Read kirikeni 1 Amanyanapụ Sịkị Mịẹaye Ma 17 Bible Online

1 Amanyanapụ Sịkị Mịẹaye Ma 17 - kirikeni bible

1 Amanyanapụ Sịkị Mịẹaye Ma 17

¹Amanyanaḅọ Devid ḅe mịọkụ oria amanyanaḅọ warị mị ḅie ori omi-ẹ. Gbọrị ene ori ịkịankoro Netan ḅe fịrịma ḅo seni nwọse ọ̀ ḅẹmẹ, “Ị̀rị̀ mịanga awụ chịn se nama amanyanaḅọ warị ḅie àrị anga waraḅẹ, ọkụma Nyanaḅọ Ḅe Ọḅọkụ Igbe mị ikowarị ḅie re mị anị simearịye-ẹ!”

²Netan ḅe nwọse ọ̀ pẹkẹrẹmẹ, “Ị́ kuḅie ḅụ ị́ tọn se ị́ mịẹḅịaye goyegoye mịẹ, anịatịḅị Tamụnọ Ḅe ori ị́rị́ na omi-ẹ.”

³Ọkụma anị ḍin mị ḅie ḅụ Tamụnọ Ḅe nwọse Netan ḅe ḅẹmẹ,

⁴“Mun à ḍuko ị́ pịrịye mị ḍuko ị̀ya fịrịnwẹngịḅọ Devid ḅe pịrị, ị̀rị̀ nwọse ọ̀ ḅẹmẹ na, ‘Ị́rị́ àrị angaḅịa Oputẹkẹwarị mị nama ị̀ pịrị ẹkẹ.

⁵Àrị Ijipt ḅie Izrẹlapụma ḍụapakụmaḅo ọkịḅo mịọkụ la, ma àrị ngịsị Oputẹkẹwarị ḅie angakẹ; ikowarị ḅie mị àrị anga se nyọ nyọ munmunye-ẹ.

⁶Àrị Izrẹlapụma na mun-arị nyọma ḅụ à tọn na tịḅịnịḅọ sọ ini pịrị nwọḅẹ apụma ḅie, cheye gose ini awụ chịn seni Oputẹkẹwarị nama ị̀ pịrịka nọ à nwọse ḅẹsaḅọ ngịsị ofori-ẹ.’

⁷“Anịẹrẹchị ḍuko Devid ị̀ya fịrịnwẹngịḅọ ḅe pịrị na Ị̀rị̀ Kụrọmamgba Nyanaḅọ Ḅe, nwọse ọ̀ ḅẹmẹ, ‘Ele ma ḅie anana ḍikiḍiki ḅụ àrị ị́ ọkịḅo ḅẹrẹtọnḅọ mịẹ ị̀ya tomoni Izrẹlapụma pịrịmẹ.

⁸Ị́ mun-anga mun-anga àrị ị́rị́ na mun mẹ, à pịkị ị́rị́na-tarakapụ ma nẹngịmamẹ ị́ nwẹngịma mun-arị sịkị ḅụ. Àrị ị́ mịẹse ị́ ẹrẹsoḅịa tomonikiri ḅie opusọtẹịn tịḅịnịma sime ọkụ mị.

⁹À gbọrị nyọ sẹlẹ koroma ị̀ya tomoni Izrẹlapụma pịrịmẹ, à pịkị ini ọkị anịju ḅụ koromasam, ini anga se nweni ḅarị ini pụnda-ẹka nyọ mị. Ini mị ama mị ḅie sọḅo sịkị ngịsị owuḍọkị apụ ḅo owu se ini pakamẹ, ọkụma mịn mị ḅarị mịẹ-ẹkẹ. À yeḅerenimẹ na ị́rị́na-tarakapụ mamgba àrị ini nẹngịmaḅịa à pịkị awọ seni ị́ pịrịḅịa ị́ furo ḅie.

¹¹Ị́ fị se ini ị́ se ị́ya olomu-aḍapụma ḍipi nyọ ḅụ ḍipisam nwọ ḅẹḅẹ, à mịẹḅịa ị́ya owuapụ awọma ḅie gbọrịḅọ amanyanaḅọ sọḅịa, à pịkị oria amanyanakiri mị mịẹse anị kụrọḅịa.

¹²Ori anị Oputẹkẹwarị mị nama ị̀ pịrịḅịaye-ẹ, à pịkị ọrịḅịa na oria amada ọrụ mị sime gbasomẹ.

¹³À ḍaḅọ sọ ọ̀ pịrịḅịa, ori pịkị ị̀ya owutọkụ sọḅịa. À Sọl ḅe ḅụ ị̀ya ḅarachụa mị sin ọkị ọkụ mị àrị ọkọse ọ̀ mịẹ-ẹkẹ, anị ị́rị́ ḅo amanyanaḅọ sọḅịa ẹrẹchị à sinḅọ ḅe.

