Read kirikeni 1 Amanyanapụ Sịkị Mịẹaye Ma 22 Bible Online

1 Amanyanapụ Sịkị Mịẹaye Ma 22 - kirikeni bible

1 Amanyanapụ Sịkị Mịẹaye Ma 22

¹Anịẹrẹchị Devid ḅe nwọ ḅẹmẹ, “Mịn anị Nyanaḅọ Ḅe Oputẹkẹwarị mị simeḅịa nyọ mị-ẹ. Pịkịna mịn anị Izrẹlapụma dọkịma agba mịẹḅịa agbamịẹ ẹbẹ mị-ẹ.”

²Gbọrị ene Amanyanaḅọ Devid ḅe kụrọ pịrịmẹ na Izrẹl ama mị ḅie anga igoniapụ mamgba ḅo koḅirima se ori ini tọn fịrị ḅie chumẹ. Inia ḅie dapụ, se Oputẹkẹwarị mị namaḅịa ḍụparị okpokpo ma pu, se pịkị àrị karakaramamẹ.

³Tọn-a ikulele chiri ọ̀ nwọse ini pịrịmẹ ini seni churu na pịkị chịn-onu-ḅọkọ ma tịḅị ma ịkasị koromaḅịaye ma na mịẹḅịa ẹrẹchị, pịkị gbọrịḅọ sọnị ineda anịa iku mị tọn nemi-ẹka alapẹlẹka na.

⁴Taya na Saịdọn na amama ḅie apụma ḅie ḅaka nangwọ nangwọ awụ chịn ikiḅa ọkịḅo ọ̀ pịrịḅịa apụ ọ̀ nwọ nyana ḅomẹ.

⁵Devid ḅe nwọ koromamẹ, “Ị̀ya tọkụ Sọlọmọn ḅe namaḅịa Oputẹkẹwarị mị opuma iḅiḅịa anị pịkị tomonikiri mị ḅie ẹrẹsoḅịa. Ọkụma ò bokẹ, ma ọ̀ pịkị nemisaye ofori-ẹ, anịẹrẹchị à yekarakarama anị pịrịḅịa.” Anịẹrẹchị Devid ḅe, ọ̀ ḅakama warị nama aye nyana churuma koroma se ọ̀ fịmẹ.

⁶Ọ̀ yayo Sọlọmọn ḅe fịrịma ọkị se tọn ọ̀ pịrịmẹ na ori Oputẹkẹwarị nama Nyanaḅọ, Izrẹl Tamụnọ Ḅe pịrị.

⁷Devid ḅe nwọse ọ̀ ḅẹmẹ, “Ị̀ya tọkụ, àrị Oputẹkẹwarị nama seni osi se Nyanaḅọ ị̀ Tamụnọ Ḅe pịrị ḅimẹ.

⁸Ọkụma Nyanaḅọ Ḅe ḍuko ị̀ pịrịmẹ na à ḅakama tọn-a tomoni ḅaasam, à pịkị tọn-a ọmụ gbinsam. Anịẹrẹchị àrị ọsụnsa tọn-a pulo ma gose ò ḅereni ị̀ pịrị ẹkẹ na àrị Oputẹkẹwarị nama ọ̀ pịrị.

⁹Anịẹḅẹ sọnị, ò yeḅereni ị̀ pịrịmẹ. ‘Ọ̀ nwọ ḅẹmẹ, ị́ gbọrị owutọkụ yiḅịa anị deinma ḅụ ḅẹrẹtọnḅịaḅọ, anịatịḅị ori-na-tarakapụ mamgba ḅụ à deinma seni ọ̀ pịrịḅịa. Ọ̀ fịḅịa ẹrẹ anị Sọlọmọn, anịatịḅị ori amadaḅịa sịkị à dein na pịkị ḅọị nyọ na sọ se Izrẹl mị pịrịḅịa.

