅe se ini vinpịkị somẹ.

²⁵Ọ̀ warị ḅie sọmun se Ịlaịsha ḅe tọrọkọ chịẹmẹ, Ịlaịsha ḅe ò gbelamẹ, “Ndeju ị́ nwọ mun?” “Yei, ị̀ nyanaḅọ, gbọrị anga sọnị à munkẹ,” ọ̀ nwọse ọ̀ pẹkẹrẹmẹ.

²⁶Ọkụma Ịlaịsha ḅe nwọse ọ̀ ḅẹmẹ, “Anịju ḅụ tẹmẹ ḅụ àrị ofori tomoniḅọ ḅe kporokporo mị ọgọnọ koroḅo ị́rị́ na ịrịa sịkị. Mị igbiki na, ḅiriaye na, oliv ozu na, chịnmgbọlụ na, anana na, nambulo na, anịkanịka fịrịnwẹngịapụ na, daọkịḅịa sịkị anịnọ?

²⁷Mịọkụ Neaman obi mị anị ḅo ị́ ọgọnọ gbanaḅịa, se ị́rị́ na ị́ furo ḅie pakaḅoḅịa apụma na anị kọn gbasoḅịa!” Gẹhezaị ḅe so sịkị, ori obi mị kọnmẹ, oria ojukiri mị sino ḅịa ọkụ ḅịamẹ.