Read kirikeni 2 Amanyanapụ 9 Bible Online

2 Amanyanapụ 9 - kirikeni bible

2 Amanyanapụ 9

¹Anịsịkị ịkịankoro Ịlaịsha ḅe asẹmẹnị ịkịankoroapụma ḅie gbọrịḅọ chịn se nwọse ọ̀ ḅẹmẹ, “Ḅụkarakarama se ḅo so Remọt Giledị ḅieḅụ simeye mị mun. Mị oliv pulo ojongo mị ọkị chụa mun,

²se ị́ mun anịju lasa ḅẹḅẹ Jẹhu ḅe ḍọkị, Jẹhoshafat yaḅe, oria opuḍaḅọ anị Nimshaị ḅe-ẹ. Ori ọkị sikima orina sime apụma ḅie, ò se gbọrị kikima jukuru ḅieḅụ sọ,

³mị oliv pulo mị seni ọ̀ tịḅị sara, se nwọḅẹ, ‘Nyanaḅọ Ḅe nwọḅẹmẹ na à pulo seni ị́ tịḅịsara ị́ seni Izrẹl amanyanaḅọ mịẹ.’ Anịsịkị sarama so anịjuḅụ.”

⁴Anịẹrẹchị asẹmẹnị ịkịankoroḅọ ḅe so Remọt Giledị mun mẹ,

⁵anịju owuni tịḅịnịma ọ̀ nwọ ọrịmẹ ini koḅiria sime ḅẹrẹ ḍukoaḅẹ. Ọ̀ nwọḅẹmẹ, “Ị̀ nyanaḅọ, à ḍuko ị́ pịrịḅịa oku omi-ẹ.” Jẹhu ḅe nwọse ò gbelamẹ, “Mịna ḅie tụḅọ ị́ nwọ ḅẹ-ao? “Ị́rị́ anị à ḅẹye-ẹ, ị̀ nyanaḅọ,” ọ̀ nwọ pẹkẹrẹmẹ.

⁶Anịsịkị ini mama apụma so warị ḅie sọmẹ, se asẹmẹnị ịkịankoroḅọ ḅe oliv pulo mị seni Jẹhu ḅe tịḅịsara se nwọse ọ̀ ḅẹmẹ, “Nyanaḅọ, Izrẹl Tamụnọ Ḅe, nwọ ḅẹmẹ: ‘À pulo seni ị́ tịḅịsara ị́ seni amanyanaḅọ mịẹ ị̀ya tomoni Izrẹlapụma pịrị.

⁷Ị́ tịḅịnị amanyanaḅọ ḅe ị́ nwọ ḅaaḅịa anị Ehab yaḅe, mịẹse à fomuḅara seni Jezibẹl ma pịrịḅịa ọkụ, ị̀ya ịkịankoroapụma na, pịkị ísí ị̀ya fịrịnwẹngịapụma na á nwọ ḅaa ẹrẹchị.

⁸Ehab furo mị mgba na pịkị ò furo ḅie apụ mamgba na ini fịḅịa; ò furo ḅieḅụ owuḅọ goyegoye à ḅaasinḅịa, asẹmẹnị na olomuapụ na.

⁹À seni Izrẹl Amanyanaḅọ Jeroboam ḅe furo mị na pịkị Beasha Izrẹl Amanyanaḅọ ḅe furo mị na mịẹ ọkụ mị, anị à seni ò furo mị mịẹḅịa ọkụ-ẹ.

¹⁰Jezibẹl ma ini á ḍipi ẹkẹ, obiri árịa oju pẹịḅịa Jezriẹl pẹkẹrẹ mị ḅụ.’” Asẹmẹnị ịkịankoroḅọ ḅe mịn mị ḍuko so sịkị ò jukuru mị ḅie pakaḅo se mangịsomẹ.

