Read kirikeni 1 Amanyanapụ Sịkị Mịẹaye Ma 23 Bible Online

1 Amanyanapụ Sịkị Mịẹaye Ma 23 - kirikeni bible

1 Amanyanapụ Sịkị Mịẹaye Ma 23

¹Devid ḅe ò ḅo opuma olomu sịkị, ori oria tọkụ Sọlọmọn ḅe se Izrẹl amanyanaḅọ mịẹmẹ.

²Amanyanaḅọ Devid ḅe Izrẹl tịḅịnị mamgba na agbamịẹapụ mamgba na Livaị apụma na koḅirima ḅomẹ.

³Ò Livaị apụma ḅie owuapụma ḅụ kụra soi anịkanịka soi nẹngịsa apụma, nwọ kịẹnmẹ. Inimgba la-ọkụ anị kịnị-a inein-a poku na jie ẹndẹ.

⁴Amanyanaḅọ ḅe, kịnị-a tẹrẹ-a poku ọ̀ nwọ se Oputẹkẹwarị mị fịrị mị nwẹngịḅịapụ mịẹmẹ, jie ẹndẹ anị pakarịaye gịẹịn pịkị ḅẹrẹkọn apụ sọḅịaye-ẹ.

⁵Oyi ẹndẹ anị nyọ koru fịrịnwẹngịḅịaye-ẹ, pịkịna oyi ẹndẹ anị amanyanaḅọ ḅe nyana pakụmaḅo farịaye ma se Nyanaḅọ Ḅe boma bomaḅịaye-ẹ.

⁶Devid ḅe ò Livaị apụma ḍiama tẹrẹ-a kpo ḅụ koromamẹ, inia sẹma sime ḅaraḅụ: Gashọn ḅe na, Kohat ḅe na, pịkị Mẹreraị ḅe na.

⁷Gashọn ḅe mama owuapụ awọ ọ̀ nwọ nyanamẹ: Ladan ḅe na Shimẹaị ḅe na.

⁸Ladan ḅe tẹrẹ-a owuapụ awọ ọ̀ nwọ nyanamẹ: Jihaịẹl ḅe na, Zitam ḅe na, pịkị Joẹl ḅe na,

⁹anị Ladan ḅe ḅụ koroḅo se tịḅịdapụ ma-ẹ (Shimẹaị ḅe tẹrẹ-a owuapụ awọ ọ̀ nwọ nyanamẹ: Shẹlomit ḅe na, Hazaẹl ḅe na, pịkị Heran ḅe na.)

¹⁰Shimẹaị ḅe inein-a owuapụ awọ ọ̀ nwọ nyanamẹ: Jehat ḅe na, Zina ḅe na, Jeush ḅe na, pịkị Biraịa ḅe na, ini ḍin se jụmḅọ jụmḅọ nẹngị ḅaraḅụ. Jeush ḅe na Biraịa ḅe na, ini ḅakama yika ẹrẹchị, ini ini gboloma gbọrị sẹ mịẹmẹ.

¹²Kohat ḅe inein-a owuapụ awọ ọ̀ nwọ nyanamẹ: Amram ḅe na, Iza ḅe na, Hibrọn ḅe na, pịkị Ọzaịẹl ḅe na.

¹³Oria owuapụ awọma ḅie sẹnịḅọ ḅe, Amram ḅe, anị Erọn ḅe na Moziz ḅe na yiye-ẹ. (Erọn ḅe na oria awọma na, ini ini sikimamẹ ini osiḅụ-sime-aye ma ḍikiḍiki gbasoḅịa ẹrẹchị, insẹnsị dọkịma Nyanaḅọ Ḅe tẹkẹ ḅụ na fịrịnwẹngị ọ̀ pịrị ḅụ na, pịkịna oria ẹrẹḅụ tomonima ḅẹlẹma na.

¹⁴Ọkụma Moziz, Tamụnọ tomoniḅọ ḅe oria owuapụ awọma sọ, Livaị apụma ḅie ini omi-ẹ.)

¹⁵Moziz ḅe ori mama owuapụ awọ nyanamẹ, Gashọm ḅe na Ẹleaza ḅe na.

¹⁶Gashọm awọma ḅụ tịḅịdaḅọ anị Shẹbuẹl ḅe-ẹ.

¹⁷Ẹleaza ḅe gbọrị owutọkụ kẹngẹ anị ọ̀ nyanaye-ẹ, anị Rihabaya ḅe-ẹ, ọkụma tọn apụ Rihabaya ḅe furo ḅie pakaḅomẹ.

¹⁸Kohat ḅe oria maịn karama owutọkụ, Iza ḅe, gbọrị owutọkụ, Shẹlomit sẹ mị daḅọ ḅe, anị ọ̀ nyanaye-ẹ.

