Read kirikeni 2 Amanyanapụ Sịkị Mịẹaye Ma 29 Bible Online

2 Amanyanapụ Sịkị Mịẹaye Ma 29 - kirikeni bible

2 Amanyanapụ Sịkị Mịẹaye Ma 29

¹Hẹzekaya ḅe sisọnọ-a kụra fịnjị ọ̀ nwọ lase ò ḅo Juda amanyanaḅọ sọmẹ, se gbọrị kụra ofori kụra soi ọ̀ nwọse Jerusalẹm mị ḅie ḅẹrẹtọnmẹ. Nyọngọrọ ma anị Abaịja ma-ẹ, Zẹkaraya ḅa ma.

²Oria opuḍaḅọ, Amanyanaḅọ Devid ḅe ḅụọ ḍikiḍa ḅụ Nyanaḅọ Ḅe ḅụḅẹlẹaye ọ̀ nwọ mịẹmẹ.

³Hẹzekaya ḅe, ò ḅo amanyanaḅọ sọ tatarị kụra mị ḅie tatarị akalụ ḅie, ori Oputẹkẹwarị onu ḅọkọma finji se kpoto àrị tẹlịmamẹ.

⁴Oputẹkẹwarị ḅụ ịrụapakapaka nyọ da odo mị ḅie agbamịẹapụ gbọrị kpo na Livaị apụ na ọ̀ nwọse koromamẹ

⁵se anịju ori ọkwẹịn ini pịrịmẹ. Ọ̀ nwọ ḅẹmẹ, “Ómine Livaị apụma, ómine ọ́ ḅụ ma se osiḅụ wẹrị se ọ́ Nyanaḅọ Ḅe Oputẹkẹwarị mị mịẹfịafịama ọ́mịna opu-aḍapụma Tamụnọ Ḅe. Oputẹkẹwarị mị pụlamaḅịaye goyegoye anịa ḅie ó dekisin.

⁶Mịna opu-aḍapụma ini kuḅie-se-ḅụgbana gbẹịn apụ sọ Nyanaḅọ mịna Tamụnọ Ḅe pịrịkẹ, ini pịkị ọ̀ ḅụḅẹlẹkaye nwọ mịẹmịẹmẹ. Ini ọ̀ sarakoroma ọḅụpịkị ori anga nyọ mị gbinmẹ

⁷Ini Oputẹkẹwarị ḅọkọ ma palị se tọnjie ma binmamẹ, ini ḅarị insẹnsị dọkịmakẹ, ini pịkị ḅarị ḍiepịrịaye agba se Oputẹkẹwarị ḅie ḅo Izrẹl Tamụnọ Ḅe pịrịkẹ.

⁸Mịn mị gose Nyanaḅọ Ḅe ori ịganị nyana Juda na Izrẹl na pịrịmẹ, ò seni ini mịẹye mị anị ọrụḅọḅọ ḅụgbiripuma pịkị ḅalafamamẹ. Mịn mị ómine iḅiọkụma nemimẹ.

⁹Mịna ḍapụma ọmụ ḅie ini ini ḅaamẹ, mịna erema na awọmẹnịma na ini ini kunso mun ikoliapụ mịẹmẹ.

¹⁰“Mịọkụ à tọnsam, à Nyanaḅọ Ḅe na ọḅọkụ fịḅịa, Izrẹl Tamụnọ Ḅe, mịẹso ọkụma ọ̀ ḅarị ịganị nyana wa pịrị ẹka ḅara.

¹¹Ị̀ya awọ, ngịsị ọ́ sịkịfamama. Ómine anị Nyanaḅọ Ḅe sẹlẹọkị se insẹnsị dọkịma ọ̀ pịrịpịrị pịkị ọ̀ tẹkẹḅịa sịkị tomonima datekeremaḅịa apụ ma-ẹ.”

¹²Mịna Livaị apụma ini omi-ẹ: Kohat sẹ ḅie apụ, Mehat Amasaị yaḅe na Joẹl, Azaraịya yaḅe na Mẹreraị sẹ ḅie apụ: Kish, Abdaị yaḅe na, Azaraịya, Jẹhalẹlẹl yaḅe na Gashọn sẹ ḅie apụ: Joa Zima yaḅe na, Idẹn Joa yaḅe na Ẹlizafan sẹ ḅie apụ: Shimraị ḅe na Jiuẹl ḅe na Esaf sẹ ḅie apụ: Zẹkaraya ḅe na Matanaya ḅe na Heman sẹ ḅie apụ: Jihuẹl ḅe na Shimẹaị ḅe na Jẹdutọn sẹ ḅie apụ: Shẹmaịya ḅe na Ọzaịẹl ḅe na.

