Read kirikeni 2 Amanyanapụ Sịkị Mịẹaye Ma 26 Bible Online

2 Amanyanapụ Sịkị Mịẹaye Ma 26 - kirikeni bible

2 Amanyanapụ Sịkị Mịẹaye Ma 26

¹Juda apụ mamgba Amazaya tọkụ ineinfa si kụra tịḅị ḅụ ḅọrọsa Ọzaya ḅe sẹlẹmẹ se ò ḅo ḍawu ḅe tịḅị ḍinma amanyanaḅọ sọmẹ.

²(Amazaya ḅe fị ḅọrọso mị Ọzaya ḅe owu ḅie pịkị Ilat opuama mị ọkị se kpoto anị namachịẹmamẹ.)

³Ọzaya ḅe ḅo amanyanaḅọ sọ sịkị anị ineinfa si kụra ọ̀ tịḅị ḅọrọ sịkị-ẹ se kụra mesi oyi fịnjị na mama kụra mị ò se Jerusalẹm ḅie amadaye-ẹ. Nyọngọrọ ma Jekolaịya anị árịa ẹrẹ-ẹ, árị ma Jerusalẹmḅọ-ẹ.

⁴Ḍawu ḅe ḍikimaye mịẹ ḅụ, ọ̀ Nyanaḅọ Ḅe ḅụḅẹlẹye nwọ mịẹmẹ.

⁵Zẹkaraya, tẹmẹ anga ò tetema tetemaḅọ ḅe ḍuko sịkị mị ḅụ, ò kuḅie-se-ḅụgbana ḅara se fịrịnwẹngị Nyanaḅọ Ḅe pịrịmẹ, se Tamụnọ Ḅe ori ọ̀ ḅẹlẹmamẹ.

⁶Ọzaya ḅe, ò Filistia apụma na owusọmẹ. Gat na Jamnịa na Ashdọd na kelema opuamama onu ma ori àrị sumagbinmẹ, se Ashdọd na kpeki opuamama na pịkị kirikọn Filistia opuamama na ọ̀ nwọse kụrọ owuni ama namamẹ.

⁷Tamụnọ Ḅe ḅarachụa ọ̀ pịrịmẹ, se ò Filistia apụma na Gọbẹl ḅie anga Arab apụma na pịkị Meụnịm apụma na nẹngịmamẹ.

⁸Amọn apụma ini ama ocho igbiki gbẹịn Ọzaya ḅe pịrịpịrịmẹ, se ò ḅo kụrọ so ọkụma oria ẹrẹ so mun Ijipt sọ lamẹ.

⁹Ọzaya ḅe ò Jerusalẹm mị mịẹ kụrọmatẹịnmẹ, anị Ịkọlị-Onu-Ḅọkọ mị ḅụ na pịkị onu mị kanama koro nyọ Pẹsịkiri-Onu-Ḅọkọ mị ḅie, ọ̀ nama sokopi-a warịma na mịẹse anịḅo kụrọtẹịnmẹ.

¹⁰Ọ̀ pịkị mịẹkụrọma sokopi warị namamẹ ḅele-a nyọ ḅụ ama mị ḅie, ọ̀ pịkịna mengi koko nyọ sokumẹ ịrụasọsọ nyọ da chịngịma chuku na sẹrẹrẹ kirima nyọ na ḅụ. Anịatịḅị ori opuma nama nyana saramẹ. Ori ozu kọrị ḅẹlẹma ẹrẹchị ò tomonima kuḅie kụrọmamẹ ini chịngị nyọma ḅie irumịẹ chịnmgbọlụ ḍipi pịkị fịye pakụma kirima ḅie ozu ḍipimẹ.

¹¹Ori opu owuni nyanamẹ ḅụkarakarama ọmụgbinḅịa apụ. Oria ḍiri gịẹịn apụ anị Jeaịẹl ḅe na Measaya ḅe na, pịkị inia tịḅịnịḅọ Hananaya ḅe na, anị amanyanaḅọ fịrịnwẹngịapụma ḅieḅọ ḅe ini anị ọ̀ ḅụaye gịẹịn-koromaye-ẹ.

¹²Owuni ma ḅụ tịḅịdapụ ma sonio ẹndẹ oyiasi fịnjị lamẹ.

