Read kirikeni 2 Amanyanapụ Sịkị Mịẹaye Ma 31 Bible Online

2 Amanyanapụ Sịkị Mịẹaye Ma 31 - kirikeni bible

2 Amanyanapụ Sịkị Mịẹaye Ma 31

¹Alalị fị mịẹmịẹye mị ḅọrọso sịkị, Izrẹlapụ mamgba so Juda opuama ḅie mun ini tẹkẹtẹkẹ ḍụparị ogbochịnma na, ini tẹmẹ eremeni-oru Ashera mị na pẹlẹgbin se àrị ḅaakọsịmamẹ, ini pịkị oru ḅẹrẹ nemiapụ ma agba mịẹ tẹkẹtẹkẹ ẹbẹ ma kanmẹ. Ini mị gbọrị ḅara mị se Juda ḅie ísí amama na pịkị Bẹnjamin na, Ifrem na, Manasẹ na sẹma ḅie sime amama ḅie oru mamgba kan gbinso sịkị mị ini so inia warịma mun ye-ẹ.

²Amanyanaḅọ Hẹzekaya ḅe, ọ̀ pịkị agbamịẹapụ ogbo na Livaị apụ ogbo na pakụmamẹ, fịrị kịrịkịrị ini nwọ nyanamẹ. Anị dọkịma agba mịẹ fịrị na, gboloma ḍiepịrịaye agba mịẹ fịrị na, ḅụse-Oputẹkẹwarị ḅie tẹkẹ fịrị ḅụ chu na pịkị Oputẹkẹwarị ḅie nyọnyọ ḅụ, boma na mịẹḅaka na ḅe fịrị na.

³Oria nama ogboma ḅie, se dede na saso na ḅie dọkịma agba mịẹḅịa nama ọ̀ nwọ pakụma ḅoḅomẹ, pịkị Ịnyọsara Ene na Ịwọ akalụ Ene Alalị Fị namama sọnị, pịkị Nyanaḅọ Ḅe Olokoma tọn wẹrị jịn alalị sọnị.

⁴Amanyanaḅọ ḅe pịkịna ḍuko Jerusalẹm apụma pịrịmẹ na, agbamịẹapụma na, Livaị apụma na lalama ḍiepịrị agba mịẹaye ini nwọse chụaḅo mịẹso sịkị ini inia sịkị mgba fama Nyanaḅọ Ḅe Olokoma ḍuko ḅara nwọse fịrịnwẹngịḅịa ḅara.

⁵Kụrọ mị pịrị kirikiri, Izrẹlapụma, iḅitẹịn ịpịamgba na, iru na, oliv pulo na, ḅẹịn na, pịkị ozuma ḅie ḅo jịn aye na ini nwọ pịrị pakụmamẹ. Ini pịkị ini nyanaye layelaye ḅụ oyi-a kiri pu ḅe gbọrị kiri mị se chụa ḅomẹ.

⁶Juda opuamama ḅie angapụ mamgba inia nambulo na anana na ḅụ oyi-a kiri pu ḅe gbọrị kiri mị se ḅomẹ. Ini pịkị ḅakama ḍiepịrịaye se ḅomẹ, se ini àrị seni osiḅụ wẹrị Nyanaḅọ inia Tamụnọ Ḅe pịrịmẹ.

⁷Ḍiepịrịaye ma se ḅo mị kunoka mun tẹrẹ karama akalụ mị ḅie sọmẹ, àrị pa pịkị ḅoaḅẹ, se ini àrị jiji kpokponima inein akalụ lamẹ.

⁸Amanyanaḅọ Hẹzekaya ḅe na oria fịrịtịḅịnị ma na, yema ḅakalaḅara ọrị sịkị, ini Nyanaḅọ Ḅe tokoni pịkị Izrẹlapụ oria tomonima tokonimẹ.

⁹Amanyanaḅọ ḅe, mà ḍiepịrịayema na gbolomaye ḅụ ori ọkwẹịn agbamịẹapụma na Livaị apụma na pịrịmẹ,

¹⁰se Gele Agbamịẹḅọ Azaraịya, Zadọk furo ḅieḅọ ḅe nwọse ọ̀ ḅẹmẹ, “Tomonima sakị inia ḍiepịrịayema se Oputẹkẹwarị ḅie ḅo sịkị ngịsị fịaye ḅakasam, gbanaye pịkị ḅaka waraḅẹ. Wa maye mamgba nyanamẹ anịatịḅị Nyanaḅọ Ḅe ori oria tomonima ḅẹlẹmasam.”

