Read kirikeni 2 Amanyanapụ 6 Bible Online

2 Amanyanapụ 6 - kirikeni bible

2 Amanyanapụ 6

¹Gbọrị ene Ịlaịsha ḅe chuku ḅie sime ịkịankoroapụ kpo mị nwọse ọ̀ ḅẹmẹ, “Wa anga nyọ mị ngịsị ḅarị wa dekikẹ!

²Kụrọ seni wa pịrị wa mun Jọdan mị ḅie eje pẹlẹ, se wa angaḅịa warị nwọ nama. “Iḅimẹ,” Ịlaịsha ḅe nwọse ini pẹkẹrẹmẹ.

³Inia ḅie gbọrịḅọ ọ̀ ḅẹmẹ na ori ini na mun; ò ḅerenimẹ,

⁴se inimgba gbọrịḅụ mun mẹ. Ini mun Jọdan mị lasịkị, ini sakị fịrịnwẹngịmẹ.

⁵Inia ḅụ gbọrịḅọ eje pẹlẹ gbin-arị-ogbo, bẹkẹma ḅaraḅụ oria ikulele apala-tịḅị mị pọkọ mengi mị ḅie koromẹ. Ori oloku nwọse Ịlaịsha ḅe ḅẹmẹ, “Nde à yeḅịa ọkụ, ị̀ nyanaḅọ?” “Àrị ọmgbọ ḅo apala-ẹ!”

⁶“Ndeju anị sokorokoro?” Ịlaịsha ḅe nwọse ò gbelamẹ. Tomoniḅọ ḅe nyọ mị seni ò ḍiemẹ, se Ịlaịsha ḅe chịn pẹlẹ, se mengi mị ḅie gbinmẹ, anị mị mịẹse ikulele apala tịḅị mị foin pakaḅomẹ.

⁷“Anị deki,” ọ̀ nwọse ọ̀ ḅẹmẹ, se tomoniḅọ ḅe tu anị dekimẹ.

⁸Siria amanyanaḅọ ḅe Izrẹl mị na ọmụgbin mẹ. Ori oria ọmụtịḅịnị ma na ḅịpị ọkịamẹ, se oria ikowarị mị pikeḅịa nyọ nwọ sẹlẹọkịmẹ.

⁹Ọkụma Ịlaịsha ḅe ḅịpị seni Izrẹl amanyanaḅọ ḅe fịrịma se, ò ḅerijinemẹ na anịju ò kpeki ma ngịsị, anịatịḅị Siria apụma anịju ini owu ọbịaḅẹ.

¹⁰Anịẹrẹchị Izrẹl amanyanaḅọ ḅe anịju ḅụ anga apụma ḅerijinemẹ se ini ama mị korumẹ. Mịn mị tọn-a sịkị anị nwọse ọkọ mịẹmẹ.

¹¹Siria amanyanaḅọ ḅe mịn mị anị opuma ọ̀ ḅụḅalaḅalamamẹ. Ori oria ọmụtịḅịnị ma chịn se ini gbelamẹ, “Ọ́mịna ḅie tụḅọ Izrẹl amanyanaḅọ ḅe pẹkẹrẹ ḅụ omi?”

¹²Inia ḅie gbọrịḅọ nwọ pẹkẹrẹmẹ, “Amanyanaḅọ, gbọrịḅọ sọnị ofori-ẹ. Ịkịankoro Ịlaịsha ḅe anị ḍuko Izrẹl amanyanaḅọ ḅe pịrịarịye-ẹ ị́ya jukuru ḅieḅụ ị́ ḅọịma kọn ọkwẹịn sọnị.”

¹³“Ómine ò sime nyọ mị ḍọkị nemi,” amanyanaḅọ ḅe nwọ ḅẹmẹ, “àrị ò kunḅịa.” Ịlaịsha ḅe Dotan mị ḅie ori omi-ẹ ini nwọ ḍuko ọ̀ pịrị sịkị,

¹⁴ḅaka owuni kpo ò nwọse anịju fịrịmamẹ, asụnma na pịkị kporokporo ọmụarụ ma na. Ḍin ḅụ ini mun ama mị la, se anị ḍẹkịkelemamẹ.

