Read kirikeni 1 Amanyanapụ Sịkị Mịẹaye Ma 4 Bible Online

1 Amanyanapụ Sịkị Mịẹaye Ma 4 - kirikeni bible

1 Amanyanapụ Sịkị Mịẹaye Ma 4

¹Mịna apụma anị Juda furo ḅie apụma ḅie dapụ-ẹ: Pẹrẹz ḅe na, Hẹzrọn ḅe na, Kamaị ḅe na, Họ ḅe na pịkị Shobal ḅe na.

²Shobal ḅe anị Reaya ḍa-ẹ, anị Jehat ḍaḅe, Ahumaị ḅe na Lehad ḅe na ḍaḅe, Zora mị ḅie anga apụma inia olomu-aḍapụ ma-ẹ.

³Họ ḅe anị tatarị tọkụ-ẹ ḍawu Kelẹb ta Ẹfrat ma ḅụlọ ḅụ, se ò furo ḅie apụma anị Bẹtlihẹm opuama mị pakụmaye-ẹ. Họ ḅe tẹrẹ-a owuapụ awọ ọ̀ nwọ yimẹ: Itam ḅe na, Pẹnuẹl ḅe na, pịkị Iza ḅe na. Itam ḅe tẹrẹ-a owuapụ awọ ọ̀ nwọ yimẹ: Jezriẹl ḅe na, Ishma ḅe na pịkị Idbash ḅe na pịkị gbọrị eremeni tọkụ na, árịa ẹrẹ Hazelẹlponaị. Pẹnuẹl ḅe Gẹdọ opuama mị pakụmamẹ, se Iza ḅe Husha mị pakụmamẹ.

⁵Ashọ, Tẹkoa ama mị pakụmaḅọ ḅe mama eremeni ọ̀ nwọ simemẹ, Hila ma na Neara ma na.

⁶Ori na Neara ma na inein-a owuapụ awọ ini nwọ yimẹ: Ahuzam ḅe na, Hifa ḅe na, Tẹminaị ḅe na pịkị Heahashtaraị ḅe na.

⁷Ashọ ḅe na Hila ma na tẹrẹ-a owuapụ awọ ini nwọ yimẹ: Zirẹt ḅe na, Iza ḅe na pịkị Itnan ḅe na.

⁸Kọz ḅe anị Enọb ḅe na Zobiba ḅe na ḍa-ẹ, Ahahẹl, Herọm yaḅe furo ḅie apụma ori anị inia olomuḍaḅọ-ẹ.

⁹Gbọrị owuḅọ, oria ẹrẹ Jabẹz, ò furo ḅie apụma ḅie ori osi nyanatẹịnmẹ. Nyọngọrọ ma Jabẹz nwọse ọ̀ chịnmẹ anịatịḅị oria yi mị opuma ḅụ ọyịmamẹ.

¹⁰Ọkụma Jabẹz ḅe ori Izrẹl Tamụnọ ḅe tẹkẹmẹ, “Tamụnọ, ị̀ ḅẹlẹma, se ḅakama kiri seni ị̀ pịrị. Ị̀rị̀ na sime pịkị ị̀ koko se ḅụ akụ ọkịḅo ị̀ pịrịḅịaye goyegoye mamgba ị̀ ḅụ sikima. Se Tamụnọ Ḅe ọ̀ tẹkẹye mị seni ọ̀ pịrịmẹ.”

¹¹Kelẹb, Shụaha numbireowu ḅe gbọrị owutọkụ ọ̀ nwọ yimẹ, oria ẹrẹ Miha. Miha ḅe anị Ẹshtọn ḍa-ẹ,

¹²anị tẹrẹ-a owuapụ awọ yiḅọ ḅe: Bẹt Rafa ḅe na, Pasia ḅe na, pịkị Tẹhina ḅe na. Tẹhina ḅe Nahash opuama mị pakụmamẹ. Mịna apụma furo ḅie apụma, Rika mị ḅie ini angamẹ.

¹³Kinaz ḅe mama owuapụ awọ ọ̀ nwọ yimẹ, Ọthnịẹl ḅe na, Sẹraịya ḅe na. Otniẹl ḅe sọnị mama owuapụ awọ ọ̀ nwọ yimẹ, Hetat ḅe na Meọnotaị ḅe na.

