Read kirikeni 2 Amanyanapụ Sịkị Mịẹaye Ma 3 Bible Online

2 Amanyanapụ Sịkị Mịẹaye Ma 3 - kirikeni bible

2 Amanyanapụ Sịkị Mịẹaye Ma 3

¹Mịn sịkị mị ḅụ Amanyanaḅọ Devid, Sọlọmọn ḍa ḅe, ọ̀ gbọrị nyọ karakarama koroma Oputẹkẹwarị mị pịrịsam. Jerusalẹm ḅie ḅụ Moraya Tụndụ mị ọgọnọ anị Nyanaḅọ Ḅe ọ̀ ḅụ se Devid ḅe ḍie nyọ mị-ẹ, anị Onan Jebus ḅọ ḅe seni ịpịamgba pịsịrị nyọ nwọ mịẹ nyọ mị-ẹ. Amanyanaḅọ Sọlọmọn ḅe ọ̀ warị nama fịrị mị sakị sịkị

²anị ori amanyanaḅọ sọ inein karama kụra mị ḅie maịn karama akalụ mị ḅieḅụ-ẹ.

³Amanyanaḅọ Sọlọmọn ḅe nama Oputẹkẹwarị mị anịa ịsụn ḅụọ-a iniasi oyi fịnjị-ẹ, anịa finji mị ḅụọ-a soi-ẹ.

⁴Ḅọrọ Oputẹkẹwarị sọ finji ḅie mị la-ọkụ anị Oputẹkẹwarị mị anịa finji pịkị la-ọkụ mị-ẹ, ḅụọ-a soi, anịsịkị anịa gele mị pịkị ḅụọ-a eseniasi nwọ lamẹ. Ḅieju jukuru mị warị agbagba ma tụkụma goli ọ̀ nwọse àrị oḅolomẹ.

⁵Opu ḅie mị awụ chịn ọ̀ nwọse anị dẹmẹ, se tụkụma goli ọ̀ nwọse awụ chịnma oḅolo kelemamẹ, anịa ḅie mị enemi kọrọ ma na ikoli na ọ̀ nwọ kẹịn anị ḅirimamẹ.

⁶Amanyanaḅọ ḅe ḍikitọrụgbẹịn yela ḍụparịma ọ̀ nwọse Oputẹkẹwarị mị ḅirimamẹ pịkị Paveim ama ḅie ọ̀ sẹịnḅo goli ma na.

⁷Oputẹkẹwarị agbagba ma na, ochu sara ọkọḅọ ma na, ḅọrọsọ pịkị ḅọrọ paka nyọma na kiki ḅọkọ ma na goli ọ̀ nwọse àrị oḅolo kelemamẹ. Fịrịnwẹngịapụ ma ini warị agbagba ma ḅụ ini tẹmẹ pamba nyanaye ini nwọ kara ḅirimamẹ.

⁸Ḅieju jukuru mị, ini Fịafịa Tẹịn Nyọ nwọse chịn nyọ mị, anịa ịsụn mị ḅụọ-a soi-ẹ, anịa finji mị pịkị ḅụọ-a soi nwọ lamẹ, anị Oputẹkẹwarị mị anịa finji mgba la-ọkụ mị-ẹ. Fịafịa Tẹịn Nyọ mị ḅe warị agbagba ma goli okpokpo mama poku na pẹkẹrẹ laḅịa goli ọ̀ nwọse àrị oḅolo kelemamẹ;

⁹ini goli se tẹmẹ churu mgbọlụ ḅe iku la-ọkụ anị pẹkẹrẹ kilogram-ẹ, pịkị ọgọnọju-a ḅie ma arịa warị agbagba ma sọnị goli ọ̀ nwọse àrị oḅolo kelemamẹ.

¹⁰Fịafịa Tẹịn Nyọ mị ḅụ mama pamba nyana ini goli se tẹmẹsa mamaye nwọse oḅolomẹ,

¹¹anịju ḅụ àrị anga anga ḅụ chịẹ tọrụ seni ḅọrọsọ nyọ mị damẹ. Gbọrị wu gbọrị wu mama pamba mama pamba nwọ nyanamẹ. Gbọrị wu gbọrị wu pamba ịsụn, sọnọma ḅụọ na ikiḅa nwọ lamẹ, àrị pamba ma ịsụn paka so ọkụma àrị mun ḅie mị ogboku ḅụ jịnye jịnye lamẹ, pịkị ịsụn mun warị agbagba lamẹ anga anga ḅụ, àrị ịsụn finjima mun saḅa bebe warị mị ḅe ḅụọ-a soi ma finji la-ọkụ nwọ lamẹ.

¹⁴Fịafịa Tẹịn Nyọ kikima ḅịtẹ mị, lọkọ ḅịtẹ na jịn-a ḅịtẹ na ini nwọse anị tẹmẹmẹ, anị ini bulu na awụ ḅịtẹ na pịkị pulo-pulo-pulo tọrụ nyana ḅịtẹ na nwọse pamba nyana tẹmẹ ayema ḍori anịa ḅụ chụamẹ.

¹⁵Anị gose Amanyanaḅọ ḅe mama ogbochịn ọ̀ nwọ tẹmẹmẹ, gbọrịye gbọrịye ḅe gele ḅụọ-a mesi oyi fịnjị na mama ḅụọ mama ḅụọ lamẹ, ori àrị seni Oputẹkẹwarị mị tọrọkọ koromamẹ, gbọrịye gbọrịye tịḅị ọgọnọ sime ijikilama ḅe gele sọnọma ḅụọ na ikiḅa ikiḅa nwọ lamẹ.

¹⁶Ogbochịnma tịḅịma ḅụ sụkama sụkama ikoli[1] na pịkị alapẹlẹka se tẹmẹ mgbafa sọnọasi na ini nwọ ḍori àrị ḅirimamẹ.

¹⁷Ogbochịnma ḅọrọ Oputẹkẹwarị sọ nyọ mị angama ḅụ ini àrị chịẹma koromamẹ: amaḅara da ogbochịn mị ọ̀ nwọse anị chịnmẹ Jakịn, ọ̀ pịkị nwọse ereḅara da ogbochịn mị chịnmẹ Boaz.[2]