Read kirikeni 1 Amanyanapụ Sịkị Mịẹaye Ma 26 Bible Online

1 Amanyanapụ Sịkị Mịẹaye Ma 26 - kirikeni bible

1 Amanyanapụ Sịkị Mịẹaye Ma 26

¹Mà anị ini tọn Livaị apụma ḅie Oputẹkẹwarị koru apụma pịrị fịrị ma-ẹ. Kora sẹ mị ḅie, Mẹshẹlimaịya Korẹ ya Esaf furo ḅieḅọ ḅe.

²Sọnọma owuapụ awọ ọ̀ nwọ nyanamẹ, mịn ini ogu ḅụ pakaḅo ọkụ-ẹ: Zẹkaraya ḅe na, Jẹdaịẹl ḅe na, Zẹbadaya ḅe na pịkị Jatniẹl ḅe na.

³Ilam ḅe na Jẹhohanan ḅe na pịkị Ilaịẹhoinaị ḅe na.

⁴Obẹd Idọm nwọ chịn gbọrịḅọ pịkị omi-ẹ ori anị Tamụnọ Ḅe ḅẹlẹma se nine owuapụ awọ nwọse pịrịḅọ-ẹ, mịn ini ogu ḅụ pakaḅo ọkụ-ẹ: Shẹmaịya ḅe na, Jẹhozabad ḅe na, Joa ḅe na, Saka ḅe na, Netanẹl ḅe na,

⁵Amịẹl ḅe na, Ịsaka ḅe na pịkị Peuletaị ḅe na.

⁶Obẹd Idọm awọma ḅie sẹnịḅọ ḅe, Shẹmaịya ḅe, sonio owuapụ awọ ọ̀ nwọ nyanamẹ: Otnaị ḅe na, Refaẹl ḅe na, Obẹd ḅe na, Ẹlzebad ḅe na, Ilaịhu ḅe na pịkị Sẹmakaya ḅe na. Ini nyana opu ịnyọ gose inia sẹ ḅie ini yelamẹ; ọḅụ kuluma mamapụ ma ini sosikima tịḅịḅie nyanamẹ.

⁸Obẹd Idọm furo mị, iḅiọkụma fịrị mị nemi kịnị-a tesi-mapụ-fịnjị nwọ pakụmaḅomẹ mị fịrị mị gose.

⁹Mẹshẹlimaịya furo mị ḅie iḅiọkụma fịrị mị nemi maịnfasi keme nwọ pakụmaḅomẹ.

¹⁰Mẹreraị sẹ mị ḅie gbọrịḅọ omi-ẹ, Hosa anị oria ẹrẹ-ẹ, inein-a owuapụ awọ ọ̀ nwọ nyanamẹ: (ḍawu Shimraị ḅe ò se tịḅịnịḅọ mịẹmẹ, ori inia ḅie opu sẹnịḅọ ḅe kẹ nwọḅẹ sọnị),

¹¹Hilkaya ḅe na, Tẹbalaya ḅe na pịkị Zẹkaraya ḅe na. Inimgba oyitẹrẹ-apụ-fịnjị anị, Hosa furo mị ḅie Oputẹkẹwarị mị koru apụ-ẹ.

¹²Oputẹkẹwarị mị koru apụma, ini ini se kpokpo ḍiemẹ inia furo furoma ḅụ, se Oputẹkẹwarị ḅie ini fịrị tọn ini pịrịmẹ, ini tọn ísí Livaị apụma pịrị ḅara mị.

¹³Furo furoma ḍụḅa laḅara ḍikika ḅara ḅụ, ini ịkịan-wakị se ini koruḅịa onu ḅọkọ mị nwọ nemimẹ.

¹⁴Shẹlẹmaya ḅe, ịrụapakapaka nyọ daọrụ ḅọkọ anị ọ̀ wakịḅoye-ẹ, oria owutọkụ Zẹkaraya ḅe, anị sịkịmamgba iḅi tetema pịrịpịrịḅọ ḅe, ọgọnọju ḅọkọ mị, mị ọ̀ wakịḅoye-ẹ.

¹⁵Obẹd Idọm ḅe, chukuju ḅọkọ mị ini tọn ọ̀ pịrịmẹ, se oria owuapụ awọma, mị ini tọnye-ẹ na ini ngọ koko-a ḅie ma koru.

¹⁶Shụpim ḅe na Hosa ḅe na mị ini tọn ịrụasọsọ nyọ da ḅọkọ mị pịrịye-ẹ, pịkị Shalịkẹt ḅọkọ mị ọgọnọju ateli mị na. Nyọ koru fịrị mị ini anị ḍie sịkị sịkị ḅụ wẹrịmẹ, jịnye jịnye ḍukoma ḅụ.

¹⁷Ịrụapakapaka nyọ daọrụ mị, sonio apụ anị nyọ koruḅịaye-ẹ ene goyegoye ḅụ, ọgọnọju inein-a apụ, chukuju inein-a apụ. Inein-a nyọ koru apụ ini nwọ se ngọ koko-a ḅie ma nyọ koromamẹ ene tịḅị goyegoye, mamapụ gbọrị ḅie gbọrị ḅie.