¹⁴Àrị ò seni tịḅịdaḅọ mịẹ ị̀ya tomonima na pịkị ị̀ya amanyanakiri mị na pịrị gbasoḅịa. Oria amada ọrụ mị ngịsị kuluma nyana-ẹkẹ.’”

¹⁵Netan ḅe Tamụnọ Ḅe finji ọ̀ pịrịye goyegoye nwọ ḍuko Devid ḅe pịrịmẹ.

¹⁶Anịsịkị Amanyanaḅọ Devid ḅe so Nyanaḅọ Ḅe pakaḅoḅo Ikowarị mị ḅie mun kpọnjị sime, se tẹkẹmẹ, “Yei Nyanaḅọ Tamụnọ, ị́ mịẹ ị̀ pịrịsaye ma ị̀ gbẹịnkẹ pịkị ị̀ furo mị sọnị gbẹịnkẹ.

¹⁷Anị-ẹ nwọḅẹ sọnị ị́ pa pịkị jịn aye mịẹ-aḅẹ mịọkụ; ị̀ furo ḅie apụma gbolomaye ḅụ ị́ yeḅereni ị̀ pịrịsam, anị tọrọkọju ḅoḅịa kụra ma ḅie ị́ pịkị opuḅọ wẹrị ḅara nwọse ị̀ wẹrịsam. Yei Nyanaḅọ Tamụnọ.

¹⁸Cheye àrị ineda nwọ ḍuko ị́ pịrịḅe! Ị́rị́ iḅiọkụ ị̀ nemimẹ, anị-ẹ nwọḅẹ sọnị, ị́ osi seni ị̀rị̀ ị́ya fịrịnwẹngịḅọ ḅe pịrịmẹ.

¹⁹Anị ị́ tọn se mịẹḅịa ẹrẹchị ị́ mịn mị mịẹ ị̀ pịrịmẹ, pịkị tọrọkọju à sọḅịa opu mị nwọse ị̀ ḍiemẹ.

²⁰Nyanaḅọ, ị́ kịkẹḅọ ofori-ẹ; sịkịmamgba wa nemimẹ na ị́rị́ kẹngẹ anị Tamụnọ Ḅe-ẹ.

²¹Sẹkiri ḅie Izrẹl mị kịkẹ jịn sẹ ofori-ẹ, anị omonisọ ḅụ ị́ ḍụapakụmaḅo apụma ị́ ini seni ị́ya tomoni mịẹḅịa ẹrẹchị, ị́ mịẹ ini pịrị opu ḅụgbiripumaye ma ị́ya ẹrẹso mị mịẹse anị bebe tomonikiri mị mgba wasamamẹ. Ị́ya tomonima ị́ nwọ ḍụamẹ Ijipt mị ḅieḅụ se jịn-a sẹma depakụmamẹ ị́ya tomonima nwẹngị sọmun-arị sịkị ḅụ.

²²Izrẹl mị ị́ nwọse ị́ya tomoni mịẹ gbasosam, se ị́rị́, Nyanaḅọ Ḅe, ḅo inia Tamụnọ sọsam.

²³“Se mịọkụ, Yei Nyanaḅọ Tamụnọ, ị́ ḅereni ị̀rị̀na-ị̀-furo ḅie apụma na pịrịsaye mị mịẹḅeinma gbaso, se ị́ mịẹḅịa ị́ nwọḅẹye mị mịẹ.

²⁴Ị́ya ẹrẹ opuma soḅịa, tomoni pịkị nwọḅẹ gbasoḅịa, Kụrọmamgba Nyanaḅọ Ḅe anị Izrẹl Tamụnọ Ḅe-ẹ! Ị́rị́ pịkị ị̀ya amada ọrụ mị ḍikiḍiki gbasoḅịa.

²⁵Ị̀ kuḅie kụrọmẹ mị tẹkẹ mị kọn ị́rị́, ị̀ Tamụnọ Ḅe pịrị, anịatịḅị ị́rị́ mịn mị mgba ḍieḅelema ị̀rị̀ ị́ya fịrịnwẹngịḅọ ḅe pịrịsam, pịkị ḍuko ị̀ pịrịsam na ị̀ furo ḅie apụma ị́ nwọse amanyanapụ mịẹḅịa.

²⁶Ị́rị́, Nyanaḅọ Ḅe, anị Tamụnọ Ḅe-ẹ, pịkị mị ḅụgbiripumaye mị ḅereni ị̀ pịrịsaye-ẹ.

²⁷Àrị ị́ ḅara ḅimẹ na ị̀ furo ḅie apụma ḅẹlẹma mịẹse ini ị́ya iḅimịẹ mị ọrị tọrọkọ munḅịa ọkụ. Ị́rị́, Nyanaḅọ Ḅe, ini ḅẹlẹmasam, ị́ya ḅẹlẹma mị pịkị inia ọgọnọ ḅụ sime gbasoḅịa.”