Read kirikeni 1 Amanyanapụ Sịkị Mịẹaye Ma 16 Bible Online

1 Amanyanapụ Sịkị Mịẹaye Ma 16 - kirikeni bible

1 Amanyanapụ Sịkị Mịẹaye Ma 16

¹Ini Ọḅọkụ Igbe mị deki mun Devid ḅe tẹlịma koroma anị pịrị ikowarị mị ḅie chu se anị seni anịa ḅie koromamẹ. Anịsịkị ini agbamịẹmẹ, pịkị nwẹngị gboloma agbamịẹ ḍiepịrịayema nwọse Tamụnọ Ḅe pịrịmẹ.

²Devid ḅe agbama mịẹfama so sịkị, ò tomonima ḅẹlẹmamẹ Nyanaḅọ Ḅe ẹrẹ ḅụ

³se fịaye ḍie inimgba pịrịmẹ. Fịturu gbọrị okpokpo na, fọịsa nama mgbọlụ na pịkị tụmgbakị elelenda na ịkịka na ọ̀ nwọse Izrẹl mị ḅie ḅụ gbọrịḅọ gbọrịḅọ pịrịmẹ owuapụ na eremeni na ḅụ.

⁴Devid ḅe Livaị apụma ḅie nweni tọnmẹ, ini tịḅịda Nyanaḅọ, Izrẹl Tamụnọ Ḅe tẹkẹ mị pịrị, Ọḅọkụ Igbe mị tọrọkọ, nime chu na pịkị ò boma na ḅụ.

⁵Esaf ḅe ọ̀ nwọ tọn tịḅịnịḅọ mịẹmẹ, se Zẹkaraya ḅe ọ̀ palịmẹ. Jeaịẹl ḅe na, Shẹmiramọt ḅe na, Jihaịẹl ḅe na, Matitaya ḅe na, Ẹlaịab ḅe na, Bẹnaya ḅe na, Obẹd Idọm ḅe na, pịkị Jeaịẹl ḅe na anị ọbọ ma farịḅịa apụ ma-ẹ. Esaf ḅe ḅarafarịaye ma farịḅịa,

⁶se mama agbamịẹapụ, Bẹnaya ḅe na pịkị Jahazịẹl ḅe na sịkịmamgba ḅụ oḍu ma ofuroḅịa Ọḅọkụ Igbe mị tọrọkọ.

⁷Anịsịkị mị ḅụ, anị Devid ḅe nime chu Nyanaḅọ Ḅe boma mị seni tatarị Esaf ḅe na ò juo Livaị apụma na pịrịye-ẹ.

⁸Ọ́ mịẹḅaka se Nyanaḅọ Ḅe ḅẹ, oria opu mị ḍukopakụma; ọ̀ mịẹaye ma ḍuko sẹma pịrị.

⁹Ó nime chu Nyanaḅọ Ḅe boma; ọ̀ mịẹsa ḅụgbiripuma ayema ḍuko.

¹⁰Ó ḅieḅẹlẹ wa sime ọ̀ pịrịmẹ; ye ọ̀ tẹkẹarị apụ mamgba ḅieḅẹlẹ!

¹¹Ọ́ Nyanaḅọ Ḅe damamun ọ̀ ḅarachụa ọ́ pịrị, ọ́ pịkị ọ̀ tẹkẹ ḅụ sime.

¹²Ómine Jekọb furo ḅie apụ, Tamụnọ fịrịnwẹngịḅọ ḅe, Izrẹl furo ḅie apụ, Tamụnọ Ḅe sẹlẹọkịsapụ, Tamụnọ Ḅe mịẹ ḅụgbiripumaye ma ọ́ nwọse ḅiekoroma pịkị ọ̀ kọn ḅẹrẹ ma na.

¹⁴Nyanaḅọ Ḅe anị mịna Tamụnọ Ḅe-ẹ; oria olokoma sime bebe tomonikiri mị pịrịmẹ.

¹⁵Tamụnọ Ḅe oria ọḅọkụ mị seni ḅieḅaramama, anị sime gbasoḅịa ẹrẹchị ọ̀ mịẹye mị,

¹⁶ori Ebraham ḅe na fị ọḅọkụ mị, ò ḅereni Aịzịk ḅe pịrịye mị.

¹⁷Nyanaḅọ Ḅe Jekọb ḅe na ọḅọkụ fịmẹ, anị sime gbasoḅịa ye mị.

¹⁸Ọ̀ nwọ ḅẹmẹ, “Kenan ama mị à seni ọ́ pịrịḅịa.” “Anị ọ́mịna ye sọḅịa.”

¹⁹Tamụnọ Ḅe oria tomonima ini bokẹ kịẹnḅịpị ḅụ, igoniapụ-ẹ Kenan ama mị ḅieḅụ.

²⁰Ini nwẹngị mun sẹ la, pịkị mun jịn sẹ lamẹ, amanyanakiri ḅụ pịkị mun jịn amanyanakiri lamẹ.

²¹Ọkụma Tamụnọ Ḅe ọ̀ ḍụkụkẹ gbọrịḅọ sọnị ini pụnda; ini ḍikiḍikiḅịa ẹrẹchị ori amanyanapụma ḅeri jinemẹ:

²²“À sẹlẹọkịsa ị̀ya fịrịnwẹngịapụma ó ye seni ini lama ma; ị̀ya ịkịankoroapụma ọ́ ḅara se ini lama ma.”

²³Ó nime chu Nyanaḅọ Ḅe pịrị, bebe tomonikiri mị mgba! Ene ḅene ḅene ómine iḅi ḅẹrẹ mị ḍukopakụma na ọ̀ wa ḍụasam.

