Read kirikeni 2 Amanyanapụ Sịkị Mịẹaye Ma 34 Bible Online

2 Amanyanapụ Sịkị Mịẹaye Ma 34 - kirikeni bible

2 Amanyanapụ Sịkị Mịẹaye Ma 34

¹Josaya ḅe nine-a kụra ọ̀ nwọ lase ò ḅo Juda amanyanaḅọ sọmẹ, kụra soi gbọrị kụra fịnjị ọ̀ nwọse Jerusalẹm ḅie ḅẹrẹtọnmẹ.

²Nyanaḅọ Ḅe ḅụḅẹlẹaye ọ̀ nwọ mịẹmẹ; oria ḅieju-ḍaḅọ Amanyanaḅọ Devid ḅe ḅụọ ọ̀ nwọ ḍukonwẹngịmẹ, ọ̀ Tamụnọ Ḅe olokoma ḍukoaye mịẹmẹ.

³Josaya ḅe amanyana nine karama kụra mị ḅie, pa oria kalasịkị ḅụ, ọ̀ sakị oria ḅieju-ḍaḅọ Amanyanaḅọ Devid Tamụnọ ḅe tẹkẹtẹkẹmẹ. Ḅo inein-a kụra lasịkị ọ̀ sakị oru ḅẹrẹnemi apụ tẹkẹ-a nyọma kansinmẹ, eremeni oru Ashera lụgụ mị na, pịkịna jịn oru na.

⁴Oria kụrọḅụ oria tomonima Beal ḅe nwọ tẹkẹtẹkẹ ẹbẹ ma kangbin se àrị na kpeki insẹnsị dọkịma ẹbẹ ma kankọsịmamẹ. Ini Ashera lụgụ mị na ísí-a oru ma na gbẹịn dẹkịdẹkịma fọn mịẹse fọn ma seni agbamịẹ àrị pịrịpịrịapụ ma iḍupuma ọgọnọ sara wasamamẹ.

⁵Oru alapụ ma ịmgbema ọ̀ dọkịmamẹ ini tẹkẹtẹkẹ ẹbẹ ma ọgọnọḅụ. Mị ḅara mị mịẹḅụ, ọ̀ mịẹmẹ Juda na Jerusalẹm na ḅo pịkịna tẹmẹḅụ fịafịa ama sọmẹ.

⁶Opuama ma ḅie na, kansa Manasẹ na Ifrem na pịkịna Simiọnị na pịkịna ọkịmun Naftalaị ọgọnọju nyọma la, mị gbọrị ḅara mị ọ̀ nwọ mịẹmẹ.

⁷Bebe ọgọnọju da sẹ mamgba ḅie, ori Ashera lụgụ ma na oru ma na gbẹịn dẹkịdẹkịma fọn mịẹmẹ, se insẹnsị ẹbẹ mamgba ọ̀ nwọ kọsịma galagalamamẹ. Anịsịkị re mị ọ̀ pịkịma Jerusalẹm ḅoye-ẹ.

⁸Ori amada maịnfa si karama kụra mị ḅie, oru tẹkẹ mịẹaye ma ọ̀ nwọ fama mị ḅụ, Oputẹkẹwarị mị na ama mị na ọ̀ mịẹfịafịamasam. Amanyanaḅọ Josaya ḅe tẹrẹ-apụ ọ̀ nwọ fịrịmamẹ na ini mun Nyanaḅọ Tamụnọ Ḅe Oputẹkẹwarị ḅụ si-a nyọma tẹlịma: Shefan, Azalaya tọkụ ḅe na Measaya, Jerusalẹm gọvịna ḅe na pịkịna Joa, Joahaz tọkụ ḅe na anị gele fịrịtịḅịnịḅọ ḅe-ẹ.

⁹Oputẹkẹwarị koruarị Livaị apụma, Oputẹkẹwarị ḅie ocho ḅo igbiki ma, ini ḅọrọma se Hilkaya Gele Agbamịẹḅọ ḅe pịrịmẹ. (Ifrem apụma na, Manasẹ apụma na pịkị ọgọnọ ọrụda sẹ apụma na, pịkịna Juda na Bẹnjamin apụma na Jerusalẹm apụma na ḅara mị ini igbiki ma ocho pakụmaḅoye-ẹ.)

