Read kirikeni 2 Amanyanapụ Sịkị Mịẹaye Ma 32 Bible Online

2 Amanyanapụ Sịkị Mịẹaye Ma 32 - kirikeni bible

2 Amanyanapụ Sịkị Mịẹaye Ma 32

¹Maye mamgba ḅọrọso sịkị, anị Amanyanaḅọ Hẹzekaya ḅe kuḅie-se-ḅụgbana gbẹịn ḅara seni fịrịnwẹngị Nyanaḅọ Ḅe pịrị ḅọrọso sịkị, Sẹnakirib, Asiria sẹ mị daḅọ ḅe owu se Juda mị pakamẹ. Ori ini onu se gbori kelema opuamama ḍẹkị kelema se kụrọ se oria owunima pịrịmẹ ini onu ma kan toluḅọrọ.

²Hẹzekaya ḅe, ò ḅo nemimẹ na Sẹnakirib ḅe ori owu seni Jerusalẹm mị sọ pakaḅịa nwọḅẹ sịkị,

³ori na oria fịrịtịḅịnị ma na ḅịpị se ogbosọmẹ na opuama mị ḅie mengi ḅọrọ pakarị nyọ mị ini pụnmaḅịa mịẹso sịkị Asiriapụ ma mengi nyana ẹka ḅara ini ḅo Jerusalẹm na kpeki sịkị. Fịrịtịḅịnị ma tomoni kpo ini nwọ ọkị pakamun ideri mengi ma ama mị ḅieḅụ wẹrị pakarị nyọma pụnmamẹ, mịẹso sịkị mengi ḅarị ideri paka ẹka ḅara arịa ḅie.

⁵Amanyanaḅọ ḅe ò kpoto onu ma mịẹkụrọmamẹ, ọ̀ pịkị arịa ọgọnọ sokopi warị namamẹ, ọ̀ pịkị jịn onu nama olomu onu mị kelemamẹ. Ọ̀ pịkị Jerusalẹm ḅụ olomu nyọ mị ḅụ ịrụapakapaka nyọ daọrụ ḅụ ini seni ḅụdachịẹma-chịẹma onwun-sara-gololoma kiri mị kpoto nwọ tẹlịmamẹ. Ọ̀ ḅakama agbọ na angwa na tẹmẹmẹ.

⁶Opuama mị ḅie sime owuapụ mamgba ori ini seni owuni kụlọdapụ chuku ḅie koromamẹ, se ọ̀ tọn ini pịrịmẹ ini opuama mị ḅie onu ḅọkọ mị ḅụ ḅele nyọ mị ḅie ḅụ kpokponima sime. Ọ̀ nwọse ini ḅẹmẹ,

⁷“Ó kuḅiekụrọma-chịẹ, Asiria sẹdaḅọ ḅe ómine ò ḍikiḅalafama, pịkị ò se ḅoarị owunima sọnị. Mịna pẹkẹrẹ wa kụrọ nyanatẹịn oria pẹkẹrẹ nẹngịmẹ.

⁸Ò tomoniḅọ kụrọ nyanamẹ, ọkụma mine wa Nyanaḅọ mịna Tamụnọ Ḅe kụrọ wa nwọ nyanamẹ, ọ̀ ḅarachụa wa pịrị se wa mịna owu mị sọḅịa.” Tomonima inia amanyanaḅọ ḅe kọn ini pịrị ọkwẹịn ma inia kuḅie kụrọmamẹ.

⁹Anị kele sịkị ọkịmẹ, Sẹnakirib ḅe na oria owunima na ini pa Lekish ḅie simearị sịkịḅụ, ọ̀ mà oku ma seni Hẹzekaya ḅe na ori na Jerusalẹm ḅie sime Juda apụma na fịrịmamẹ:

¹⁰“Ị̀rị̀, Sẹnakirib, Asiria Sẹdaḅọ ḅe gbelaḅẹ cheye kuḅiekụrọ se ọ́ pịrị, se wa ḍẹkị kelemasa Jerusalẹm ḅie ọ́ pa sime waraḅẹ.

¹¹Hẹzekaya ḅe ḍuko ómine pịrịaḅẹ na Nyanaḅọ ọ́mịna Tamụnọ Ḅe ori ọ́ ḍụaḅịa mịna kụrọḅie, ọkụma Hẹzekaya ḅe ori oḅori se ómine chịn aḅẹ, ọ́ papa ḅuruḅaa ḅie na mengi pụkọtarị ḅụ na sime fịḅịa.