¹⁴Meọnotaị ḅe anị Ọfra ḍa-ẹ. Sẹraịya ḅe anị Joab ḍa-ẹ, Ḅarafịrị nwẹngịapụ Pẹsịkiri mị pakụmaḅọ ḅe, anịju ḅụ sime apụ mamgba iḅiọkụ ḅarafịrị nwẹngị ḍin apụ-ẹ.

¹⁵Kelẹb, Jẹfunẹ yaḅe, tẹrẹ-a owuapụ awọ ọ̀ nwọ yimẹ: Aịru ḅe na, Ela ḅe na, pịkị Neam ḅe na. Ela ḅe anị Kinaz ḍa-ẹ.

¹⁶Jẹhalẹlẹl ḅe inein-a owuapụ awọ ọ̀ nwọ yimẹ: Zif ḅe na, Zifa ḅe na, Tiria ḅe na, pịkị Asarẹl ḅe na.

¹⁷Ẹzra ḅe inein-a owuapụ awọ ọ̀ nwọ yimẹ: Jẹta ḅe na, Mirẹd ḅe na, Ifẹ ḅe na pịkị Jelọn ḅe na. Mirẹd ḅe Bitia ma simemẹ, Ijipt amanyanaḅọ ḅe ḅarọ ma, se ini gbọrị eremeni tọkụ yimẹ, árịa ẹrẹ Miriam, pịkị mama owuapụ awọ na; Shamaị ḅe na Ishba ḅe na. Ishba ḅe Ẹshtẹmoa ama mị pakụmamẹ. Mirẹd ḅe pịkị Juda furo eremeniḅọ simemẹ, se tẹrẹ-a owuapụ awọ nwọ yimẹ: Jirẹd, Gẹdọ ama mị pakụmaḅọ ḅe na, Hiba, Sokọ ama mị pakụmaḅọ ḅe na; pịkị Jẹkutịẹl, Zanoa ama mị pakụmaḅọ ḅe na.

¹⁹Hodia ḅe Neham nụmbụrarọ ma simemẹ. Inia furo ḅie apụma Gam sẹ mị pakụmamẹ, anị Keila ama mị ḅie anga apụma, pịkị Meakat sẹ mị na, anị Ẹshtẹmoa mị ḅie anga apụma.

²⁰Shimọn ḅe inein-a owuapụ awọ ọ̀ nwọ yimẹ: Amnọn ḅe na, Rina ḅe na, Bẹnhenan ḅe na, pịkị Tilọn ḅe na. Ishaị ḅe mama owuapụ awọ ọ̀ nwọ yimẹ: Zohẹt ḅe na Bẹnzohẹt ḅe na.

²¹Shila ḅe Juda owuapụ awọma ḅie gbọrịḅọ-ẹ. Ò furo ḅie apụma anị Ẹr, Lika ama mị pakụmaḅọ ḅe na, Leada, Marẹsha ama mị pakụmaḅọ ḅe na anị lọkọ-ḅịtẹ ḍori apụ sẹ Bẹt-Ashbịa ama mị ḅie anga apụ ma-ẹ;

²²Jokim ḅe na Koziba ama mị ḅie anga apụma na; pịkị Joash ḅe na Seraf ḅe na, anị Moab eremeni ma sime se Bẹtlihẹm mị ḅie anga apụ ma-ẹ. (Mà ama anganga ḅarama àrị opuma olomusam.)

²³Ini anị ḅẹlẹ tẹmẹ amanyanaḅọ ḅe pịrị fịrị ḅụ sime apụ ma-ẹ, se Nẹteim na Gẹdẹra amama ḅie ini angamẹ.

²⁴Simiọnị ḅe sọnọ-a owuapụ awọ ọ̀ nwọ yimẹ: Nẹmuẹl ḅe na, Jamin ḅe na, Jerib ḅe na, Zira ḅe na, pịkị Shaul ḅe na.

²⁵Shaul ya anị Shalọm ḅe-ẹ, yayo ḅe tọkụ ḅe anị Mibsam ḅe-ẹ, se Mibsam ḅe yi tọkụ ḅe anị Mishma ḅe-ẹ.