¹⁵Anịḅe eneḅa dede funfun ḅụ Ịlaịsha fịrịnwẹngịḅọ ḅe sịsẹ, nụngọ paka, se Siria owunima ọrịmẹ kpo kpo ḅụ, inia asụnma na pịkị kporokporo ọmụarụ ma na, seni ama mị ḍẹkịkelema waraḅẹ. Ò vinpịkịso Ịlaịsha ḅe damamun oloku se nwọ ḅẹmẹ, “Wa fa ḅie sọsam, ị̀ nyanaḅọ! Nde wa mịẹḅịa ọkụ?”

¹⁶“Ḅalafama,” Ịlaịsha ḅe nwọse ọ̀ pẹkẹrẹmẹ. “Mịnaḅụ sime apụma ḅakatẹịn inia ḅụ sime apụma nẹngịmẹ.”

¹⁷Anị ọ̀ tẹkẹye-ẹ, “Yei Nyanaḅọ, ọ̀ tọrụmgbọlụma finji se ori ọrị!” Nyanaḅọ Ḅe oria tẹkẹ mị pẹkẹrẹmẹ, se Ịlaịsha fịrịnwẹngịḅọ ḅe tọrụ dekichịẹma ḍiki se ọrịmẹ na chịngị mị pẹkẹrẹ mị mgba asụnma na, pịkị kporokporo ọmụarụ ma na koḅiri nyọ mị gbẹịn Ịlaịsha ḅe kelema waraḅẹ.

¹⁸Siria apụma owu seni ini paka sịkị, Ịlaịsha ḅe tẹkẹ ḅụ nwọ ḅẹmẹ, “Yei Nyanaḅọ, mịna apụma tọrụmgbọlụma pụnma!” Nyanaḅọ Ḅe oria tẹkẹ mị pẹkẹrẹmẹ, se inia tọrụmgbọlụma pụnmamẹ.

¹⁹Anị Ịlaịsha ḅe ini damamun se nwọ ḅẹye-ẹ, “Ómine ateli irisam; mị ọ́ ḍọkịarị ama mị anịkẹ. Ómine ị̀ ḍuko àrị ómine se ọ́ ḍọkịarịḅọ ḅe damamunḅịa.” Se ori ini seni Sameria mị mun mẹ.

²⁰Ini opuama mị ḅie sọ kirikiri, Ịlaịsha ḅe tẹkẹmẹ, “Inia tọrụmgbọlụma finji, Nyanaḅọ, se ye ini nyọ ọrị.” Nyanaḅọ Ḅe oria tẹkẹ mị pẹkẹrẹmẹ; ori inia tọrụmgbọlụma finji, se ini ọrịmẹ na Sameria ḅieḅụ ini omi-ẹ.

²¹Izrẹl amanyanaḅọ ḅe Siria apụma ọrị sịkị, ori Ịlaịsha ḅe gbelamẹ, “Àrị ini ḅaa, ị̀ nyanaḅọ? Àrị ini ḅaa?”

²²“Ẹn-ẹn,” ori nwọse ọ̀ pẹkẹrẹmẹ. “Dada ọmụ ḅie ị́ kun owuni sọnị ị́ ḅaa-ẹkẹ. Ini fịḅịaye na ḅuḅịaye na nwọ ḍọkị ini pịrị, seye ini vinpịkịso inia amanyanaḅọ ḅe damamun.”

²³Anịẹrẹchị Izrẹl amanyanaḅọ ḅe fịaye dẹ ini pịrịmẹ, se ini fị pịkị ḅu so sịkị, ori ini seni Siria amanyanaḅọ ḅe sẹịnmamẹ. Anịsịkị mị ḅụ sakị tọrọkọ mun Siria apụma ini ḅarị owu seni Izrẹl ama mị munkẹ.