¹⁰Mị igbiki mị ini ḅọrọma seni Oputẹkẹwarị mị tẹlịma-ẹ nwọḅẹ tẹrẹ-apụ ma pịrịmẹ, se ini anị seni

¹¹akanịapụ ma na, warị mị namaḅịa apụma na pịrịmẹ, anị Juda amanyanaḅọ ḅe gboinma sime se ḅụrụ warị mị ḅụ ini seni anị tẹlịmaḅịa ḍụparị na chịn na fẹḅịa.

¹²Fịrị mị nwẹngịapụma iḅiọkụma kuḅie-se-ḅụgbana-gbẹịn apụ-ẹ. Inein-a Livaị apụ inia tịḅịdamẹ: Jehat ḅe na, Obadaya ḅe na, Mẹreraị sẹ ḅie apụ-ẹ, anịsịkị Zẹkaraya ḅe na Mẹshụlam ḅe na, Kohat sẹ ḅie apụ-ẹ. (Livaị apụ mamgba iḅiọkụma nime chu na farị na mịẹmịẹaye nemiapụ-ẹ.)

¹³Ísí Livaị apụma inia fịrị anị seni fịrịnwẹngịḅịaye ma sẹịnsẹịn mun fịrị mị nwẹngịḅịa nyọ ḅụ koroma na, pịkị tịḅịda tọrụ seni jịn kịrịkịrị fịrịnwẹngịapụ na ḍiki-ẹ, jịn apụ pịkị ḍiri gịẹịn gịẹịn koroma pịkị nyọ ḍikiḍiki fịrịḅụ simemẹ.

¹⁴Ngọ koko warị ḅie ini igbiki ma kịẹn kịẹn pakụmarịogbo, Hilkaya ḅe Nyanaḅọ Ḅe Oloko ḍiri mị ḍọkịḅomẹ, Nyanaḅọ Ḅe seni Moziz ḅe pịrị Oloko mị.

¹⁵Ọ̀ nwọse Shefan ḅe ḅẹmẹ, “Mị Oputẹkẹwarị ḅie, Oloko ḍiri mị àrị anị ḍọkịḅosam.” Se ò ḍiri mị se Shefan ḅe pịrịmẹ,

¹⁶anịsịkị Shefan ḅe anị ọkịmun amanyanaḅọ ḅe pịrịmẹ. Ọ̀ nwọ ḍukomẹ, “Ị́ tọnye goyegoye wa mịẹsam.

¹⁷Oputẹkẹwarị ḅie ini se koroma igbiki mị wa anị ọkịsam, wa pịkịna anị seni fịrịnwẹngịapụma na inia tịḅịnịma na pịrịsam.”

¹⁸Ọ̀ pịkịna nwọḅẹmẹ, “Hilkaya ḅe seni ị̀ pịrị gbọrị ḍiri mịanga omi-ẹ.” Se ori anị gopakụma amanyanaḅọ ḅe pịrịmẹ.

¹⁹Ḍiri mị go àrị sịkị, amanyanaḅọ ḅe naa se ḅalafa ḅụ ori oria ḅụchụayema kanmẹ

²⁰se ọ̀ ma kụrọ ma tọn Hilkaya ḅe na Shefan tọkụ Ahaịkam ḅe na, Maịkaya tọkụ Abdọn ḅe na, Shefan ḅẹrẹkọn warị ḅie ḍiri gịẹịnḅọ ḅe na, pịkị amanyanaḅọ ḅie koruḅọ, Asaịya ḅe na pịrịmẹ:

²¹“Ó mun Nyanaḅọ Ḅe ḅịpị gbela ị̀rị̀ na pịkịna pa Izrẹl na Juda na ḅie sime apụma na pịrị. Mị ḍiri mị telima ayema na gbolomaye ọ́ nwọ ḍọkịpakụmaḅo. Nyanaḅọ Ḅe ori ịganị nyana wa pịrịmẹ anịatịḅị mịna ḅieju-aḍapụma Nyanaḅọ Ḅe ọkwẹịn ma ini kokokẹ, pịkịna mị ḍiri mị ḅẹ na mịẹ nwọḅẹ ayema ini mịẹkẹ.”