¹⁵Mịna apụma ini inia juo Livaị apụma chịn koḅirima se inimgba iniaḅụma mịẹfịafịamamẹ. Se amanyanaḅọ ḅe tọn ini pịrịsa ḅaraḅụ ini sakị Oputẹkẹwarị mị mịẹfịafịamamẹ, Nyanaḅọ Ḅe Olokoma sime ḅaraḅụ.

¹⁶Agbamịẹapụma ini Oputẹkẹwarị ḅie sọmun se anị mịẹfịafịamamẹ, se fịafịakaye goyegoye Oputẹkẹwarị ḅie ini dekipakụma odo mị ḅie koromamẹ. Anịanga ḅụ Livaị apụma àrị deki opuama mị ḅie pakaso mun Kidrọn Pẹsịkiri mị ḅie sarakoromamẹ.

¹⁷Fịrị mị tatarị akalụ mị ḅie tatarị ene ḅụ anị sakịmẹ, se ḅo nine-a ḍin karama ene mị laḅịa sịkị fịrị mị mgba ini nwẹngịsosam, ḅọrọ mun Oputẹkẹwarị ḅie sọḅịa jukuru fịrị mị sọnị, Ini jịn nine-a ḍin nwọse fịrịnwẹngị ọkịmun akalụ mị ḅie ineinfa si karama ene mị lamẹ, Oputẹkẹwarị mị karakarama tẹkẹ pịrịaḅẹ.

¹⁸Livaị apụma, ma ḅẹrẹ ma ḍuko Amanyanaḅọ Hẹzekaya ḅe pịrịmẹ: “Oputẹkẹwarị mị na anịa ḅie simeaye goyegoye mamgba wa mịẹfịafịamasam, insẹnsị dọkịma dọkịma ẹbẹ mị na, osiḅụ sime fịturu gbana dẹbụl mị na pịkị anịa fịrịnwẹngịaye mamgba na.

¹⁹Amanyanaḅọ Ehaz ḅe àrị kụra ma ḅie, Tamụnọ Ḅe ḅụ ḅereni nyanaka se dekiso aye mamgba wa pịkị àrị dekiḅosam, wa pịkị àrị mịẹfịafịamasam. Nyanaḅọ Ḅe agbamịẹ ẹbẹ mị tọrọkọ àrị omi-ẹ.”

²⁰Sịkịfamaka ḅaraḅụ Amanyanaḅọ Hẹzekaya ḅe ori opuama mị ḅie tịḅịnị mamgba chịn koḅirimẹ, se ini gbọrị ḅụọ ḅụ so Oputẹkẹwarị mị mun mẹ.

²¹Seni amanyanaḅọ furo mị mịẹ si na, Juda apụma mịẹ si na, pịkị Oputẹkẹwarị mị mịẹfịafịama gose, sọnọma owoi nambulo na, sọnọma anana na, sọnọma ayamburama anana na, pịkị sọnọma oḅori na ini nwọ ọkịmẹ seni ḍiepịrịaye agba mịẹḅịa ẹrẹchị. Amanyanaḅọ ḅe nwọ ḍuko agbamịẹapụma, Erọn furo ḅie apụma pịrịmẹ na ini namama se agbamịẹ ẹbẹ mị ọgọnọ agba mị mịẹ.

²²Agbamịẹapụma owoi-a nambuloma ini tatarị nwọ ḅaamẹ, ḅo ananama na pịkịna ayamburama ananama na, anịsịkị ini mịẹ agba goyegoye ini nama pulo mị seni agbamịẹ ẹbẹ mị ọgọnọ sanamẹ.

²³Kuluma mị ḅụ ini oḅorima seni amanyanaḅọ ḅe na ísí tẹkẹ àrị apụma na damamunmẹ se inia ḅarama ini nwọse arịa ọgọnọ gbanamẹ.

²⁴Anịsịkị agbamịẹapụma oḅorima ḅaa se arịa puloma seni agbamịẹ ẹbẹ mị ọgọnọ saramẹ, anị se tomoni mamgba mịẹasi ma dekisinḅịa agba mị-ẹ. Anịatịḅị amanyanaḅọ ḅe ọ̀ kụrọ pịrịsam na bebe Izrẹlapụma gose ini dọkịma agba na si sịkịrị sin agba na nwọ mị-ẹ.