²⁶Anịsịkị Mishma ḅe ḅụ, furo mị ideri mun Hamụẹl ḅe ḅụ ḅọrọ Zakọ ḅe na, pịkị Shimẹaị ḅe na lamẹ.

²⁷Shimẹaị ḅe owuapụ awọ ḅụ ineinfasi keme ọ̀ nwọ yimẹ, pịkị sonio eremeni awọ na. Ọkụma oria mịna apụma awọma ini ḅakakẹ, Simiọnị sẹ mị Juda sẹ mị sẹnị ọkụ anị ọkọ sẹnịkẹ.

²⁸Ọkịḅo Amanyanaḅọ Devid ḅụọ mị la, Simiọnị furo ḅie apụma mà ini anga ama ma-ẹ: Biashiba na Molada na, Heza Shụal na,

²⁹Bilha na, Ezem na, Tolad na,

³⁰Bẹtuẹl na, Họma na, Ziklag na,

³¹Bẹt Makabọt na, Heza Susim na, Bẹt Biraị na pịkị Sheareim mị ḅie ḅụ na.

³²Ini pịkị jịn sọnọ-a nyọ ḅụ angamẹ: Itam na, Aịn na, Rimọn na, Tokẹn na, pịkị Ashan mị na,

³³anị kelema ịwọ amama na, ọkịmun chukuju ịrụasọsọ nyọ daọrụ mị la, anị Bealat ama mị. Mà ini gịẹịn koroma inia ḅụ wẹrịma ḍiri ma-ẹ, inia furoma ḅie ḅụ na pịkị ini angasa nyọma ḅie na.

³⁴Mà inia sẹma ḅie tịḅịnị ma-ẹ: Mẹshobab ḅe na, Jamlẹk ḅe na, Josha, Amazaya yaḅe na, Joẹl ḅe na Jẹhu (Joshibaya ya Sẹraịya yaḅe, Asịẹl yaḅe) Ilaịẹhoinaị ḅe na, Jeakoba ḅe na, Jeshọhaịya ḅe na, Asaịya ḅe na, Adiẹl ḅe na, Jẹsimịẹl ḅe na, Bẹnaya ḅe na, Ziza (Shifị yaḅe, Alọn yaḅe, Jẹdeya furo ḅie ḅọ ḅe na, Shimraị ḅe na, pịkị Shẹmaịya ḅe na.) Anịatịḅị inia furoma sẹnị ma mun mẹ nwọḅẹ ẹrẹchị,

³⁹ini wasama ịrụasọsọ ọrụ damẹ, se ini mun Gira mị la, se pẹsịkiri mị ḅie ḅụ ịrụapakapaka nyọ daọrụ mị ḅụ osuein seni inia ananama pịrị fịfịmẹ, anị opuama mị sime nyọ mị.

⁴⁰Tọn-a nama fịḅịa iḅi osuein kiri ini nwọ ọrịmẹ, nyọ mị ịsụn pịkị ḅelemẹ, yawụ pịkị opuma deinmẹ. Ham apụma olomu sịkị ḅụ anịju ini anga simemẹ.

⁴¹Amanyanaḅọ Hẹzekaya, Judaḅọ ḅe ḅụọ ḅụ, anị ọgọnọju ḅụ ini ẹrẹ go apụma so Gira mun se anịju anga apụma inia ikowarịma na kala warịma na kan sinmẹ. Ini tomonima desin se gbọkụ anịju angamẹ anịatịḅị inia ananama fịḅịa osuein nyọ mị ḅụ opuma ḅakamẹ.

⁴²Simiọnị sẹ apụma ḅie jịn kịnị ẹndẹ sọnọasi fịnjị so Idọm ḅụ ịrụapakapaka nyọ daọrụ mun mẹ. Ishaị owuapụ awọ, Pẹlataya ḅe na Nearaịya ḅe na, Rifaya ḅe na pịkị Ọzaịẹl ḅe na tọrọkọ da ini se mun mẹ.

⁴³Anịju ḅụ ini Amalẹk apụma ḅụ kọn apụma ḅaamẹ, se anịsịkị ngịsị anịju ḅụ ini angamẹ.