²²Amanyanaḅọ ḅe tọn kụrọḅụ, Hilkaya ḅe na ísíapụma na, mun Holda nwọ chịn gbọrị ịkịankoro eremeniḅọ, Jerusalẹm ḅieḅụ ịwọ pẹkẹrẹ mị ḅụ angaḅọ ma ḅara ọkwẹịn gbelamẹ. (Dewu ḅe anị Hahas ḅe tọkụ, Tikva tọkụ Shalọm ḅe-ẹ, ori anị Oputẹkẹwarị ḅie fịrịnwẹngịapụma chụachụa koro ḅụchụayema ḍikiḍikiarịḅọ ḅe-ẹ.) Ini paka ayema ḍukopakụma á pịrịmẹ,

²³se á nwọse ini ḅẹmẹ na ini vinpịkịso amanyanaḅọ ḅe damamun

²⁴se mị Nyanaḅọ Ḅe ḅaraḅo oku mị ḍuko ọ̀ pịrị: “Ini go amanyanaḅọ ḅe pịrị ḍiri mị ḅie sime worinime ma, à nwọse fomuḅara seni Jerusalẹm na anịa tomoni mamgba na pịrị-ẹmun-aḅẹ.

²⁵Ini ị̀ sịkịsam, se agbamịẹ jịn-a oru ma pịrịsam. Ị̀ya ịganị Jerusalẹm ḅụ owoitẹịnsam, anị pịkịna fịkoro ẹkẹ.

²⁶Amanyanaḅọ ḅe ḅụ ọkụma, mị anị Ị̀rị̀, Nyanaḅọ Izrẹl Tamụnọ Ḅe, ḍukoye-ẹ: Ḍiri mị ḅie gịẹịnye mị ị́ nwọ pokimẹ,

²⁷se ị́ si ḅụ pịkị se ị́ ḅụ iderimamẹ ị̀ tọrọkọ ị́ya ḅụchụayema kan se owuaḅẹ, anị à fomuḅara seni Jerusalẹm na anịa tomonima na pịrịḅịa ẹrẹma mị ị́ nwọ naaye mị ḅụ. Ị́ya tẹkẹ mị à naasam,

²⁸à seni Jerusalẹm na anịa tomonima na pịrị-ẹḅoarị fomuḅara mị ḅarị ḅoẹkẹ ị́rị́ fịḅọrọka simeogbo. À mịẹse ị́ deinma fịḅịa.” Tomonima ini mị oku mị se so amanyana Josaya ḅe damamunmẹ.

²⁹Amanyanaḅọ Josaya ḅe, Juda na Jerusalẹm na ḅie sime tịḅịnị mamgba nwọ chịn koḅirimamẹ,

³⁰se ini gboloma Oputẹkẹwarị ḅie mun agbamịẹapụma na Livaị apụma na pịkị kirikọn tomoni mamgba na, alapụ na igwein apụ na iniaḅụ sọ mun mẹ. Inimgba tọrọkọ ḅụ, mị amanyanaḅọ ḅe oloku pụkọ seni Oputẹkẹwarị ḅie ini ḍọkịpakụmaḅosa ọḅọkụ ḍiri mị gopakụmaye-ẹ.

³¹Amanyanapụ ogbochịn mị angasịkị ḅụ ọ̀ chịẹmẹ, se Nyanaḅọ Ḅe na ọḅọkụ fịmẹ, na ori ọ̀ ḅịpị pokiḅịa, ò kuḅie na ọ̀ tẹmẹ mgba na ọ̀ nwọse olokoma na ọ̀ tọn aye mamgba na kokoḅịa, ọ̀ pịkịna ọḅọkụ mị ḍukoaye ma seni mịẹmịẹye ḅụ chuḅịa ḍiri mị ḅie gịẹịn ọkụ mị.

³²Ọ̀ Bẹnjamin apụ na pịkị Jerusalẹm ḅie simeḅọ goyegoye na mịẹmẹ na ini ḅereni ọkị ọḅọkụ mị ini anị kokoḅịa. Anị mị ḅụ, Jerusalẹm apụma ini inia ḅieju-aḍapụma Tamụnọ Ḅe na fị ọḅọkụ mị ḍukoaye ma kokomẹ.

³³Amanyanaḅọ Josaya ḅe Izrẹlapụ eke ma ḅie sime ḅụngụngụma oru mamgba ọ̀ kankọsịmamẹ, pịkịna ò sime la ḍin ma ḅie ọ̀ mịẹmẹ ini Nyanaḅọ inia ḅieju-aḍapụma Tamụnọ Ḅe tẹkẹtẹkẹmẹ.