¹¹Jẹhu ḅe vinpịkị somun ò juo owuni tịḅịnịma lasịkị, ini nwọse ò gbelamẹ, “Kpaịnma iḅiwara-ao? Ori nọmụḅọ ḅe ori ị́ damaḅo chemịẹ-ẹḅo?” “Ò ḅo mịẹ-oḅoye ó nemimẹ.” Jẹhu ḅe ọkọse ini pẹkẹrẹmẹ.

¹²“Ẹn-ẹn, wa nemikẹ!” ini nwọse ọ̀ pẹkẹrẹmẹ. “Ò ḍukoye mị ḍuko wa pịrị!” “Ọ̀ nwọ ḍuko ị̀ pịrịmẹ na Nyanaḅọ Ḅe nwọ ḅẹmẹ, ‘À pulo seni ị́ tịḅịsara ị́ seni amanyanaḅọ mịẹ Izrẹl mị pịrịmẹ.’”

¹³Anị gbọrị kirikiri Jẹhu ḅe ò juo owuni tịḅịnịma inia ḅụchụayema seni ịkpịkpa ma ọgọnọju ḅụ dẹmẹ, Jẹhu ḅe anị ọgọnọ chịẹḅịa ẹrẹchị, ini oḍu ma ofuro, se oloku se nwọ ḅẹmẹ, “Jẹhu ḅe anị amanyanaḅọ-ẹ!”

¹⁴Anịsịkị Jẹhu ḅe ḅẹrẹḅia Joram Izrẹl Amanyanaḅọ ḅe wẹrịmamẹ, anị Jezriẹl mị ḅie simeḅọ ḅe, anị Remọt Giledị ọmụ kiri mị ḅụ. Ori Hazaẹl Siria Amanyanaḅọ ḅe na owusọarị sịkị ḅụ ọ̀ laye mị ò mun nwọ gwọ mun nyọ mị ḅụ. Anịẹrẹchị Jẹhu ḅe nwọse ò juo owuni tịḅịnịma ḅẹmẹ, “Ó nemikase ị̀ ḅụ omi-ẹ ḅẹḅẹ, ómine ọrị na gbọrịḅọ sọnị sịnịnị Remọt Giledị mị ḅieḅụ pakasomun wa ḅia ḅẹrẹ mị ḍuko seni Jezriẹl mị ḅieḅụ sime apụma pịrịkẹ.”

¹⁶Anị Jẹhu ḅe oria kporokporo ọmụarụ mị ḅụkụlọ se so Jezriẹl mun ye-ẹ. Joram ḅe ọ̀ ḅụ ma pa iḅikẹ, se Ehaziya Juda Amanyanaḅọ ḅe mun toluma ò ḍiki ḅaraḅụ anịju omi-ẹ.

¹⁷Ama koruḅọ ḅe nyọkoru-gelewarị Jezriẹl ḅie simeye mị ḅie Jẹhu ḅe na ori na ḅoarị apụma ọrịmẹ. Ọ̀ nwọ ḅẹmẹ, “À ḅoarị owuapụ ọrịmẹ!” Joram ḅe nwọ pẹkẹrẹmẹ, “Asụn seni nwẹngịḅọ fịrịma se ḍọkị nemi nwọfa ikiapụ-ẹ anịkanịka tarakapụ-otuḅo.”

¹⁸Okumunḅọ ḅe dọkụ mun Jẹhu ḅe la se nwọse ọ̀ ḅẹmẹ, “Amanyanaḅọ ḅe nemi ḅimẹ nwọfa ikiaḅọ ḅaraḅụ ị́ ḅo-otuḅo.” “Anị ị́ya fịrịkẹ!” Jẹhu ḅe nwọse ọ̀ pẹkẹrẹmẹ. “Ị̀ya ọḅụju ḅọrọ.” Ama koru warị ḅie sime ama koruḅọ ḅe nwọ ḅẹmẹ, okumunḅọ ḅe ò mun tomonikpo mị lasam, ọkụma ọ̀ ḅarị vinpịkị ḅokẹ.