²⁴Oria boma mị ḍukopakụma sẹma pịrị, oria opu kụrọ fịrịma ḍuko tomonima pịrị.

²⁵Nyanaḅọ Ḅe ọ̀ ḍụḅamẹ ini pịkị opuḅọ ḅara nwọ seni ò tokoniḅịa; ini osi seni ọ̀ pịrịtẹịn oru mamgba nẹngịḅịa.

²⁶Jịn sẹ-a oru mamgba ini ḅara se tẹmẹ oru kẹngẹ-ẹ, ọkụma Nyanaḅọ Ḅe so ma tẹmẹmẹ.

²⁷Boma na amanyana opu mị na ò kelemamẹ, kụrọ na ḅieḅẹlẹ na oria Oputẹkẹwarị mị ḅieḅụ ḅeinmẹ.

²⁸Ọ́ Nyanaḅọ Ḅe tokoni, ómine sẹkiri ḅie sime apụ mamgba, oria boma mị na oria opu mị na ọ́ nwọ tokoni.

²⁹Nyanaḅọ Ḅe boma ẹrẹ mị ọ́ nwọ tokoni; ḍiepịrịaye agba ọ́ nwọse oria Oputẹkẹwarị ḅie ḅo. Fịafịaḅọ Ḅe tọrọkọ ọ́ tịḅịtu, ori ọ̀ ḅụ ḍiepakụmasa ḅẹḅẹ;

³⁰sẹkiri mị mgba ọ̀ tọrọkọ ọ́ ḅụgeregere! Sẹkiri mị ọ̀ nwọ tọn kụrọma koromamẹ anịa kiriḅụ se ngịsị anị jike ẹkẹ.

³¹Ó ḅieḅẹlẹ, sẹkiri na so na! Ó ḍuko sẹma pịrị na Nyanaḅọ Ḅe ori Amanyanaḅọ-ẹ.

³²Ala mengi tọrụ, ị́ ḅie sime se ini tẹmẹ aye goyegoye ekerea; ó ḅieḅẹlẹ, ozu-a kiri, pịkị ị́ ḅie sime yegoyegoye mamgba na!

³³Piri ma ḅie sime eje mamgba olokuḅịa ḅieḅẹlẹ ḅụ Nyanaḅọ Ḅe ḅo ḅẹrẹtọn sẹkiri mị pịrịḅịa sịkị ḅụ.

³⁴Ọ́ mịẹḅaka se Nyanaḅọ Ḅe ḅẹ, anịatịḅị ori iḅimẹ, oria ḅẹlẹma ma sime gbasomẹ.

³⁵Ọ́ pịkị nwọ ḅẹ, “Wa ḍụaḅọrọma, Yei Tamụnọ mịna Ḍụaḅọrọmaḅọ; wa koḅiri gboloma; wa ḍụa sẹma ḅara ḅie, mịẹso sịkị wa mịẹḅaka ḅẹḅịa ọkụ pịkị ị́ya fịafịa ẹrẹ mị tokoniḅịa ọkụ.”

³⁶Ọ́ Nyanaḅọ Ḅe tokoni, Izrẹl Tamụnọ Ḅe! Ómine ò tokoni mịọkụ na pịkị sịkịmamgba na! Anịsịkị tomoni mamgba nwọ ḅẹmẹ, “Anị ọkọ sime,” se ini Nyanaḅọ Ḅe tokonimẹ.

³⁷Amanyanaḅọ Devid ḅe Esaf ḅe na ò juo Livaị apụma na seni gbọtụma Ọḅọkụ Igbe mị sime nyọ mị ḅụ tẹkẹ tịḅịdapụ nwọ mịẹmẹ. Ini anịju ḅụ inia fịrịma nwẹngịḅịa ene ene ḅụ.

³⁸Obẹd Idọm, Jẹdutọn yaḅe na oria sẹ mị ḅie nweni-a maịnfa kịnị-a tesi oyi fịnjịma na anị ḅarachụa ini pịrịḅịaye-ẹ. Hosa ḅe na Obẹd Idọm ḅe na, onu ḅọkọ ma koru fịrị mị sime ini pịrịmẹ.

³⁹Zadọk agbamịẹḅọ ḅe na ò juo agbamịẹapụma na, anị Gibiọn ḅie ḅụ ini Nyanaḅọ Ḅe tẹkẹtẹkẹ nyọ mị ḅụ tịḅịdapụ ma-ẹ.

⁴⁰Dede na saso na ini bebe ma dọkịma agbamịẹ Nyanaḅọ Ḅe pịrịpịrịḅịa agbamịẹ ẹbẹ mị ọgọnọ ḅụ anị Nyanaḅọ Ḅe seni Izrẹl mị pịrị Olokoma ḅie anị gịẹịnsa ḅaraḅụ.

⁴¹Anịju ḅụ Heman ḅe na pịkị Jẹdutọn ḅe na ini na simemẹ, pịkị jịn dada boma nime ma chu Nyanaḅọ Ḅe tokoniḅịa ẹrẹchị ini sẹlẹọkịsapụ ma na oria sime gbaso ḅẹlẹma mị gose.

⁴²Boma nime chuchu sịkị ḅụ, ini se nime chuchu oḍu ma na, ḅarafarịaye ma na, pịkị ini se nime chuchu jịn aye na, Heman ḅe na Jẹdutọn ḅe na anị arịa tịḅịdaye-ẹ. Jẹdutọn sẹ mị ḅie apụma anị onu ḅọkọ ma ḍikiḍiki fịrị mị ḅara sime apụ ma-ẹ.

⁴³Anịsịkị ḅọḅọ so warị mun mẹ, se Devid ḅe sọnị pịkị so warị mun se kele oria furo mị na simemẹ.