¹²Ori anị Nyanaḅọ Ḅe oria osi nyana nyọma na agbamịẹ ẹbẹ ma na kansin pịkị àrị dọkịmaye-ẹ, se ò ḍuko Juda apụma na Jerusalẹm apụma na pịrịmẹ na gbọrị agbamịẹ ẹbẹ ọgọnọ ḅụ kẹngẹ anị ini agba mịẹ pịkị insẹnsị dọkịma-dọkịmaḅịaye-ẹ.

¹³Ị̀ya opu-aḍapụma na-ị̀rị̀-na seni ísí sẹma ḅie apụma mịẹaye ó nemika? Asiria sẹdaḅọ ḅe ḅaraḅie nde jịn sẹ-a oru jịn sịkị oria tomonima ḍụasa?

¹⁴Nde gbọrị sịkị, àrị sẹma ḅe oru ma sẹma ḍụasa mịna ḅaraḅie? Anịsịkị cheye mịẹse ó koroma-ao na ọ́mịna oru ḅe ori ineda ọ́ ḍụaḅịa.

¹⁵Mịọkụ ó ḅerenima Hẹzekaya ḅe ori oḅori se ọ́ chịn anịkanịka ọ́ dairima anị ḅaraḅụ. Ómine ò ḅerenima! Asiria sẹdaḅọ goyegoye ḅaraḅie jịn sẹ-a oru ma ḅie jịn sịkị ineda oria sẹ mị ḍụasa oru ngịsị ofori-ẹ. Anịẹrẹchị, pikipikiye ofori-ẹ na ḅe ọ́mịna oru ḅe ori ineda ọ́ ḍụaẹkẹ!”

¹⁶Asiriapụ fịrịtịḅịnị ma, Nyanaḅọ, Tamụnọ Ḅe na, Hẹzekaya, Tamụnọ fịrịnwẹngịḅọ ḅe ḅụ na, ini sitẹịn aye ḍukomẹ.

¹⁷Sẹdaḅọ ḅe gịẹịn ḍiri pẹkẹrẹ mị, anị opuma Nyanaḅọ, Izrẹl Tamụnọ Ḅe ḍukosimamẹ. Anị nwọḅẹmẹ, “Sẹ ma ḅe-a oru ma, mà àrị ị̀ya kụrọḅie arịa sẹma ḍụakẹ ngịsị, pịkị Hẹzekaya Tamụnọ Ḅe sọnị ori ineda oria tomonima ḍụaẹkẹ ị̀ ḅaraḅie.”

¹⁸Fịrịtịḅịnị ma, Hibruapụ ọkwẹịn ḅịpị ḅụ, ini mà ọkwẹịn ma oloku pakụmamẹ mịẹso sịkị onu ma ọgọnọ sime Jerusalẹm apụma, inia kuḅie lọkọ se ḅalafaḅịa ḅara, anị ọkọpaka ọkụma, opuama mị nẹngịma mị sarasara ini pịrịḅịa.

¹⁹Tomoni ḅara-se-tẹmẹ ísí-a tomonima oru lụgụ ma ini nwọ worisima ọkụ anị ini pịkị Jerusalẹm Tamụnọ Ḅe worisima ọkụ-ẹ.

²⁰Anịḅụ Amanyanaḅọ Hẹzekaya ḅe na ịkịankoro Aịzaya, Emọs tọkụ ḅe na tẹkẹ ḅụ owu Tamụnọ Ḅe pịrị se ḅarachụa ḅimẹ.

²¹Nyanaḅọ Ḅe gbọrị enjẹlḅọ nwọse sẹịn se ori Asiria owunima na fịrịtịḅịnị ma ḅaafamamẹ. Anị mị ḅụ, sẹdaḅọ ḅe ḅụgerere ḅụ pịkịmaso Asiria mun mẹ. Gbọrị ene oria oru ma warị ḅie ò simearịogbo, oria awọma ḅie dapụ inia okola-agiji ma se ò temi ḅaamẹ.

²²Mị ḅaraḅụ Nyanaḅọ Ḅe Asiria sẹdaḅọ Sẹnakirib ḅe kụrọ ḅie Amanyanaḅọ Hẹzekaya ḅe na Jerusalẹm apụma na ḍụaḅọrọmamẹ, pịkị ini na taraka jịn apụ ḅaraḅie na. Ọ̀ mịẹmẹ tomonima inina-kpeki sẹma na deinma angamẹ.