¹⁹Jịn okumunḅọ ini pịkị nwọ fịrịma pakụmamẹ, ori sọnị anị gbọrịye mị seni Jẹhu ḅe gbelamẹ. Jẹhu ḅe pịkịna nwọse ọ̀ pẹkẹrẹmẹ, “Anị ị́ya fịrịkẹ! Ị̀ya ọḅụju ḅọrọ.”

²⁰Ama koruḅọ ḅe pịkị nwọ ḍukomẹ na okumunḅọ ḅe ò mun tomonikpo mị lasam, ọkụma ọ̀ ḅarị vinpịkị ḅokẹ. Ọ̀ pịkị nwọ ḅẹmẹ, “Tomonikpo mị tịḅịnịḅọ ḅe nọmụḅọ ḅara mị ò seni kporokporo ọmụarụ mị dọkụarị ọkụ-ẹ, Jẹhu ḅe sime ọkụ!”

²¹Joram Amanyanaḅọ ḅe kụrọ pịrịmẹ, “Ómine ị̀ya kporokporo ọmụarụ mị karakarama.” Ọ̀ ḅẹ ḅara ini nwọ mịẹmẹ, se ori na pịkị Ehaziya Amanyanaḅọ ḅe na dọkụ paka mun mẹ, ḅọḅọ nụḅọ kporokporo ọmụarụ mị ḅieḅụ simemẹ, mun Jẹhu ḅe na bịamaḅịa ẹrẹchị. Nebọt ḅe oria ozukiri nyọ ḅụ anị ini orina bịamaye-ẹ.

²²Joram ḅe nwọse ò gbelamẹ, “Ị́ deinma ḅụ ḅo-ao?” Jẹhu ḅe nwọse ọ̀ pẹkẹrẹmẹ, “Nde deinma ineda simeḅịa ọkụ,” “ị́ nyengi Jezibẹl ma ọkịḅo-àrị-si-a mịẹmịẹaye ma na pịkị oru tẹkẹ mamgba na pa omi-ẹ nwọ ḅe sịkị?”

²³Joram ḅe oloku se nwọ ḅẹmẹ, “Mịn kụrọḅara se sẹ sumagbin-ẹ, Ehaziya!” ori oria kporokporo ọmụarụ mị pịkị se mangịmẹ.

²⁴Jẹhu ḅe oria lubu mị wọrọ pakụma, se ori ịnyọ la-ọkụ mgba seni gbọrị ḍẹịn tẹịnmẹ, se anị Joram ḅe kokuogbo tolu mun ò kuḅiemgbọlụ mị temitolumẹ. Joram ḅe oria kporokporo ọmụarụ mị ḅie sokoro se fịmẹ,

²⁵se Jẹhu ḅe nwọse oria ọmụkụlọdaḅọ Bidka ḅe ḅẹmẹ, “Oria oju mị deki se mun Nebọt ozukiri mị ḅie gbin wokuma. Se ḅiekoroma na ị́rị́na-ị̀rị̀na gboloma Amanyanaḅọ Joram ḍa Ehab ḅe ọḅụju dọkụ mun-arị sịkị Nyanaḅọ Ḅe ma ọkwẹịnma kọnmẹ Ehab ḅe ḅụ:

²⁶‘Nebọt ḅe na oria owuapụ awọma na ini nwọ nini ọkụ àrị ọrịmẹ ḅịaḅụ. À yekarịfịmẹ na, mị gbọrị ozukiri mị ḅie à fomuḅara seni ị́ pịrịḅịa.’ Anịẹrẹchị Joram oju mị deki,” “se mun Nebọt ozukiri mị ḅie gbin wokuma, mịẹse Nyanaḅọ Ḅe ḍukoye mị ḅo mịẹḅeinmaḅịa ọkụ,” Jẹhu ḅe ọkọse oria ọmụkụlọdaḅọ ḅe ḅẹmẹ.

