Read kirikeni 1 Amanyanapụ Sịkị Mịẹaye Ma 21 Bible Online

1 Amanyanapụ Sịkị Mịẹaye Ma 21 - kirikeni bible

1 Amanyanapụ Sịkị Mịẹaye Ma 21

¹Oru ḅe ḅimẹ ọ̀ ḅụfụka ọkịḅo Izrẹlapụma ọgọnọ gbana, anịẹrẹchị ò Devid ḅe mịẹse ọ̀ tọnpẹlẹmẹ na ò nweni kịẹnḅịa.

²Devid ḅe kụrọ seni Joab ḅe na pịkị ísí fịrịtịḅịnị ma na pịrị se nwọ ḅẹmẹ, “Ómine Izrẹl mị mgba mun, gbọrị ịkọlị ḅụ, Bashẹba ḅụ sakịmun ísí ịkọlị Danị mị la, bebe sẹ mị ḅie sime tomonima ọ́ nwọ kịẹn. Inia kịẹnḅịpị mị la-ọkụ à nwọ nemi ḅimẹ.”

³Joab ḅe nwọse ọ̀ pẹkẹrẹmẹ, “Nyanaḅọ Ḅe Izrẹlapụma mịẹ seni mịọkụ ini laḅara mị ḅe kiri-a sọnọasi ini nwọ la! Ị́ya opu ḅụ, Amanyanaḅọ, inimgba kọkọ ị́ya fịrịnwẹngịapụ. Cheye gose ị́ nwọ simeye mịẹ ḍọkị-ao se bebe sẹ mị seni mun ḅẹrẹḅarasi ḅie chu-ẹmun-ao?”

⁴Ọkụma amanyanaḅọ ḅe Joab ḅe mịẹse ori ọ̀ tọnye mị mịẹmẹ. Joab ḅe pakaso bebe Izrẹl sẹ mị mgba nwẹngị kelemamẹ, se anịsịkị vinpịkị Jerusalẹm ḅomẹ.

⁵Ineda ọmụgbinḅịa owuapụma ḅe kịẹnḅịpị mị ọ̀ nwọ ḍuko Amanyanaḅọ Devid ḅe pịrịmẹ: Izrẹl mị ḅie tẹrẹfa kịnị poku-a sọnọmasi fịnjị, anịsịkị Juda mị ḅie maịnfa kịnị poku-a tesi na jie ẹndẹ na.

⁶Amanyanaḅọ Devid ḅe tọnye mị Joab ḅe ọ̀ ḅụḅẹlẹka ẹrẹchị Livaị na Bẹnjamin na furoma inia kịẹnḅịpị mị ori ọkịkẹ.

⁷Ini mịẹye mị Tamụnọ Ḅe ḅụḅẹlẹka ẹrẹchị, ò fomuḅara seni Izrẹl mị pịrịmẹ.

⁸Devid ḅe nwọse Tamụnọ Ḅe ḅẹmẹ, “Àrị opuma ḅalafamasi mịẹsam anị à nwọ mịn mị mịẹye mị ḅụ! Pasisi siḅụ-ḅarasin ị̀ pịrị. À yenemika ḍumokọnsam.”

⁹Anịsịkị Nyanaḅọ Ḅe nwọse Gadị, Devid ịkịankoroḅọ ḅe ḅẹmẹ,

¹⁰“Mun ḍuko Devid ḅe pịrị na à nwọ seni ọ̀ pịrịarị tẹrẹ ayema ḅụ ò gbọrịye sẹlẹọkị, ori sẹlẹọkịye goyegoye anị à mịẹḅịaye-ẹ.”

¹¹Gadị ḅe Devid ḅe damamun se Nyanaḅọ Ḅe ḍukoye mị ḍuko ọ̀ pịrị se nwọse ò gbelamẹ, “Nde arịa ḅie mịẹ ị́ nwọ ḅiye?