¹⁰Ori Oputẹkẹwarị nama ị̀ pịrịḅịa. Ori ị̀ya tọkụ sọḅịa, ị̀rị̀ pịkị ḍawu sọḅịa. Ọ̀ furo ḅie pakaḅoḅịa apụ anị Izrẹl mị da gbasoḅịaye-ẹ.’”

¹¹Devid ḅe ọ̀ pịkị nwọ ḅẹmẹ, “Mịọkụ, ị̀ya tọkụ, ye Nyanaḅọ ị́ Tamụnọ Ḅe, ị́rị́na-sime, se ye ò ḅereni ị̀ pịrịye mị ọ̀ nwọ mịẹ, se ị́ mịẹse ị́ ḅo Oputẹkẹwarị nama ọ̀ pịrịḅọ nwọ sọ.

¹²Pịkịna ye Nyanaḅọ ị́ Tamụnọ Ḅe yekaịnḅo na, nemi na nwọse ị́ pịrị mịẹso sịkị ị́rị́ Izrẹl mị ḍikiḍikiḅịa ọkụ, oria Oloko mị ḅi ḅaraḅụ.

¹³Ị́ nemikase Nyanaḅọ Ḅe se Moziz ḅe pịrị se Izrẹlapụma pịrị-ẹ ḅẹ oloko mamgba ḍukoye nwọ mịẹ ọkụma, ye ḅịrị ị́ pịrịḅịa. Ị́ kuḅie mịẹ kụrọma pịkị kuḅie kụrọ nyana, se ḅerenima gbọrịye sọ ị́ ḅalafama.

¹⁴Oputẹkẹwarị mị gose à ḅụkụrọma goli okpokpo nine ẹndẹ oyiasi fịnjị na seleḅa okpokpo ḅụ inein-a poku sọnọ ẹndẹ fịnjị nwọ koḅirisam se anị namaḅịa ẹrẹchị. Mà sikima, kịẹnḅịa-ọkụ-ofori alapẹlẹka na ikulele na omi-ẹ. À pịkịna chịn na ḍụparị na karakarama koroma waraḅẹ, ọkụma ị́rị́ ị́ ḅakaye ọkịḅoḅịa.

¹⁵Ị́ ḅakama fịrịnwẹngịapụ nyanamẹ. Ḍụparịma ḅie fịrịnwẹngịḅịa owuapụ omi-ẹ, pịkịna warị namapụ na akanịapụ na, pịkị ḅaka kịrịkịrị ḅara fịrịnwẹngịapụ na ineda

¹⁶goli na, seleḅa na alapẹlẹka na, ikulele na se fịrịnwẹngịapụ omi-ẹ. Mịọkụ fịrị mị sakị se ye Nyanaḅọ Ḅe ị́rị́ na sime.”

¹⁷Devid ḅe ọ̀ tọn Izrẹl tịḅịnị mamgba pịrịmẹ na ini ḅarachụa Sọlọmọn ḅe pịrị.

¹⁸Ori ọkọ ḅẹmẹ, “Nyanaḅọ ọ́mịna Tamụnọ Ḅe, ori ómine na sime pịkị dein se ọ́ pịrịsam ḅọkọḅọkọ mamgba ḅụ. Ò ḅereni ị̀ pịrịmẹ se à mị ama ḅie anga sime apụma nẹngịmamẹ, mịọkụ ini ḅo ọ́mịna chuku ḅie simesam pịkị Nyanaḅọ Ḅe chuku ḅie na.

¹⁹Mịọkụ ómine ọ́mịna kuḅie mgba na tẹmẹ na nwọse fịrịnwẹngị Nyanaḅọ ọ́mịna Tamụnọ Ḅe pịrị. Ọ́ sakị Oputẹkẹwarị mị nama, mịẹso sịkị ómine ineda Nyanaḅọ Ḅe Ọḅọkụ Igbe mị na, ísí osiḅụ sime aye mamgba na, ini se ọ̀ tẹkẹtẹkẹ ayema na, se koromaḅịa.”