¹³Inia chuku ḅụ sime owuni, ọkịmun maịnfa poku-a mesi na nine ẹndẹ jieasi fịnjị na lamẹ anị ineda owusọ amanyanaḅọ ḅe pịrịḅịapụ-ẹ, ori na tarakapụma tọrụkuḅu.

¹⁴Ọzaya ḅe ò se owunima pịrị se ini se owusọḅịa agbọ na, angwa na, chu na, owuni-ḅụchụaye na, lubu na, ḍẹịn na, pịkị mgbele-gbinḅịa ḍụparị na.

¹⁵Oria tẹmẹnị ma Jerusalẹm ḅie tẹmẹ pakụmaye anị lubutẹịnye na mgbele-gbinye na mị sokopi warịma ọgọnọ wẹrị pakaḅoḅịaye-ẹ, pịkị opuama mị onu ma ḅụ ịkọlị ma ḅie sọ. Oria ẹrẹ so mun nyọma ḅụmgba saramẹ, ọ̀ pịkị ḅo opuma kụrọmẹ, ọ̀ Tamụnọ Ḅe ḅara nyanaḅo ḅarachụa gose.

¹⁶Ọkụma Amanyanaḅọ Ọzaya ḅe ḅo kụrọ sịkị, ọ̀ ḅụdekichịẹmamẹ, anị mị anị oria ḅịkị mị dekiḅoye-ẹ. Ọ̀ kọngọ kụrọma Nyanaḅọ oria Tamụnọ Ḅe pịrịmẹ, se ò mun Oputẹkẹwarị ḅie insẹnsị dọkịma ẹbẹ ọgọnọ insẹnsị dọkịmamẹ.

¹⁷Kụrọ pịkị kụrọkuḅie nyana agbamịẹapụ agbamịẹ Azaraịya ḅe ḅụ sọ amanyanaḅọ ḅe ḍuko mun ò

¹⁸kikimẹ. Ini nwọse ọ̀ ḅẹmẹ, “Ọzaya! Ị́ kụrọ nyanakẹ insẹnsị dọkịma Nyanaḅọ Ḅe pịrị. Erọn ḅe ḅụ koroḅo agbamịẹapụma kẹngẹ anị ini se osiḅụ wẹrịye-ẹ na ini mịn mị mịẹmịẹ-ẹ. Mị fịafịa nyọ ḅụ sikima. Ị́ Nyana Tamụnọ Ḅe ịganịmasam, ị́ ḅarị pịkị oria ḅẹlẹma nyana ẹkẹ.”

¹⁹Ọzaya ḅe ori anịnyọ Oputẹkẹwarị ḅie chịẹ waraḅẹ insẹnsị ẹbẹ mị anga sịkị, insẹnsị dọkịma ḅụrọ mị na ọ̀ ḅara na. Ori agbamịẹapụma ḍikiḅieḅumẹ, anị gbọrị kirikiri mị ḅụkan obi ọ̀ fụḅara ogbo kan pakaye-ẹ.

²⁰Azaraịya ḅe na ísí agbamịẹapụma na ḅalafaḅụ amanyanaḅọ ḅe fụḅara ogbo ḍiki se ọ̀ depakụmamẹ Oputẹkẹwarị ḅie. Ò be pakamẹ anịatịḅị Nyanaḅọ Ḅe ò fomuḅara se ọ̀ pịrịsam.

²¹Oria ḍumo ḅie kọn pẹkẹrẹ ḅụ Amanyanaḅọ Ọzaya ḅe, oria obi gose ọ̀ ḅarị fịafịakẹ. Ọ̀ ḅarị ineda Oputẹkẹwarị sọka, pịkị ḅarị ineda oria fịrị mamgba nwẹngịka ḅụ, ọ̀ warị ḅie simemẹ, se oria owutọkụ Jotam ḅe mị sẹ mị ḍikiḍikiye-ẹ.

²²Emọs tọkụ, ịkịankoro Aịzaya ḅe, mị Amanyanaḅọ Ọzaya ḅe mịẹaye mamgba nwọ gịẹịn koromaye-ẹ.

²³Ọzaya ḅe ọ̀ fịmẹ se ini ò se amanyanapụ ḍụẹịn ḍipi nyọ ḍipimẹ, ọkụma oria obi mị gose ini ò se amanyanapụ iḍupuma ḅie ḍipikẹ. Oria tọkụ Jotam ḅe oria kiri ọkịmẹ amanyanaḅọ ḅaraḅụ.