¹²Tẹrẹ-a kụra ḅe ḅuruḅaa mụnọ? Anịkanịka tẹrẹ-akalụ seni ómine na taraka owunima gose mangịso mị mụnọ? Anịkanịka tẹrẹ-a ḍin ḅụ Nyanaḅọ Ḅe oria okola-agiji mị seni owu se ọ́ paka se amanwẹngị obi seni ọ́mịna ama mị fịrịma, oria enjẹlḅọ ḅe ḅụ ḅọrọ fị ọkịḅo bebe Izrẹl mị mgba pịrị mị mụnọ? Nde à seni Nyanaḅọ Ḅe pẹkẹrẹḅịaye?”

¹³Devid ḅe nwọse Gadị ḅe pẹkẹrẹmẹ, “Àrị opu ḅụḅalaḅala ḅie omi-ẹ! Ọkụma à ḅikẹ tomoni re fomuḅara seni ị̀ pịrị. Ye Nyanaḅọ Ḅe ḅarana fomuḅara mị seni ị̀ pịrị, anịatịḅị ò ḍikitịḅịfoin nyanamẹ.”

¹⁴Anịẹrẹchị Nyanaḅọ Ḅe amanwẹngị obi seni bebe Izrẹlapụma gbinmẹ, se inia ḅie nine-a poku na kịnị-a jie ẹndẹ na fịmẹ.

¹⁵Anịsịkị ori enjẹlḅọ fịrịmamẹ mun Jerusalẹm mị famaḅịa ẹrẹchị, ọkụma ori ò kuḅie ḍinmamẹ se nwọse enjẹlḅọ ḅe ḅẹmẹ, “Dachịẹ! Iḅisam!” Enjẹlḅọ ḅe Arona, Jebusḅọ ḅe ịpịamgba pịsịrị nyọ mị ḅụ ọ̀ chịẹ simemẹ.

¹⁶Devid ḅe enjẹlḅọ ḅe ọrịmẹ, so-na-kiri-na-ogboku fọrụ mị ḅie ọ̀ chịẹ waraḅẹ okola-agiji ọ̀ ḅara omi-ẹ ḅụkarakarama se Jerusalẹm mị famaḅịa ẹrẹchị. Anịsịkị Devid ḅe na tịḅịnịma na—inimgba ini kurukuru ḅiriaye ḅiri waraḅẹ—tịḅịtu, se inia tọrụ ma seni kiri iḅomẹ.

¹⁷Devid ḅe nwọ tẹkẹmẹ, “Yei Tamụnọ, ị̀rị̀ anị yemịẹirimaye-ẹ. Ị̀rị̀ anị tọn se ini nweni ma kịẹnye-ẹ. Mịna igwein apụma ini ḅọrọ che mịẹ? Nyanaḅọ ị̀ Tamụnọ, fomuḅara mị seni ị̀rị̀na-ị̀-furo-na pịrị, se ị́ya tomonima wẹrịso.”

¹⁸Anịsịkị Nyanaḅọ Ḅe enjẹlḅọ ḅe ḍuko Gadị ḅe pịrịmẹ na ọ̀ tọn Devid ḅe pịrị, ò mun agbamịẹ ẹbẹ nama Nyanaḅọ Ḅe pịrị Arona ịpịamgba pịsịrị nyọ mị ḅụ.

¹⁹Devid ḅe Nyanaḅọ Ḅe ḅịpịpoki ḅụ ọ̀ tọn nyọ mị mun mẹ, anị Gadị ḅe ḍuko ọ̀ pịrị ọkụ mị.

²⁰Anịju ịpịamgba pịsịrị nyọ mị ḅụ Arona ḅe na oria inein-a owuapụ awọma na ini ịpịamgba pịsịrị aḅẹ, se ini enjẹlḅọ ḅe ọrị sịkị owuapụ awọma mangị mun ḅọịmẹ.