¹⁹Kohat tẹrẹ karama owutọkụ, Hibrọn ḅe, inein-a owuapụ awọ ọ̀ nwọ nyanamẹ: Jeraịya ḅe na, Amaraya ḅe na, Jahazịẹl ḅe na pịkị Jẹkameam ḅe na.

²⁰Kohat inein karama owutọkụ, Ọzaịẹl ḅe, mama owuapụ awọ ọ̀ nwọ nyanamẹ, Maịka ḅe na Ịshaya ḅe na.

²¹Mẹreraị ḅe mama owuapụ awọ ọ̀ nwọ nyanamẹ, Malaị ḅe na Mushaị ḅe na. Malaị ḅe sọ mama owuapụ awọ ọ̀ nwọ nyanamẹ, Ẹleaza ḅe na Kish ḅe na.

²²Ọkụma Ẹleaza ḅe ori owutọkụ nyanaka ḅụ fịmẹ, ọkụma eremeni awọ kẹngẹ-ẹ. Oria eremeni awọma, inia ḍa numbireowu Kish owuapụ awọma na simemẹ.

²³Mẹreraị maịn karama owutọkụ, Mushaị ḅe, tẹrẹ-a owuapụ awọ ọ̀ nwọ nyanamẹ: Malaị ḅe na Ida ḅe na pịkị Jẹremọt ḅe na.

²⁴Mịnapụ ma anị Livaị furo ḅie awọ ma-ẹ, sẹ sẹ ḅie na furo furo ḅie na, ọrụḅọḅọ ẹrẹ wẹrị gịẹịn ḅaraḅụ. Ọ̀ ḅụ pakaḅo ḅọ goyegoye, si kụra anịkanịka si kụra nẹngịḅọ, Nyanaḅọ Ḅe Oputẹkẹwarị ḅie, fịrị-ḍiekiri nwọ nyanamẹ.

²⁵Devid ḅe nwọ ḅẹmẹ, “Nyanaḅọ Izrẹl Tamụnọ Ḅe ò dein se oria tomonima pịrịsam, pịkịna ori-na-mịnaḅụ-na ò Jerusalẹm ḅie anga gbasoḅịa.

²⁶Anịgose anị ḅarị mịẹkamịẹka ḅara sime Livaị apụma pịrịkẹ na ini pa Nyanaḅọ Ḅe pakaḅoḅo Ikowarị mị na tẹkẹ na gbolomaye mamgba na dekisin.”

²⁷Devid ḅe kọn kuluma ọkwẹịn ma gose, Livaị apụ mamgba ḅụ, ḅo si kụra laḅọ goyegoye, ini nụḅọ ẹrẹchụamẹ fịrịnwẹngịḅịa gose,

²⁸se ini ini tọn ma fịrịma ḅie chumẹ: ḅarachụa Erọn ḅe oria awọ agbamịẹ apụma pịrịḅịa gose Oputẹkẹwarị-a fịrịma ḅụ; tọrụkweinma tẹkẹwarịma na jukuru ma na ḍikiḍiki se ḅie sime osi nyanaye mamgba pụla ẹka ḅara;

²⁹tọrụ se ini seni Tamụnọ Ḅe pịrịḅịa fịturu ḅụ wẹrị anịa ḍiepịrịye agbamịẹḅịa fịlawa ma na fịturu sumaye sọka ịkịka ma na fọị-ḍiepịrịye ma na pịkịna oliv pulo se gwa fịlawa na Tẹkẹwarị ḍiepịrịye ma ḅe iku laḅara na tọn.

³⁰Pịkịna dede na saso na goyegoye Nyanaḅọ Ḅe boma pịkị osi se ọ̀ pịrị

³¹pịkị dọkịma agba mịẹ Nyanaḅọ Ḅe pịrịḅịa Ịnyọsara Ene ḅụ, Ịwọ Akalụ Alalị ene na jịn Alalị ene na Livaị apụma ḅie, sịkị sịkị ḅụ ma fịrịma nwẹngịḅịa apụ kịẹnḅịpị oloko ini nwọ chụamẹ, Livaị apụma ini nwọ tọn sịkịmamgba Nyanaḅọ Ḅe tẹkẹ fịrị mị pịrịmẹ.

³²Ini Nyanaḅọ Ḅe pakaḅoḅo Ikowarị mị na Oputẹkẹwarị mị na ḅe fịrị nwọ se ini pịrịmẹ, pịkịna ḅarachụa inia mịnapụ, Erọn awọma pịrị Oputẹkẹwarị fịrịma ḅụ.