²⁴Ọḅụkọ anị ḅo gbọrị sịkị lasịkị Siria Amanyanaḅọ Bẹnhadad ḅe bebe oria ọmụogbo mị mgba ọkịḅo owu se Izrẹl mị paka se Sameria, opuama mị, ḍẹkịkelemamẹ.

²⁵Ama mị ini nwọ ḍẹkịkelemaye mị mịẹse fịye opuama mị ḅie kụrọ so ọkụma, gbọrị yepụra asụn tịḅị seleḅa pẹkẹrẹ-a iniasi nwọ lamẹ, se okuku fịnya ḅụ, mama ḅarakuḅu ḅeinḅịaye laye, seleḅa sọnọ-a pẹkẹrẹ nwọ lamẹ.

²⁶Izrẹl amanyanaḅọ ḅe opuama mị onu ọgọnọ ḅụ nwẹngị ḅọrọarịogbo anị gbọrị eremeniḅọ olokuye-ẹ, “Ḅarachụa ị̀ pịrị, Amanyanaḅọ!”

²⁷Ọ̀ nwọse á pẹkẹrẹmẹ, “Nemikase Nyanaḅọ Ḅe ḅarachụa ị́ pịrị ẹkẹ nwọḅẹ ọkụma, ị̀rị̀ che ḅarachụa àrị ineda nwọ nyana ị́ pịrịḅe? Àrị ịpịamgba nyana mọnọ anịkanịka ere iru?

²⁸Nde ị́ ḅụfụkamaye?” À nwọ pẹkẹrẹmẹ, “Ísí ene mà eremeniḅọ ma nwọ ḅẹmẹ na wa ị̀ya tọkụ ḅe pẹị, se anịsịkị wa arịa tọkụ ḅe pẹịḅịa anịḅe eneḅa.

²⁹Anị wa ị̀ya tọkụ ḅe chụọ se ọ̀ pẹịye-ẹ. Anịḅe eneḅa àrị á ḅẹmẹ na wa yayo ḅe pẹịḅịa, ọkụma árị ò seni ḅọịsam!”

³⁰Amanyanaḅọ ḅe ijira ọ̀ ḅụ saramẹ, ọ̀ mịn mị na sịkị, ori oria ḅụchụayema kanmẹ, se onu mị na kpekima sime apụma ineda ọrịḅịa na okuru ḅụchụaye anị chuku ḅieḅụ ọ̀ chụaye-ẹ.

³¹Ori oloku se nwọ ḅẹmẹ, “Ye Tamụnọ Ḅe ị̀ fomuḅaa à nemikase Ịlaịsha, Shafat yaḅe tịḅị pẹlẹka mun saso ḅiri lamẹ ḅẹḅẹ!”

³²Se ori okumunḅọ seni Ịlaịsha ḅe fịrịmamẹ ọ̀ nyanaḅoḅịa ẹrẹchị. Anịsịkị mị ḅụ, Ịlaịsha ḅe ọ̀ warị ḅie omi-ẹ ọ̀ la-oḅo sẹnịapụma na. Amanyanaḅọ ḅe oria okumunḅọ ḅe ma ḅo laka simeogbo, Ịlaịsha ḅe nwọse sẹnịapụma ḅẹmẹ, “Ori niniḅọ ḅe ò nweniḅọ seni ị̀ fịrịmaḅẹ ị̀ ḅaaḅịa ẹrẹchị! Mịọkụ, ò ḅo mịju lasa ḅẹḅẹ, ọ́ ḅọkọ mị palị, ó ḅerenima ọ̀ sọḅo. Amanyanaḅọ ḅe sọnị oria ọḅụju ò ḅoaḅẹ.”

³³Ọkwẹịn mị ọ̀ ḅịpị ḅụ ma fasoka simeogbo, amanyanaḅọ ḅe ḅo lase nwọ ḅẹmẹ, “Nyanaḅọ Ḅe anị mị ḅụfụka mị ọkịḅo wa pịrịye-ẹ! Cheye ẹrẹchị à pa sime Nyanaḅọ Ḅe mịẹḅịaye nwọ koruḅe?”