²¹Arona ḅe Amanyanaḅọ Devid ḅe ḅoarị ọkụ nwọ ọrị kirikiri, ori ịpịamgba pịsịrị nyọ mị ḅụ so mun tịḅịtu ọ̀ tọrụ seni kiri iḅo ọ̀ pịrịmẹ.

²²Devid ḅe nwọse ọ̀ ḅẹmẹ, “Ị́ya ịpịamgba pịsịrị nyọ mị seni ị̀ dẹrị, mịẹse àrị ineda agbamịẹ ẹbẹ nama Nyanaḅọ Ḅe pịrịḅịa ọkụ, seni ama nwẹngị obi mị dachịẹmaḅịa ẹrẹchị. Anị la igbiki à nwọse ị́ gbẹịnḅịa.”

²³“Anị ọkị, Ị́ya opu ḅụ,” Arona ḅe ọkọse ọ̀ ḅẹmẹ, “anị se ị́ mịẹ ḅiye goyegoye mịẹ. Mà anị mịanga se agbamịẹ ẹbẹ mị ọgọnọ dọkịma se agbamịẹ ḍiepịrịye mịẹ Nyanaḅọ Ḅe pịrịḅịa owoi-nambulo ma-ẹ, mà pịkị ịpịamgba pịsịrị ḍụpọ ma-ẹ seni fịnị tọnọḅịa ayema pịkị seni agbamịẹ ḍiepịrịye mịẹḅịa ịpịamgba mị na. Arịmgba à seni ị́ pịrịmẹ.”

²⁴Ọkụma amanyanaḅọ ḅe nwọse ọ̀ pẹkẹrẹmẹ, “Ẹn-ẹn, anị la igbiki mgba à nwọse ị́ gbẹịnḅịa. Ị́rị́ nyanaye à nwọse ḍiepịrịye agbamịẹ Nyanaḅọ Ḅe pịrị ẹkẹ, anị àrị igbiki se fẹkaye.”

²⁵Se goli igbiki ma ḅụ ẹndẹ oyiasi fịnjị ọ̀ nwọse Arona ḅe gbẹịnmẹ ịpịamgba pịsịrị nyọ mị gose.

²⁶Ori anịju ḅụ agbamịẹ ẹbẹ mị nama Nyanaḅọ Ḅe pịrịmẹ se dọkịma agbama na pịkị nwẹngịgboloma-agba ma na nwọ mịẹmẹ. Ọ̀ tẹkẹmẹ se Nyanaḅọ Ḅe pịkị ọ̀ pẹkẹrẹ se soḅie fịnị koroma agbamịẹ ẹbẹ mị ọgọnọ agbama dọkịmamẹ.

²⁷Nyanaḅọ Ḅe ḍuko enjẹlḅọ ḅe pịrịmẹ na ori oria okola-agiji mị sin, enjẹlḅọ ḅe pịkị ọ̀ ḅịpịpokimẹ.

²⁸Devid ḅe mị ḅụ ḅọrọ ọrịmẹ na Nyanaḅọ Ḅe oria tẹkẹ na sam, anịẹrẹchị Arona ịpịamgba pịsịrị nyọ mị ḅụ agbamịẹ ẹbẹ mị ọgọnọ ori agbama mịẹmẹ.

²⁹Nyanaḅọ Ḅe pakaḅoḅo Ikowarị mị, anị Moziz ḅe piri ele mị ḅieḅụ namaye mị na, pịkị ini anị ọgọnọ agbama dọkịma dọkịma agbamịẹ ẹbẹ mị na àrị pa Gibiọn mị ḅie omi-ẹ ọkịḅo mị sịkị mị la;

³⁰ọkụma Devid ḅe ori ineda anịju mun Tamụnọ Ḅe tẹkẹkẹ, anịatịḅị ọ̀ Nyanaḅọ Ḅe enjẹlḅọ ḅe okola-agiji mị ḍikiḅalafamẹ.