²⁷Amanyanaḅọ Ehaziya ḅe pakaye mị ọrị se mangị mun oria kporokporo ọmụarụ mị ḅụkụlọ se so Bẹt Hagan ama mị mun aḅẹ. Jẹhu ḅe ò ḍuko se nwọse oria owuapụma ḅẹmẹ, “Ori sọnị ómine ọ̀ ḅa-a!” Se ini ye seni ọ̀ lamamẹ ateli ogbo ḅụ ori oria kporokporo ọmụarụ mị dọkụ Gọ mị mun-arị sịkị ḅụ, Ibleam ama mị na kpekima nyọ ḅụ. Ọkụma ọ̀ ḅụkụrọma nweni ò mun Mẹgido opuama mị lamẹ, anịju ḅụ ọ̀ fịmẹ.

²⁸Oria tịḅịnị fịrịnwẹngịapụma oria oju mị deki vinpịkị so Jerusalẹm mun mẹ kporokporo ọmụarụ mị ḅie, se amanyana furo iḍupuma ḅie ini ò ḍipimẹ Devid opuama mị ḅieḅụ.

²⁹Joram, Ehab yaḅe, Izrẹl amanyanaḅọ sọ oyigbọrị kụra fịnjị karama kụra mị ḅie anị Ehaziya ḅe ḅo Juda amanyanaḅọ sọye-ẹ.

³⁰Jẹhu ḅe mun Jezriẹl mị lamẹ. Jezibẹl ma pakaye mị naamẹ, ye se á tọrụmgbọlụ anjịma tan, á tịḅị inime tẹlịma, se ikiḅaḅọkọ mị ḅụ chịẹ ateli mị ḍikiaḅẹ amanyanaḅọ warị mị ḅie.

³¹Jẹhu ḅe nụngọ ḅọkọ mị tolu sọḅo sịkị, árị ọ̀ chịnmẹ, “Ị́rị́ Zimraị! Ị́rị́ nweni ḅaaḅọ! Mịju ị́ chemịẹ-oḅo?”

³²Jẹhu ḅe ọgọnọ ḍiki se olokumẹ, “Tụḅọ ị̀ ḅụ omi?” Amanyanaḅọ warị ḅie fịrịnwẹngịapụma ḅụ mama apụ anịkanịka tẹrẹ-apụ ikiḅaḅọkọ mị ḅieḅụ tọrụtoluma ò ḍikimẹ,

³³se Jẹhu ḅe nwọse ini ḅẹmẹ, “Ómine á se gbin!” Ini á se chama gbinmẹ, se á ḅụ pulo mị warị agbagba mị na asụnma na ḅụ saramẹ. Jẹhu ḅe oria asụnma na kporokporo ọmụarụ mị na dọkụ árịa oju mị ọgọnọ ḅọrọ somẹ,

³⁴ori amanyanaḅọ warị mị ḅie sọ, se yefịmẹ. Anịsịkị re mị ọ̀ ḅẹye-ẹ, “Ó mun anị yeḅụsọka eremeniḅọ ma deki mun ḍipi; anị-sime-ọkụ-sime-ọkụ sọnị árị amanyanaḅọ tọkụ-ẹ.”

³⁵Ọkụma mun á ḍipi-etọn owuapụma gbọrịye sọnị ini ọrịkẹ, kukure mị na, pịkị á ḅarama na á ḅụọma na imgbe ma sikima ọkụma.

³⁶Ini mịn mị ḍuko Jẹhu ḅe pịrị sịkị ọ̀ nwọ ḅẹmẹ, “Mịn Nyanaḅọ Ḅe ḍuko na pakaḅịa nwọḅẹye mị-ẹ, anị oria fịrịnwẹngịḅọ Ịlaịja ḅe ḅụ ọ̀ ḅọrọ ọkwẹịn sịkị. ‘Obiri ma Jezibẹl ma oju mị pẹịḅịa Jezriẹl eke mị ḅụ.

³⁷Arịa ḍụẹịn mị anịju ḅụ galagalaḅịa opu nama fịnya galagala ọkụ mị, mịẹse gbọrịḅọ sọnị ineda á nemi ẹka ḅara.’”