Read kirikeni 2 Amanyanapụ Sịkị Mịẹaye Ma 27 Bible Online

2 Amanyanapụ Sịkị Mịẹaye Ma 27 - kirikeni bible

2 Amanyanapụ Sịkị Mịẹaye Ma 27

¹Jotam ḅe sisọnọ-a kụra fịnjị mị ọ̀ la se ò ḅo amanyanaye-ẹ. Se Jerusalẹm ḅie ineinfa si kụra mị ò se amanyanaye-ẹ. Zadọk eremeni tọkụ, Jerusha ma mị nyọngọrọ-ẹ.

²Nyanaḅọ Ḅe ḅieḅẹlẹmaye ọ̀ nwọ mịẹmẹ, ḍawu ḅe mịẹ ọkụ; ọkụma ḍawu ḅe kịkẹka ḅaraḅụ ò simịẹkẹ insẹnsị dọkịma ḅụ Oputẹkẹwarị mị ḅie. Tomonima anịsọ, ini pa siaye mịẹmịẹaḅẹ.

³Jotam ḅe mị Oputẹkẹwarị mị ḅe Ọgọnọju Onu Ḅọkọ mị namaye-ẹ, se pịkị opuama mị onu ma ḅụ Jerusalẹm ḅie ini Ọfẹl se chịn nyọ mị namaye-ẹ.

⁴Juda tụndụma ogboku ori opuama namamẹ, ọ̀ pịkịna opu-a piri ma ḅie owuni-a warị na sokopi-a warị na namamẹ.

⁵Ori Amọn amanyanaḅọ ḅe na oria owunima na owusọ se ini nẹngịmamẹ. Anịeso ọ̀ kụrọḅara se Amọn apụma mịẹmẹ, ini seleḅa inein-a opu okpokpo na ini gbẹịn dẹkịdẹkịmasa fịturu mịẹ ịpịamgba ḅụ akpa sonio-a poku sọnọ ẹndẹ fịnjị na ini gbẹịn dẹkịdẹkịmasa irumịẹ ịpịamgba ḅụ pịkị okpokpo-a sonio-a poku sọnọ ẹndẹ fịnjị ini nwọse ama igbiki ocho ḅara kụra kụra ḅụ ọ̀ gbẹịn mun tẹrẹ-a kụra laḅịa.

⁶Jotam ḅe ori ịnyọ laḅara ọ̀ nwọse Nyanaḅọ ọ̀ Tamụnọ Ḅe ḅịpịpokiye gose, ò ḅo kụrọ ḅụ ẹrẹsomẹ.

⁷Jotam ḅe, ori amada sịkịḅụ ọ̀ mịẹ jịn aye na, ọ̀ sọsọ owu ma na pịkị ọ̀ mịẹmịẹ aye na Izrẹl na Juda na amanyanapụ Ḅụ olomu-a ḅẹrẹ ḍiri ma ḅie gịẹịn waraḅẹ.

⁸Jotam ḅe si sọnọ-a kụra fịnjị ọ̀ nwọse Jerusalẹm ḅie amadamẹ.

⁹Ọ̀ fịmẹ se ini Devid Opuama ḅie ò ḍipimẹ se oria owutọkụ Ehaz ḅe oria kiri ọkịmẹ amanyanaḅọ ḅaraḅụ.