²³Tọntọn apụ agbamịẹ ḍiepịrịaye se ḅo Jerusalẹm ḅie Nyanaḅọ Ḅe pịrịmẹ, ini pịkị ḍiepịrịaye se Hẹzekaya ḅe sọnị pịrịmẹ, anịẹrẹchị, anịsịkị ḅụ sakị sẹ mamgba opu osi se Hẹzekaya ḅe pịrịmẹ.

²⁴Hẹzekaya ḅe ḅo gbọrị ḅiri lasịkị ori obi se fị-ẹtọnmẹ. Ọ̀ tẹkẹmẹ, se Nyanaḅọ Ḅe ori elekima se ò ḍiemẹ na ọ̀ ḅụ iḅiḅịa.

²⁵Hẹzekaya ḅe opuayemịẹ ò ḅie ḅein so ọkụma ọ̀ mịẹḅaka se Nyanaḅọ Ḅe ḅẹkẹ, anịẹrẹchị Juda na Jerusalẹm na anịa tọrụsiọrị nyanamẹ.

²⁶Anịḅe kuluma, anị-sime-ọkụ-sime-ọkụ sọnị Hẹzekaya ḅe na Jerusalẹm apụma na ini iniaḅụ iderimamẹ, anịẹrẹchị Nyanaḅọ Ḅe ọ̀ ḅarị fomuḅara seni tomonima pịrịkẹ ọkịmun Hẹzekaya ḅe fị ḅọrọsịkị lamẹ.

²⁷Amanyanaḅọ Hẹzekaya ḅe ò ḅo opuma pẹrẹmẹ, tomoniḅọ goyegoye osi se ọ̀ pịrịmẹ. Oria goli na, seleḅa na, yela ḍụparị na, ye kụnụmaye na, agbọ na, pịkị yela jịn aye na koko warị ọ̀ nwọ namamẹ.

²⁸Pịkịna oria ịpịamgba na, iru na, oliv pulo na koko warị ọ̀ nwọ namamẹ, pịkị oria nambuloma fịfị osuein na jịn fịaye warị na ọ̀ nwọ namamẹ, ọ̀ pịkị ogbokiaye nama oria ananama pịrịmẹ.

²⁹Maye mamgba sikima, Tamụnọ Ḅe ọ̀ ḅakama anana na nambulo na pịkị jịn ngọ na se ọ̀ pịrịmẹ, anịẹrẹchị ọ̀ ḅaka opuama pakụmamẹ.

³⁰Amanyanaḅọ Hẹzekaya ḅe anị Gịhọn Tụḅụ Ideri mengi mị kikise, kiri ḅieju ogororo mịẹ anị pịrị se anịḅo Jerusalẹm onu ma ḅieḅụ gbọrị pẹkẹrẹ ḅụ wẹrị iderimẹ. Ori mịẹye goyegoye ori na ḅịrịmẹ.

³¹Babilọn opuapụ ḅo ama mị ḅie pakarị ḅụgbiripumaye nwọse ò gbela-ẹḅomẹ, Tamụnọ Ḅe ori Hẹzekaya ḅe wẹrịsomẹ na ọ̀ ḅụḅẹlẹḅara ọ̀ nwọ mịẹ, pa ò simeḅara ḍikiḅịa ẹrẹchị.

³²Amanyanaḅọ Hẹzekaya ḅe mịẹ jịn aye goyegoye na, ọ̀ Nyanaḅọ Ḅe ḅereni ḅara na, Ịkịankoro Aịzaya, Emọs yaḅe tẹmẹḅụ ọrịaye na pịkị Juda Amanyanapụ na Izrẹl Amanyanapụ ma na olomu ḅẹrẹ-a ḍiri ma ḅie gịẹịn koroma waraḅẹ.

³³Hẹzekaya ḅe ọ̀ fịmẹ, se amanyanapụ ḍipi iḍupuma ḅụ ọgọnọju iḍupuma ḅie ini ò ḍipimẹ. Oria fị ḅụ bebe Juda apụma na Jerusalẹm apụma na opu osi seni ọ̀ pịrịmẹ. Oria tọkụ Manasẹ ḅe amanyanaḅọ ḅaraḅụ oria kiri ọkịmẹ.