²⁵Amanyanaḅọ ḅe, Nyanaḅọ Ḅe, ịkịankoroapụ, Gadị ḅe anị amanyanaḅọ ịkịankoroḅọ ḅe na, Netan ḅe na ḅụ ḅọrọ tọn Amanyanaḅọ Devid ḅe pịrịayema ọ̀ nwọ ḍukonwẹngịmẹ; ori Oputẹkẹwarị ḅie Livaị apụ tọn koromamẹ, ọ̀ pịkị ḅarafarị-farị alapẹlẹka ḅarafarịaye se ini pịrịmẹ,

²⁶anị Amanyanaḅọ Devid ḅe àrị enema ḅie seni nime chuchu ayema kịkẹaye. Agbamịẹapụma ini pịkị anịanga oḍuma na chịẹ waraḅẹ.

²⁷Hẹzekaya ḅe ọ̀ kụrọ pịrịmẹ na ini dọkịma agba mị mịẹ; agba mị mịẹarịsịkịḅụ tomonima ini nime chuchu Nyanaḅọ Ḅe tokoniaḅẹ, oḍu ofurofuroapụma sakị inia oḍuma ofuroaḅẹ, ísí farịayema sọnị fieaḅẹ.

²⁸Anịju simeḅọ goyegoye ḅụ seni tẹkẹ mị ḅie chumẹ, nimenima na farịayema na fie nweni-i agba mamgba dọkịfama sịkị lamẹ.

²⁹Anịsịkị Amanyanaḅọ Hẹzekaya ḅe na tomoni mamgba na kpẹrẹkị se Tamụnọ Ḅe tẹkẹmẹ.

³⁰Amanyanaḅọ ḅe na sẹ tịḅịnịma na nwọ ḍuko Livaị apụma pịrịmẹ na Devid ḅe na ịkịankoro Esaf ḅe na gịẹịn koroma Nyanaḅọ Ḅe tokoni tokoni nimema ini nwọ chu ò tokoni. Anịẹrẹchị nweni mamgba opu ḅieḅẹlẹḅụ nime chumẹ, se ini kpẹrẹkị Tamụnọ Ḅe tẹkẹmẹ.

³¹Hẹzekaya ḅe nwọse tomonima ḅẹmẹ, “Mịọkụ ọ́ ḅụ ma ọ́ mịẹfịafịamasam, mịẹḅaka agbamịẹ ḍiepịrịaye ọ́ nwọ ọkịḅo Nyanaḅọ Ḅe pịrị.” Ini ọ̀ ḅịpị pokimẹ, se iniaḅie dapụ ḅielokoloko ḅụ dọkịma agbamịẹḅịa nama ọkịḅomẹ.

³²Owoi nambulo-a tesi oyi fịnjị, anana sọnọasi pịkị ayamburama anana oyiasi ini nwọ ọkịḅomẹ se dọkịma agba mịẹ Nyanaḅọ Ḅe pịrịḅịaye;

³³ini pịkịna owoi-a nambulo ẹndẹ oyiasi fịnjị, pịkị anana sọnọ mẹndẹ oyiasi fịnjị na nwọse ḅomẹ, se agba mịẹ tomonima pịrị ini pẹịḅịa.

³⁴Ma nama mamgba ḅaaḅịa agbamịẹapụ boka ẹrẹchị, Livaị apụma ḅarachụa ini pịrị se fịrị mị fasịkị lamẹ. Anịsịkị mị ḅụ ḅaka agbamịẹapụ iniaḅụma mịẹfịafịamasam. (Livaị apụma ḅụ mịẹfịafịama mịẹmịẹye mị se yechịntẹịn agbamịẹapụma nẹngịmẹ.)

³⁵Bebema dọkịma agba mị mịẹarịsịkị, agbamịẹapụma anị ḍiepịrịaye agba mịẹye mị ḅụ ḅo ḅẹlẹkị mị fọịfọị tomonima pịrị ini pẹịḅịa, ḍiepịrịye dọkịma agba mịẹye mị na ḅo iru mị sara mị sọnị inia fịrị-ẹ. Anịẹrẹchị Oputẹkẹwarị ḅie tẹkẹtẹkẹ mị pịkị sakịmẹ.

³⁶Amanyanaḅọ Hẹzekaya ḅe na tomonima na inia ḅieḅẹlẹmẹ, anịatịḅị Tamụnọ Ḅe ọ̀ ḅarachụa ini pịrị se ini sarasarama maye mamgba mịẹmẹ.