¹⁸Ịrụasọsọ nyọ daọrụ ḅiekiri mị kpekima nyọ ḅụ, inein-a nyọ koru apụ omi-ẹ, ateli da anga, mamapụ anị ḅiekiri mị angasịkị ḅụ simeye-ẹ.

¹⁹Mịn anị ini nyọ koru fịrị mị tọn Kora sẹ mị na Mẹreraị sẹ mị pịrị ọkụ-ẹ.

²⁰Inia juo jịn Livaị apụ anị Oputẹkẹwarị igbiki koko nyọ na, sime Tamụnọ pịrị ḍiepịrịaye ngọ koko ḅie ma fịrị tịḅịdaye-ẹ.

²¹Gashọn owuapụ awọma ḅie gbọrịḅọ, Ladan ḅe anị tọn-a kpokpo furoma ḅieju-ḍaḅọ ḅe-ẹ, oria owutọkụ Jihaịẹl furo mị sọ arịa ḅie omi-ẹ.

²²Jihaịẹl jịn mama owuapụ awọ, Zitam ḅe na Joẹl ḅe na, anị Oputẹkẹwarị igbiki koko nyọ mị na ngọ ḅie mị na tịḅịdaye-ẹ.

²³Ini pịkị fịrị tọn Amram ḅe na Iza ḅe na Hibrọn ḅe na Ọzaịẹl ḅe na oria awọma na pịrịmẹ.

²⁴Shẹbuẹl, anị Moziz tọkụ Gashọm ḅe sẹ ḅieḅọ ḅe anị tịḅịda Oputẹkẹwarị igbiki koko nyọ fịrị mị pịrịye-ẹ.

²⁵Gashọm numbireowu Ẹleaza ḅe ḅụ ọ̀ ḅọrọ Shẹlomit ḅe na mịna sọmẹ. Ẹleaza ḅe anị Rihabaya ḅe ḍa-ẹ, Rihabaya ḅe anị Jẹshaya ḅe ḍa-ẹ, Jẹshaya ḅe anị Joram ḅe ḍa-ẹ, Joram ḅe anị Zikraị ḅe ḍa-ẹ, Zikraị ḅe anị Shẹlomit ḅe ḍa-ẹ.

²⁶Shẹlomit ḅe na oria furo ḅie apụma na, Amanyanaḅọ Devid ḅe, furoma na ḅie tịḅịnịma na, sẹma ḅie kpo kpo tịḅịnịma na pịkị owuni tịḅịnịma na se osi ḅaraḅụ koroma Tamụnọ Ḅe pịrị aye mamgba tịḅịdapụ ma-ẹ.

²⁷Ini owuḅie ọfọịnḅo daye ini nwọ ọkị se osiḅụ wẹrịmẹ se Oputẹkẹwarị ḅie fịrịnwẹngịḅịaye gose.

²⁸Shẹlomit ḅe na oria furo na anị ini tọn se Oputẹkẹwarị ḅie fịrịnwẹngịḅịaye goyegoye ḅụ tịḅịdaye-ẹ, ịkịankoro Samụẹl ḅe na Amanyanaḅọ Sọl ḅe na, Na tọkụ Abna ḅe na, Zẹruaya tọkụ Joab ḅe na ọkịḅo ḍiepịrịayema sọnị arịa ḅie omi-ẹ.

²⁹Iza ḅe oria awọma ḅie, Kịnenaịya ḅe na oria owuapụ awọma na, anị ini nyọ ḍikiḍiki fịrị na pakaye ma na gịẹịn koroma pịkị Izrẹlapụma ḅie ịgbanịaye tẹlịma fịrị na se pịrịye-ẹ.

³⁰Hibrọn ḅe oria awọma ḅie, Hashabaya ḅe na oria mịnapụ, kịnị-a inein-ẹndẹ sọnọasi fịnjị, inimgba tọrụkwein apụ-ẹ, ini ini tọn Jọdan Tọrụ ḅụ ịrụasọsọ nyọ da Izrẹl amama pịrịmẹ; ini ma tịḅịda tọrụse Tamụnọ tẹkẹ-na-gboloma yema pịkị papa ḅẹrẹ mamgba na nwọ tẹlịma tẹlịma anịnyọ ḅụ.

³¹Jeraịya ḅe anị Hibrọn ḅe oria awọma ḅie tịḅịnịḅọ-ẹ. Devid ḅe amada kụra mesi karama kụra mị ḅie, Hibrọn ḅe oria awọma ḅie ḅụ ini ye chuku ḍọkị se yesọkịrị-pakụmamẹ, tọrụpaka owuni, mị furo mị ḅie apụ ḅụ ini nwọ ḍọkịpakụmamẹ, anị Giledị eke ḅụ Jiza ama ḅie angapụ.

³²Amanyanaḅọ Devid ḅe, Jeraịya ḅe oria mịnapụma ḅie tọrụpaka tịḅịnị, kịnị-a sonio ẹndẹ jieasi fịnjị nwọ sẹlẹ se Jọdan Tọrụ ḅụ ịrụapakapaka nyọ da Izrẹlapụma sẹịnmamẹ, anị Rubẹnị na Gadị na pịkị Ịrụapakapaka nyọ da Manasẹ sẹma na; anịnyọ ḅụ ini tịḅịda tẹkẹ-na-gbolomaye na pịkị papa ḅẹrẹ mamgba na tẹlịma tẹlịmaḅịa.