¹¹Amanyanaḅọ ḅe pịrị kụrọḅụ, Oputẹkẹwarị nyọ mị ḅụ ini ngọ koko-a jukuru namamẹ

¹²se ini ḍiepịrịayema na pịkị oyi-a kiri pu ḅe gbọrị kiriaye ma na seni arịa ḅie chumẹ, àrị kpaịnma kokoḅịa ẹrẹchị. Ini gbọrị Livaịḅọ, oria ẹrẹ Kịnenaịya nwọse yema ḍikiḍiki fịrịkiri fịrịtịḅịnịḅọ mịẹmẹ, anịsịkị ini numbireowu Shimẹaị ḅe seni ḅarachụa ọ̀ pịrịḅọ mịẹmẹ.

¹³Inia chukuḅie fịrịnwẹngịḅịa oyi-a Livaị apụ ini nwọ tọnmẹ: Jihaịẹl, Azazaịya, Nehat, Asahẹl, Jerimọt, Jozabad, Ilaịẹl, Ismakaịya, Mehat pịkị Bẹnaya ḅe na. Amanyanaḅọ Hẹzekaya ḅe na Gele Agbamịẹḅọ Azaraịya ḅe na, pịrị kụrọḅụ mị maye mamgba mịẹye-ẹ.

¹⁴Livaịḅọ, Korẹ, Imna tọkụ ḅe, Oputẹkẹwarị odo ḅie ḅụ Ịrụapakapaka nyọ da Onu Ḅọkọ koruapụ tịḅịnịḅọ ḅe anị ini se ḅo Nyanaḅọ Ḅe pịrịpịrị ḍiepịrịayema daọkị pịkị àrị ḍieḍieye-ẹ.

¹⁵Agbamịẹapụma anga ísí opuamama ḅie jịn Livaị apụ: Idẹn, Miniamin, Jẹsụwa, Shẹmaịya, Amaraya pịkị Shẹkanaịya ḅe na, ḅereni-nyana-ḅara-se ḅarachụa ọ̀ pịrịpịrịmẹ. Ini fịayema ḍie inia juo Livaị apụma pịrịpịrịmẹ nweni inumaka ḅaraḅụ, inia fịrịma sime ḅaraḅụ,

¹⁶ọkụma sẹsẹ ḅarakẹ. Kụra soi la pịkị ḅọrọsa owuapụ Oputẹkẹwarị ḅie ene ḅene ḅene fịrịnwẹngịarịapụ mamgba inia fịrịnwẹngị ḅara anị ini fịaye ḍie ini pịrịpịrịye-ẹ.

¹⁷Agbamịẹapụma, sẹsẹ ma inia fịrịma tọn ini pịrịmẹ, anịsịkị si kụra la pịkị ḅọrọsa Livaị apụma kpokpo ḅụ inia fịrịma tọn ini pịrịmẹ.

¹⁸Inia eremeni ma na, awọmẹnịma na, pịkị ini ma ḍikiḍikiarị jịn apụ na, inia ẹrẹ ma ini se ḍiri ḅie chụa gbolomamẹ, anịatịḅị ini ḅimẹ osi nyana fịrị koro sịkị goyegoye ini tụkụma ḅara se anị nwẹngị.

¹⁹Erọn furo ḅie agbamịẹapụ, opuamama ḅie angapụ anịkanịka àrị opuama amama ḅie, nama fịfị osuein nyana apụma ḅie tọrụyenemi owuapụ omi-ẹ, fịaye ḍie agbamịẹapụ furoma ḅie owuapụ na pịkị Livaị apụ sẹma ḅie ẹrẹ ḍiri ḅie simeapụ na pịrịpịrịapụ.

²⁰Juda ḅie mgba ḅụ Amanyanaḅọ Hẹzekaya ḅe, mịẹgbẹịnye ọ̀ nwọ mịẹmẹ, ọ̀ pịkị Nyanaḅọ ọ̀ Tamụnọ Ḅe ḅụḅẹlẹye nwọ mịẹmẹ.

²¹Mịẹye ori-na-deinmẹ, anịatịḅị Oputẹkẹwarị mị ḅie na Oloko mị ḍuko ḅara ḍiki nwẹngị ḅụ na ọ̀ nwẹngị fịrị goyegoye, tẹmẹ ḅie ḅụ opu Tamụnọ Ḅe ḅụ gbana ḅara ọ̀ nwọse àrị nwẹngị kpaịnmamẹ.